ບໍລິສັດ CAMCE ຈາກ​ປະ​ເທດ​ຈີນ​ທີ່​ເປັນ​ຜູ້​ລົງທຶນ​ໂຄງການ
Vientiane New World ຊຶ່ງ​ມີ​ມູນ​ຄ່າ​ການ​ລົງທຶນ​ຫຼາຍ​ກວ່າ
600 ລ້ານ​ໂດ​ລາ ທີ່​ໄດ້​ຈັດ​ງານ​ເປີດ​ຕົວ​ໂຄງການ ຢ່າງ​ເປັນ
​ທາງ​ການ​ເມື່ອ​ເດືອນ​ພືດ​ສະພາ​ທີ່​ຜ່ານ​ມາ​ນັ້ນ ​ໄດ້​ສະ​ເໜີ​ລາຍ
​ງານກ່ຽວ​ກັບ​ເປົ້າໝາຍ​ຂອງ​ໂຄງການ​ໃນ​ໄລຍະ 8 ປີ​ຕໍ່ໜ້າວ່າ
​ເປົ້າໝາຍ​ສໍາຄັນ​ທີ່ສຸດ​ຂອງ​ໂຄງການ ​ກໍ​ຄື​ການ​ຮອງ​ຮັບ​ນັກທຸ
ລະກິດ​ການ​ຄ້າ​ ແລະ​ການ​ລົງທຶນ​ຊາວ​ຕ່າງຊາດ​ໃນ​ລາວ ​ໃຫ້
​ໄດ້​ຫຼາຍ​ກວ່າ 50,000 ລາຍຊຶ່ງ​ໃນ​ຈໍ​ານວນ​ດັ່ງກ່າວ​ນີ້ ​ກໍ​ຄາດ
ໝາຍວ່າ​ສ່ວນ​ໃຫຍ່​ຈະ​ເປັນ​ນັກທຸລະກິດ​ຈີນ.

Embed
ຟັງລາຍງານກ່ຽວກັບໂຄງການວຽງຈັນເມືອງໃໝ່
by ສຽງອາເມຣິກາ ວີໂອເອລາວ

No media source currently available

0:00 0:04:40 0:00
ລິງໂດຍກົງ

ທັງ​ນີ້​ກໍ​ເນື່ອງ​ຈາກ​ວ່າ​ ໂຄງການ Vientiane New World ຈະ​ເປັນ​ການ​ພັດທະນາ​ພື້ນ
​ທີ່ 46 ​ເຮັກ​ຕ້າທີ່ຢູ່​ເທິງ​ດອນ​ຈັນ​ ໃຫ້​ເປັນ​ເມືອງ​ທັນສະໄໝ ​ແລະ​ເປັນ​ສູນ​ກາງ​ທາງເສດ
ຖະກິດການ​ຄ້າ ​ແລະ​ການ​ບໍລິການ​ຢ່າງ​ຄົບ​ຊຸດ​ຂອງ​ນະຄອນ​ວຽງ​ຈັນ​ພາຍ​ໃນ 6-8 ປີ​ຕໍ່ໜ້າ
ຫຼື​ພາຍ​ໃນ​ປີ 2020 ​ເປັນ​ຢ່າງ​ຊ້າ​.

Vientiane New World Project Launching Ceremony
Photo Gallery:

Vientiane New World Project Launching Ceremony

ບໍລິສັດ CAMCE ຈາກ​ປະ​ເທດ​ຈີນ ​ໄດ້​ຈັດ​ແບ່ງ​ການ​ດໍາ​ເນີນ​ງານ​ໃນ​ໂຄງການອອກ​ເປັນ 3 ສ່ວນ​ດ້ວຍ​ກັນ​ຄື ສູນວັດທະນະ​ທໍາ​ ແລະ​ທ່ອງ​ທ່ຽວ​ນາໆ ຊາດ ສູນ​ກາງ​ທາງ​ທຸລະ​ກິດ​ນາໆ ຊາດ ​ແລະ​ເຂດທີ່ຢູ່​ອາ​ໃສ​ນາໆ​ຊາດ​ ໂດຍ​ທັງ 3 ສ່ວນ​ດັ່ງກ່າວ​ນີ້ ​ຈະ​ຕັ້ງ​ຢູ່​ເທິງ​ເນື້ອ​ທີ່​ລວມກວ້າງ​ກວ່າ 7​ ​ແສນ​ຕາ​ລາງ​ແມັດ ຊຶ່ງ​ຈະປະກອບ​ດ້ວຍ​ສູນ​ສັບພະ​ສິນຄ້າ ​ໂຮງ​ແຮມ ​ໂຮງ​ຮູບເງົາ ອາຄາ​ນສໍານັກງານ ອາຄານ​ທີ່​ພັກ​ອາ​ໃສ ບ້ານ​ພັກ ສູນ​ອາຫານ​ນາໆ ຊາດ ຮ້ານ​ຄ້າ​ຕ່າງໆ ສູນ​ຄວາມບັນ​ເທີ​ງຄົບ​ວົງ​ຈອນ ​ແລະ​ທີ່​ຖື​ວ່າ​ເປັນສ່ວນ​ນຶ່ງ​ໃນ​ໂຄງການ​ທີ່​ໄດ້​ລົງມື​ກໍ່ສ້າງ​ແລ້ວ​ໃນ​ເວລາ​ນີ້ກໍ​ຄື ​ບ້ານ​ພັກ​ຮັບຮອງ​ສໍາລັບ​ຜູ້​ນໍາ​ລັດຖະບານ​ທີ່​ຈະ​ເຂົ້າຮ່ວມ​ກອງ​ປະຊຸມສຸດ​ຍອດ​ຜູ້​ນໍາ​ເອ​ເຊຍ-ຢູ​ໂຣບ ASEM ຄັ້ງ​ທີ 9 ທີ່​ລັດຖະບານ​ລາວ​ຈະ​ເປັນ​ເຈົ້າພາບ​ຈັດ​ຂຶ້ນຢ່າງ​ເປັນ​ທາງ​ການ​ໃນ​ວັນ​ທີ່ 5-6 ​ເດືອນ​ພະ​ຈິກ 2012 ນີ້ ຢູ່​ນະຄອນວຽງ​ຈັນ.

ປັດຈຸບັນ​ນີ້ ​ເຖິງ​ແມ່ນ​ວ່າ​ຈີນ​ຈະ​ຖືກ​ຫວຽດນາມ​ແຊງ​ໜ້າ​ຂຶ້ນມາ​ເປັນ​ປະ​ເທດ​ທີ່​ມີມູນ​ຄ່າລົງທຶນ​ໃນ​ລາວ​ຫຼາຍ​ທີ່​ສຸດ​ເປັນອັນ​ດັບ​ທີ 1 ​ແລ້ວ​ກໍ​ຕາມ ຫາກ​ແຕ່ວ່າ​ດ້ວຍ​ການ​ລົງທຶນ​ໃນ​ລາວ​ທີ່​ເພີ່ມ​ມູນ​ຄ່າ​ຫຼາຍ​ຂຶ້ນຕະຫຼອດ​ເວລານັ້ນ ກໍ​ເຮັດ​ໃຫ້​ຈີນ​ຍັງ​ມີ​ໂອກາດ​ທີ່​ຈະ​ກັບ​ຂຶ້ນ​ໄປ​ຄອງ​ອັນ​ດັບ​ນຶ່ງ​ໄດ້​ຄື​ກັນ ເນື່ອງ​ຈາກ​ວ່າ ຈີນ​ໄດ້​ມີ​ການ​ລົງທຶນ​ໃນ​ລາວ​ເພີ່ມ​ຕະຫຼອດ​ເວລາ ດັ່ງ​ທີ່​ທ່ານສົມ​ດີ ດວງ​ດີ ລັດຖະມົນຕີ​ວ່າການ​ກະຊວງ ​ແຜນການ ​ແລະ​ການ​ລົງທຶນ​ຂອງ​ລາ​ວ​ໄດ້​ຖະ​ແຫຼງວ່າ:

“ສໍາລັບ​ການ​ລົງທຶນ​ຂອງ ສປ.ຈີນ ຮອດ​ປັດຈຸບັນ​ນີ້​ ມີ​ມູນ​ຄ່າ​ເຖິງ 3.3 ຕື້ ມີ 742 ​ໂຄງການ ທີ່​ນອນ​ຢູ່​ໃນ​ຂະ​ແໜງ​ບໍ່ແຮ່ ອຸດສາຫະກໍາ ​ແລະ​ຫັດຖະ​ກໍາ ​ກະສິກໍາ ການ​ບໍລິການ ພະລັງງານ​ໄຟຟ້າ​ນໍ້າຕົກ ອຸດສາຫະກໍາ​ໄມ້ ອຸດສາຫະກໍາ​ຕັດ​ຫຍິບ ​ແລະ​ອື່ນໆ ​ໃນ​ຈໍານວນ 742 ​ໂຄງການ ມີ 557 ​ໂຄງການ ​ທີ່​ເປັນ​ການ​ລົງທຶນ​ຂອງ​ນັກທຸລະກິດ ສປ.ຈີນ 100%.”

