ອົງການອະນາໄມໂລກ ຫຼື WHO ກ່າວວ່າ ການຈົມນໍ້າຕາຍຮວມຢູ່ໃນຫ້າສາເຫດສຳຄັນ ໃນການເສຍຊີວິດ ຂອງພວກເດັກນ້ອຍ ອາຍຸຕໍ່າກວ່າ 15 ປີ ຢູ່ໃນ 48 ຂອງ 85 ປະເທດ ທີ່ໄດ້ສຳຫຼວດ ໂດຍມີພວກເດັກນ້ອຍທີ່ພາກັນອາໄສຢູ່ໃກ້ກັບແຫຼ່ງນໍ້າທີ່ເປີດກວ້າງຕ່າງໆ ເຊັ່ນວ່າ ຫ້ວຍ ໜອງ ບຶງ ຄອງຊົນລະປະທານ ຫລືວ່າສະນໍ້າ ທີ່ມີຄວາມສ່ຽງເປັນພິເສດ.
ການສຳຫລວດຢູ່ໃນຂົງເຂດ ສະແດງໃຫ້ເຫັນວ່າ ການຈົມນໍ້າໄດ້ເອົາຊີວິດເດັກນ້ອຍຜູ້ນຶ່ງ ໃນຢ່າງໜ້ອຍທຸກໆ 15 ນາທີຢູ່ໃນເອເຊຍ. ໃນທ່າມກາງຄວາມຮ້ອນເອົ້າຂອງລະດູຮ້ອນ ສຸດ ແລະລະຫວ່າງລະດູຝົນ ແລະລະດູນໍ້າຖ້ວມ ພວກເດັກນ້ອຍໃນເອເຊຍໂດຍສະເພາະ ຢ່າງຍິ່ງ ຕົກຢູ່ໃນອັນຕະລາຍ.
ອົງການພັນທະມິດເພື່ອຄຸ້ມຄອງຄວາມປອດໄພແກ່ເດັກນ້ອຍ ທີ່ມີຫ້ອງການ ໃນເອເຊຍ ກ່າວວ່າ ອັດຕາການຈົມນໍ້າຢູ່ໃນບັນດາປະເທດທີ່ກຳລັງພັດທະນາມີຢູ່ 10 ຫາ 20 ເທື່ອ ສູງກວ່າພວກທີ່ຢູ່ປະເທດທີ່ຈະເລີນທາງດ້ານອຸດສາຫະກຳ.
ອີງຕາມການສຳຫລວດຂອງພັນທະມິດ ບັນທຶກຂອງບັງກລາແດັສ ມີອັດຕາສູງສຸດຂອງ ເດັກນ້ອຍຈົມນໍ້າຕາຍເກືອບ 17,000 ຄົນຕໍ່ປີ ຕີີດຕາມມາດ້ວຍຫວຽດນາມ ທີ່ມີຫລາຍ ກວ່າ 11,000 ຄົນ. ຢູ່ໃນປະເທດໄທເດັກນ້ອຍຈຳນວນ 2,600 ຄົນໄດ້ຫາຍສາບສູນໃນ ແຕ່ລະປີ.
ພະແນກຄວບຄຸມພະຍາດຂອງໄທ ຫວ່າງມໍ່ໆມານີ້ ໄດ້ລາຍງານວ່າ ເດັກນ້ອຍຈຳນວນ 10,923 ຄົນໄດ້ຈົມນໍ້າຕາຍແຕ່ປີ 2006 ຫາປີ 2015 ໃນອັດຕາ 10 ຄົນຕໍ່ມື້. ແຕ່ລະປີ ຈາກປີ 2011 ຫາປີ 2015 ເດັກນ້ອຍ 192 ຄົນ ອາຍຸຕໍ່າກວ່າສາມປີ ໄດ້ຈົມນໍ້າຕາຍຢູ່ ບ່ອນເກັບນໍ້າໃນເຮືອນ ຫລືບ່ອນລ້ຽງເດັກນ້ອຍ.
ສຳລັບຈີນແລ້ວຂໍ້ມູນແມ່ນຍັງບໍ່ມີສຳລັບທຸກແຂວງ. ແຕ່ວ່າຢູ່ໃນແຂວງ Jiangxi ເທົ່ານັ້ນ ຂໍ້ມູນຂອງພັນທະມິດ ສະແດງໃຫ້ເຫັນວ່າ ມີເດັກນ້ອຍຈົມນ້ຳຕາຍຫຼາຍກວ່າ 4,600 ຄົນ ຕໍ່ປີ ຊຶ່ງເປັນອັດຕາການຕາຍ 10 ຄົນຕໍ່ມື້.
