ລິ້ງ ສຳຫລັບເຂົ້າຫາ

logo-print

ວີໂອເອ ລາວ ສຳພາດທ່ານ ສີຈັນ ຄຳພາວົງ ໃນລາຍການ ຊົມຊຸມຊາວ ລາວ ໃນອາເມຣິກາ


ທ່ານ ສີຈັນ ຄຳພາວົງ ຖ່າຍຮູບຢູ່ງານແຫ່ງນຶ່ງ.

ໃນລາຍການຊຸມຊົນຊາວໃນທະວີບ ອາເມຣິກາ ສຳລັບແລງວັນອາທິດມື້ນີ້ເຮົາຈະພາທ່ານໄປພົບກັບທ່ານ ສີຈັນ ຄໍາພາວົງ, ອົບພະຍົບທີ່ໄດ້ຍ້າຍມາຕັ້ງຖິ່ນຖານຢູ່ໃນ ສະຫະລັດ ແລະໄດ້ເປັນນຶ່ງ ໃນນັກທຸລະກິດລາວ ທີ່ໃຫຍ່ໃນລັດ ໄອໂອວາ, ພວກເຮົາໄດ້ລົມກັບທ່ານ ກ່ຽວກັບຊີວິດການເປັນຢູ່ໃນຊຸມຊົນ ທີ່ເພິ່ນອາໄສຢູ່, ເຊິ່ງ ພຸດທະສອນ ຈະນຳເອົາການສຳພາດມາສະເໜີທ່ານ ໃນອັນດັບຕໍ່ໄປ.

ທ່ານ ສີຈັນ ຄຳພາວົງ ໄດ້ອົບພະຍົບອອກຈາກ ລາວ ເປັນຊາຍໂສດໄປຢູ່ສູນອົບພະຍົບ ນາໂພ ໃນປະເທດ ໄທ ເມື່ອປີ 1984 ແລະ ກໍໄດ້ສ້າງຄອບຄົວຢູ່ທີ່ສູນດັ່ງກ່າວ, ທ່ານຢູ່ທີ່ນັ້ນປະມານຫ້າປີ ແລະ ໄດ້ເດີນທາງມາຮອດ ສະຫະລັດ ໃນປີ 1990.

ທ່ານ ສີຈັນ ເດີນທາງມາຮອດ ສະຫະລັດ ທຳອິດແມ່ນຕົກຢູ່ເມືອງ ເມັມຟິສ, ລັດ ເທັນເນັສຊີ, ປັດຈຸ ບັນນີ້ ທ່ານອາໄສຢູ່ເມືອງ ສຕອມ ເລກ, ລັດ ໄອໂອວາ, ເປັນເມືອງນ້ອຍໆທີ່ຕັ້ງຢູ່ຫ່າງໄກຈາກເມືອງຫຼວງຂອງລັດນັ້ນ. ກ່ອນຕັດສິນໃຈຕັ້ງຖິ່ນຖານໃນເມືອງດັ່ງກ່າວ ທ່ານກໍເຄີຍອາໄສຢູ່ຫຼາຍບ່ອນ.

“ພໍ່ຕົກຢູ່ລັດ ເທັນເນັສຊີ, ເມືອງ ເມັມຟິສ. ເປັນເມືອງເອກຂອງລັດ ເທັນເນັສຊີ ມັນໃຫຍ່ໃດ. ລະດັບໃຫຍ່ລະກໍຄົນຫຼາຍຢູ່ຫັ້ນໄດ້ (ປີ 1990-1991) 90 ຮອດ 91. ຢູ່ຫັ້ນໄດ້ 11 ເດືອນ. ລະກໍກັບໄປ ຄາລິຟໍເນຍ. 91 ໄປ ຄາລິຟໍເນຍ, ຢູ່ ຄາລິຟໍເນຍ ກະໄດ້ 11 ເດືອນຄືກັນ. ກັບມາ ເທັນເນັສຊີ ອີກ 6 ເດືອນ. ລະ ພໍ່ກະໄດ້ຍ້າຍມານີ້ (ເມືອງ ສຕອມ ເລກ).

