ເຈົ້າໜ້າທີ່ຂັ້ນສູງໃນສະຫະພັນກໍາມະບານລາວໃຫ້ການຢືນ
ຢັນວ່າ ສະຫະພັນກໍາມະບານລາວໄດ້ເຈລະຈາຮ່ວມກັນກັບ
ສະມາຄົມນາຍຈ້າງໃນລາວຢ່າງເປັນທາງການແລ້ວ ເມື່ອບໍ່
ນານມານີ້ ໂດຍໄດ້ມີຂໍ້ສະຫລຸບຮ່ວມກັນໃນຫລັກການວ່າ
ເຫັນສົມຄວນມີການປັບຂຶ້ນອັດຕາຄ່າຈ້າງຂັ້ນຕໍ່າສຸດສໍາລັບ
ແຮງງານໃນທົ່ວປະເທດລາວພາຍໃນຕົ້ນປີ 2011 ເພື່ອໃຫ້
ສອດຄ່ອງກັບສະພາວະຄ່າຄອງຊີບທີ່ເພີ້ມຂຶ້ນຢ່າງຕໍ່ເນື່ອງ,
ດັ່ງທີ່ເຈົ້າໜ້າທີ່ຂັ້ນສູງໃນສະຫະພັນກໍາມະບານລາວໄດ້ເນັ້ນ ຢໍ້າໃນຕອນໜຶ່ງວ່າ:
“ອີງໃສ່ຄ່າຄອງຊີບ ອີງໃສ່ສະພາບການເສດຖະກິດການເງິນຂອງໂລກ ກໍຄືພາຍ
ໃນຂອງພວກເຮົານີ້ ມັນມີການປ່ຽນແປງ
ຈັ່ງຊັ້ນ ພວກເຮົາຈຶ່ງມີຄວາມຈໍາເປັນຈະ
ຕ້ອງໄດ້ປັບປຸງກ່ຽວກັບເງິນເດືອນຕໍ່າສຸດ
ຂອງກໍາມະກອນຂຶ້ນຕື່ມອີກ. ປັດຈຸບັນນີ້
ພວມກໍາລັງຄົ້ນຄວ້າເປັນເອກະພາບກັນ
ແລ້ວ ແລະຈະໄດ້ນໍາສະເໜີເພື່ອຂໍອະນຸ ຍາດຈາກລັດຖະບານ.”
ໃນປັດຈຸບັນນີ້ ອັດຕາຄ່າຈ້າງຂັ້ນຕໍ່າຂອງບັນດາຜູ້ໃຊ້ແຮງງານໃນລາວນັ້ນ ຢູ່ທີ່ລະດັບ
348,000 ກີບ ຊຶ່ງເມື່ອລວມກັບຄ່າລ່ວງເວລາໃນການທຳງານ ແລະເງິນອຸດໜູນຕ່າງໆ
ເພື່ອການຄອງຊີບແລ້ວ ກໍຈະເຮັດໃຫ້ຜູ້ໃຊ້ແຮງງານລາວ ແຕ່ລະຄົນ ມີລາຍໄດ້ສະເລ່ຍ
ປະມານ 5 ແສນກວ່າກີບຕໍ່ເດືອນ ຊຶ່ງສຳລັບຜູ້ໃຊ້ແຮງງານແລ້ວ ຖືວ່າເປັນລາຍໄດ້ທີ່ຕໍ່າ
ຫລາຍເມື່ອທຽບກັບຄ່າຄອງຊີບ ທີ່ເພີ້ມສູງຂຶ້ນຕະຫລອດເວລາ.
ຕົວຢ່າງກໍຄື ລາຄາສິນຄ້າອຸບປະໂພກ ບໍລິໂພກໃນທົ່ວປະ
ເທດລາວໄດ້ປັບຕົວສູງຂຶ້ນເຖິງ 13.19% ໃນເດືອນຕຸລາ
ແລະ ເຖິງແມ່ນວ່າຈະລົດລົງໃນຊ່ວງເດືອນພະຈິກກໍຕາມ
ຫາກແຕ່ຍັງສູງເຖິງ 11% ເມື່ອທຽບກັບເດືອນມິຖຸນາຂອງ
ປີດຽວກັນ. ສ່ວນອັດຕາເງິນເຟີ້ ກໍປັບຕົວສູງຂຶ້ນເກີນກວ່າ
8% ໃນເດືອນກັນຍາ ແລະເຖິງແມ່ນວ່າຈະລົດລົງໃນຊ່ວງ
ເດືອນພະຈິກກໍຕາມ ຫາກແຕ່ອັດຕາເງິນເຟີ້ສະເລ່ຍໃນ 2
ເດືອນດັ່ງກ່າວນີ້ ກໍຍັງສູງເກີນກວ່າລະດັບ 7% ຢູ່ເລື້ອຍ
ມາຈົນເຖິງຂະນະນີ້.
