ລັດຖະບານລາວຈັດກອງປະຊຸມສຸດຍອດຜູ້ນຳອາຊຽນ 2 ຄັ້ງຕິດຕໍ່ກັນໃນປີ 2024 ເນື່ອງຈາກວ່າມີງົບປະມານຈໍາກັດ ແຕ່ການຮັກສາຄວາມປອດໄພນັ້ນຈະຕ້ອງນຳໃຊ້ງົບປະມານຈຳນວນຫລາຍ
ນັກຊ່ຽວຊານໃນດ້ານການພັວພັນແລະການຮ່ວມມືໃນອາຊຽນ ເປີດເຜີຍວ່າ ສາເຫດສຳຄັນ ທີ່ລັດຖະບານລາວຈະຕ້ອງຈັດກອງປະຊຸມສຸດຍອດຜູ້ນຳອາຊຽນ ໃນປີ 2024 ທັ້ງສອງຄັ້ງຕິດຕໍ່ກັນ ຄືຄັ້ງທີ 44 ແລະ 45 ກະຍ້ອນວ່າ ລັດຖະບານລາວ ມີງົບປະມານ ຈຳກັດ. ໃນຂະນະທີ່ການຈັດກອງປະຊຸມດັ່ງກ່າວຈະຕ້ອງການງົບປະມານຫຼາຍ, ໂດຍສະເພາະໃນດ້ານການຮັກສາຄວາມປອດໄພໃຫ້ແກ່ຜູ້ນຳ ແລະ ຜູ້ຕາງໜ້າຂອງທຸກປະເທດທີ່ເຂົ້າຮ່ວມໃນກອງປະຊຸມຕ່າງໆ ທີ່ຈະຈັດຂຶ້ນໃນລະຫວ່າງວັນທີ 6-12 ຕຸລາ 2024 ທີ່ນະຄອນຫຼວງວຽງຈັນ ໃນນີ້ລວມເຖິງກອງປະຊຸມສຸດຍອດເອເຊຍຕາເວັນອອກທີ່ມີຜູ້ນຳ ສະຫະລັດ, ຈີນ, ຣັດເຊຍ, ອິນເດຍ, ອອສເຕຣເລຍ ແລະ ນິວ ຊີແລນ ເຂ້າຮ່ວມໃນກອງປະຊຼມດ້ວຍນັ້ນ ດັ່ງທີ່ຜູ້ຊ່ຽວຊານ ໃຫ້ການຢືນຢັນວ່າ
“ຈະມີກອງປະຊຸມສຸດຍອດອາຊຽນຄັ້ງທີ 44 ແລະ 45 ພ້ອມກັນໃນເດືອນຕຸລາ. ການຈັດການປະຊຼມທັງສອງໃນຊ່ວງດຽວກັນ. ມັນຈະຫຼຸດຜ່ອນຄ່າໃຊ້ຈ່າຍ. ໂດຍສະເພາະກ່ຽວກັບການຮັກສາຄວາມປອດໄພ ຫຼືການເບິ່ງແຍງຜູ້ນໍາຂອງປະເທດຕ່າງໆທີ່ເຂົ້າຮ່ວມກອງປະຊຸມ. ຢ່າລືມວ່າຜູ້ນຳຂອງສະຫະລັດ, ຈາກຈີນ, ຈາກຣັດເຊຍ, ຈາກອິນເດຍ, ຈາກອອສເຕຣເລຍ, ຈາກນິວຊີແລນ, ເຊິ່ງເປັນຄູ່ເຈລະຈາທີ່ສໍາຄັນ, ຈະໄດ້ພົບປະກັນໃນລະຫວ່າງການປະຊຸມທີ່ເອີ້ນວ່າກອງປະຊຸມສຸດຍອດເອເຊຍຕາເວັນອອກ.”
