ຄວາມຄິດເຫັນຂອງປະຊາຊົນຊາວ ຮັນສ໌ວີລ ກ່ອນການເລືອກຕັ້ງປະທານາທິບໍດີ ສະຫະລັດ

ພຽງນຶ່ງມື້ຂອງການເລືອກຕັ້ງ, ຊາວອາເມຣິກັນ ແລະປະຊາຄົມໂລກກໍຈະໄດ້ຮັບຮູ້ວ່າ ແມ່ນໃຜຈະໄດ້ກາຍມາເປັນປະທານາທິບໍດີຄົນທີ 47 ຂອງສະຫະລັດ, ໃນຂະນະດຽວກັນ ປະຊາຊົນຊາວອາເມຣິກັນຢູ່ໃນທ້ອງຖິ່ນຫຼາຍຄົນຢູ່ໃນຫຼາຍຂົງເຂດເມືອງເມດີສັນ ແລະ ເມືອງຮັນສວີລ ກໍກຽມພ້ອມທີ່ຈະອອກໄປໃຊ້ສິດຂອງພວກເຂົາເຈົ້າໃນການເລືອກຕັ້ງແລ້ວເຊັ່ນກັນ.

ລັດອາລາບາມາ ເປັນລັດທີ່ຕັ້ງຢູ່ທາງພາກໃຕ້ຂອງສະຫະລັດ, ມີປະຊາກອນປະມານ 5,143,030 ຄົນ, ໃນນັ້ນ ກວມເອົາປະມານ 70 ເປີເຊັນຂອງປະຊາຊົນທີ່ມີສິດລົງຄະແນນສຽງເລືອກຕັ້ງທົ່ວໄປໃນປີນີ້, ລັດດັ່ງກ່າວ ເປັນລັດທີ່ມີປະຊາຊົນຫຼາຍເຊື້ອຊາດອາໃສຢູ່ ແຕ່ສ່ວນໃຫຍ່ແມ່ນປະຊາກອນເຊື້ອຊາດຜິວຂາວ ກວມເອົາ 64.7 ເປີເຊັນ, ຮອງລົງມາແມ່ນປະຊາຊົນເຊື້ອສາຍອາຟຣິກາ ກວມເອົາ 25.4 ເປີເຊັນ, ຊາວຮິສເປນິກ 5.7 ເປີເຊັນ, ເອເຊຍ 1.5 ເປີເຊັນ ແລະອື່ນໆຕາມລໍາດັບ.

ສໍາລັບເມືອງຮັນສວີລ ເປັນເມືອງນຶ່ງທີ່ຕັ້ງຢູ່ທາງພາກເໜືອຂອງລັດອາລາບາມາ ມີປະຊາກອນທັງໝົດ 228,616 ຄົນ, ເປັນເມືອງສໍາຄັນທີ່ມີການຂະຫຍາຍໂຕທາງດ້ານເສດຖະກິດຢ່າງໄວວາ ໂດຍສະເພາະດ້ານອຸດສາຫະກໍາຍານພາຫະນະລົດຍົນຂະໜາດໃຫຍ່ເຊັ່ນ ໂຮງງານຜະລິກລົດ ToYoTa-Mazda, ສ້າງຕັ້ງສໍາເລັດໃນປີ 2021, ເຊິ່ງເປັນໂຮງງານໃຫຍ່ອັນດັບ 10 ຂອງບໍລິສັດດັ່ງກ່າວທີ່ຕັ້ງຢູ່ໃນສະຫະລັດ, ໂດຍການຮ່ວມມືກັນລະຫວ່າງບໍລິສັດຫຼັກຂອງຍີ່ປຸ່ນ ແລະລັດຖະບານທ້ອງຖິ່ນ, ຄວາມຕ້ອງການຂອງໂຮງງານສະເພາະພະນັກງານດ້ານການຜະລິດແມ່ນ 4,000 ຄົນ ແລະມີເປົ້າຫຼາຍໃນການຜະລິດລົດອອກສູ່ຕະຫຼາດ 300,000 ຄັນຕໍ່ປີ.

