ທາງການລາວວາງຄາດໝາຍທີ່ຈະເພີ່ມການສົ່ງອອກໃນປີ
2011 ນີ້ໃຫ້ໄດ້ເກີນ 17% ຫາກແຕ່ຈະພ້ອມປະຕິບັດ
ຕາມຂໍ້ຕົກລົງວ່າດ້ວຍເຂດການຄ້າເສລີອາຊຽນໄດ້ຢ່າງ
ແທ້້ຈິງ ພາຍໃນຕົ້ນປີ 2015.
ທາງການກະຊວງອຸດສະຫະກໍາ ແລະການຄ້າຂອງລາວ
ລາຍງານວ່າໃນຕະຫຼອດປີ 2011 ນີ້ ທາງການກະຊວງອຸດ
ສະຫະກໍາ ແລະການຄ້າໄດ້ວາງຄາດໝາຍທີ່ຈະສົ່ງເສີມການ
ສົ່ງອອກສິນຄ້າໄປຕ່າງປະເທດໃຫ້ໄດ້ໃນມູນຄ່າລວມບໍ່ໜ້ອຍ
ກວ່າ 1,220 ລ້ານໂດລາ ຫຼືເພີ່ມຂຶ້ນເຖິງ 17.55% ເມື່ອ
ທຽບກັບມູນຄ່າການສົ່ງອອກສິນຄ້າໃນຕະຫຼອດປີ 2010 ທີ່ ຜ່ານມາ.
ສ່ວນການນໍາເຂົ້າສິນຄ້າຈາກຕ່າງປະເທດນັ້ນ ທາງການ
ກະຊວງອຸດສາຫະກໍາ ແລະການຄ້າຂອງລາວກໍຈະຄວບຄຸມ
ໃຫ້ຢູ່ໃນລະດັບມູນຄ່າລວມບໍ່ເກີນ 1,240 ລ້ານໂດລາ ຊຶ່ງ
ກໍ່ຈະເຮັດໃຫ້ລາວຂາດດຸນການຄ້າກັບຕ່າງປະເທດ ໃນມູນ
ຄ່າລວມ ຕໍ່າກ່ວາ 20 ລ້ານໂດລາ ຫຼືບໍ່ເຖິງ 1% ຂອງມູນ
ຄ່າການຄ້າຕ່າງປະເທດທັງໝົດ.
ປໍ້ານໍ້າມັນແຫ່ງນຶ່ງໃນ ນະຄອນຫລວງວຽງຈັນ
ສໍາລັບໃນປີ 2010 ທີ່ຜ່ານມານັ້ນກໍປາກົດວ່າລາວໄດ້ສົ່ງ
ອອກສິນຄ້າໄປຕ່າງປະເທດຄິດເປັນມູນຄ່າລວມ 1,030
ລ້ານໂດລາ ຫຼືເກີນຄາດໝາຍ ເຖິງ 18.38% ຫາກແຕ່
ວ່າສໍາລັບໃນດ້ານການນໍາເຂົ້າສິນຄ້າຈາກຕ່າງປະເທດນັ້ນ
ກໍມີມູນຄ່າລວມເຖິງ 1,250 ລ້ານໂດລາ ຊຶ່ງຖືວ່າເກີນລະ
ດັບຄາດໝາຍທີ່ວາງເອົາໄວ້ເຖິງ 19.49% ແລະກໍເຮັດໃຫ້
ລາວຕ້ອງຂາດດຸນການຄ້າຕ່າງປະເທດ ເຖິງ 220 ລ້ານ ໂດລາ.
ເພາະສະນັ້ນ ຖ້າຫາກວ່າສະພາວະການຄ້າຕ່າງປະເທດໃນປີ 2011 ນີ້ ຍັງຄົງເປັນຄືກັນ
ກັບໃນປີ 2010 ທີ່ຜ່ານ ມານັ້ນ ກໍເຊື່ອແນ່ວ່າລາວຈະຍັງຕ້ອງປະເຊີນກັບບັນຫາຂາດດຸນ
ການຄ້າກັບຕ່າງປະເທດເພີ່ມຂຶ້ນຕື່ມອີກ ຊຶ່ງກໍ່ມີຄວາມເປັນໄປໄດ້ວ່າລາວຍັງຈະຕ້ອງຂາດ
ດຸນການຄ້າຕ່າງປະເທດ ຄິດເປັນມູນຄ່າບໍ່ໜ້ອຍກວ່າ 280 ລ້ານໂດລາ ໂດຍມີສາເຫດທີ່
ສໍາຄັນປະການນຶ່ງ ມາຈາກການນໍາເຂົ້ານໍ້າມັນເຊື້ອໄຟຫຼາຍຂຶ້ນນັ້ນເອງ.
