ການປ່ຽນແປງຂອງຜູ້ນຳໄນຈີເຣຍ ອາດພາໃຫ້ມີຄວາມຫວັງ
ຄັ້ງໃໝ່ ໃນຄວາມພະຍາຍາມຂອງສະຫະລັດ ເພື່ອຊ່ອຍເຫຼືອ
ປະເທດດັ່ງກ່າວ ຕໍ່ສູ້ກັບພວກໂບໂກ ຮາຣາມ. ບັນດານັກວິເຄາະ
ກ່າວວ່າ ພິທີສາບານໂຕ ເຂົ້າຮັບຕຳແໜ່ງ ປະທານາທິບໍດີ
ໄນຈີເຣຍຂອງ ທ່ານ Muhammadu Buhari ໄດ້ອຳນວຍໃຫ້
ທັງສອງປະເທດຈັດຕັ້ງການພົວພັນ ນຳກັນຄືນອີກ ຫລັງຈາກທີ່
ໄດ້ຕຶງຄຽດມາພາຍໃຕ້ອະດີດປະ ທານາທິບໍດີ Goodluck
Jonathan. ຜູ້ສື່ຂ່າວວີໂອເອປະຈຳກະຊວງ ການຕ່າງປະເທດ
Pam Dockins ມີລາຍງານກ່ຽວກັບເລື້ອງນີ້ ຊຶ່ງ ໄຊຈະເລີນສຸກ
ຈະນຳມາສະເໜີທ່ານໃນອັນດັບຕໍ່ໄປ.
ວີດີໂອ ທີ່ໄດ້ນຳອອກເຜີຍແຜ່ທາງອິນເຕີເນັດ ຫຼື online ໃນ ອາທິດແລ້ວນີ້ ສະແດງໃຫ້ເຫັນວ່າ ພວກນັກຕໍ່ສູ້ ກຸ່ມໂບໂກ ຮາຣາມ ໄດ້ນຳໃຊ້ສັນຍາລັກຂອງ “ລັດອິສລາມ ໃນ ອາຟຣິກາຕາເວັນຕົກ.”
ໃນວີດີໂອດັ່ງກ່າວ ນັກຕໍ່ສູ້ຫົວຮຸນແຮງຄົນນຶ່ງ ກ່າວຫາພວກປະເທດ ທີ່ຕໍ່ສູ້ກັບກຸ່ມໂບໂກ
ຮາຣາມ ວ່າ ຂີ້ຕົວະກ່ຽວກັບເລື້ອງຄວາມສຳເລັດໃນ ການກົດດັນໃຫ້ກຸ່ມດັ່ງກ່າວ ແຕກ ຖອຍໄປນັ້ນ.
ວີດີໂອນີ້ໄດ້ນຳອອກເຜີຍແຜ່ ບໍ່ເທົ່າໃດມື້ ຫຼັງຈາກປະທານາທິບໍດີ Muhammadu
Buhari ທີ່ໄດ້ສາບານໂຕເຂົ້າຮັບຕຳແໜ່ງໃໝ່ໆ ສັນຍາວ່າ ຈະຖືເອົາເລື້ອງການຕໍ່ສູ້ ກັບ
ກຸ່ມໂບໂກ ຮາຣາມ ເປັນບູລິມະສິດສຳຄັນສຸດ ອັນເປັນບັນຫາ ທີ່ທ່ານໄດ້ປຶກສາຫາລື ກັບ
ລັດຖະມົນຕີຕ່າງປະເທດ ສະຫະລັດ ທ່ານ John Kerry ທີ່ໄດ້ໄປຮ່ວມພິທີເຂົ້າຮັບຕຳ
ແໜ່ງຂອງທ່ານ Buhari.
ຜູ້ອຳນວຍການ ສູນສຶກສາອາຟຣິກາ ທ່ານ J. Peter Pham ກ່າວວ່າ ມັນເປັນເລື້ອງ
ສຳຄັນ ທີ່ສະຫະລັດ ບໍ່ຄວນອະນຸຍາດປ່ອຍໃຫ້ຄວາມເຄັ່ງຕຶງຕ່າງໆ ກັບລັດຖະບານ
ຊຸດກ່ອນ ກາຍເປັນບັນຫາຮ້າຍແຮງກວ່າເກົ່າ.
