ຜູ້ປົກຄອງລັດ West Virginia ໄດ້ປະກາດພາວະສຸກເສີນ ຢູ່ໃນ 44 ເມືອງ ຫລັງຈາກໄດ້ເກີດນໍ້າຖ້ວມ ທີ່ຮ້າຍແຮງສຸດ ຢູ່ໃນເຂດແຄມຝັ່ງມະຫາສະມຸດ Atlantic ຕອນກາງຂອງສະຫະລັດໃນຮອບ 100 ປີ ທີ່ເຮັດໃຫ້ມີຜູ້ເສຍຊີວິດ 23 ຄົນ.
ທ່ານ Earl Ray Tomblin ກ່າວໃນວັນສຸກວານນີ້ວ່າ “ຄວາມເສຍຫາຍແມ່ນ ມີຢູ່ຢ່າງກວ້າງຂວາງ ແລະຮ້າຍແຮງ. ຈຸດເພັ່ງເລັງຂອງພວກເຮົາຍັງແມ່ນການຊອກຄົ້ນຫາ ແລະການກູ້ໄພ.”
ໄດ້ມີຝົນຕົກລົງມາຫລາຍເຖິງ 25 ຊັງຕີແມັດ ໃນວັນພະຫັດທີ່ຜ່ານມາ ເຮັດໃຫ້ແມ່ ນໍ້າຫລາຍສາຍ ຢູ່ພາກຕາເວັນຕົກສຽງໃຕ້ແລະພາກກາງຂອງລັດ ໄດ້ລົ້ນຝັ່ງ ແລະ ໄຫລເຂົ້າຖ້ວມ ຖະໜົນຫົນທາງຢູ່ບັນດາເມືອງທີ່ຢູ່ໃກ້ຄຽງ.
ເຈົ້າເມືອງ ເມືອງນຶ່ງ ກ່າວວ່າ ທ່ານໄດ້ຖືກອ້ອມລ້ອມ “ໄປດ້ວຍຄວາມສັບສົນ ວຸ້ນວາຍ.”
ເຈົ້າເມືອງ ເມືອງ Greenbrier ທ່ານນາງ Jan Cahill ກ່າວວ່າ “ຖະໜົນຫົນທາງຖືກທຳ ລາຍ ຂົວຂ້າມບໍ່ໄດ້ ບ້ານເຮືອນຖືກໄຟໄໝ້ ຫຼືຖືກນ້ຳພັດໄປ ຫລາຍພາກສ່ວນຂອງທາງຫຼວງຫາຍສາຍສູນ ທາງຍ່າງເງີງຂຶ້ນຄືກັບປອກໝາກກ້ວຍ.”
ຫລາຍສິບພັນຄົນບໍ່ມີໄຟຟ້າໃຊ້ ແລະຫລາຍຮ້ອຍຄົນຕົກຄ້າງຢູ່ໃນບ້ານເຮືອນຂອງເຂົາເຈົ້າ. ປະມານ 500 ຄົນໄດ້ຖືກຕົກຄ້າງຢູ່ຕາມສູນການຄ້າ ຫລັງຈາກຂົວທີ່ເປັນທາງອອກ ໄດ້ຖືກນໍ້າພັດໄປ.
ສ່ວນຊາວບ້ານຄົນອຶ່ນໆໄດ້ພາກັນຂຶ້ນໄປຢູ່ເທິງຫລັງຄາເຮືອນ ຫລັງຈາກນໍ້າໄດ້ຖ້ວມບ້ານເຮືອນຂອງເຂົາເຈົ້າ.
ກຳລັງພິທັກຊາດ ປະຈໍາລັດ West Virginia ກຳລັງໃຫ້ການຊ່ວຍເຫລືອໃນການປະຕິບັດງານກູ້ໄພ.
ກຳລັງພິທັກຊາດປະມານ 200 ຄົນໄດ້ພາກັນປະຕິບັດງານຢູ່ແປດເມືອງ ເພື່ອຊ່ວຍໜ່ວຍກູ້ໄພທ້ອງຖິ່ນ ແລະໄດ້ເປີດບ່ອນພັກພາອາໄສສຸກເສີນ 17 ແຫ່ງ ໃຫ້ແກ່ບັນດາຜູ້ທີ່ເຮືອນຊານໄດ້ຮັບຄວາມເສຍຫາຍ ແລະຖືກທຳລາຍ.
ບັນດານັກພະຍາກອນອາກາດ ກ່າວວ່າ ໄພນໍ້າຖ້ວມແມ່ນເກີດຍ້ອນພາຍຸຫລາຍຫົວ ເກີດຂຶ້ນພ້ອມໆກັນຢູ່ໃນເຂດນ້ອຍໆພຽງເຂດດຽວ. ຝົນຕົກໜັກຍັງໄດ້່ສົ່ງກະແສນໍ້າທີ່ໄຫລລົງມາຢ່າງແຮງຈາກພູ.
ລະບົບລົມພາຍຸດຽວກັນນີ້ ຍັງໄດ້ເຮັດໃຫ້ເກີດລົມຫົວກຸດໃຫຍ່ຫຼືທໍເນໂດ ຢູ່ໃນທົ່ວເຂດພາກກາງຂອງສະຫະລັດ.
