ທ່ານນາງ ມົນທາທິບ ຈັນເພັງໄຊ ຫົວໜ້າກົມກະສິກໍາ
ກະຊວງກະສິກໍາ-ປ່າໄມ້ໄດ້ຖະແຫລງຢືນຢັນວ່າ ທາງ
ການກະຊວງກະສິກໍາ-ປ່າໄມ້ລາວໄດ້ວາງແຜນການ ແລະ
ເປົ້າໝາຍທີ່ຈະສົ່ງເສີມການຜະລິດສິນຄ້າກະເສດ ເຊັ່ນເຂົ້າ, ມັນຕົ້ນ, ອ້ອຍ, ສາລີ ແລະ
ກາເຟເພື່ອສົ່ງອອກໄປຕ່າງປະເທດໃຫ້ໄດ້ຫລາຍຂຶ້ນຢ່າງຕໍ່ເນື່ອງໃນ ຕະຫຼອດໄລຍະ 5 ປີ
ຕໍ່ໄປນີ້ກໍ່ຄືຈາກປີ 2011-2015ນີ້.
ສໍາລັບຜົນຜະລິດເຂົ້ານັ້ນ ລັດຖະບານລາວໄດ້ຕັ້ງເປົ້າໝາຍທີ່ຈະສົ່ງເສີມການຜະລິດໃຫ້ໄດ້ບໍ່
ໜ້ອຍກວ່າ 4.15 ລ້ານ ໂຕນ ພາຍໃນປີ 2015 ດ້ວຍການຂະຫຍາຍລະບົບຊົນລະປະ
ທານເພື່ອຕອບສະໜອງນໍ້າໃຫ້ແກ່ພື້ນທີ່ປູກເຂົ້າເພີ້ມຂຶ້ນຈາກ 362,000 ເຮັກຕ້າ ໃນປັດຈຸ
ບັນເປັນບໍ່ໜ້ອຍກວ່າ 8 ແສນກວ່າເຮັກຕ້າ ຊຶ່ງຈະເຮັດໃຫ້ລາວມີຜົນຜະລິດເຂົ້າເຫຼືອກິນເພື່ອ
ສົ່ງອອກໄປຕ່າງປະເທດຄິດເປັນມູນຄ່າຫຼາຍວ່າ 15 ລ້ານໂດລ້າ.
ແຕ່ຢ່າງໃດກໍ່ຕາມທາງດ້ານ ທ່ານນາງ ມົນທາທິບກໍຍອມຮັບວ່າ ການທີ່ຈະສາມາດບັນລຸເປົ້າ
ໝາຍດັ່ງກ່າວ ໄດ້ຢ່າງແທ້ຈິງນັ້ນກໍ່ບໍ່ແມ່ນເລື້ອງງ່າຍເນື່ອງຈາກວ່າລາວກໍາລັງປະເຊີນກັບບັນ
ຫາທ້າທາຍຫລາຍດ້ານທີ່ເຮັດໃຫ້ເກີດຄວາມບໍ່ໝັ້ນຄົງທາງດ້ານສະບຽງອາຫານຂອງປະຊາ
ຊົນລາວໄດ້ ເຊັ່ນການປ່ຽນສະພາບເນື້ອທີ່ນາ ແລະພື້ນທີ່ການກະເສດໄປເປັນເຂດທີ່ຢູ່ອາໃສ
ແລະເຂດຊຸມຊົນຫລາຍຂຶ້ນນັບມື້.