Laos-Chinese Business Forum in 2011
Photo Gallery:

Laos-Chinese Business Forum in 2011

ຍິ່ງ​ໄປ​ກວ່າ​ນັ້ນ ການ​ຮ່ວມ​ມື​ລະຫວ່າງ​ລາວ​ກັບ​ຈີນ​ກໍ​ໄດ້​ມີ​ການ​ພັດທະນາ​ດີ​ຊຶ້ນ​ໃນ ທຸກໆ​ດ້ານ ​ໂດຍ​ສະ​ເພາະ​ແມ່ນ​ນັບ​ຕັ້ງ​ແຕ່​ປີ 2000 ທີ່​ຜູ້​ນໍາ​ຂອງ​ທັງ​ສອງ​ປະ​ເທດ ​ໄດ້​ເລີ່​ມການ​ເດີນທາງ​ຢ້ຽມຢາມ​ລະຫວ່າງ​ກັນ ​ຢ່າງ​ເປັນ​ທາງ​ການ​ເປັນ​ຕົ້ນ​ມາ ກໍ​ຍັງ ​ເຮັດ​ໃຫ້​ມີ​ການ​ຕົກລົງ​ໃນ​ຖະ​ແຫຼ​ງການ​ຮ່ວມ​ວ່າ​ດ້ວຍການ​ເປັນ​ຫຸ້ນ​ສ່ວນ​ຍຸດ​ທະ​ສາດ ​ໃນ​ການ​ພັດທະນາ​ຮ່ວມ​ກັນ​ຢ່າງຮອບດ້ານ​ໃນ​ປີ 2009 ທີ່​ເຮັດ​ໃຫ້​ການ​ພົວພັນ​ຮ່ວມ​ມື​ລະຫວ່າງ​ສອງ​ປະ​ເທດ​ໄດ້​ຖືກ​ຍົກ​ຂຶ້ນສູ່​ ລະດັບ​ສູງ​ສຸດ​ນັບ​ແຕ່​ນັ້ນ​ມາ​ອີກ​ດ້ວຍ.
​ປັດຈຸບັນ​ນີ້ ຈີນ​ນັບ​ວ່າ​ເປັນ​ປະ​ເທດ​ນຶ່ງ​ທີ່​ໄດ້​ໃຫ້ກາ​ນຊ່ວຍ​ເຫຼືອ​ແກ່​ລາວ​ເພີ່ມຫຼາຍ​ຂຶ້ນນັບ​ມື້ ຊຶ່ງ​ຖ້າ​ຫາກ​ນັບ​ຈາກ​ປີ 1990 ຈົນ​ເຖິງທ້າຍ​ປີ 2011 ທີ່​ຜ່ານ​ມາ​ນັ້ນ ກໍ​ປາກົດ​ວ່າ​ລັດຖະບານ​ຈີນ​ໄດ້​ໃຫ້ການ​ຊ່ວຍເຫຼືອ​ແກ່​ລັດຖະບານ​ລາວ ຄິດ​ເປັນ​ມູນ​ຄ່າ​ລວມຫຼາຍ​ກວ່າ 3,000 ລ້ານ​ໂດ​ລາ​ແລ້ວ ​ແລະ​ລ່າ​ສຸດ​ກໍ​ມີ​ລາຍ​ງານ​ວ່າ​ທາງ ການ​ຈີນ​ໄດ້​ລົງ​ນາມ​ໃນ​ສັນຍາ​ໃຫ້ການ​ຊ່ວຍ​ເຫຼື​ອ​ແກ່​ທາງ​ການ​ລາວ​ດ້ວຍ​ການ​ສະໜອງ​ເງິນ​ກູ້​ປອດ​ດອກ​ເບ້ຍ​ສໍາລັບ​ຊື້​ເຮືອບິນ MA-60 ຈາກ​ຈີນ 2 ລໍາ, ສັນຍາ ສະໜອງ​ເງິນ​ກູ້ໃຫ້​ກັບ​ກະຊວງ​ປ້ອງ​ກັນ​ຄວາມ​ສະຫງົບພາຍ​ໃນ​ລາວ ​ແລະສັນຍາ ສະໜອງ​ເງິນ​ກູ້​ເພື່ອ​ພັດທະນາ​ຂະ​ແໜງ​ການ​ເງິນ​ຂອງ​ລາວ​ໄປ​ສູ່​ທັນ​ສະ​ໄໝ.