ທ່ານນາມ ວິຍະເກດ ລັດຖະມົນຕີກະຊວງອຸດສະຫະກໍາ
ແລະການຄ້າຂອງລາວ ໄດ້ອະນຸມັດໃຫ້ມີການປັບຂຶ້ນລາຄາ
ນໍ້າມັນເຊື້ອໄຟ ທຸກຊະໜິດ ໃນປະເທດລາວ ຢ່າງເປັນທາງ
ການ ເມື່ອວັນທີ 7 ເມສາ ທີ່ຜ່ານມານີ້ ຊຶ່ງກໍນັບເປັນ
ການປັບຂຶ້ນລາຄາ ຈໍາໜ່າຍນໍ້າມັນພາຍໃນລາວເປັນຄັ້ງທີ
7 ແລ້ວ ນັບຈາກຕົ້ນປີ 2011 ເປັນຕົ້ນມາ.
ສໍາລັບການອະນຸມັດໃຫ້ປັບ
ຂຶ້ນລາຄາຈໍາໜ່າຍນໍ້າມັນເຊື້ອໄຟໃນລາວໃນຄັ້ງຫລ້າສຸດນີ້
ກໍມີສາເຫດ ອັນດຽວກັນກັບການປັບ ຂຶ້ນລາຄານໍ້າມັນໃນ 6
ຄັ້ງກ່ອນ ຊຶ່ງກໍຄືເປັນການປັບລາຄາຈໍາໜ່າຍນໍ້າມັນ ຕາມ
ລາຄານໍ້າມັນໃນຕະຫລາດໂລກ ທີ່ເພີ້ມສູງຂຶ້ນຢ່າງຕໍ່ເນື່ອງ.
ດ້ວຍເຫດນີ້ ຈຶ່ງເຮັດໃຫ້ລາຄາຈໍາໜ່າຍນໍ້າມັນເຊື້ອໄຟໃນລາວ
ໄດ້ປັບຕົວສູງຂຶ້ນໃນ ລະຫວ່າງ 140-310 ກີບ ຕໍ່ລິດໂດຍ
ຂຶ້ນຢູ່ກັບໄລຍະທາງຂອງການຂົນສົ່ງເປັນສໍາຄັນ.
ຊຶ່ງກໍຄືໃນຂະນະທີ່ລາຄາຈໍາໜ່າຍຢູ່ພາຍໃນເຂດນະຄອນວຽງຈັນໄດ້ ໄດ້ປັບຂຶ້ນເປັນ 11,810
ກີບ ຕໍ່ລິດ ສໍາລັບນໍ້າມັນແອັດຊັງ ພິເສດ ກັບ 10,640 ກີບ ແລະ 9,670 ກີບຕໍ່ລິດສຳ
ລັບນໍ້າມັນແອັດຊັງທຳມະດາ ແລະນໍ້າມັນກາຊວນ ຕາມລໍາດັບນັ້ນ ກໍປາກົດວ່າ ປະຊາຊົນ
ລາວຢູ່ແຂວງຊຽງຂວາງຕ້ອງຊື້ນໍ້າມັນແອັດຊັງຊະນິດພິເສດໃນລາຄາສູງເຖິງ 11,950 ກີບຕໍ່
ລິດ. ສ່ວນນໍ້າມັນແອັດຊັງທໍາມະດາແລະນໍ້າມັນກາຊວນກໍມີລາຄາຈໍາໜ່າຍ 10,990 ກີບ
ແລະ 9,9850 ກີບຕໍ່ລິດຕາມລຳດັບ.
ແຕ່ຢ່າງໃດກໍຕາມ ທ່ານຄໍາຈັນ ລັດຕະນະວົງ, ປະທານສະ
ມາຄົມນໍ້າມັນເຊື້ອໄຟແລະອາຍແກັສລາວ ຫໍໄດ້ໃຫ້ການຢືນ
ຢັນວ່າ ການຊົມໃຊ້ນໍ້າມັນເຊື້ອໄຟຢູ່ໃນລາວໄດ້ເພີ້ມຫລາຍ
ຂຶ້ນທຸກປີ.ສໍາລັບໃນຕະຫລອດປີ 2011ນີ້ ກໍຄາດໝາຍວ່າ
ລາວຈະນໍາເຂົ້ານໍ້າມັນເຊື້ອໄຟຈາກຕ່າງປະເທດໃນປະລິ
ມານລວມເກີນກວ່າ 750 ລ້ານລິດຊຶ່ງນອກຈາກຈະມີສາ
ເຫດການເພີ້ມຂຶ້ນຂອງການນໍາເຂົ້າຍວດຍານພາຫະນະ
ແລ້ວກໍຍັງມີສາເຫດທີ່ສໍາຄັນມາຈາກການທີ່ມີການລົງທຶນຈາກຕ່າງປະເທດເຂົ້າມາໃນລາວ
ຫລາຍຂຶ້ນຊຶ່ງກໍເຮັດໃຫ້ເສດຖະກິດລາວມີການຂະຫຍາຍຕົວເພີ້ມຂຶ້ນຢ່າງຕໍ່ເນື່ອງອີກດ້ວຍ.