ສະຫະລັດ ເປັນປະເທດທີ່ໃຫຍ່ ແລະ ມີເຖິງ 50 ລັດ, ໃນລັດຕ່າງໆສະພາບ ການດຳລົງຊີວິດຈະບໍ່ຄືກັນ. ໃນຕົວເມືອງໃຫຍ່ປະຊາຊົນຈະຫຍຸ້ງນຳການເຮັດວຽກຫຼາຍກວ່າ, ແລະ ຄ່າຄອງຊີບກໍຈະສູງກວ່າ ເຊິ່ງກົງກັນຂ້າມກັບເມືອງນ້ອຍ. ບາງຄົນຕ້ອງໄດ້ຍ້າຍລັດ ແລະ ຊອກຫາເມືອງທີ່ວ່າຕົນເອງສາມາດຢູ່ ຄືກັບທ່ານ ສີຈັນ ໄດ້ກ່າວໄວ້ວ່າ

“ໄປຫຼາຍບ່ອນແລ້ວ, ໄປຫຼາຍໆລັດແລ້ວໄປເລາະເບິ່ງຫັ້ນນະ. ເອົາລົດໄປເລາະໄປທົວໄປຫຼິ້ນບໍ່ໄດ້ເຮັດການແຕ່ກ່ອນຫັ້ນ. ກະເລີຍວ່າມັນມີຄວາມຈຳເປັນບາງເລື່ອງ ທີ່ວ່າເຮົາຕ້ອງໄດ້ມາຢູ່ເມືອງນ້ອຍຫັ້ນນະ. ຄືສະພາບສິ່ງແວດລ້ອມກັບຄອບຄົວ. ຄືລຳພັງຕົວເຮົາເອງເຮົາກໍສາມາດໄປໄດ້ເຮັດຫຍັງກະພໍລອດ ແຕ່ວ່າຄົນຢູ່ເບື້ອງຫຼັງເຮົາຫັ້ນນະມັນອັນຕະລາຍ. ມັນເລື່ອງພາສາ ເລື່ອງກົດໝາຍ ຫຼາຍໆເລື່ອງຫັ້ນນະ ທີ່ວ່າເຈົ້າບໍ່ທັນເກັ່ງ. ທີ່ວ່າເຈົ້າບໍ່ສາມາດຈະໄປຮັບມືກັບເມືອງໃຫຍ່ໄດ້. ອັນນີ້ ຄືສິ່ງທີ່ຕ້ອງໄດ້ສຶກສາລະອຽດວ່າ ເວົ້າລະມັນເລື່ອງຄອບຄົວຫັ້ນນະ. ເປັນຫຍັງໄປມັນກໍອາດຈະຍາກສຳລັບຄົນທີ່ຢູ່ເບື້ອງຫຼັງຢ້ານເອົາໂຕບໍ່ລອດ. ຄືລູກນ້ອຍເຂົາເຈົ້າກໍຈະ 3 ປີ 4 ປີເດະ ລູກກົກຫັ້ນນະ. ເຮັດ ຫຼາຍໆເລື່ອງທີ່ວ່າເຮົາຕ້ອງໄດ້ຄຶດ. ພໍ່ກະບໍ່ໄດ້ມາເບິ່ງໃນເມືອງນີ້ ໂທຖາມລູກນ້ອງເກົ່າ, ສະມາຊິກເກົ່າ, ລູກສິດເກົ່າໄປຊັ້ນນະ. ເຂົາເຈົ້າມາຢູ່ນີ້ກ່ອນຫຼາຍແລ້ວເຂົາເຈົ້າກະມາຢູ່ນີ້ ສຕອມ ເລກ ນີ້ກະປະມານເກືອບສີ່, ຫ້າສິບຄອບຄົວແລ້ວທີ່ວ່າເປັນສະມາຊິກເກົ່າຂອງພໍ່ຫັ້ນນະ.”

ທ່ານ ສີຈັນ ແລະ ໝູ່ເພື່ອນທີ່ງານລ້ຽງຢູ່ນອກໂຮງແຮມຂອງທ່ານ ສີຈັນ.
ທ່ານ ສີຈັນ ແລະ ໝູ່ເພື່ອນທີ່ງານລ້ຽງຢູ່ນອກໂຮງແຮມຂອງທ່ານ ສີຈັນ.

