ໃນວັນເລືອກຕັ້ງ ຊາວອາເມຣິກັນ ທົ່ວປະເທດ ພາກັນອອກໄປໃຊ້ສິດອອກສຽງ ເລືອກເອົາປະທານາທິບໍດີ
ຜູ້ມີສິດອອກສຽງຂອງສະຫະລັດຫຼາຍລ້ານຄົນ ໄດ້ພາກັນໄປປ່ອນບັດເລືອກຕັ້ງ ໃນວັນອັງຄານມື້ນີ້ ເພື່ອເລືອກເອົາປະທານາທິບໍດີຄົນໃໝ່ ໂດຍຕ້ອງໄດ້ຕັດສິນໃຈຈະຍົກລະດັບຕຳແໜ່ງຮອງປະທານາທິບໍດີ ຄາມາລາ ແຮຣິສ ໃຫ້ກາຍເປັນ ຜູ້ນຳເພດຍິງຄົນທຳອິດຂອງປະເທດ ຫຼືຈະເລືອກເອົາອະດີດປະທານາທິບໍດີ ດໍໂນລ ທຣຳ ກັບຄືນໄປດຳລົງຕຳແໜ່ງໃນທຳນຽບຂາວ.
ໜ່ວຍເລືອກຕັ້ງທັງຫຼາຍສະແດງໃຫ້ເຫັນວ່າ ທ່ານນາງ ແຮຣິສ ຜູ້ສະໝັກສັງກັດ ພັກເດໂມແຄຣັດ ແລະທ່ານທຣຳ, ຄູ່ແຂ່ງຂອງທ່ານນາງຈາກພັກຣີພັບບລີກັນ, ກຳລັງແຂ່ງຂັນກັນຢ່າງສູສີທີ່ສຸດໃນຮອບຫຼາຍທົດສະວັດຜ່ານມາ ໂດຍຜູ້ຊະນະເລີດຈະເລີ້ມດຳລົງຕຳແໜ່ງປະທານາທິບໍດີ ເປັນເວລາສີ່ປີ ໃນເດືອນມັງກອນ ຈະມາເຖິງນີ້.
ໜ່ວຍເລືອກຕັ້ງໃນເຂດພາກຕາເວັນອອກຂອງສະຫະລັດ ໄດ້ປິດລົງແລ້ວ ແລະຜົນການນັບຄະແນນສຽງກຳລັງຖືກປະກາດອອກມາຢ່າງຕໍ່ເນື່ອງ
ໃນຂະນະນີ້ ໜ່ວຍເລືອກຕັ້ງທັງຫຼາຍຢູ່ເຂດພາກຕາເວັນອອກຂອງສະຫະລັດ ກໍໄດ້ປິດລົງເປັນທີ່ຮຽບຮ້ອຍ ຖ້າຫາກຜູ້ໃດທີ່ບໍ່ໄດ້ຢູ່ໃນແຖວເມື່ອເຖິງເວລາປິດໜ່ວຍເລືອກຕັ້ງກໍຈະບໍ່ມີສິດປ່ອນບັດເລືອກຕັ້ງໄດ້. ບາງໜ່ວຍເລືອກຕັ້ງເຖິງແມ່ນວ່າ ຈະໄດ້ປິດໜ່ວຍເລືອກຕັ້ງໄປແລ້ວນັ້ນ ກໍຕ້ອງໄດ້ລໍຖ້າໃຫ້ຜູ້ມີສິດອອກສຽງທີ່ລຽນແຖວຢູ່ນັ້ນ ໄດ້ປ່ອນບັດຂອງພວກເຂົາເຈົ້າເສຍກ່ອນ ຈຶ່ງຈະສາມາດເລີ້ມການນັບຄະແນນສຽງ.
ຫຼາຍລັດທາງພາກຕາເວັນອອກ ໄດ້ສົ່ງຜົນການນັບຄະແນນສຽງເຂົ້າມາເປັນທີ່ຮຽບຮ້ອຍ ແລະໄດ້ປະກາດຜົນທີ່ອອກມາຂອງການປ່ອນບັດເລືອກຕັ້ງ ໂດຍວີໂອເອ ຄືດັ່ງນີ້: ລັດເວີມອນທ໌ ພັກເດໂມແຄຣັດ ໄດ້ຄະແນນສຽງຂອງຜູ້ແທນ 3 ຄະແນນ, ລັດເວີຈີເນຍຕາເວັນຕົກ ພັກຣີພັບບລີກັນ ໄດ້ຄະແນນສຽງຂອງຜູ້ແທນ 4 ຄະແນນ, ລັດເຄນຕັກກີ ພັກຣີພັບບລີກັນ ໄດ້ຄະແນນສຽງຂອງຜູ້ແທນ 8 ຄະແນນ, ລັດອິນເດຍນາ ພັກຣີພັບບລີກັນ ໄດ້ຄະແນນສຽງຂອງຜູ້ແທນ 11 ຄະແນນ.
ສ່ວນລັດອື່ນໆ ອາດຈະຍັງບໍ່ສາມາດນັບຄະແນນໄດ້ເປັນທີ່ຮຽບຮ້ອຍເທື່ອ ຈຶ່ງບໍ່ສາມາດປະກາດອອກມາ. ເຂດໜ່ວຍເລືອກຕັ້ງທີ່ຈະປິດລົງກໍຄືເຂດພາກກາງຂອງສະຫະລັດ, ຕໍ່ຈາກນັ້ນ ກໍຈະເປັນພາກຕາເວັນຕົກ ແລະຄາດໝາຍວ່າ ຜົນການເລືອກຕັ້ງອາດຈະຖືກປະກາດອອກມາໄດ້ໃນຕອນແລງວັນອັງຄານມື້ນີ້ ຫຼື ຕອນເຊົ້າວັນພຸດມື້ອື່ນນີ້. ວີໂອເອ ລາວ ຈະລາຍງານຜົນການເລືອກຕັ້ງຕະຫຼອດຄືນ ແລະທ່ານສາມາດຕິດຕາມລາຍການຖ່າຍທອດສົດຂອງພວກໄດ້ໃນແລງມື້ອື່ນ ທີ່: lao.voanews.com
ການເລືອກຕັ້ງ ສະຫະລັດ ແມ່ນຢູ່ໃນກຳມືຂອງຜູ້ລົງຄະແນນສຽງ ໃນຂະນະທີ່ທ່ານນາງ ແຮຣິສ ແລະ ທ່ານ ທຣຳ ຕໍ່ສູ້ເພື່ອທຳນຽບຂາວ
ປະຊາຊົນ ອາເມຣິກັນ ຫຼາຍລ້ານຄົນແມ່ນມີກຳນົດຈະອອກໄປປ່ອນບັດຂອງເຂົາເຈົ້າໃນວັນອັງຄານມື້ນີ້, ໃນຂະນະທີ່ເຂົາເຈົ້າຈະຕັດສິນວ່າຮອງປະທານາທິບໍດີ ຄາມາລາ ແຮຣິສ ຫຼື ອະດີດປະທານາທິບໍດີ ດໍໂນລ ທຣຳ ຈະເປັນປະທານາທິບໍດີຄົນຕໍ່ໄປຂອງປະເທດ.