ທ່ານ Pham ເວົ້າວ່າ “ຂ້າພະເຈົ້າຄາດຫວັງວ່າ ສະຫະລັດຈະເຄື່ອນ ໄຫວຢ່າງໄວວາ
ເພື່ອເກັບກຳເອົາໝາກໄມ້ທີ່ສາມາດຍື້ເຖິງໄດ້ ຕົວຢ່າງ ເຊັ່ນ ສົ່ງບັນດາທີ່ປຶກສາ
ໄປຊ່ອຍເຫຼືອ ທາງດ້ານສືບລັບ ແລະ ດ້ານ ພະລາທິການ.”
ທ່ານ Pham ກ່າວວ່າ ໄນຈີເຣຍບໍ່ແມ່ນປະເທດທຸກຍາກ ເຖິງແມ່ນວ່າ ໃນປັດຈຸບັນປະເທດ
ດັ່ງກ່າວພວມປະສົບກັບບັນຫາຕ່າງໆ ທາງດ້ານເສດຖະກິດ.
ທ່ານ Pham ເວົ້າຕໍ່ໄປວ່າ “ປະເທດນັ້ນ ບໍ່ໄດ້ສະແຫວງຫາການຊ່ວຍ ເຫລືອລ້າ ແຕ່
ກັບສະແຫວງຫາຄວາມອາດສາມາດ ເພື່ອຈະຊື້ເຮືອບິນ ຫຼືກຳປັ່ນ ໃນຈຳນວນທີ່
ເໝາະສົມ ແລະ ອຸປະກອນອື່ນໆ ເພື່ອຮັບມືກັບບັນຫາທ້າທາຍຕ່າງໆ ທີ່ພວກ
ເຂົາເຈົ້າກຳລັງປະເຊີນຢູ່ນັ້ນ.”
ທ່ານ Mohammed Rahim ນັກວິເຄາະເລື້ອງການຕໍ່ຕ້ານກຸ່ມຫົວຮຸນແຮງຈັດ ໃນທະວີບ
ອາຟຣິກາ ຜູ້ທີ່ໄດ້ສົນທະນາໃນລາຍການ “Africa 54” ຂອງວີໂອເອ ກ່າວວ່າ ສະຫະລັດ ແລະ ບັນດາປະເທດມະຫາອຳ ນາດອື່ນໆຂອງໂລກ ຄວນຈະເພັ່ງເລັງໃສ່ ການຊ່ອຍເຫຼືອ ຊຸມຊົນຕ່າງໆ ທີ່ໄດ້ຮັບຜົນກະທົບໂດຍກົງ ຈາກການລັກພາໂຕໄປ ແລະ ການໂຈມຕີ ຂອງກຸ່ມໂບໂກ ຮາຣາມ.
ທ່ານ Rahim ເວົ້າວ່າ “ການຊ່ອຍເຫຼືອໃນດ້ານເທັກນິກ ສາມາດຊ່ອຍເຫຼືອຊຸມຊົນເຫຼົ່ານີ້ ໄດ້ຢ່າງໃຫຍ່ຫລວງ.”
ໃນການສະລຸບລາຍງານ ເຈົ້າໜ້າທີ່ອາວຸໂສຄົນນຶ່ງ ຂອງກະຊວງການ ຕ່າງປະເທດ ກ່າວ
ວ່າ ສະຫະລັດຫວັງວ່າ ຈະໄດ້ດຳເນີນການເພີ້ມຕື່ມ ອີກ ເພື່ອຊ່ອຍເຫຼືອປະເທດໄນຈີເຣຍ
ຕໍ່ສູ້ກັບກຸ່ມໂບໂກ ຮາຣາມ ລວມ ທັງການເຝິກແອບ ທະຫານນຶ່ງກອງ ໃນທ້າຍປີນີ້.