ໂດຍສະເພາະແມ່ນພື້ນທີ່ການກະເສດທີ່ຢູ່ໃກ້ເຂດຕົວເມືອງໃຫຍ່ ແລະທີ່ຢູ່ແຄມທາງນັ້ນ ນັບ
ເປັນພື້ນທີ່ການກະເສດທີ່ຖືກແປສະພາບໄປເປັນເຂດທີ່ຢູ່ອາໃສເພີ່ມຂຶ້ນຢ່າງວ່ອງໄວ. ອີກທັງ
ຍັງຄົງບໍ່ມີການກໍານົດພື້ນທີ່ການກະເສດ ແລະເຂດທີ່ຢູ່ອາໃສໃນລາວຢ່າງຊັດເຈນເມື່ອປະ
ກອບກັບການທີ່ໃນເຂດແຂວງພາກເໜືອກໍ່ຍັງຂາດແຄນລະບົບຊົນປະທານ ເນື່ອງຈາກພື້ນ ທີ່ສ່ວນໃຫຍ່ຢູ່ໃນເຂດພູດອຍອີກດ້ວຍແລ້ວ ກໍນັບເປັນອີກປັດໃຈນຶ່ງທີ່ຈະສົ່ງຜົນກະທົບຕໍ່ ແຜນການດັ່ງກ່າວຂອງທາງການລາວ, ດັ່ງທີ່ເຈົ້າໜ້າທີ່ລາວໄດ້ອະທິບາຍເຖິງສະພາບການ
ທີ່ເກີດຂຶ້ນໃນແຂວງຫົວພັນໃນຕອນນຶ່ງວ່າ:
“ເນື່ອງຈາກວ່າມີສະພາບ
ໄພແລ້ງ ຊັ້ນຈຶ່ງເຮັດໃຫ້
ເນື້ອທີ່ການຜະລິດຂອງ
ພວກເຮົາຫັ້ນ ຖືວ່າມີການ
ເສຍຫາຍໄປຈໍານວນນຶ່ງ
ເຮັດໃຫ້ການຜະລິດຂອງ
ພວກເຮົາບໍ່ໄດ້ຕາມແຜນ
ການພວກເຮົາວາງໄວ້
50,144 ເຮັກຕ້າ ແຕ່ວ່າ
ຜົນກະທົບຈາກໄຟແຫ້ງ
ແລ້ງນັ້ນແມ່ນມັນມີເນື້ອທີ່
ທີ່ພວກເຮົາບໍ່ໄດ້ປັກດໍາ
ແລະບາງເນື້ອທີ່ປັກດໍາໄປແລ້ວ ແຕ່ໄພແລ້ງແກ່ຍາວມັນກະຕາຍ”
ນອກຈາກນີ້ປາກົດວ່າກະເສດຕະກອນລາວຈຳນວນບໍ່ໜ້ອຍກໍໄດ້ພາກັນປະລະຈາກການ
ປູກເຂົ້າໄປປູກພືດເສດ ຖະກິດຊະນິດອື່ນໆ ເພື່ອຕອບສະໜອງຕະຫລາດໃນຕ່າງປະເທດ
ເປັນດ້ານຫລັກຫລາຍຂຶ້ນອີກດ້ວຍແລ້ວ ກໍຍັງເຮັດໃຫ້ຄົນລາວຕ້ອງຂາດແຄນເຂົ້າກິນໃນ
ໄລຍະຕໍ່ໄປຢ່າງຫລີກລ້ຽງບໍ່ໄດ້ເຊັ່ນກັນ.
ທັງນີ້ໂດຍລັດຖະບານລາວວາງແຜນການທີ່ຈະ
ຂະຫຍາຍພື້ນທີ່ປູກເຂົ້າຈາກ 8 ແສນກວ່າ
ເຮັກຕ້າໃນປັດຈຸບັນ ໃຫ້ເພີ່ມຂຶ້ນເປັນບໍ່ໜ້ອຍ
ກວ່າ 2 ລ້ານເຮັກຕ້າພາຍໃນປີ 2020
ແລະຖ້າຫາກວ່າ ບໍ່ສາມາດຈະຂະຫຍາຍໄດ້
ຕາມເປົ້າໝາຍທີ່ວາງໄວ້ດັງກ່າວກໍຍ່ອມໝາຍ
ເຖິງການທີ່ປະຊາຊົນລາວຈະຕ້ອງຜະເຊີນກັບ
ບັນຫາຂາດເຂົ້າກິນຢ່າງໜັກໜ່ວງຫຼາຍ ເນື່ອງ
ຈາກຄາດໝາຍວ່າໃນປີ 2020 ລາວຈະມີ
ປະຊາກອນເພີ່ມຂຶ້ນເປັນຫລາຍກວ່າ 8 ລ້ານ
ຄົນ ຊຶ່ງຈະຕ້ອງມີຜົນຜະລິດເຂົ້າກິນຫລາຍກວ່າ 4 ລ້ານໂຕນ ຈຶ່ງຈະພຽງພໍກັບຄວາມຕ້ອງ
ການບໍລິໂພກພາຍໃນປະເທດນັ້ນເອງ.
ທັງນີ້ໂດຍໃນປີ 2010 ທີ່ຜ່ານມາ ກະເສດຕະກອນລາວໃນທົ່ວປະເທດມີຜົນຜະລິດເຂົ້າ
ລວມກັນທັງໝົດ 3 ລ້ານຕັນຊຶ່ງຖືວ່າຕ່ຳກວ່າເປົ້າໝາຍທີ່ວາງໄວ້ເຖິງ 2 ແສນກວ່າໂຕນ
ເນື່ອງຈາກວ່າເຂດພາກກາງ ແລະພາກໃຕ້ຂອງລາວໄດ້ປະເຊີນກັບໄພນ້ຳຖ້ວມຢ່າງໜັກ
ໜ່ວງ. ສ່ວນຢູ່ພາກເໜືອກໍ່ຕ້ອງຜະເຊີນກັບໄພແຫ້ງແລ້ງຢ່າງກວ້າງຂວາງ.
