ທ່ານຈູມມະລີ ໄຊຍະສອນ ປະທານປະເທດລາວ ໄດ້ກ່າວຢືນຢັນຕໍ່ກອງປະຊຸມສຸດຍອດ ສະຫັດສະວັດ ດ້ານການພັດທະນາໃນໂອກາດກອງປະຊຸມສະມັດຊາໃຫຍ່ຄັ້ງທີ່ 65 ຂອງ ອົງການສະຫະປະຊາຊາດຢູ່ນະຄອນນີວຢ໊ອກ ເມື່ອບໍ່ນານມານີ້ວ່າ ການຂະຫຍາຍຕົວທາງ ເສດຖະກິດຢ່າງຕໍ່ເນື່ອງໃນລາວ ນັບເປັນປັດໃຈສໍາຄັນ ທີ່ເຮັດໃຫ້ບັນຫາຄວາມທຸກຈົນຂອງ ປະຊາຊົນລາວລົດລົງຢ່າງຕໍ່ເນື່ອງອີກດ້ວຍເຊັ່ນກັນ. ທັງນີ້ກໍເພາະວ່າ ໃນໄລຍະແຜນການ ພັດທະນາປະຈໍາປີ 2001-2005 ທີ່ເສດຖະກິດຂອງລາວ ມີການຂະຫຍາຍຕົວໃນອັດຕາ ສະເລ່ຍ 6.2% ຕໍ່ປີ ແລະກໍເພີ່ມຂຶ້ນເປັນ 7% ຕໍ່ປີ ໃນໄລຍະແຜນການພັດທະນາປີ 2006-2010 ນີ້ ກໍໄດ້ເປັນຜົນເຮັດໃຫ້ ອັດຕາຄວາມທຸກຈົນຂອງປະຊາຊົນລາວ ລົດລົງ ຈາກ 48% ຂອງຈໍານວນປະຊາຊົນທັງໝົດໃນປີ 1990 ມາເປັນ 26% ຂອງຈຳນວນປະ ຊາກອນລາວທັງໝົດທີ່ມີຢ່ 6 ລ້ານກວ່າຄົນໃນປັດຈຸບັນນີ້ ໂດຍກໍລະນີນຶ່ງທີ່ສາມາດວັດແທກ ໃຫ້ເຫັນເຖິງສະພາບຊີວິດຄວາມເປັນຢູ່ທີ່ດີຂຶ້ນຂອງປະຊາຊົນລາວ ໄດ້ຢ່າງເປັນຮູບປະທໍານັ້ນ ກໍແມ່ນຄຸນນະພາບຊີວິດທີ່ດີຂຶ້ນຂອງແມ່ແລະເດັກ ດັ່ງທີ່ທ່ານ ຈູມມະລີ ໄດ້ກ່າວວ່າ:
“ອັດຕາການເສຍຊີວິດຂອງແມ່ຫລຸດລົງຈາກ 650 ຄົນມາເປັນ 405 ຄົນ ຕໍ່ແມ່ ຍິງຖືພາ ແລະຫລັງເກີດລູກ 100 ພັນຄົນ ອັດຕາການເສຍຊີວິດຂອງເດັກນ້ອຍ ຫລຸດລົງຈາກ 104 ຄົນມາເປັນ 70 ຄົນຕໍ່ເດັກນ້ອຍ ທີ່ມີຊີວິດ 1.000 ຄົນ”
ຊຶ່ງດ້ວຍສະພາບການດັ່ງກ່າວ ກໍຍັງເຮັດໃຫ້ຜູ້ນໍາຂອງລາວເຊື່ອໝັ້ນວ່າ ການພັດທະນາ ເສດຖະກິດແລະສັງຄົມຂອງລາວໃນໄລຍະ 5 ປີຕໍ່ໜ້ານີ້ ກໍຄືໃນຊ່ວງປີ 2011-2015 ລັດຖະບານລາວຈະສາມາດແກ້ໄຂ ບັນຫາຄວາມຍາກຈົນຂອງປະຊາຊົນລາວໄດ້ ໂດຍ ພື້ນຖານອີກດ້ວຍ.
ສໍາລັບໃນໄລຍະ 5 ປີຕໍ່ໜ້ານີ້ ລັດຖະບານລາວ ໄດ້ວາງ ແຜນການທີ່ຈະດຶງດູດເອົາການລົງທຶນຈາກຕ່າງປະເທດໃຫ້ ໄດ້ໃນມູນຄ່າລວມເຖິງ 40 ພັນລ້ານໂດລາສະຫະລັດ ສໍາລັບໂຄງການການຂະໜາດໃຫຍ ຫລື Mega Projects ຈໍານວນຫລາຍກວ່າ 200 ໂຄງການ ແລະ ທີ່ສໍາຄັນນັ້ນກໍຄື ໂຄງການສ້າງທາງລົດໄຟຈາກນະຄອນວຽງຈັນໄປປະເທດຈີນ ໂຄງການຂະຫຍາຍສາຍສົ່ງກະແສໄຟຟ້າແຮງສູງທົ່ວປະເທດ ໂຄງການສ້າງທາງຫລວງແຫ່ງຊາດ ຂະໜານກັບເສັ້ນທາງ ເລກ 3 ໂຄງການສ້າງເຂື່ອນໄຟຟ້າ 14 ແຫ່ງ ໂຄງການ ສ້າງທາງດ່ວນໄປຫວຽດນາມ ໂຄງການຂຸດຄົ້ນແຮ່ເຫລັກ ແຮ່ໂປຣແຕສ ແລະແຮ່ບ໊ອກ ໄຊດ໌ຢູ່ພາກໃຕ້ເປັນຕົ້ນ.
ສ່ວນໃນໄລຍະແຜນການພັດທະນາປີ 2010-2011 ນີ້ ລັດຖະບານລາວ ກໍໄດ້ວາງເປົ້າ ໝາຍ ທີ່ຈະເຮັດໃຫ້ຍອດຜະລິດຕະພັນລວມພາຍໃນ ຫລື GDP ຂະຫຍາຍຕົວເພີ່ມຂຶ້ນ ບໍ່ຕໍ່າກວ່າ 8% ຊຶ່ງກໍຈະເຮັດໃຫ້ມູນຄ່າ GDP ໄລ່ສະເລ່ຍເປັນລາຍຮັບຂອງປະຊາກອນ ລາວໄດ້ 9.6 ລ້ານກີບ ຫລືປະມານ 1,130 ໂດລາຕໍ່ຄົນຕໍ່ປີ ແລະ ການທີ່ຈະເຮັດໃຫ້ ເປົ້າໝາຍດັ່ງກ່າວ ສາມາດເກີດຂຶ້ນໄດ້ຢ່າງແທ້ຈິງນັ້ນ ກໍມີຄວາມຈໍາເປັນທີ່ຈະຕ້ອງຊຸກຍູ້ ໃຫ້ການຜະຫລິດໃນພາກກະສິກໍາ-ປ່າໄມ້ ມີການຂະຫຍາຍຕົວເພີ່ມຂຶ້ນບໍ່ໜ້ອຍກວ່າ 3.5% ແລະ ພາກບໍລິການກໍຈະຕ້ອງຂະຫຍາຍຕົວບໍ່ຕໍ່າກວ່າ 6.7%. ສ່ວນພາກອຸດສາຫະກໍານັ້ນ ກໍຈະຕ້ອງຂະຫຍາຍຕົວເຖິງ 17.3%.
ສໍາລັບໃນໄລຍະແຜນການພັດທະນາປະຈໍາປີ 2009-2010 ທີ່ກໍາລັງຈະສິ້ນສຸດແຜນການ ລົງໃນທ້າຍເດືອນກັນຍານີ້ ລັດຖະບານລາວກໍເຊື່ອໝັ້ນວ່າ GDP ຈະຂະຫຍາຍຕົວໃນອັດ ຕາສະເລ່ຍບໍ່ຕໍ່າກວ່າ 7.8% ຊຶ່ງກໍຈະເຮັດໃຫ້ GDP ຂອງລັດຖະບານລາວ ມີມູນຄ່າ ລວມເຖິງ 54.225 ຕື້ກີບ ຫລື ປະມານ 6.450 ລ້ານໂດລາ ຕາມອັດຕາແລກປ່ຽນໃນ ປັດຈຸບັນ.
ພາກການຜະຫລິດທີ່ມີການຂະຫຍາຍຕົວເພີ່ມຂຶ້ນຫລາຍທີ່ສຸດນັ້ນ ກໍຄືພາກອຸດສາຫະກໍາ ທີ່ຂະຫຍາຍຕົວເຖິງ 17% ຕິດຕາມດ້ວຍພາກບໍລິການທີ່ຂະຫຍາຍຕົວບໍ່ໜ້ອຍກວ່າ 6.7% ແລະ ພາກກະສິກໍາ-ປ່າໄມ້ ກໍຈະຂະຫຍາຍຕົວບໍ່ຕໍ່າກວ່າ 3.2% ຕາມລໍາດັບ.
