ທາງການແຂວງຫລວງພະບາງຄາດໝາຍວ່າ ຈະມີນັກທ່ອງ
ທ່ຽວຊາວຕ່າງຊາດຫລາຍກວ່າ 240,000 ຄົນ ທີ່ຈະເດີນ
ທາງເຂົ້າໄປທ່ອງທ່ຽວໃນແຂວງຫລວງພະບາງ ໃນຕະ
ຫລອດໄລຍະແຜນການປີ 2010-2011 ນີ້.
ທ່ານຄຳຜຸຍ ພົມມະວົງ ຫົວໜ້າຫ້ອງການທ່ອງທ່ຽວແຂວງຫລວງພະບາງ ໄດ້ສະແດງ
ຄວາມໝັ້ນໃຈວ່າ ໃນຕະຫລອດໄລຍະແຜນການປີ 2010-2011 ນີ້ ຈະມີນັກທ່ອງທ່ຽວ
ຊາວຕ່າງຊາດເດີນທາງເຂົ້າໄປທ່ອງທ່ຽວໃນແຂວງຫລວງພະບາງເພີ້ມຂຶ້ນຈາກແຜນການ
ປີ 2009-2010 ທີ່ຜ່ານມາຢ່າງແນ່ນອນ.
ທັງນີ້ກໍ່ເນື່ອງຈາກວ່າສະເພາະໃນໄລຍະ 3 ເດືອນທຳອິດ ຂອງແຜນການປີ 2010-2011 ກໍຄືຈາກເດືອນຕຸລາ-ທັນວາ 2010 ນັ້ນກໍປະກົດວ່າມີນັກທ່ອງທ່ຽວຊາວຕ່າງຊາດຫລາຍກວ່າ 52,000 ຄົນແລ້ວ ທີ່ເດີນທາງເຂົ້າໄປທ່ອງທ່ຽວຢູ່ໃນແຂວງຫລວງພະບາງ ໂດຍໃນຈຳນວນດັ່ງກ່າວນີ້ ກໍມີນັກທ່ອງທ່ຽວຈາກໄທ, ອັງກິດ, ຝຣັ່ງເສດ, ອັອສເທຮເລຍ ແລະ ສະຫະລັດອາເມຣິກາ ດັ່ງທີ່ທ່ານຄຳຜຸຍ ໄດ້ໃຫ້ການຢືນຢັນວ່າ:
“ບັນຍາກາດການທ່ອງທ່ຽວໃນໄລຍະ 3 ເດືອນມານີ້ ກະຄ່ອຍໆຄຶກຄັກຂຶ້ນ ສຳລັບນັກທ່ອງທ່ຽວ ສາກົນ ທີ່ເພີ້ມຂຶ້ນຈາກປີການເກືອບຮອດພັນຄົນ. ນັກທ່ອງທ່ຽວ ທີ່ເຂົ້າມາທ່ຽວຫລວງພະບາງ ເປັນອັນດັບນຶ່ງກໍແມ່ນນັກທ່ອງທ່ຽວຈາກປະເທດໄທ, ແລ້ວອັນດັບສອງກໍແມ່ນຈາກປະເທດອັງກິດ, ອັນດັບສາມ ແມ່ນຈາກປະເທດຝຣັ່ງເສດ ແລ້ວກໍເປັນເຢຍລະມັນ ແລະສະຫະລັດອາເມຣິກາ.”
ສໍາລັບໃນປີ 2009-2010 ທີ່ຜ່ານມາກໍມີນັກທ່ອງທ່ຽວຊາວຕ່າງຊາດຫລາຍກວ່າ 210,000 ຄົນ ທີ່ເດີນທາງໄປທ່ອງທ່ຽວໃນແຂວງຫລວງພະບາງ ແລະແຜນການປີ 2010-2011 ທີ່ຈະສິ້ນສຸດລົງໃນທ້າຍເດືອນກັນຍາປີນີ້ ທາງການແຂວງຫລວງພະບາງ ກໍເຊື່ອວ່າຈະມີນັກທ່ອງທ່ຽວຊາວຕ່າງຊາດຫລາຍກວ່າ 240,000 ຄົນ ທີ່ຈະເດີນທາງເຂົ້າໄປທ່ອງທ່ຽວໃນແຂວງຫລວງພະບາງ.
ທາງດ້ານ ທ່ານສົມພົງ ມົງຄົນວິໄລ ລັດຖະມົນຕີປະຈໍາ
ສໍານັກງານນາຍົກລັດຖະມົນຕີ ແລະປະທານອົງການ
ທ່ອງທ່ຽວແຫ່ງຊາດລາວໄດ້ສະແດງຄວາມເຊື່ອໝັ້ນວ່າ
ໂຄງການກໍ່ສ້າງທາງລົດໄຟຄວາມໄວສູງ ລະຫວ່າງຈີນ
ກັບລາວ ແລ້ວເຊື່ອມຕໍ່ໄປຍັງປະເທດໄທ-ມາເລເຊຍແລະ
ສິງກະໂປ ຫຼືທີ່ເອີ້ນວ່າໂຄງການເຊື່ອມຕໍ່ທາງລົດໄຟອາ
ຊຽນ-ຈີນນັ້ນ ຈະສົ່ງຜົນດີຕໍ່ການພັດທະນາໃນດ້ານການ
ທ່ອງທ່ຽວຂອງລາວໃນອານາຄົດ.
