ລິ້ງ ສຳຫລັບເຂົ້າຫາ

ຫວຽດນາມ ຍັງຄົງເປັນ ຜູ້ລົງທຶນໂດຍກົງ ອັນດັບນຶ່ງ ໃນລາວ ໃນປີ 2012


ລາຍຊື່ບັນດາປະເທດ ທີ່ເປັນຜູ້ລົງທຶນໂດຍກົງ ລາຍໃຫຍ່ ໃນລາວ ໃນປີ 2012.
ບັນດາ​ລັດ​ວິ​ສາ​ຫະກິດ ​ແລະ​ບໍລິສັດ​ເອກ​ກະ​ຊົນ​ຈາກ​ຫວຽດນາມ
​ຍັງ​ຄອງ​ອັນ​ດັບ​ທີ 1 ຂອງ​ການ​ເປັນ​ຜູ້​ລົງທຶນ​ທີ່​ມີ​ມູນ​ຄ່າ​ສະ​ສົມ
ຫຼາຍທີ່​ສຸດ​ໃນ​ລາວ ຕິດຕາມ​ດ້ວຍ​ໄທ ຈີນ ​ເກົາຫຼີ​ໃຕ້ ​ແລະຝຣັ່ງ ຕາມ​ລໍາດັບ.

ສະຖິຕິ​ປະ​ຈໍາປີ 2012 ຂອງ​ກະຊວງ​ແຜນການ​ແລະ​ການ​ລົງທຶນ​
ໄດ້​ລາຍ​ງານ​ສະ​ລຸບກ່ຽວ​ກັບ​ສະພາວະ​ການ​ລົງທຶນ​ຂອງ​ຕ່າງປະ
​ເທດ​ໃນ​ລາວວ່າ ​ບັນດາ​ລັດ​ວິ​ສາ​ຫະກິດ​ແລະ​ບໍລິສັດ​ເອກ​ກະ​ຊົນ​
ຈາກຫວຽດນາມ​ ຍັງ​ຄົງ​ສາ​ມາ​ດຄອງ​ອັນ​ດັບ​ນຶ່ງ ທີ່​ມີ​ມູນ​ຄ່າ​ການ​
ລົງທຶນ​ສະ​ສົມ​ຢູ່​ໃນ​ລາວຫຼາຍທີ່ສຸດ ​ໂດຍ​ຄິດ​ໄລ່​ນັບ​ຈາກ​ປີ 1989
ຈົນ​ເຖິງປີ 2012 ທີ່​ຜ່ານ​ມານີ້ ກໍ​ປາກົດ​ວ່າ​ ບັນດາ​ລັດ​ວິ​ສາ​ຫະກິດ​
ແລະ​ບໍລິສັດ​ເອກ​ກະ​ຊົນ​ຈາກ​ຫວຽດນາມ ​ໄດ້​ເຂົ້າມາ​ລົງທຶນ​ໃນ​
ລາວ​ ຈໍານວນ 429 ​ໂຄງການ ​ແລະ​ຄິດ​ເປັນ​ມູນ​ຄ່າ​ລົງທຶນ​ລວມ
ເຖິງ 4,913 ລ້ານ​ໂດລາ.​

ການລົງທຶນລາຍໃນລາວ ແບ່ງເປັນຂະແໜງການ ແຕ່ປີ 1999-2012
ການລົງທຶນລາຍໃນລາວ ແບ່ງເປັນຂະແໜງການ ແຕ່ປີ 1999-2012

ສ່ວນທີ່ຕິດຕາມມາເປັນອັນດັບທີ 2 ກໍແມ່ນບັນດາບໍລິສັດເອກກະ
ຊົນໄທ ທີ່ລົງທຶນຢູ່ໃນລາວໃນໄລຍະດຽວກັນນີ້ຈໍານວນທັງໝົດ
742 ໂຄງການ ແລະຄິດເປັນມູນຄ່າການລົງທຶນລວມເຖິງ 4,082
ລ້ານໂດລາ ຊຶ່ງກໍໃກ້ຄຽງກັນກັບການລົງທຶນຈາກຈີນ ທີ່ມີມູນຄ່າ
ລວມເຖິງ 3,952 ລ້ານໂດລາ ໃນຈໍານວນ 801 ໂຄງການ ແລະ
ຕິດຕາມມາເປັນອັນດັບທີ 4 ກໍແມ່ນເກົາຫຼີໃຕ້ທີ່ມີມູນຄ່າລົງທຶນ
ສະສົມ 748 ລ້ານ ໂດລາ ໃນ 287 ໂຄງການ ສ່ວນອັນດັບທີ 5
ກໍຄືຝຣັ່ງທີ່ມີມູນຄ່າລົງທຶນສະສົມ 490 ລ້ານໂດລາ ໃນ 224 ໂຄງ
ການ ສໍາລັບສະຫະລັດອະເມຣິການັ້ນ ຢູ່ອັນດັບທີ 9 ດ້ວຍມູນຄ່າ
ລົງທຶນສະສົມ 150 ລ້ານໂດລາ ໃນ 113 ໂຄງການ.

ນອກຈາກນີ້ ຖ້າຫາກຄິດໄລ່ການລົງທຶນຂອງຕ່າງປະເທດໃນລາວທັງໝົດກໍປາກົດວ່າ ມີ
ມູນຄ່າລວມເກີນກວ່າ 18,000 ລ້ານໂດລາ ໂດຍໃນນີ້ແບ່ງເປັນ 52% ທີ່ເປັນການລົງທຶນ
ໃນພາກພະລັງງານ ແລະການຂຸດຄົ້ນແຮ່ທາດ ຕິດຕາມດ້ວຍພາກກະສິກໍາໃນສັດສ່ວນ
12% ພາກບໍລິການໃນສັດສ່ວນ 10% ພາກຫັດຖະກໍາ ແລະອຸດສາຫະກໍາການແປຮູບ
ສິນຄ້າ ໃນສັດສ່ວນ 8% ຂອງມູນຄ່າການລົງທຶນທັງໝົດ ດັ່ງກ່າວ.