ສ່ວນ ທ່ານສະເຫລິມໄຊ ກມມະສິດ ຮອງນາຍົກລັດຖະມົນຕີ ແລະ ລັດຖະມົນຕີວ່າ ການຕ່າງປະເທດ ໄດ້ຖະແຫຼງຢືນຢັນວ່າ, ອຳນາດການປົກຄອງລາວ ໄດ້ເພີ່ມທະວີການຮັກສາຄວາມປອດໄພ. ແລະ ຕິດຕາມຢ່າງໃກ້ຊິດທຸກການເຄື່ອນໄຫວໃນຂອບເຂດທົ່ວປະເທດ ໃນໂອກາດທີ່ລັດຖະບານລາວ ເປັນປະທານອາຊຽນໃນປີ 2024 ລວມທັງຈະຕິດຕາມການເຜີຍແຜ່ຂໍ້ມູນ ແລະ ຂ່າວສານທາງສື່ສັງຄົມຢ່າງໃກ້ສິດ ທັງໃນລາວ ແລະ ຕ່າງປະເທດດ້ວຍ ທັ້ງຍັງຈະຕອບໂຕ້ຄືນໃນທັນທີ ໃນກໍລະນີທີ່ສື່ສັງຄົມ ນຳສະເໜີຂໍ້ມູນຂ່າວສານ ທີ່ໂຈມຕີ ລັດຖະບານລາວໃນຖານະປະທານອາຊຽນ ທີ່ຈະຈັດກອງປະຊຸມສຸດຍອດຜູ້ນຳອາຊຽນຄັ້ງທີ 44 ແລະ 45 ໃນວັນທີ 6-12 ຕຸລາ 2024 ທີ່ລວມທັງກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 57 ໃນວັນທີ 21-27 ກໍລະກົດ 2024 ທີ່ນະຄອນຫຼວງວຽງຈັນ ຊຶ່ງຈະປຶກສາຫາລືຫຼາຍດ້ານ ລວມທັງການສ້າງແຜນແມ່ບົດການກໍ່ສ້າງປະຊາຄົມອາຊຽນໃຫ້ສຳເລັດໃນປີ 2045 ດ້ວຍ ດັ່ງທີ່ ທ່ານ ສະເຫລິມໄຊ ໄດ້ໃຫ້ການຢືນຢັນວ່າ
“ເປົ້າໝາຍຕໍ່ໜ້ານັ້ນ ແມ່ນພວກເຮົາເອິ້ນວ່າ ແຜນແມ່ບົດກ່ຽວກັບການຈັດຕັ້ງປະຕິບັດວິໄສທັດການສ້າງປະຊາຄົມອາຊຽນ 2045 ໃນໄລຍະນີ້: ລະແມ່ນລາວເຮົາໃນຖານະເປັນປະທານອາຊຽນ 2024 ໄດ້ເຮັດວຽກຮ່ວມກັບປະທານໃນປີຫນ້າ ມາເລເຊຍ ເພື່ອຮ່າງເອກະສານດັງກ່າວນີ້. ແລະຖ້າວ່າສໍາເລັດແລ້ວ ເປັນເອກກະພາບກັນແລ້ວເອກະສານດັ່ງກ່າວກໍຈະໄດ້ຮັບການຮັບຮອງເອົາໃນໄລຍະທີ່ມາເລເຊຍເປັນປະທານອາຊຽນໃນປີ 2025 ເພື່ອຈະກ້າວໄປສູ່ການຈັດຕັ້ງປະຕິບັດ ແລະເຮ້ດໃຫ້ການສ້າງປະຊາຄົມອາຊຽນໄດ້ຢ່າງສຳເລັດຜົນ”
ໃນວັນທີ 10 ກໍລະກົດ 2024 ມີລາຍງານວ່າ ຕຳຫຼວດລາວໄດ້ກັກຕົວຜູ້ຊາຍລາວຄນໜຶ່ງ ໃນຂະນະທີ່ຜູ້ກ່ຽວໄດ້ຖືປ້າຍຜ້າຢູ່ໃກ້ປະຕູໄຊ ທີ່ຂຽນວ່າ: "ບໍ່ເອົາພວກສໍ້ລາດບັງຫຼວງ" ແລະກ່ອນຫນ້ານີ້ ຜູ້ກ່ຽວຍັງຖືປ້າຍຜ້າທີ່ຂຽນວ່າ: “ບໍ່ເອາຜະເດັດການ” ຢູ່ຕໍ່ໜ້າຫ້ອງການສະຫະປະຊາຊາດ ທີ່ນະຄອນຫຼວງວຽງຈັນອີກດ້ວຍ ແລະ ຍັງບໍ່ທັນເປັນທີ່ຈະແຈ້ງເທື່ອວ່າ ຕໍາຫຼວດລາວຈະດໍາເນີນຄະດີອາຍາກັບຜູ້ກ່ຽວຫລືບໍ່
ໃນປັດຈຸບັນ, ປະເທດລາວມີສື່ສັງຄົມອອນລາຍ 90 ກວ່າລາຍທີ່ຈົດທະບຽນຖືກຕ້ອງຕາມກົດໝາຍສື່ມວນຊົນ. ແຕ່ກໍຍັງມີອີກຫລາຍສິບລາຍທີ່ໄດ້ເຜີຍແຜ່ຂໍ້ມູນແລະຂ່າວກ່ຽວກັບລາວໃນຕ່າງປະເທດ ທີ່ທາງການລາວຄວບຄຸມບໍ່ໄດ້. ສະນັ້ນ, ຈຶ່ງຢາກຈະພັດທະນາລະບົບເຄືອຂ່າຍສື່ມວນຊົນໃນລາວໃຫ້ມີຄວາມທັນສະໄໝ ດ້ວຍການຊ່ວຍເຫຼືອທາງວິຊາການ ແລະ ເທັກນິກຂັ້ນສູງຈາກ ສປ ຈີນ ເພື່ອໃຫ້ສາມາດຕອບໂຕ້ກັບສື່ສັງຄົມໃນຕ່າງປະເທດໄດ້ຢ່າງທັນການຕໍ່ການເຜີຍແຜ່ຂໍ້ມູນແລະ ຂ່າວສານທີ່ໂຈມ ຕີພັກ ແລະ ລັດຖະບານລາວນັ້ນ
ຟໍຣັມສະແດງຄວາມຄິດເຫັນ