ທ່ານສີຕາເຮັ່ງ ລາດຊະພົນ ລັດຖະມົນຕີກະຊວງກະສິກໍາ
-ປ່າໄມ້ລາວ ຖະແຫລງຢືນຢັນວ່າ ຈົນເຖິງປັດຈຸບັນນີ້ທາງ
ການລາວໄດ້ອະນຸມັດສຳປະທານສິດໃນການເຊ່ົ່າທີ່ດິນ
ໄລຍະຍາວໃຫ້ແກ່ເອກະຊົນລາວ ແລະຕ່າງຊາດໄປແລ້ວ
1,200 ກວ່າລາຍ ໂດຍໃນນີ້ກໍເປັນການໃຫ້ສຳປະທານ
ທີ່ມີເນື້ອທີ່ກວ້າງຕັ້ງແຕ່ 8,000 ເຮັກຕາ ໄປຈົນເຖິງ 5 ໝື່ນເຮັກຕາ ແກ່ບັນດາບໍລິສັດເອ
ກະຊົນຕ່າງຊາດຈຳນວນເຖິງ 398 ລາຍ ແລະກໍຄິດເປັນພື້ນທີ່ລວມກັນເກີນວ່າ 4.3
ແສນເຮັກຕາໃນທົ່ວປະເທດ.
ໂດຍທີ່ຖືວ່າເປັນການໃຫ້ສຳປະທານທີ່ມີເນື້ອທີ່ລວມຫລາຍທີ່ສຸດນັ້ນ ກໍແມ່ນການໃຫ້ສຳ
ປະທານທີ່ດິນເພື່ອການປູກຢາງພາລາ ແລະພືດເສດຖະກິດຕ່າງໆ ຊຶ່ງກໍເຮັດໃຫ້ຜົນຜະລິດ
ໃນດ້ານກະສິກຳ-ປ່າໄມ້ລາວນັ້ນ ກໍຍັງຄົງເປັນສິນຄ້າສົ່ງອອກອັນດັບນຶ່ງຂອງລາວ ຈົນເຖິງ
ທຸກມື້ນີ້ ດັ່ງທີ່ທ່ານສີຕາເຮັ່ງໄດ້ຊີ້ແຈງວ່າ:
“ໂຄງການສ່ວນໃຫຍ່ຍັງແມ່ນເພື່ອປູກ
ຢາງພາລາຊຶ່ງມີ 143 ໂຄງການ ແລະ
ກວາມເອົາເກືອບ 2 ແສນເຮັກຕາ ໂຄງ
ການຢາງພາລາຂອງຕ່າງປະເທດມີ 83
ໂຄງການມີມູນຄ່າເຖິງ 557 ລ້ານໂດລາ
ຊຶ່ງກວາມເນື້ອທີ່ປະມານ 150 ພັນເຮັກ
ຕາ. ສຳຫລັບໂຄງການປູກໄມ້ອື່ນໆອີກ
ມີ 30ໂຄງການທີ່ມີມູນຄ່າ 725 ລ້ານ
ໂດລາ. ແຕ່ແນວໃດກໍຕາມ ມາຮອດ
ປັດຈຸບັນສິນຄ້າກະສິກຳກໍກວາມ 65%
ຂອງໂຄງປະກອບສິນຄ້າພາຍໃນ ສຳ
ລັບສິນຄ້າສົ່ງອອກຕົ້ນຕໍກໍແມ່ນໄມ້
ເຄື່ອງປ່າຂອງດົງ, ກາເຟ, ສາລີ, ພືດ
ຜັກ, ງົວ ແລະຄວາຍ”
ແຕ່ຢ່າງໃດກໍຕາມ ທ່ານ ຄໍາອ້ວນ ບຸບຜາ, ລັດຖະມົນຕີປະຈຳສຳນັກງານນາຍົກລັດຖະມົນ
ຕີລາວ ຜູ້ຮັບຜິດຊອບວຽກງານໃນດ້ານການບໍລິຫານ ແລະຄຸ້ມຄອງທີ່ດິນແຫ່ງຊາດຂອງ
ລັດຖະບານ ກໍໄດ້ຖະແຫລງຢືນຢັນກ່ອນໜ້ານີ້ວ່າ ຄະນະລັດຖະບານລາວ ໄດ້ມີມະຕິຄໍາສັ່ງ
ໄປເຖິງໜ່ວຍງານທີ່ກ່ຽວຂ້ອງໃນທົ່ວປະເທດ ເພື່ອໃຫ້ດໍາເນີນການກວດກາທີ່ດິນທີ່ໄດ້ໃຫ້
ສໍາປະທານກັບບັນດາເອກກະຊົນລາວ ແລະຕ່າງຊາດໃນທົ່ວປະເທດແລ້ວເມື່ອບໍ່ນານມານີ້.