ກ່ອນໜ້ານີ້ທ່ານ ຄໍາຫລ້າ ລໍລອນສີ ຮອງປະທານສະຫະພັນກຳມະບານລາວ ກໍໄດ້ໃຫ້
ການຍອມຮັບວ່າ ສະຖານະການທີ່ໜ້າເປັນຫ່ວງອີກຢ່າງນຶ່ງ ກໍຄືການເອົາລັດເອົາປຽບຕໍ່ຜູ້
ໃຊ້ແຮງງານໂດຍບັນດານາຍຈ້າງໃນລາວນັ້ນ ກໍຍັງຄົງເກີດຂຶ້ນຢູ່ເລື້ອຍມາ. ເຖິງແມ່ນວ່າສະ
ຫະພັນກໍາມະບານລາວຈະໄດ້ດຳເນີນມາດຕະການກວດກາຢ່າງຕໍ່ເນື່ອງກໍຕາມ ແຕ່ກໍຍັງຄົງ
ບໍ່ສາມາດທີ່ຈະກວດກາຢ່າງທົ່ວເຖິງໄດ້ແຕ່ຢ່າງໃດ.
ການທີ່ວ່າລາວມີອັດຕາຄ່າຈ້າງຕໍ່າຫລາຍເມື່ອສົມທຽບໃສ່ກັບ
ຄ່າຄອງຊີບທີ່ເພີ້ມສູງຂຶ້ນທຸກມື້ນັ້ນ ກໍນັບວ່າເປັນເງື່ອນໄຂນຶ່ງ
ທີ່ເຮັດໃຫ້ແຮງງານລາວຕ້ອງພະຍາຍາມເດີນທາງໄປລອບທໍາ
ງານໂດຍຜິດກົດໝາຍ ຢູ່ໃນປະທດໄທເພີ້ມຫລາຍຂຶ້ນນັບມື້
ເຊັ່ນດຽວກັນ ເຖິງແມ່ນວ່າຈະສ່ຽງຕໍ່ການທີ່ຈະຖືກທາງການ
ໄທຈັບກຸມຄຸມຂັງ ໃນຂໍ້ຫາເຂົ້າເມືອງໂດຍຜິດກົດໝາຍ ແລະ
ສ່ຽງຕໍ່ການຕົກເປັນເຫຍື່ອຂອງຂະບວນການຄ້າມະນຸດຂ້າມ
ຊາດກໍຕາມ, ຫາກແຕ່ພວກເຂົາເຈົ້າກໍຍອມເພື່ອແລກກັບຄ່າ
ຈ້າງທີ່ສູງກວ່າຢູ່ໃນລາວ.
ນອກຈາກນີ້ ການທີ່ຢູ່ໃນລາວກໍມີຕໍາແໜ່ງງານຢ່າງຈໍາກັດອີກດ້ວຍແລ້ວ ຈຶ່ງເຮັດໃຫ້ແຮງງານ
ລາວສ່ວນໃຫຍ່ ໄດ້ພາກັນສະມັກໃຈເດີນທາງໄປລັກລອບທໍາງານຢູ່ໃນໄທຫລາຍຂຶ້ນນັບມື້
ໂດຍອົງການເຄືອຂ່າຍເພື່ອການຄຸ້ມຄອງແຮງງານຕ່າງດ້າວຈາກລາວ ພະມ້າ ແລະກໍາປູເຈຍ
ໃນໄທເຊື່ອວ່າໃນປັດຈຸບັນນີ້ ມີແຮງງານລາວທີ່ລັກລອບທໍາງານໂດຍຜິດກົດໝາຍໃນໄທ
ຫລາຍກວ່າ 4 ແສນຄົນ ໃນຂະນະທີ່ທາງການລາວນັ້ນກັບເຊື່ອວ່າມີຢູ່ແຕ່ພຽງ 2 ແສນ
ກວ່າຄົນເທົ່ານັ້ນ.