ທັງນີ້ກໍ່ເນື່ອງຈາກວ່າການເດີນທາງດ້ວຍລົດໄຟທີ່ມີຄວາມ
ສະດວກ ແລະວ່ອງໄວນັ້ນຈະເຮັດໃຫ້ນັກທ່ອງທ່ຽວຊາວ
ຕ່າງຊາດພາກັນເດີນທາງເຂົ້າມາທ່ອງທ່ຽວໃນລາວເພີ່ມຫຼາຍຂຶ້ນຢ່າງຕໍ່ເນື່ອງ ໂດຍສະເພາະ
ແມ່ນນັກທ່ອງທ່ຽວຊາວຈີນນັ້ນ ກໍ່ເຊື່ອວ່າຈະເດີນທາງເຂົ້າມາທ່ອງທ່ຽວໃນລາວຫຼາຍກວ່າ
ທຸກປະເທດເມື່ອການກໍ່ສ້າງທາງລົດໄຟຄວາມໄວສູງດັ່ງກ່່າວນີ້ ໄດ້ດໍາເນີນການສຳເລັດສົມ
ບູນແລ້ວນັ້ນ.
ການກໍ່ສ້າງທາງລົດໄຟສະເພາະໃນເຂດລາວຈະເລີ່ມລົງມືໃນພາກຕົວຈິງນັບຈາກເດືອນເມສາ
2011 ເປັນຕົ້ນໄປ ແລະຖ້າຫາກວ່າການດໍາເນີນງານເປັນໄປຕາມແຜນການທີ່ວາງໄວ້ກໍ່ຄາດ
ວ່າການກໍ່ສ້າງທາງລົດໄຟສະເພາະໃນເຂດລາວທີ່ມີໄລຍະທາງຍາວເຖິງ 421 ກິໂລແມັດນັ້ນ
ຈະແລ້ວສໍາເລັດຕະຫຼອດເສັ້ນທາງພາຍໃນປີ 2015 ຊຶ່ງເປັນໂອກາດຄົບຮອບ 40 ປີ ຂອງ ການສະຖາປະນາສາທາລະນະລັດປະຊາທິປະໄຕປະຊາຊົນລາວພໍດີ.
ທັງນີ້ ໂດຍອິງຕາມແຜນການ
ກໍ່ສ້າງທາງລົດໄຟຄວາມໄວສູງ
ສະເພາະໃນເຂດລາວທີ່ເຊື່ອມ
ຕໍ່ຈາກຈີນທີ່ຢູ່ດ່ານຊາຍແດນ
ບໍ່ເຕັນໃນແຂວງຫຼວງນໍ້າທານັ້ນ
ຈະມີການກໍ່ສ້າງສະຖານີໃຫຍ່
5 ແຫ່ງ ກໍຄືຢູ່ທີ່ດ່ານບໍ່ເຕັນ,
ອຸດົມໄຊ, ຫຼວງພະບາງ, ວັງ
ວຽງ ແລະນະຄອນວຽງຈັນ.
ນອກຈາກນັ້ນ ກໍ່ຈະມີສະຖານີ
ນ້ອຍອີກ 16 ແຫ່ງ ທີ່ຢູ່ລະ
ຫວ່າງສະຖານີໃຫຍ່ທັງ 5 ແຫ່ງ
ດັ່ງກ່າວ.
ຊຶ່ງດ້ວຍເສັ້ນທາງດັ່ງກ່າວນີ້
ກໍເຮັດໃຫ້ທາງການລາວໝັ້ນໃຈວ່າຈະມີນັກທ່ອງທ່ຽວຊາວຕ່າງຊາດເດີນທາງ ເຂົ້າໄປໃນລາວ
ຫຼາຍຂຶ້ນຢ່າງຕໍ່ເນື່ອງ ໂດຍຄາດໝາຍວ່າຈະມີນັກທ່ອງທ່ຽວຊາວຕ່າງຊາດຫຼາຍກວ່າ 2.8
ລ້ານຄົນ ທີ່ຈະເດີນທາງເຂົ້າໄປລາວໃນປີ 2015 ສ່ວນປີທີ່ຜ່ານມາປາກົດວ່າມີນັກທ່ອງທ່ຽວ
ຊາວຕ່າງຊາດເກືອບ 2.2 ລ້ານຄົນ ທີ່ເດີນທາງເຂົ້າໄປໃນລາວ.