ສາເຫດທີ່ເຮັດໃຫ້ຄະນະລັດຖະບານລາວຕ້ອງມີມະຕິຄໍາສັ່ງ ໃຫ້ດໍາເນີນການກວດກາດັ່ງກ່າວ
ນີ້ ກໍຍ້ອນວ່າການຄຸ້ມຄອງໃນການໃຫ້ສຳປະທານທີ່ດິນແກ່ບໍລິສັດເອກະຊົນທີ່ຜ່ານມານັ້ນ
ໄດ້ມີການພິຈາລະນາ ແລະຕັດສິນໃຈອະນຸມັດຢ່າງບໍ່ໄດ້ມາດຕະຖານ ແລະບໍ່ເປັນໄປຕາມກົດ
ລະບຽບ ຫຼືກົດໝາຍທີ່ທາງການລາວໄດ້ວາງອອກ ຈຶ່ງເຮັດໃຫ້ເກີດບັນຫາຂັດແຍ້ງຕ່າງໆຂຶ້ນ
ຕິດຕາມມາຢ່າງກ້ວາງຂວາງໃນທົ່ວປະເທດ.
ຍິ່ງໄປກວ່ານັ້ນ ກໍຍັງປາກົດວ່າການໃຫ້ສຳປະທານທີ່ດິນໃນຫລາຍໆກໍລະນີກໍໄດ້ໄປກວາມ
ເອົາທີ່ດິນທຳກິນຂອງປະຊາຊົນ ແລະໃນຫລາຍໆກໍລະນີກໍໄດ້ບຸກລຸກເຂົ້າໄປໃນເຂດປ່າສະ
ຫງວນແຫ່ງຊາດກໍມີ ຈຶ່ງໄດ້ສົ່ງຜົນກະທົບຕໍ່ສະພາບແວດລ້ອມທຳມະຊາດ ຢ່າງຫລີກລ້ຽງ
ບໍ່ໄດ້ ເນື່ອງຈາກວ່າໄດ້ມີການຕັດໄມ້ທຳລາຍປ່າ ຢູ່ໃນເຂດສຳປະທານທີ່ກວາມໄປເຖິງເຂດ
ປ່າສະຫງວນຢ່າງກວ້າງຂວາງອີກດ້ວຍ ນັ້ນເອງ.
ນອກຈາກນີ້ ດ້ວຍເຫດທີ່ ການອະນຸມັດສໍາປະທານທີ່ດິນ
ໃຫ້ແກ່ບັນດາບໍລິສັດຕ່າງຊາດທີ່ບໍ່ໄດ້ມີການສໍາຫລວດພື້ນ
ທີ່ຕົວຈິງເລີຍນັ້ນ ກໍ່ຍັງເຮັດໃຫ້ລັດຖະບານລາວຕ້ອງສູນ
ເສຍລາຍຮັບຢ່າງຫຼວງຫຼາຍອີກດ້ວຍ ເນື່ອງຈາກວ່າເຈົ້າໜ້າ
ທີ່ຜູ້ຮັບຜິດຊອບໄດ້ມີການກໍາໜົດອັດຕາຄ່າເຊົ່າທີ່ຕໍ່າເກີນ
ໄປ ຫຼື່ບໍ່ເປັນໄປຕາມກົດລະບຽບທີ່ວາງອອກ ຈຶ່ງເຮັດໃຫ້
ລັດຖະບານລາວໄດ້ຮັບຄ່າເຊົ່າທີ່ດິນເຮັກຕາລະ$1-$3 ຕໍ່ ປີເທົ່ານັ້ນ.
ຊຶ່ງດ້ວຍສະພາບການດັ່ງກ່າວ ກໍ່ຍັງເຮັດໃຫ້ສໍານັກງານ
ນາຍົກລັດຖະມົນຕີລາວອອກມະຕິຄໍາສັ່ງ ໄປເຖິງໜ່ວຍ
ງານທີ່ກ່ຽວຂ້ອງໃນທົ່ວປະເທດເພື່ອໃຫ້ດໍາເນີນມາດຕະການສໍາຫຼວດພື້ນທີ່ ແລະຈັດທໍາບົດ
ວິພາກເສດຖະກິດຢ່າງຄົບຖ້ວນເສຍກ່ອນ ຈຶ່ງຈະຖືວ່າເປັນການອະນຸມັດສໍາປະທານທີ່ດິນ
ຢ່າງຖືກຕ້ອງ.
