ທ່ານອາຊາງ ລາວລີ ຮອງນາຍົກລັດຖະມົນຕີ ໃນຖານະ
ປະທານອົງການກວດກາແຫ່ງລັດໄດ້ເນັ້ນຢໍ້າຕໍ່ກອງປະ
ຊຸມປະຈຳປີ 2011 ຂອງອົງການກວດກາແຫ່ງລັດ ທີ່ໄດ້
ຈັດຂຶ້ນຢ່າງເປັນທາງການເມື່ອບໍ່ດົນມານີ້ຢູ່ນະຄອນຫລວງ
ວຽງຈັນວ່າ ການດຳເນີນການກວດກາການປະຕິບັດງານ
ແລະການໃຊ້ຈ່າຍງົບປະມານໃນໜ່ວຍງານຂອງລັດຖະບານ
ລາວໃນຕະຫລອດປິ 2010 ທີ່ຜ່ານມານີ້ ປາກົດວ່າຍັງບໍ່ມີ
ການປະຕິບັດທີ່ເປັນໄປຕາມກົດລະບຽບ ແລະມີການປະຕິບັດງານເພື່ອຜົນປະໂຫຍດສ່ວນ
ຕົວ ເກີດຂຶ້ນຢ່າງກວ້າງຂວາງ.
ໂດຍກໍລະນີທີ່ກວດພົບຫລາຍ
ທີ່ສຸດ ກໍ່ຄືການລັກລອບຕັດໄມ້
ເກີນໂຄຕ້າ ຊຶ່ງໃນຕະຫລອດປີ
ທີ່ຜ່ານມາ ກໍປາກົດວ່າສາມາດ
ກວດຢຶດໄມ້ ທີ່ລັກລອບຕັດຢ່າງ
ຜິດກົດໝາຍ ໄດ້ເຖິງ 65,000
ກວ່າທ່ອນ ຕິດຕາມດ້ວຍການ
ນໍາເຂົ້າຍວດຍານພາຫະນະໂດຍ
ການແຈ້ງວັດຖຸປະສົງທີ່ບໍ່ຈິງ
ເຊັ່ນແຈ້ງວ່ານໍາຍວດຍານພາຫາ
ນະເຂົ້າມາໃຊ້ໃນໂຄງການພັດ
ທະນາຕ່າງໆ ເພື່ອໃຫ້ເປັນການຫຼີກລ່ຽງການເສຍພາສີ ຢ່າງຖືກຕ້ອງ.
ນອກຈາກນັ້ນ ກໍມີການໃຫ້ສໍາປະທານສິດໃນການເຊົ່າທີ່ດິນເກີນກວ່າພື້ນທີ່ ທີ່ໄດ້ຮັບອະນຸ
ຍາດຈາກລັດຖະບານທີ່ສ່ວນກາງ, ການບໍ່ສົ່ງລາຍຮັບຈາກການຂາຍໄມ້ເຂົ້າຄັງຂອງລັດ
ແລະການຫຼີກລ່ຽງການຈ່າຍອາກອນແລະຄ່າທໍານຽມຕ່າງໆ ຂອງບັນດາບໍລິສັດເອກກະຊົນ
ໂດຍມີເຈົ້າໜ້າທີ່ຂອງລັດຖະບານໃຫ້ການຮ່ວມມືດ້ວຍເປັນຕົ້ນ ຊຶ່ງທັງໝົດນີ້ກໍເຮັດໃຫ້ລັດ
ຖະບານລາວຕ້ອງຂາດລາຍໄດ້ ຫຼາຍຮ້ອຍຕື້ກີບ ໃນແຕ່ລະປີ.