ແຕ່ຢ່າງໃດກໍຕາມ ການທີ່ລາວຕ້ອງປະເຊີນກັບສະພາວະຂາດດຸນການຄ້າຕ່າງປະເທດນັ້ນ ສໍາລັບໃນດ້ານນຶ່ງກໍເປັນຍ້ອນວ່າ ມີການລົງທຶນຈາກຕ່າງປະເທດເຂົ້າມາໃນລາວຫຼາຍຂຶ້ນ ຊຶ່ງກໍ່ເປັນຜົນເຮັດໃຫ້ເສດຖະກິດຂອງລາວ ມີການຂະຫຍາຍຕົວເພີ່ມຂຶ້ນຢ່າງຕໍ່ເນື່ອງໃນອັດ
ຕາສະເລ່ຍບໍ່ຫຼຸດ 7% ຕໍ່ປີ ໃນຕະຫຼອດໄລຍະກວ່າ 10 ປີມານີ້ ແລະໃນຂະນະດຽວກັນກໍ່
ຍັງເຮັດໃຫ້ຄວາມອາດສາມາດໃນການຜະລິດສິນຄ້າຂອງລາວເພີ່ມສູງຂຶ້ນອີກດ້ວຍເຊັ່ນກັນ ຊຶ່ງກໍເຮັດໃຫ້ທາງການລາວເຊື່ອໝັ້ນວ່າ ລາວຈະມີຄວາມພ້ອມເຖິງ 100% ໃນການປະຕິ
ບັດຕາມຂໍ້ຕົກລົງວ່າດ້ວຍເຂດການຄ້າເສລີອາຊຽນພາຍໃນຕົ້ນປີ 2015 ເຊັ່ນດຽວກັນກັບ
ມຽນມາ, ກໍາປູເຈຍ, ແລະຫວຽດນາມ.
ດັ່ງທີ່ທ່ານນາມ ວິຍະເກດ ລັດຖະມົນຕີກະຊວງອຸດສະຫະກໍາ ແລະການຄ້າຂອງລາວ ໄດ້
ຖະແຫຼງຢືນຢັນໃນໂອກາດເປັນປະທານໃນກອງປະຊຸມລັດຖະມົນຕີການຄ້າອາຊຽນຢ່າງ
ບໍ່ເປັນທາງການຄັ້ງທີ່ 17 ໃນທ້າຍເດືອນກຸມພາ ທີ່ຜ່ານມານີ້ຢູ່ນະຄອນວຽງຈັນວ່າ:
ທ່ານນາມ ວິຍະເກດ ດຖະມົນຕີກະຊວງ ອຸດສະຫະກໍາ ແລະ ການຄ້າຂອງລາວ
“ເລີ່ມແຕ່ວັນທີນຶ່ງເດືອນນຶ່ງ ປີ 2010 ຜ່ານມານັ້ນ
ບັນດາປະເທດອາຊຽນຫົກ ໄດ້ເລີ່ມປະຕິບັດການ
ລົບລ້າງລະບົບພາສີ ແລະໄດ້ປະຕິບັດລະບົບພາສີ
0% ແລ້ວ, ແຕ່ສໍາລັບສີ່ປະເທດ ພວກເຮົາຈະໄດ້
ເລີ່ມປະຕິບັດແຕ່ວັນທີນຶ່ງເດືອນນຶ່ງປີ 2015 ໝາຍ
ຄວາມວ່າໃນວັນທີ່ນຶງເດືອນນຶ່ງປີ 2015 ນີ້ ອາຊຽນ
ສິບຈະເປັນເຂດການຄ້າເສລີ.”
ສໍາລັບປະເທດສະມາຊິກອາຊຽນທີ່ໄດ້້ເລີ່ມປະຕິບັດຕາມຂໍ້ຕົກ
ລົງວ່າດ້ວຍເຂດການຄ້າເສລີອາຊຽນ ນັບແຕ່ຕົ້ນປີ 2010
ເປັນຕົ້ນມາແລ້ວ ກໍຄື ບຣູໄນ, ມາເລເຊຍ, ໄທ, ສິງກະໂປ, ຟີລິບປີນ, ແລະ ອິນໂດເນ
ເຊຍ. ສ່ວນລາວ, ມຽນມາ, ກໍາປູເຈຍ, ແລະຫວຽດນາມນັ້ນ ເນື່ອງຈາກວ່າຍັງບໍ່ມີຄວາມ
ພ້ອມ ຈຶ່ງໄດ້ມີການຜ່ອນຜັນໄປຈົນເຖິງຕົ້ນປີ 2015 ດັ່ງກ່າວ ແລະກໍເຊື່ອວ່າເປັນສາເຫດ
ສໍາຄັນປະການນຶ່ງທີ່ເຮັດໃຫ້ອົງການການຄ້າໂລກ ຍັງບໍ່ຍອມຮັບລາວໃຫ້ເປັນສະມາຊິກອົງ
ການການຄ້າໂລກຈົນເຖິງປັດຈຸບັນນີ້.