ວຽກທີ່ທຳອິດທີ່ທ່ານ ສີຈັນ ໄດ້ເຮັດແມ່ນເປັນຜູ້ອອກແບບຂອງບໍລິສັດເຮັດກາຕິດເສື້ອ, ຈອກ, ປະຕິທິນ, ໝວກ ແລະ ອື່ນໆ ແລະ ອີກວຽກນຶ່ງທີ່ທ່ານໄດ້ເຮັດ ກໍແມ່ນເປັນຄົນປາດຊີ້ນໝູຂອງບໍລິສັດແຫ່ງນຶ່ງ, ເຊິ່ງທ່ານເຮັດໄດ້ປະມານ 3​ ປີ. ຫຼັງຈາກນັ້ນກໍໄດ້ອອກມາຕັ້ງທຸລະກິດຄອບຄົວເຊິ່ງທ່ານໄດ້ກ່າວວ່າ

“ອອກຈາກໂຮງງານແລ້ວກະມາຕັ້ງທຸລະກິດຄອບຄົວ, ທຳອິດເລີ່ມຕົ້ນກະເປີດຕະຫຼາດ. ເປີດຕະຫຼາດເອເຊຍກ່ອນ. ລະກະຈັ່ງມາເຮັດເລື່ອງ Property, ມາຊື້ອາພາດເມັ້ນ,​ ຊື້ບ້ານຊື້ດິນໃຫ້ຄົນເຊົ່າ. ດຽວນີ້ມີ ເປັນເຂົາຮ້ອງຊຸບເປີມາເກັດຂອງເອເຊຍລະຫວ່າງ 4, 5,​ 6 ຊາດ ເຂົ້າບ່ອນດຽວກັນ. ມື້ເລີ່ມຕົ້ນລູກນ້ອງ ກະປະມານ 40 ປາຍເນາະ ແຕ່ມື້ເລີ່ມຕົ້ນມາຫັ້ນນະ, ລູກນ້ອງຫຼາຍ. ແຕ່ດຽວນີ້ຫັ້ນກະຄືວ່າ ເຮົາຕັດເລື່ອງຫຼາຍໆຢ່າງລົງຫັ້ນນະ. ແຮງງານຄົນກໍບໍ່ຫຼາຍ.”

ພຸດທະສອນ ຖາມ, ເຄື່ອງຂອງເຂົ້າຮ້ານຊຸບເປີມາເກັດນີ້ທ່ານສັງເຂົ້າມາແຕ່ໃສ ແດ່?

ທ່ານ ສີຈັນ ຕອບວ່າ “ຊິຄາໂກ ນີ້ເປັນຜັກສົດ, Frozen (ແຊ່ແຂງ) ເປັນອາຫານທີ່ວ່າຂາຍປະຈຳ ວັນ. ອັນນີ້ມັນເຂົ້າມາມື້ວັນຈັນທາງຝ່າຍ ຊິຄາໂກ, ຊິຄາໂກ ມັນກະມາຈາກ ຫວຽດນາມ, ໄທ ແຕ່ ວ່າ ຈີນ ດຽວນີ້ກະຕັດອອກແລ້ວ, ບໍ່ມີແລ້ວຂອງ ຈີນ ນະ. ລະກະມາຈາກ ຄາລິຟໍເນຍ, ລອສ ແອນເຈີລິສ, ແຊນ ແຟຣນຊິສໂກ. ມາຫຼາຍບ່ອນ.”

ທ່ານ ສີຈັນ ເວົ້າວ່າເງິນລົງທຶນສຳລັບເປີດຮ້ານຊຸບເປີມາເກັດນັ້ນແມ່ນປະມານ 2, 3 ແສນໂດລາ.

ຕູ້ຊັກເຄື່ອງຢູ່ຮ້ານຊັກເຄື່ອງຂອງທ່ານ ສີຈັນ.
ຕູ້ຊັກເຄື່ອງຢູ່ຮ້ານຊັກເຄື່ອງຂອງທ່ານ ສີຈັນ.

ປັດຈຸບັນນີ້ ທຸລະກິດຂອງທ່ານ ສີຈັນ ປະກອບມີຮ້ານຊຸບເປີມາເກັດເອເຊຍ, ຮ້ານອາຫານ, ໂຮງແຮມ, ຮ້ານຊັກເຄື່ອງ ແລະ ດິນໃຫ້ຄົນເຊົ່າ. ສ່ວນອາພາດເມັ້ນ ແລະ ເຮືອນໃຫ້ຄົນເຊົ່ານັ້ນ ທ່ານໄດ້ຢຸດໄປແລ້ວ.

