ທາງການລາວ ສາມາດສະສາງການສໍ້ລາດບັງຫຼວງໄດ້ພຽງແຕ່ 4 ກໍລະນີເທົ່ານັ້ນຈາກທັ້ງໝົດ 117 ເປົ້າໝາຍ ຊຶ່ງເຮັດໃຫ້ລັດຖະບານລາວ ສູນເສຍລາຍຮັບຈາກພາສີອາກອນ ແລະຄ່າສໍາປະທານຕ່າງໆ ຫລາຍກວ່າ 4,800 ຕື້ກີບ.
ເຈົ້າຫນ້າທີ່ຂັ້ນສູງໃນຄະນະກວດສອບລັດຖະບານ ເປີດເຜີຍວ່າລັດຖະບານລາວຍັງບໍ່ສາມາດຮຽກເກັບລາຍຮັບທີ່ສູນເສຍຈາກການຈັດຕັ້ງປະຕິບັດທີ່ລະເມີດກົດຫມາຍແລະການສໍ້ລາດບັງຫຼວງຂອງພະນັກງານລັດ ຄິດເປັນມູນຄ່າລວມຫລາຍກວ່າ 4,800 ຕື້ກີບ ຊຶ່ງເປັນລາຍຮັບຈາກພາສີອາກອນ, ຄ່າສໍາປະທານ ແລະຄ່າເຊົ່າຊັບສິນຂອງລັດ ຖະບານຈໍານວນເຖິງ 117 ໂຄງການໃນທົ່ວປະເທດ ໂດຍສະເພາະແມ່ນການສໍ້ລາດບັງຫຼວງ ທີ່ເກີດຈາກການບໍລິ ຫານງານທີ່ບໍ່ໂປ່ງໃສຂອງບັນດາພະນັກງານຂອງລັດນັ້ນກໍຄືພາກສ່ວນທີ່ເຮັດໃຫ້ລັດຖະບານລາວສູນເສຍລາຍຮັບຫຼາຍທີ່ສຸດ.
ໂດຍໃນໄລຍະເກືອບ 1 ທີ່ປີຜ່ານມາ ອົງການກວດກາແຫ່ງລັດ ໄດ້ສໍາເລັດການກວດກາ ແລະ ແກ້ໄຂສະສາງການສໍ້ລາດບັງຫຼວງໄດ້ພຽງແຕ່ 4 ກໍລະນີ ທັ້ງຍັງສາມາດຮຽກເກັບເງິນກັບຄືນມາໄດ້ບໍ່ເຖິງ 4% ຂອງມູນຄ່າທີ່ເສຍຫາຍທັງໝົດອີກດ້ວຍ ໂດຍເຖິງແມ່ນຈະສາມາດຈັບຕົວຜູ້ກະທຳຜິດໄດ້ເຖິງ 208 ຄົນກໍຕາມ ດັ່ງທີ່ ທ່ານຄຳພັນ ພົມມະທັດ ປະທານອົງການກວດກາແຫ່ງລັດ ໄດ້ຖະແຫລງຢຶນຢັນວ່າ
“ການສືບສວນ-ສອບສວນຄະດີສໍ້ລາດບັງຫຼວງສຳເລັດ 4 ເລື່ອງມີຄວາມເສຍຫາຍທັ້ງ ຫມົດເປັນເງິນ 115.08 ຕື້ກີບ ເປັນເງິນບາດ 3.2 ລ້ານບາດ ເປັນເງິນໂດລາສະຫະລັດ 25.61 ລ້ານໂດລາ ແລະເປັນເງິນຢວນ 7.8 ລ້ານຢວນ ທີ່ພັວພັນເປົ້າຫມາຍ 208 ຄົນ ໃນນີ້ເກັບກູ້ໄດ້ເປັນເງິນ 63.62 ຕື້ກີບ, ເປັນເງິນບາດ 200,000 ບາດ, ເປັນເງິນໂດລາ 4,700 ໂດລາສະຫະລັດ, ເປັນເງິນຢວນ 5.1 ລ້ານຢວນ ນອກນັ້ນຍັງເກັບກູ້ບໍ່ໄດ້.”
