ທ່ານ John Kerry ລັດຖະມົນຕີຕ່າງປະເທດສະຫະລັດ ແລະ
ທ່ານ Mohammad Javad Zarif ລັດຖະມົນຕີຕ່າງປະເທດ
ອີຣ່ານໄດ້ເລີ້ມທຳການພົບປະຫາລືກັນໜ້າຕໍ່ໜ້າກັນທີ່ Oman
ໃນເວລາພຽງແຕ່ 2 ສັບປະດາເທົ່ານັ້ນກ່ອນເວລາເສັ້ນຕາຍສຳ
ລັບການບັນລຸຂໍ້ຕົກລົງກັນວ່າດ້ວຍນີວເຄລຍນັ້ນ.
ທ່ານນາງ Catherine Ashton ຫົວໜ້ານະໂຍບາຍຕ່າງປະເທດ
ຂອງສະຫະພາບຢູໂຣບ ກໍໄດ້ປະກອບສ່ວນນຳເຊັ່ນກັນ ໃນການ
ພົບປະສົນ ທະນາກັນໃນວັນອາທິດມື້ນີ້.
ທ່ານ Kerry ແລະທ່ານ Zarif ໄດ້ຈັບມືກັນ ແຕ່ບໍ່ໄດ້ກ່າວຖ້ອຍຖະແຫຼງໃດໆຕໍ່ສື່ມວນຊົນ ໃນຂະນະທີ່ພວກທ່ານກະກຽມເພື່ອເລີ້ມທຳການໂອ້ລົມສົນທະນາກັນ ທີ່ນະຄອນຫຼວງ Muscat ຂອງ Oman ນັ້ນ.
ໃນການຖະແຫຼງ ກ່ອນອອກເດີນທາງຈາກປັກກິ່ງໃນວັນເສົາວານນີ້ ທ່ານ Kerry ກ່າວວ່າ “ມີຊ່ອງຫວ່າງອັນແທ້ຈິງຫຼາຍຢ່າງ” ໃນການ ໂອ້ລົມສົນທະນາກັນ ເພື່ອໃຫ້ບັນລຸຂໍ້ຕົກ
ລົງກັນກັບອີຣ່ານ ກ່ຽວກັບໂຄງການນີວເຄລຍຂອງອີຣ່ານນັ້ນ ແລະທ່ານໄດ້ກ່າວເນັ້ນເຊັ່ນກັນວ່າ ການເຈລະຈາເລື້ອງນີວເຄລຍນີ້ ແມ່ນແຍກຈາກເລື້ອງອື່ນໆ ຮວມທັງ ການຮ່ວມມືທີ່ເປັນໄປໄດ້ກັບອີຣ່ານໃນການຕໍ່ສູ້ກັບກຸມລັດອິສລາມນັ້ນ.
ປະທານາທິບໍດີບາຣັກ ໂອບາມາ ກ່າວຫວ່າງໄວໆຜ່ານມານີ້ວ່າ ສະ ຫະລັດ ແລະກຸ່ມພັນທະມິດ P5 ບວກນຶ່ງ ໄດ້ມອບໂຄງຮ່າງສຳລັບຂໍ້ຕົກລົງດ້ານນີວເຄລຍ ໃຫ້ແກ່ອີຣ່ານ
ແລ້ວ.
ທ່ານເອີ້ນໂຄງຮ່າງດັ່ງກ່າວວ່າເປັນບາດກ້າວເທື່ອລະກ້າວທີ່ກວດສອບໄດ້ ສຳລັບອີຣ່ານ
ທີ່ຈະຫລຸດພົ້ນຈາກການລົງໂທດທີ່ເຮັດໃຫ້ປະເທດ ຕົກຢູ່ໃນສະພາບອຳມະພາດ ແລະກັບຄືນມາຮ່ວມປະຊາຄົມນາໆຊາດ. ແຕ່ປະທານາທິບໍດີ ໂອບາມາ ເອີ້ນເລື້ອງນີ້ວ່າ “ເປັນຄຳຖາມທີ່ເປີດກວ້າງອັນນຶ່ງ” ວ່າ ຄະນະນຳພາຂອງອີຣ່ານຈະເຮັດຫຼືບໍໃນອັນທີ່ດີທີ່ສຸດສຳລັບອີຣ່ານນັ້ນ.
ກຸ່ມ P5 ບວກ 1 ຫຼືກຸ່ມ 5 ປະເທດສະມາຊິກຖາວອນຂອງສະພາຄວາມໝັ້ນຄົງສະຫະປະ
ຊາຊາດແລະເຢຍຣະມັນ ຢາກໃຫ້ອີຣ່ານຫຼຸດ ຜ່ອນສະມັດຖະພາບໃນການຫລອມທາດຢູເຣນຽມຂອງຕົນ ເພື່ອບໍ່ໃຫ້ຕົນສາມາດຜະລິດລະເບີດນີວເຄລຍໄດ້ນັ້ນ ເພື່ອເປັນການແລກປ່ຽນ ສະຫະປະຊາຊາດ ຈະຍົກເລີກການລົງໂທດຂອງຕົນຕໍ່ອີຣ່ານ.
ອີຣ່ານໄດ້ປະຕິເສດມາໂດຍຕະຫຼອດ ທີ່ວ່າຕົນຢາກຜະລິດອາວຸດນີວເຄລຍນັ້ນ.
