ບັນດາຜູ້ນຳຈາກຫລາຍເຖິງ 170 ປະເທດ ມີກຳນົດທີ່ຈະໄປເຕົ້າໂຮມກັນຢູ່ທີ່ສຳນັກງານ ໃຫຍ່ອົງການສະຫະປະຊາຊາດ ໃສນະຄອນ New York ໃນວັນສຸກມື້ນີ້ ເພື່ອເຊັນຂໍ້ຕົກ ລົງ Paris ກ່ຽວກັບການປ່ຽນແປງຂອງດິນຟ້າອາກາດສີ່ເດືອນຫລັງຈາກຂໍ້ຕົກລົງດັ່ງກ່າວ ໄດ້ເລີ້ມມີການເຈລະຈາກັນ.
ບັນດາເຈົ້າໜ້າທີ່ສະຫະປະຊາດກ່່າວວ່າ ພິທີລົງນາມໃນວັນສຸກມື້ນີ້ ຈະເປັນຂີດໝາຍຄັ້ງ ທຳອິດຂອງການທູດໂລກ ເພາະວ່າ ບໍ່ມີເວລາໃດໃນປະຫວັດສາດທີ່ມີຫລາຍປະເທດລົງ ນາມຂໍ້ຕົກລົງໃນທຳນອງນີ້.
ພິທີລົງນາມອາດເຮັດໃຫ້ຂໍ້ຕົກລົງດັ່ງກ່າວ ຢູ່ໃນເສັ້ນທາງໄປສູ່ການຈັດຕັ້ງປະຕິບັດຢ່າງ ວ່ອງໄວ ກ່ອນກຳນົດເສັ້ນຕາຍທີ່ໄດ້ວາງໄວ້ໃນປີ 2020 ເຖິງແມ່ນວ່າຍັງຈະຜ່ານຂັ້ນຕອນການດຳເນີນນະໂຍບາຍພາຍໃນປະເທດ ລະຫວ່າງບັນດາປະເທດທີ່ລົງນາມ.
ລັດຖະມົນຕີຕ່າງປະເທດສະຫະລັດ ທ່ານ John Kerry ຈະເປັນຜູ້ຕາງໜ້າສະຫະລັດ ເຂົ້າຮ່ວມພິທີລົງນາມ.
ຂໍ້ຕົກລົງນີ້ ແມ່ນໝາກຜົນຂອງກອງປະຊຸມ ໃນເດືອນທັນວາ ຢູ່ນະຄອນຫລວງ Paris ແລະເປັນຄວາມກ້າວໜ້າທີ່ສຳຄັນ ຂອງການເຈລະຈາ ກ່ຽວກັບດິນຟ້າອາກາດຢູ່ໃນທົ່ວ ໂລກ. ຄວາມພະຍາຍາມເທື່ອກ່ອນ ທີ່ຈະບັນລຸຂໍ້ຕົກລົງ ໃນປີ 2009 ໄດ້ປະສົບກັບອຸບ ປະສັກ ຍ້ອນການບໍ່ລົງຮອຍກັນ ລະຫວ່າງບັນດາປະເທດທີ່ຮັ່ງມີແລະທຸກຈົນ ກ່ຽວກັບ ວ່າບົດບາດຂອງເຂົາເຈົ້າ ຈະກະທຳຢ່າງໃດໃນການຕໍ່ສູ້ກັບການປ່ຽນແປງຂອງດິນຟ້າ ອາກາດ.
ພາຍໃຕ້ຂໍ້ຕົກລົງ Paris ນີ້ ບັນດາປະເທດຮັ່ງມີຈະສະເໜີສະໜັບສະໜູນດ້ານ ການເງິນ ໃຫ້ແກ່ບັນດາປະເທດທີ່ທຸກຈົນ ເພື່ອຊ່ວຍຫລຸດຜ່ອນ ການປ່ອຍແກັສ ເຮືອນແກ້ວຂອງ ເຂົາເຈົ້າແລະປັບໂຕເຂົ້າກັບການປ່ຽນແປງຂອງດິນຟ້າອາກາດ. ຈຳນວນເງິນໂດລາທີ່
ແທ້ຈິງນັ້ນບໍ່ໄດ້ກຳນົດກັນຢູ່ໃນຂໍ້ຕົກລົງແຕ່ກໍໄດ້ເປີດກ້ວາງ ປະຕູສຳລັບປະເທດທີ່ມີ ເສດຖະກິດພຸ່ງພົ້ນໃໝ່ ຄືດັ່ງຈີນ ເພື່ອປະກອບສ່ວນເຂົ້າ ຮ່ວມ ເຖິງແມ່ນວ່າບໍ່ໄດ້ມີການ ບັງຄັບໃຫ້ຕ້ອງໄດ້ປະຕິບັດກໍຕາມ.