ແຕ່ຢ່າງໃດກໍຕາມ ສະມາຊິກສະພາແຫ່ງຊາດລາວທ່ານນຶ່ງກໍໄດ້ໃຫ້ຄວາມຄິດເຫັນວ່າ ການ
ທີ່ຈະເຮັດໃຫ້ການປະຕິບັດໜ້າທີ່ຂອງອົງການກວດກາແຫ່ງຊາດມີປະສິດຕິພາບຫຼາຍຂຶ້ນນັ້ນ
ກໍຈຳເປັນທີ່ຈະຕ້ອງມີການກວດສອບການປະຕິບັດງານຂອງເຈົ້າໜ້າທີ່ຂອງອົງການກວດກາ
ອີກດ້ວຍ ດັ່ງທີ່ທ່ານກ່າວວ່າ:
“ຜູ້ກວດສອບນີ້ ກໍ່ຕ້ອງກວດກາຄືນຄີກັນ ຄວາມໂປ່ງໃສນີ້ກະຢາກໃຫ້ເບິ່ງຄືກັນ
ເດີ້ ນີ້ຜູ້ໄປກວດສອບບໍ່ແມ່ນໄປກວດສອບລ້າໆເດ້ ບໍ່ແມ່ນເດ້ ພ້ອມກັນນີ້ແລ້ວ
ການໃຊ້ຈ່າຍເດ້ໄປກວດສອບແຕ່ລະບ່ອນໆ ໝົດນ້ອຍຫຼາຍປານໃດມັນຈຶ່ງຈະຮູ້
ວ່າຄວາມຮັບຜິດຊອບຂອງເຮົາໃນການປະຕິບັດໜ້າທີ່ນີ້ເດ້ ບາງບ່ອນມັນກະແກ່
ຍາວ 2-3 ເດືອນ 6 ເດືອນກໍຍັງບໍ່ແລ້ວ ອັນນີ້ຕ້ອງໄດ້ກວດຄືກັນ ກໍຕ້ອງແຈ້ງ
ຕໍ່ສະພາແຫ່ງຊາດເຊັ່ນດຽວກັນ.”
ກ່ອນໜ້ານີ້ ທ່ານຈູມມະລີ ໄຊຍະສອນ ປະທານປະເທດ
ແລະລັດຖະບານລາວທັງຈາກຂັ້ນສູນກາງແລະຂັ້ນແຂວງ
ຈາກທົ່ວປະເທດວ່າມີພະນັກງານຂອງພັກແລະລັດຖະບານ
ຈໍານວນບໍ່ໜ້ອຍທີ່ຍັງປະຕິບັດໜ້າທີ່ໃນຄວາມຮັບຜິດຊອບ
ຫຼືວຽກງານທີ່ໄດ້ຮັບມອບໝາຍ ຢ່າງມີປະສິດທິຜົນຕໍ່າ.
ເຖິງແມ່ນວ່າບັນດາພະນັກງານເຫລົ່ານີ້ຈະມີຄວາມເຂົ້າໃຈ
ຕໍ່ທິດທາງແລະແນວທາງນະໂຍບາຍທີ່ພັກແລະລັດຖະບານໄດ້ວາງອອກເປັນຢ່າງດີກໍ່ຕາມ ຫາກແຕ່ກໍປາກົດວ່າໄດ້ມີການຂາດການຜັນຂະຫຍາຍໄປສູ່ການປະຕິບັດວຽກງານຕ່າງໆຢ່າງເປັນຮູບປະທໍາ. ສ່ວນໃນຫຼາຍໆກໍລະນີ ທີ່ໄດ້ມີການນໍາໄປສູ່ການປະຕິບັດທີ່ເປັນຮູບປະທຳແລ້ວນັ້ນ ກໍກັບ
ປາກົດວ່າ ຂາດການເສີມຂະຫຍາຍໄປສູ່ການປະຕິບັດໃນສັງຄົມທີ່ກວ້າງຂວາງຂຶ້ນ ເນື່ອງ
ຈາກວ່າພະນັກງານຂອງພັກ ແລະລັດຖະບານຈຳນວນບໍ່ໜ້ອຍ ຕ່າງກໍ່ບໍ່ໄດ້ເອົາໃຈໃສ່ຕໍ່
ການນຳພາເພື່ອດຶງເອົາການມີສ່ວນຮ່ວມຈາກປະຊາຊົນລາວບັນດາເຜົ່າ.
ແຕ່ຢ່າງໃດກໍ່ຕາມ ທ່ານຈູມມະລີ ກໍໄດ້ສະແດງຄວາມເຊື່ອໝັ້ນວ່າພາຍໃຕ້ການນຳພາອັນ
ສະຫຼາດສ່ອງໃສຂອງພັກດຽວໃນຕະຫຼອດໄລຍະ 35 ປີມານີ້ ກໍໄດ້ເຮັດໃຫ້ການພັດທະນາ
ຂອງລາວມີອັນປະສົບຜົນສຳເລັດໃນຫຼາຍໆດ້ານ ໂດຍທີ່ສຳຄັນກໍ່ຄືການພັດທະນາທາງ
ເສດຖະກິດ-ສັງຄົມໃນຕະຫຼອດໄລຍະທີ່ຜ່ານມາ ກໍ່ໄດ້ເຮັດໃຫ້ຊີວິດຄວາມເປັນຢູ່ຂອງປະຊາ
ຊົນບັນດາເຜົ່າໄດ້ຮັບການຍົກລະດັບໃຫ້ດີຂຶ້ນຢ່າງຕໍ່ເນື່ອງ.