ດັ່ງທີ່ທ່ານຄໍາຈັນໄດ້ຊີ້ແຈງວ່າ:
“ການຊົມໃຊ້ນ້ຳມັນຂອງປະເທດເຮົານີ້ກະເພິ່ມຂຶ້ນ 7%-10% ຕໍ່ປີ ສະນັ້ນແລ້ວ
ໃນປີ 2009 ພວກເຮົາກໍ່ໃຊ້ນ້ຳມັນທົ່ວປະເທດນີ້ 640 ກວ່າລ້ານລິດແລະໃນປີ
2010 ນີ້ ຕາມເສດຖະຕິທີ່ເກັບມາໄດ້ເຖິງປັດຈຸບັນນີ້ກໍປະມານ 700 ກວ່າ
ລ້ານລິດແລະຖ້າມັນເພີ້ມຂຶ້ນປະມານ 7%-10%. ໃນປິ 2011 ນີ້ ພວກເຮົາ
ຈະໃຊ້ນໍ້າມັນບໍ່ຕ່ຳກວ່າ 750 ລ້ານລິດ ເພາະການພັດທະນາສ້າງສາປະເທດ
ຂອງພວກເຮົາກະເພີ້ມຂຶ້ນເນາະ”.
ທັງນີ້ ເນື່ອງຈາກວ່າລາວຕ້ອງນໍາເຂົ້ານໍ້າມັນເຊື້ອໄຟຈາກຕ່າງປະເທດທັງ 100% ຂອງ
ຄວາມຕ້ອງການທັງໝົດພາຍໃນປະເທດ ຈຶ່ງເຮັດໃຫ້ລາຄາຈໍາໜ່າຍນໍ້າມັນໃນລາວມີການ
ປັບຂຶ້ນ-ລົງຕາມລາຄານໍ້າມັນເຊື້ອໄຟໃນຕະຫລາດໂລກຢູ່ຕະຫລອດເວລາ.
ສໍາລັບໃນປີ 2010 ທີ່ຜ່ານມາກໍປາກົດວ່າລັດວິສະຫະກິດນໍ້າມັນເຊື້ອໄຟລາວໄດ້ມີການ
ປັບລາຄາຈໍາໜ່າຍໄປແລ້ວເຖິງ 29 ຄັ້ງ ຊຶ່ງໃນນີ້ເປັນການປັບລາຄາເຖິງ 21 ຄັ້ງ ແລະ
ສະເພາະໃນປີ 2011 ນີ້ກໍໄດ້ມີການປັບຂຶ້ນລາຄາຈໍາໜ່າຍນໍ້າມັນ 7 ຄັ້ງແລ້ວ.
ຍິ່ງໄປກວ່ານັ້ນ ການທີ່ລັດຖະບານລາວໄດ້ນໍາໃຊ້ລະບົບພາສີມູນຄ່າເພີ້ມໃນອັດຕາ 10%
ລວມທັງຍັງໄດ້ມີການເກັບຄ່າທໍານຽມໃນການໃຊ້ນໍ້າມັນເພີ້ມຂຶ້ນອີກ ນັບຕັ້ງແຕ່ວັນທີ 1
ຕຸລາປີກາຍນີ້ ເປັນຕົ້ນມາອີກດ້ວຍແລ້ວ ກໍນັບວ່າເປັນປັດໃຈສໍາຄັນທີ່ເຮັດໃຫ້ປະຊາຊົນ
ລາວຕ້ອງໄດ້ແບກຫາບພາລະລາຄານໍ້າມັນ ທີ່ແພງຫລາຍຂຶ້ນຢ່າງຕໍ່ເນື່ອງເຊັ່ນກັນອີກດ້ວຍ.