ທ່ານກ່າວວ່າ ທ່ານໄດ້ຕັ້ງປ້າຍ Lao Town ຂຶ້ນໃນເມືອງດັ່ງກ່າວ. ແຕ່ວ່າຄົນລາວ ທີ່ອາໄສຢູ່ເມືອງ ສຕອມ ເລກ ແມ່ນມີບໍ່ຫຼາຍເຊິ່ງທ່ານໄດ້ເວົ້າວ່າ

ປ້າຍ Lao Town ທີ່ທ່ານ ສີຈັນ ຕັ້ງຂຶ້ນ ໃນເມືອງ ສຕອມ ເລກ.
ປ້າຍ Lao Town ທີ່ທ່ານ ສີຈັນ ຕັ້ງຂຶ້ນ ໃນເມືອງ ສຕອມ ເລກ.

“ຄົນລາວດຽວນີ້ປະມານໄດ້ 70 ຄອບຄົວ. ເມືອງນ້ອຍ ເມືອງນີ້ບໍ່ຮອດໝື່ນນະ. ຄົນມີແຕ່ປະມານ 10,000 ນີ້ແຫຼະ. ຢູ່ນີ້ມັນມີເວົ້າເລື່ອງລູກຄ້າຫຼັກ ມັນກະເປັນ ຄົນລາວເຮົາກະຄືວ່າ 100, ຄົນ ໄທ ມີປະມານ 4, 5 ຄອບຄົວ, ຄົນ ຫວຽດນາມ ກະ 10 ປາຍຄອບຄົວ, ຄົນເກາະຂອງ Micronesia ກະມີຢູ່ 50 ປາຍຄອບຄົວ. ລະກະມາໃສ່ ກະຣ່ຽງ ກະປະມານ 30 ປາຍຄອບຄົວ ຫຼື 40 ຄອບຄົວໄດ້. ລະກະມີ ອາເມກາ ກະສ່ວນນຶ່ງເຂົາເຈົ້າກະໄດ້ກິນອາຫານລາວ, ຟີລິບປິນ ເບາະພວກນີ້ເຂົາເຈົ້າກະມາ.”

ຢູ່ທີ່ເມືອງ ສຕອມ ເລກ, ທ່ານ ສີຈັນ ກໍໄດ້ຕັ້ງສະມາຄົມລາວຂຶ້ນມາ. ຄືກັບສະມາຄົມ ລາວ ໃນລັດອື່ນໆ ທີ່ເຂົາເຈົ້າໄດ້ຮວມຕົວກັນເພື່ອພົບປະໃນງານສຳຄັນ ແລະ ໃຫ້ການຊ່ວຍເຫຼືອກັນ ແລະ ກັນເວລາທີ່ມີຄວາມຈຳເປັນ, ດັ່ງທີ່ທ່ານ ສີຈັນ ກ່າວຕໍ່ໄປນີ້

“ພໍ່ຕັ້ງເປັນສະມາຄົມລາວ, ຊ່ວຍກັນເລື່ອງຕາຍ ເລື່ອງເຈັບ. ແບບວ່າໂຮງໝໍ ເລື່ອງຕາຍພໍ່ເປັນຜູ້ຈັດພິທີສົ່ງສະການໃຫ້ ຖ້າເຈົ້າຂາດຄວາມຕ້ອງການຫັ້ນນະ. ກະຖືວ່າເກືອບ 98 ເປີເຊັນພໍ່ຕ້ອງໄດ້ຮັບ ຜິດຊອບເລື່ອງນີ້ນະ. ຜູ້ທີ່ເຂົ້າສະມາ ຄົມ ນີ້ນະເວລາທີ່ເຈົ້າເຈັບ, ນອນໂຮງໝໍທາງສະມາຄົມລາວກະມີຄະນະກຳມະການໄປຢ້ຽມຢາມ, ຕ້ອງການຄວາມຊ່ວຍເຫຼືອຫຍັງ, ເຈົ້າຢາກໄດ້ພາສາບໍ່, ຖ້າ ເຈົ້າຕ້ອງການອັນໃດສິ່ງໃດສິ່ງນຶ່ງບໍ ເຮົາກະຄອຍຖ້າ ຮັບໃຊ້ເຂົາເຈົ້າ. ເຮົາກໍມີເງິນສົງເຄາະຊ່ວຍ ເຫຼືອເຂົາເຈົ້າເລັກໆນ້ອຍໆ. ຜູ້ທີ່ຕາຍເຮົາກໍໄປຈັດພິທີສົ່ງສະ ການໃຫ້, ທຸກຢ່າງສິ່ງທີ່ເຈົ້າຕ້ອງການທາງສະມາຄົມຊິໃຫ້ເຂົາເຈົ້າໄດ້ໝົດ.”