ນອກຈາກນັ້ນ ຍັງມີ Warehouse ຕ່າງໆທີ່ເລີ້ມເຂົ້າມາຕັ້ງຢູ່ໃນຂົງເຂດໃກ້ຄຽງເຊັ່ນ Amazon ແລະອື່ນໆ, ເຊິ່ງຖືເປັນການສ້າງວຽກເຮັດງານທໍາໃຫ້ປະຊາຊົນຢູ່ໃນທ້ອງຖິ່ນ ແລະຂົງເຂດໃກ້ຄຽງ. ນອກຈາກວຽກງານທາງດ້ານອຸດສາຫະກໍາແລ້ວ ຍັງມີວຽກງານດ້ານວິຊາການ ແລະວິສະວະກອນດ້ານຕ່າງໆທີ່ມີຄວາມຮຽກຮ້ອງຕ້ອງການຢ່າງຫຼວງຫຼາຍ. ດັ່ງນັ້ນ, ທຸລະກິດດ້ານອະສັງຫາລິມະຊັບ ຈຶ່ງມີການຂະຫຍາຍໂຕຂຶ້ນຢ່າງໄວວາ ແລະຫຼວງຫຼາຍເຊັ່ນກັນ, ຄວາມຮຽກຮ້ອງຕ້ອງການດ້ານແຮງງານໃນການກໍ່ສ້າງຕ່າງໆ ຈຶ່ງເປັນສິ່ງສໍາຄັນ ແລະຈໍາເປັນ.

ແນວໃດກໍຕາມ, ໃນການເລືອກຕັ້ງປະທານາທິບໍດີມື້ອື່ນນີ້ ມີປະຊາຊົນອາເມຣິກັນເຊື້ອສາຍລາວຈໍານວນນຶ່ງທີ່ອົບພະຍົບມາຢູ່ທີ່ນີ້ເກືອບ 40 ປີແລ້ວບອກວ່າ ຕົນພ້ອມທີ່ຈະອອກໄປໃຊ້ສິດຂອງຕົນເອງ ແລະເລືອກພັກທີ່ຕົນສະໜັບສະໜູນ.

ທ່ານ ລົບນີ ພົງສະຫວັນ, ປະຊາຊົນທີ່ອາໄສຢູ່ໃນເມືອງຮັນສວີລ ມາເກືອບ 40 ປີ​ກ່າວວ່າ:

“ພັກຣີພັບບຣິກັນ, ຄັນຊິເວົ້າໄປແລ້ວກໍຍ້ອນວ່າ ອ້າຍຊອບເຂົາ ອ້າຍມັກເຂົານະ, ຄັນຊິເວົ້າໄປແລ້ວເລື້ອງການເມືອງແມ່ນຫຍັງເພິ່ນກໍຮອບຄອບດີ.”

ທ້າວ ເຄັນນີ ຂຸນມະໂນ, ນັກວິສະວະກອນດ້ານ IT ທີ່ອາໄສຢູ່ເມືອງຮັນສວີລ ມາຫຼາຍກວ່າ 30 ປີ ກ່າວວ່າ:

“ແນ່ນອນ ຂ້ອຍຊິອອກໄປລົງຄະແນນສຽງ, ປັດຈຸບັນນີ້ ຂ້ອຍຈະມຸ້ງໄປທາງພັກຣີພັບບຣິກັນ, ຂ້ອຍຄິດວ່າ ເມື່ອຂ້ອຍເຮັດການຄົ້ນຄວ້າຕ່າງໆ ແລະຂ້ອຍກໍໄດ້ເຫັນຜູ້ຄົນທາງອອນລາຍ ແລະເຂົາເຈົ້າກໍໄດ້ສໍາພາດຜູ້ຄົນກ່ຽວກັບຊາຍແດນແລະບັນຫາຕ່າງໆດັ່ງກ່າວນັ້ນເຫັນວ່າ ມັນມີຂັ້ນຕອນຫຼາຍອັນຍາວນານ ແລະເບິ່ງຄືວ່າ ມີຄົນເຂົ້າມາ ແລະເຂົ້າມາໄວຂຶ້ນ. ຂ້ອຍກໍໄດ້ແຕ່ຫວັງວ່າ ດ້ວຍການເລືອກດັ່ງກ່າວມັນຈະບໍ່ເຮັດໃຫ້ເກີດມີຄວາມວຸ້ນວາຍຫຍັງ, ເວົ້າຄວາມຊື່ ຂ້ອຍບໍ່ຮູ້ວ່າໃຜຈະໄດ້ຮັບໄຊຊະນະ ແຕ່ກໍຫວັງວ່າມັນຈະມີທາງອອກທີ່ດີ.”

