ບັນດາຜູ້ນຳໂລກ ແລະກຸ່ມປົກປ້ອງສິ່ງແວດລ້ອມ ໄດ້ພາກັນສະແດງ”ຄວາມຜິດຫວັງ
ກ່ຽວກັບການຕັດສິນໃຈ ຂອງ ປະທານາທິບໍດີສະຫະລັດ ທ່ານດໍໂນລທຣໍາ ທີ່ຈະຖອນ
ໂຕ ອອກຈາກຂໍ້ຕົກລົງດິນຟ້າອາກາດປາຣີ ຊຶ່ງເປັນຄວາມພະຍາຍາມຂອງທົ່ວໂລກ
ເພື່ອຮັບມືກັບຜົນກະທົບຈາກການປ່ຽນແປງຂອງດິນຟ້າອາກາດ.
ບັນດາຜູ້ນຳເຢຍຣະມັນ ຝຣັ່ງ ແລະອີຕາລີ ຢູ່ໃນການເຄື່ອນໄຫວທີ່ມີຄວາມສຳຄັນຂ້ອນ
ຂ້າງສູງເປັນພິເສດ ໄດ້ອອກຖະແຫລງການຮ່ວມ ສະແດງ “ຄວາມຜິດຫວັງ” ກ່ຽວກັບ
ການຕັດສິນໃຈດັ່ງກ່າວ.
“ພວກເຮົາເຊື່ອໝັ້ນຢ່າງໜັກແໜ້ນວ່າ ຂໍ້ຕົກລົງນີ້ບໍ່ສາມາດທີ່ຈະເຈລະຈາຄືນໃໝ່ໄດ້”
ນັ້ນຄືຄຳເວົ້າຂອງພວກຜູ້ນຳທັງສາມ ທີ່ກ່າວຕື່ມວ່າ ເພື່ອໃຫ້ຢຸດເຊົ້າໃນສິ່ງທີ່ຜູ້ນຳສະ
ຫະລັດເຊື່ອວ່າ ທ່ານສາມາດເຈລະຈາຄືນໃໝ່ໄດ້ ທີ່ຈະນຳເອົາສະຫະລັດ ກັບຄືນເຂົ້າ
ຮ່ວມຂໍ້ຕົກລົງປາຣີ. ປະທານາທິບໍດີທຣໍາ ກ່າວຢູ່ໃນຄຳປະກາດກ່ຽວກັບການຖອນໂຕ
ຂອງສະຫະລັດວ່າ ທ່ານແມ່ນເປີດກວ້າງ “ຕໍ່ການເຈລະຈາ ທີ່ຈະກັບຄືນເຂົ້າຮ່ວມຂໍ້
ຕົກລົງປາຣີ.”
ທ່ານ Jean-Claude Juncker ປະທານຄະນະກຳມາທິການຢູໂຣບ ກ່າວຕໍ່ກອງປະຊຸມສະຫະພັນນາຍຈ້າງເຢຍຣະມັນ ທີ່ນະຄອນ Berlin ວ່າ “ອາເມຣິ ກັນ ບໍ່ສາ
ມາດທີ່ຈະອອກຈາກການຕົກລົງໄດ້” ໂດຍກ່າວຕື່ມວ່າ “ມັນໃຊ້ເວລາສາມຫາສີ່ປີ”
ທີ່ຈະຖອນໂຕອອກ.
ທ່ານນາງ Hua Chunying ໂຄສົກກະຊວງຕ່າງປະເທດຈີນ ກ່າວໃນວັນສຸກມື້ນີ້ວ່າ
ການຍຶດໝັ້ນຂອງຈີນໃນຂໍ້ຕົກລົງປາຣີ ແມ່ນ “ເປັນຄວາມຮັບຜິດຊອບທີ່ແບກຫາບ
ໂດຍຈີນໃນຖານະທີ່ເປັນປະເທດມີຄວາມຮັບຜິດຊອບທີ່ສຳຄັນ.” ໃນ ການຖະແຫຼງ
ຕໍ່ພວກນັກຂ່າວ ໃນວັນສຸກມື້ນີ້ ທີ່ນະຄອນປັກກິ່ງ ໂຄສົກຍິງຜູ້ນີ້ ຍັງກ່າວວ່າ “ພວກ
ເຮົາຄິດວ່າຂໍ້ຕົກລົງປາຣີ ສະທ້ອນໃຫ້ເຫັນວ່າ ເປັນຂໍ້ຕົກລົງທີ່ກວ້າງຂວາງທີ່ສຸດ
ຂອງປະຊາຄົມສາກົນ ທີ່ກ່ຽວພັນກັບ ການລຶບລ້າງ ການ ປ່ຽນແປງ ແລະພັກຝ່າຍ
ຕ່າງໆຄວນຖະໜຸຖະໜອມ ຜົນຂອງຄວາມພະຍາຍາມທີ່ໄດ້ມາດ້ວຍຄວາມຍາກ
ລຳບາກ.”
ຈີນເປັນປະເທດທີ່ສ້າງມົນລະພິດລາຍໃຫຍ່ທີ່ສຸດຂອງໂລກ ແລະສະຫະລັດຢູ່ໃນ
ອັນດັບສອງ. ປະທານາທິບໍດີທຣໍາກ່າວວ່າ ສະຫະລັດໄດ້ “ຖອນໂຕອອກ” ຈາກຂໍ້
ຕົກລົງທີ່ທ່ານກ່າວວ່າ ບັງຄັບໃຫ້ສະຫະລັດຮັບເອົາຄວາມຮັບຜິດຊອບທີ່ມີມູນຄ່າ
ຫລາຍພັນລ້ານໂດລາ ແລະສູນເສຍວຽກ ຫລາຍລ້ານວຽກ. ທ່ານອະທິບາຍວ່າ ຂໍ້
ຕົກລົງນີ້ “ບໍ່ເປັນທຳຫຼາຍ” ສຳລັບສະຫະລັດ ແລະໃຫ້ຜົນປະໂຫຍດ ແກ່ບັນດາຜູ້
ສ້າງມົນລະພິດອື່ນໆ ເຊັ່ນວ່າຈີນ ແລະອິນເດຍ.