ນອກຈາກນີ້ ການຈັດເກັບລາຍຮັບແລະການນຳໃຊ້ງົບປະມານທີ່ບໍ່ໂປ່ງໃສໂດຍບັນດາພະນັກງານຂອງລັດ ກໍ່ເປັນອີກປັດໄຈໜຶ່ງທີ່ເຮັດໃຫ້ເກີດຄວາມເສຍຫາຍຫຼາຍທີ່ສຸດດ້ວຍເຊັ່ນກັນ ຊຶ່ງເຫັນໄດ້ຈາກກໍລະນີຂອງຄະນະກໍາມະການຄຸ້ມຄອງເຂດເສດຖະກິດພິເສດສາມຫລ່ຽມຄໍາ ທີ່ເມືອງຕົ້ນເຜິ້ງ ແຂວງບໍ່ແກ້ວ ທີ່ໄດ້ສົ່ງຜົນກະທົບຕໍ່ຜົນປະ ໂຫຍດຂອງລັດຖະບານລາວທີ່ຄວນຈະໄດ້ຮັບຈາກໂຄງການລົງທຶນຕ່າງໆ ທີ່ຍູ່ໃນເຂດດັ່ງກ່າວ ເຊັ່ນ ການກໍ່ສ້າງສະໜາມບິນແຫ່ງໃໝ່ໃນແຂວງບໍ່ແກ້ວ ທີ່ໃຫ້ສໍາປະທານແກ່ບໍລິສັດ Greater Bay ຈາກຈີນເປັນໄລຢະເວລາເຖິງ 50 ປີນັ້ນ ກໍຄືຫຸ້ນສ່ວນຂອງບໍລິສັດດອກງິ້ວຄໍາ ຊຶ່ງເປັນຜູ້ລົງທຶນພັດທະນາເຂດເສຖກິດພິເສດສາມຫລ່ຽມຄຳ ດ້ວຍເຫດນີ້ ຈຶ່ງຍັງບໍ່ມີຄວາມຊັດເຈນວ່າ ລັດຖະບານລາວຈະໄດ້ຮັບຜົນປະໂຫຍດເທົ່າໃດແທ້ ເພາະການກວດກາແລະການກວດສອບໃນໄລຍະທີ່ຜ່ານມາຍັງບໍ່ເຂັ້ມງວດໃນການຈັດຕັ້ງປະຕິບັດຕາມລະບຽບກົດຫມາຍນັ້ນເອງ ດັ່ງທີ່ ສະມາຊິກສະພາແຫ່ງຊາດລາວ ໄດ້ໃຫ້ການຢືນຢັນວ່າ
“ອົງການກວດສອບກວດການີ້ ຖືວ່າເປັນເຄື່ອງມືທີ່ສຳຄັນຂອງລັດໃນການຈະສະກັດກັ້ນແລະແກ້ໄຂບັນຫາປະກົດ ການຫຍໍ້ທໍ້ ຫຼືການສໍ້ລາດບັງຫຼວງນີ້ ຈຶ່ງສະເໜີໃຫ້ 2 ອົງການນີ້ໄດ້ເພີ່ມທະວີໃນການຊີ້ນຳ ແລະ ຈັດຕັ້ງປະຕິບັດກົດໝາຍທີ່ກ່ຽວພັນກັບການສໍ້ລາດບັງຫຼວງນີ້ ໃຫ້ມັນເຂັ້ມງວດ ຜ່ານມາປະຕິບັດແລ້ວ ແຕ່ມັນບໍ່ເຂັ້ມງວດເຫັນໂຕເລກເສຍຫາຍຂອງພວກເຮານີ້ ກໍເສຍດາຍ ຄັນພວກເຮົາບໍ່ລົງໂທດໃຫ້ໜັກຕາມກົດໝາຍນີ້ ບັນຫາການສໍ້ລາດບັງຫຼວງນີ້ກໍຍັງຈະສືບຕໍ່ເພີ່ມຂຶ້ນອີກ.”
ສ່ວນ ຄະນະກວດສອບແຫ່ງລັດ ໄດ້ດຳເນິນການກວດສອບ 25 ໂຄງການ ທີ່ເປັນສິດການເຊົ່າແລະການນຳໃຊ້ຊັບສິນຂອງລັດຖະບານ ເຊິ່ງຄິດເປັນລາຍຮັບທີ່ລັດຖະບານລາວຄວນຈະໄດ້ຮັບໃນມູນຄ່າລວມ 3,516 ຕື້ກີບ ແຕ່ກໍປະກົດວ່າ ຄະນະກວດສອບແຫ່ງລັດ ສາມາດຮຽກເກັບໄດ້ພຽງ 122.4 ຕື້ກີບ ຄິດເປັນ 3.48% ເທົ່ານັ້ນຂອງການຮຽກເກັບທັ້ງໝົດ ນັບແຕ່ເດືອນມິຖຸນາ 2024 ເປັນຕົ້ນມາ.
ຟໍຣັມສະແດງຄວາມຄິດເຫັນ