ດັ່ງທີ່ຮູ້ກັນດີ ລັດອະລາບາມາເປັນລັດຫົວອະນຸລັກນິຍົມ, ເຊິ່ງພະອາຈານ ຣອບບີ້ ບອຍດ໌ (Robby Boyd) ໄດ້ສະແດງຄວາມຄິດເຫັນ ແລະມຸມມອງເປັນກາງກ່ຽວກັບນະໂຍບາຍຂອງສອງພັກການເມືອງ, ເຊິ່ງທ່ານກ່າວວ່າ ທັງສອງພັກມີນະໂຍບາຍທີ່ແຕກຕ່າງກັນ, ແຕ່ມີຈຸດປະສົງ ເພື່ອເຮັດໃຫ້ອາເມຣິກາ ດີຂຶ້ນກວ່າເກົ່າ.

ພະອາຈານ ຣອບບີ້ ບອຍດ໌, ສິດຍາພິບານປະຈໍາ Sherwood Baptist Church:

“ຂ້າພະເຈົ້າຕັ້ງໃຈຈະໄປລົງຄະແນນສຽງ ແລະຄິດວ່າ ການໄດ້ລົງຄະແນນສຽງເປັນສິດທິພິເສດ ພ້ອມທັງເປັນສິ່ງທີ່ດີໃນຊີວິດ, ວັດຂອງພວກເຮົາເປັນນຶ່ງສໍາລັບການເລືຶອກຕັ້ງ ດັ່ງນັ້ນ ພວກເຮົາຈະໄດ້ເປີດໝົດມື້ໃນວັນອັງຄານນີ້. ໃນນາມສ່ວນຕົວແລ້ວ ຂ້າພະເຈົ້າບໍ່ໄດ້ລົງນາມວ່າເລືອກຢູ່ພັກໃດ ຂ້າພະເຈົ້າຄິດວ່າ ສິ່ງສໍາຄັນແມ່ນມອງເບິ່ງຜູ້ລົງແຂ່ງຂັນທຸກໆຄົນວ່າ ວິທີການລົງຄະແນນສຽງຂອງພວກເຂົາຈະເປັນແນວໃດ? ນະໂຍບາຍຂອງພວກເຂົາເຈົ້າກ່ຽວກັບບັນຫາຕ່າງໆເປັນແນວໃດ ຄືຕົວຢ່າງ ຂ້າພະເຈົ້າພິຈາລະນາຕົນເອງວ່າເປັນຜູ້ສົ່ງເສີມຊີວິດ ແລະມັນກໍເປັນສິ່ງສໍາຄັນສໍາລັບຂ້າພະເຈົ້າຫຼາຍ, ຂ້າພະເຈົ້າຄິດວ່າ ການມີກອງທັບທີ່ເຂັ້ມແຂງສໍາລັບປະເທດຂອງພວກເຮົາ, ຂເາພະເຈົ້າຄິດວ່າ ການມີເສລີພາບໃນການນັບຖືສາດສະໜາ ກໍເປັນສິ່ງທີ່ປະເສີດ ແລະຂ້ອຍພິຈາລະນາເຖິງສິ່ງນັ້ນເປັນສໍາຄັນ ວ່າຜູ້ໃດທີ່ຂ້າພະເຈົ້າຈະລົງຄະແນນສຽງເລືອກຕັ້ງເອົາ.”

ອາລາບາມາ ເປັນນຶ່ງໃນສາມລັດທີ່ບໍ່ມີການລົງຄະແນນສຽງເລືອກຕັ້ງລ່ວງໜ້າ, ແຕ່ມີກໍລະນີຍົກເວັ້ນສໍາລັບຜູ້ທີ່ມີໜ້າທີຈໍາເປັນຕ້ອງອອກໄປວຽກຕ່າງລັດ ຫຼືຕ່າງປະເທດເທົ່ານັ້ນ, ສ່ວນປະຊາຊົນທົ່ວໄປ ມີສິດມາລົງຄະແນນສຽງໄດ້ໃນມື້ອື່ນ ເຊິ່ງເປັນມື້ເລືອກຕັ້ງ ຕາມຂົງເຂດທີ່ຕົນລົງທະບຽນ, ເຊິ່ງສະຖານທີ່ເລືອກຕັ້ງຈະເປີດໃນເວລາ 7 ໂມງເຊົ້າ ຫາ 7 ໂມງແລງ (ຕາມເວລາທ້ອງຖິ່ນທີ່ຊ້າກວ່າເວລາຂອງວໍຊິງຕັນດີຊີ 1 ຊົ່ວໂມງ).

ການຕັດສິນເລືອກຕັ້ງປະທານາທິບໍດີຂອງສະຫະລັດ ບໍ່ໄດ້ຕັດສິນໂດຍຄະແນນສຽງຂອງຜູ້ມີສິດເລືອກຕັ້ງ ແຕ່ຕັດສິນໂດຍຄະແນນຂອງຜູ້ຕາງໜ້າລັດ ຫຼື Electoral College ເຊິ່ງຈະມິການນັບຄະແນນເປັນລັດໆທັງໝົດ 50 ລັດ, ເຊິ່ງການລົງຄະແນນຂອງແຕ່ລະລັດແມ່ນອີງຕາມຈໍານວນຂອງປະຊາຊົນ, ດັ່ງນັ້ນ ລັດໃຫຍ່ຈຶ່ງນໍ້າໜັກຫຼາຍກວ່າໃນການຕັດສິນຊີ້ຂາດຜົນການເລືອກຕັ້ງແຫ່ງຊາດ, ເຊິ່ງຜູ້ໄດ້ຮັບຕໍາແໜ່ງປະທານາທິບໍດີ ຕ້ອງໄດ້ຮັບ 270 ຄະແນນຂອງຈໍານວນຜູ້ຕາງໜ້າທັງໝົດ 538 ຄະແນນ.

ປັດຈຸບັນ, ສະຫະລັດ ມີສະມາຊິກສະພາສູງ 33 ຄົນ, ໃນນັ້ນ ພັກເດໂມແຄຣັດມີ 19 ບ່ອນນັ່ງໃນສະພາ, ພັກຣີພັບບຣິກັນມີ 10 ບ່ອນນັ່ງ, ສະມາຊິກອິດສະຫຼະທີ່ບໍ່ຂຶ້ນກັບພັກໃດ ມີ 4 ບ່ອນນັ່ງ. ສໍາລັບສະມາຊິກສະພາຕໍ່າມີທັງໝົດ 435 ຄົນ, ໃນນັ້ນ ພັກຣິພັບບຣິກັນມີ 220 ບ່ອນນັ່ງ, ພັກເດໂມແຄຣັດມີ 212 ບ່ອນນັ່ງ. ສ່ວນລັດອະລາບາມາ ມີພຽງສະມາຊິກສະພາຕໍ່າຂອງສະຫະລັດ 7 ທ່ານເທົ່ານັ້ນ ທີ່ຈະລົງແຂ່ງຂັນໃນຄັ້ງນີ້, ໃນນັ້ນ 6 ທ່ານສັງກັດພັກຣີພັບບຣິກັນ ແລະ 1 ທ່ານ ສັງກັດພັກເດໂມແຄຣັດ.

ແນວໃດກໍຕາມ, ບໍ່ວ່າການເລືອກຕັ້ງໃນມື້ອື່ນຈະເປັນແບບໃດ ຫຼືມີຜົນອອກມາແນວໃດ, ສິ່ງນຶ່ງທີ່ປະຊາຊົນຫຼາຍຄົນຄາດຫວັງກໍຄື ປະທານາທິບໍດີຄົນທີ 47 ຂອງສະຫະລັດ ຈະແກ້ໄຂບັນຫາຕ່າງໆທີ່ຍັງຄົງຄ້າງ ແລະບັນລຸເປົ້າຫຼາຍທີ່ຄາດຫວັງໄວ້ນັ້ນ ໄດ້ແນວໃດ?