ແຕ່ຢ່າງໃດກໍຕາມ ການທີ່ຫວຽດນາມເປັນປະເທດອັນດັບ 1 ທີ່ມີມູນຄ່າການລົງທຶນສູງສຸດ
ໃນລາວນັ້ນ ກໍມີການຕັ້ງຂໍ້ສັງເກດວ່າເປັນຍ້ອນຄວາມສໍາພັນແບບພິເສດ ທີ່ຫວຽດນາມ
ມີຢູ່ກັບລາວ ຈຶ່ງໄດ້ຮັບຄວາມສະດວກ ແລະການສົ່ງເສີມໃນທຸກໆດ້ານ ຈາກລັດຖະບານ
ລາວ ແລະຫລ້າສຸດທາງການຫວຽດນາມກໍໄດ້ຢືນຢັນຕໍ່ກອງປະຊຸມພາກທຸລະກິດລາວ-
ຫວຽດນາມຢູ່ນະຄອນວຽງຈັນ ເມື່ອປີຜ່ານມານີ້ວ່າ ຫວຽດນາມຈະເພີ່ມການລົງທຶນໃນ
ລາວ ຈາກລະດັບປັດຈຸບັນຂຶ້ນເປັນ 2 ເທົ່າພາຍໃນປີ 2015 ຊຶ່ງກໍມີຄວາມເປັນໄປໄດ້ສູງ
ທີ່ຈະເກີດຂຶ້ນໄດ້ຢ່າງເປັນຮູບປະທໍາ ເພາະໄດ້ຮັບການສະໜັບສະໜຸນ-ສົ່ງເສີມ ຈາກ
ທາງການລາວເປັນຢ່າງດີ ດັ່ງທີ່ທ່ານສົມດີ ດວງດີ ລັດຖະມົນຕີວ່າການກະຊວງແຜນ
ການ ແລະການລົງທຶນ ໄດ້ໃຫ້ການຢືນຢັນວ່າ:


ກອງປະຊຸມຖະແຫລງຂ່າວຮ່ວມລະຫວ່າງປະທານປະເທດລາວ ແລະປະທານປະເທດຫວຽດນາມ ຈັດຂຶ້ນທີ່ນະຄອນວຽງຈັນເມື່ອມໍ່ໆ ມານີ້
ກອງປະຊຸມຖະແຫລງຂ່າວຮ່ວມລະຫວ່າງປະທານປະເທດລາວ ແລະປະທານປະເທດຫວຽດນາມ ຈັດຂຶ້ນທີ່ນະຄອນວຽງຈັນເມື່ອມໍ່ໆ ມານີ້

ເພື່ອຕອບສະໜອງການສົ່ງເສີມການລົງທຶນໃນ
ສະພາບແວດລ້ອມເສດຖະກິດສັງຄົມອັນໃໝ່ນີ້ ສອງປະເທດພວກເຮົາກໍາລົງດໍາເນີນການທົບ
ທວນສັນຍາສະບັບດັ່ງກ່າວຮ່ວມກັນ ພ້ອມດຽວ
ກັນນັ້ນ ສອງຝ່າຍກໍໄດ້ເອົາໃຈໃສ່ກໍານົດທິດລະ
ອຽດ ແລະສ້າງເງື່ອນໄຂອໍານວຍຄວາມສະດວກ
ໃຫ້ແກ່ບັນດາຫົວໜ່ວຍ ທຸລະກິດຂອງທຸກພາກ
ສ່ວນເສດຖະກິດຂອງແຕ່ລະຝ່າຍໃຫ້ເຂົ້າໄປລົງ
ທຶນໃນ ປະເທດຂອງກັນ ແລະກັນ.”


ທັງນີ້ໂດຍບັນດາວິສາຫະກິດຫວຽດນາມ ກໍໄດ້ເນັ້ນໜັກການລົງທຶນໃນດ້ານການຂຸດຄົ້ນ
ແຮ່ທາດ ດ້ານພະລັງງານໄຟຟ້າ ດ້ານການບໍລິການ ແລະດ້ານກະສິກໍາ ແລະປ່າໄມ້ຕາມ
ລໍາດັບ ໂດຍສະເພາະແມ່ນດ້ານພະລັງງານໄຟຟ້ານັ້ນ ກໍປະກົດວ່າມີບໍລິສັດຈາກຫວຽດ
ນາມ 7 ລາຍ ທີ່ໄດ້ລົງທຶນເພື່ອການກໍ່ສ້າງເຂື່ອນຜະລິດກະແສໄຟຟ້າຈໍານວນ 15 ໂຄງ
ການຢູ່ໃນລາວ ໂດຍມີເປົ້າໝາຍທີ່ຈະສົ່ງກະແສໄຟຟ້າທີ່ຜະລິດໄດ້ສ່ວນໃຫຍ່ ຫຼືບໍ່ຕໍ່າ
ກວ່າ 3,357 ເມກາວັດ ໄປຕອບສະໜອງການຊົມໃຊ້ກະແສໄຟຟ້າຂອງຫວຽດນາມເອງ ນັບຈາກທ້າຍປີ 2015 ເປັນຕົ້ນໄປ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG