ປະຊາຊົນ ອາເມຣິກັນ ຫຼາຍລ້ານຄົນແມ່ນມີກຳນົດຈະອອກໄປປ່ອນບັດຂອງເຂົາເຈົ້າໃນວັນອັງຄານມື້ນີ້, ໃນຂະນະທີ່ເຂົາເຈົ້າຈະຕັດສິນວ່າຮອງປະທານາທິບໍດີ ຄາມາລາ ແຮຣິສ ຫຼື ອະດີດປະທານາທິບໍດີ ດໍໂນລ ທຣຳ ຈະເປັນປະທານາທິບໍດີຄົນຕໍ່ໄປຂອງປະເທດ.
ການຢັ່ງຫາງສຽງມາຈົນຮອດວັນເລືອກຕັ້ງມື້ນີ້ໄດ້ຊີ້ໃຫ້ເຫັນການແຂ່ງຂັນທີ່ສູສີກັນ, ໂດຍສະເພາະໃນບັນດາລັດທີ່ມີການແຂ່ງຂັນສຳຄັນ ທີ່ຈະເປັນກະແຈເພື່ອຕັດສິນຜູ້ຊະນະເລີດ.
ຜູ້ລົງແຂ່ງຂັນທັງສອງທ່ານນັ້ນໄດ້ທຳການຢຸດແວ່ໂຄສະນາຫາສຽງເມື່ອວັນຈັນວານນີ້ໃນລັດ ເພັນຊິລເວເນຍ, ເຊິ່ງແມ່ນນຶ່ງໃນບັນດາລັດທີ່ມີການຕິດຕາມຢ່າງໃກ້ຊິດ, ດ້ວຍການຈັດການຊຸມນຸມຫຼາຍຄັ້ງ ລວມທັງໃນງານທີ່ຢູ່ໃກ້ກັນໃນເຂດນະຄອນ ພິດສເບີກ ໃນຂະນະທີ່ພວກເພິ່ນສະແດງຄວາມໝັ້ນໃຈໃນການໂຄສະນາຫາສຽງຂອງພວກເພິ່ນ.
ທ່ານນາງ ແຮຣິສ ໄດ້ກ່າວຕໍ່ບັນດາຜູ້ສະໜັບສະໜູນທີ່ເຕົ້າໂຮມກັນຢູ່ໂຮງງານເຫຼັກເກົ່າແກ່ ທີ່ສະທ້ອນໃຫ້ເຫັນເຖິງປະຫວັດສາດຂອງເມືອງ ພິດສເບີກ ເຊິ່ງເປັນສູນກາງຂອງອຸດສາຫະກຳເຫຼັກຂອງປະເທດ ວ່າ “ມື້ອື່ນເປັນວັນເລືອກຕັ້ງ ແລະ ກຳລັງໃຈກໍຢູ່ຄຽງຂ້າງພວກເຮົາ. ການໂຄສະນາຫາສຽງຂອງເຮົາໄດ້ໃຊ້ປະໂຫຍດຈາກຄວາມທະເຍີທະຍານ, ຄວາມປາຖະໜາ ແລະ ຄວາມຝັນຂອງປະຊາຊົນ ອາເມຣິກັນ ແລະ ເຮົາຮູ້ວ່າເຖິງເວລາແລ້ວສຳລັບຜູ້ນຳລຸ້ນໃໝ່ໃນ ອາເມຣິກາ.”
ທ່ານນາງ ແຮຣິສ ກ່າວຕື່ມວ່າ “ພວກເຮົາຕ້ອງສິ້ນສຸດການແຂ່ງຂັນຢ່າງແຂງແກ່ນ. ບໍ່ມີຄວາມຜິດພາດ, ພວກເຮົາຈະຊະນະ.”
ທ່ານ ທຣຳ, ໄດ້ກ່າວຄຳປາໄສຕໍ່ຜູ້ສະໜັບສະໜູນຂອງທ່ານຢູ່ສະໜາມກິລາວ່າ, ການມີລັດຖະບານ ທຣຳ ອີກຄັ້ງນຶ່ງຈະ “ກໍ່ໃຫ້ເກີດການຂະຫຍາຍຕົວທາງດ້ານເສດຖະກິດທີ່ພິເສດທີ່ສຸດທີ່ໂລກບໍ່ເຄີຍເຫັນມາກ່ອນ.”
ທ່ານ ທຣຳ ກ່າວວ່າ “ຖ້າພວກເຈົ້າລົງຄະແນນສຽງໃຫ້ ຄາມາລາ, ເຈົ້າຈະມີຊີວິດທີ່ໜ້າເວດທະນາ, ລົ້ມແຫຼວ ແລະ ໄພພິບັດເປັນເວລາສີ່ປີ. ປະເທດຂອງເຮົາຈະບໍ່ມີວັນຟື້ນຟູກັບຄືນມາ. ລົງຄະແນນສຽງໃຫ້ຂ້ອຍ ແລະ ຂ້ອຍຈະຂຶ້ນຄ່າຈ້າງແຮງງານ, ມີລາຍໄດ້ສູງຂຶ້ນ, ແລະ ມີວຽກງານເຮັດງານທຳເກີດຂຶ້ນຢ່າງໃຫຍ່ໂຕ, ຮັ່ງມີ ແລະ ໂອກາດສຳລັບປະຊາຊົນ ອາເມຣິກັນທຸກເຊື້ອຊາດ, ສາສະໜາ, ສີຜິວ ແລະ ຄວາມເຊື່ອ. ທຸກໆຄົນເລີຍ.”
ກ່ອນການເລືອກຕັ້ງຂອງວັນອັງຄານມື້ນີ້, ປະຊາຊົນ ອາເມຣິກັນ ຫຼາຍກວ່າ 81 ຄົນແມ່ນໄດ້ໄປປ່ອນບັດຄະແນນສຽງກ່ອນກຳນົດແລ້ວ, ບໍ່ວ່າຈະໄປດ້ວຍຕົນເອງ ຢູ່ສະຖານທີ່ປ່ອນບັດ ຫຼື ທາງໄປສະນີ.
ຟໍຣັມສະແດງຄວາມຄິດເຫັນ