ບັນຍາກາດຍາມບຸນ ຢູ່ເມືອງ ສຕອມ ເລກ.
ບັນຍາກາດຍາມບຸນ ຢູ່ເມືອງ ສຕອມ ເລກ.

ສະມາຊິກຂອງສະມາຄົມຈະຈ່າຍເງິນ 20 ໂດລາຕໍ່ປີ ແລະ ການຫາເງິນອື່ນໆນັ້ນ ທາງສະມາຄົມກໍໄດ້ຈັດງານລາຕີສະໂມສອນ, ເຊິ່ງຈະຈັດຂຶ້ນປີລະເທື່ອ. ຈັດງານແຕ່ລະຄັ້ງ ກໍຈະມີຄົນໃນຊຸມຊົນເຂົ້າຮ່ວມປະມານ 100 ກວ່າຄົນ.

ປະຊາຊົນ ລາວ ທີ່ອາໄສຢູ່ໃນເມືອງດັ່ງກ່າວ 99 ເປີເຊັນແມ່ນມີອາຊີບເປັນຄົນປາດຊີ້ນໝູ, ຊີ້ນໄກ່ໃຫ້ແກ່ໂຮງງານ ໄທສັນ, ເຊິ່ງແມ່ນບໍລິສັດຜະລິດຊີ້ນທີ່ໃຫຍ່ທີ່ສຸດໃນ ສະຫະລັດ.

ທ່ານ ສີຈັນ ເວົ້າວ່າເມືອງ ສຕອມ ເລກ ຖ້າທຽບໃສ່ເມືອງຕ່າງໆໃນປະເທດ ລາວ ແລ້ວກໍຈະຄືກັບເມືອງ ໂພນໂຮງ, ເຊິ່ງປະຊາຊົນຈະເຫັນໜ້າກັນທຸກມື້, ເມື່ອເຈັບເປັນເຂົາເຈົ້າກໍຈະຊ່ວຍກັນ, ເມື່ອລົ້ມຫາຍຕາຍຈາກກໍບໍ່ຖິ້ມກັນ.

ທ່ານເວົ້າວ່າ ຄົນອື່ນໆທີ່ອາໄສຢູ່ໃນເມືອງ ສຕອມ ເລກ ໂດຍທົ່ວໄປຈະເປັນ ຄົນທີ່ວ່າດີຢູ່, ເຂົາເຈົ້າກໍບໍໄດ້ລັງກຽດຄົນຕ່າງຊາດຫຼາຍ, ເຫັນໜ້າກັນເຂົາເຈົ້າ ກໍຍົກມືທັກທາຍ. ຄົນ ອາເມຣິກັນ ທີ່ອາໄສຢູ່ເມືອງນັ້ນສ່ວນຫຼາຍເຂົາເຈົ້າຈະເປັນຊາວນາ.

ໃນຂະນະທີ່ການເລືອກຕັ້ງປະທານາທິບໍດີ ສະຫະລັດ ແມ່ນກຳລັງຫຍັບໃກ້ເຂົ້າມານີ້, ພວກເຮົາກໍໄດ້ຖາມທ່ານ ສີຈັນ ກ່ຽວກັບ ຄວາມຄິດເຫັນວ່າທ່ານສະໜັບ ສະໜູຜູ້ລົງແຂ່ງຂັນເອົາຕຳແໜ່ງປະ ທານາທິບໍດີຄົນໃດ. ທ່ານເວົ້າວ່າຜູ້ໃດມາແຮງເຮົາກໍໄປໂຕນັ້ນ. ຜູ້ໃດທີ່ໄດ້ເປັນປະທານາທິບໍດີທ່ານກໍຢາກໃຫ້ເພິ່ນປັບປຸງ ບັນຫາເສດຖະກິດ, ການນຳສິນຄ້າເຂົ້າ. ຢາກໃຫ້ເພິ່ນເປີດກວ້າງກວ່າເກົ່າ ເຂົ້າຫາຕະຫຼາດໃໝ່. ເມື່ອມີບັນຫາກັບ ຈີນ ທ່ານກໍຢາກໃຫ້ຫັນໄປເຂົ້າຫາ ຫວຽດນາມ, ໄທ, ລາວ ແລະ ອື່ນໆ.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG