ລິ້ງ ສຳຫລັບເຂົ້າຫາ

ວັນອັງຄານ, ໒໓ ເມສາ ໒໐໒໔

ລາຍໄດ້ສະເລ່ຍຂອງປະຊາຊົນລາວ ໃນເຂດນະຄອນວຽງຈັນ ຈະຫລຸດລົງເກີນກວ່າ 76 ເປີເຊັນ ທຽບກັບປີ 2022 ເນື່ອງຈາກຄ່າເງິນກີບຕົກຕ່ຳລົງ


ຕະຫຼາດຂາຍໄຂ່ໄກ່ ແລະເຂົ້າສານ ຢູ່ບ້ານໂຊກໃຫຍ່ ນະຄອນວຽງຈັນ ຊຶ່ງຄ່າເງິນກີບຕົກຕ່ຳລົງຢ່າງຮຸນແຮງດັ່ງກ່າວ ຈຶ່ງເຮັດໃຫ້ຕ້ອງໃຊ້ຈ່າຍເພີ້ມຂຶ້ນ ຍ້ອນສິນຄ້າລາຄາແພງຂຶ້ນ ໂດຍເຫັນໄດ້ຈາກດັດຊະນີ ລາຄາການຊົມໃຊ້ທີ່ສູງກວ່າ 178 ເປີເຊັນ.
ຕະຫຼາດຂາຍໄຂ່ໄກ່ ແລະເຂົ້າສານ ຢູ່ບ້ານໂຊກໃຫຍ່ ນະຄອນວຽງຈັນ ຊຶ່ງຄ່າເງິນກີບຕົກຕ່ຳລົງຢ່າງຮຸນແຮງດັ່ງກ່າວ ຈຶ່ງເຮັດໃຫ້ຕ້ອງໃຊ້ຈ່າຍເພີ້ມຂຶ້ນ ຍ້ອນສິນຄ້າລາຄາແພງຂຶ້ນ ໂດຍເຫັນໄດ້ຈາກດັດຊະນີ ລາຄາການຊົມໃຊ້ທີ່ສູງກວ່າ 178 ເປີເຊັນ.

ຄາດໝາຍໃນດ້ານລາຍໄດ້ສະເລ່ຍຂອງປະຊາຊົນລາວໃນເຂດນະຄອນວຽງຈັນໃນ ປີ 2023 ຈະຫລຸດລົງເກີນກວ່າ 76 ເປີເຊັນ ທຽບກັບປີ 2022 ໂດຍມີສາເຫດຈາກຄ່າເງິນກີບຕົກຕ່ຳລົງທຽບໃສ່ເງິນໂດລາສະຫະລັດ ຊຶ່ງ ຊົງຣິດ ໂພນເງິນ ມີລາຍງານຈາກບາງກອກ.

ເຈົ້າໜ້າທີ່ກະຊວງແຜນການ ແລະການລົງທຶນ ເປີດເຜີຍວ່າ ປະຊາຊົນລາວ ໃນເຂດນະຄອນວຽງຈັນ ຖືວ່າເປັນກຸ່ມປະຊາກອນທີ່ຖືກກະທົບໜັກທີ່ສຸດຈາກບັນຫາເງິນເຟີ້ ແລະຄ່າເງິນກີບຕົກຕ່ຳລົງຢ່າງຮຸນແຮງນັບຈາກໄຕມາດທີ 2 ຂອງປີ 2022 ເປັນຕົ້ນມາຈົນເຖິງປັດຈຸບັນນີ້ ເນື່ອງຈາກວ່າ ປະຊາຊົນລາວ ໃນເຂດນະຄອນວຽງຈັນມີລະດັບຄ່າຄອງຊີບສູງທີ່ສຸດໃນລາວ ໂດຍເຖິງແມ່ນວ່າ ຈະມີລາຍໄດ້ສະເລ່ຍສູງກວ່າປະຊາຊົນລາວ ໃນແຂວງອື່ນໆກໍຕາມ ແຕ່ເມື່ອຕ້ອງປະເຊີນກັບອັດຕາເງິນເຟີ້ສູງ ແລະຄ່າເງິນກີບຕົກຕ່ຳລົງຢ່າງຮຸນແຮງດັ່ງກ່າວ ຈຶ່ງເຮັດໃຫ້ຕ້ອງໃຊ້ຈ່າຍເພີ້ມຂຶ້ນ ຍ້ອນສິນຄ້າລາຄາແພງຂຶ້ນ ໂດຍເຫັນໄດ້ຈາກດັດຊະນີ ລາຄາການຊົມໃຊ້ທີ່ສູງກວ່າ 178 ເປີເຊັນ ແລະອັດຕາເງິນເຟີ້ສູງເກີນລະດັບ 40 ເປີເຊັນ ໃນປັດຈຸບັນນີ້.

ຍິ່ງໄປກວ່ານັ້ນ ບັນຫາເງິນເຟີ້ ແລະຄ່າເງິນກີບຕົກຕ່ຳລົງດັ່ງກ່າວນີ້ ກໍຍັງໄດ້ສົ່ງຜົນກະທົບຕໍ່ລະດັບລາຍໄດ້ສະເລ່ຍຂອງປະຊາກອນລາວ ອີກດ້ວຍ ເມື່ອທຽບໃສ່ເງິນໂດລາສະຫະລັດ ກໍຄືສຳລັບປະຊາຊົນໃນເຂດນະຄອນວຽງຈັນ ຊຶ່ງມີລາຍໄດ້ສະເລ່ຍ 64 ລ້ານກີບ ຫຼືເທົ່າກັບ 6,379 ໂດລາຕໍ່ຄົນໃນປີ 2022 ນັ້ນ ກໍຈະຄິດເປັນພຽງແຕ່ 3,620 ໂດລາຕໍ່ຄົນເທົ່ານັ້ນ ໃນປັດຈຸບັນ ໂດຍຫລຸດລົງເກີນກວ່າ 76 ເປີເຊັນທຽບໃສ່ປີ 2022 ພ້ອມກັນນີ້ ກໍຍັງໄດ້ສົ່ງຜົນກະທົບຕໍ່ເປົ້າໝາຍການລົບລ້າງບັນຫາທຸກຍາກຂອງປະຊາຊົນໃນເຂດນະຄອນວຽງຈັນ ໃຫ້ໄດ້ຢ່າງສິ້ນເຊີງໃນປີ 2023 ອີກດ້ວຍ.

ໂດຍການດຳເນີນແຜນການສົ່ງເສີມເພື່ອຊຸກຍູ້ການຜະລິດສິນຄ້າໃຫ້ໄດ້ເພີ້ມຂຶ້ນຢ່າງຕໍ່ເນື່ອງ ໃນໄລຍະກ່ອນການລະບາດໄວຣັສໂຄວິດ-19 ນັ້ນ ໄດ້ເຮັດໃຫ້ 154,000 ກວ່າຄົວເຮືອນຫລຸດພົ້ນຈາກຄວາມຍາກຈົນຊຶ່ງຄິດເປັນ 97 ເປີເຊັນຂອງຈຳນວນຄອບຄົວທັງໝົດໃນເຂດນະຄອນວຽງຈັນ ໃນນີ້ມີເກີນກວ່າ 142,000 ຄົວເຮືອນທີ່ເປັນຄອບຄົວພັດທະນາ ແລະມີການຜະລິດສິນຄ້າ 1 ເມືອງ 1 ຜະລີດຕະພັນ (ODOP) ໄດ້ຫຼາຍກວ່າ 250 ຜະລິດຕະພັນທີ່ນຳໃຊ້ເທັກນິກທັນສະ ໄໝ ຫາກແຕ່ກໍໄດ້ຮັບຜົນກະທົບຢ່າງໜັກໜ່ວງຈາກການລະບາດໄວຣັສໂຄວິດ-19 ໃນຊ່ວງປີ 2020-2022 ຈຶ່ງເຮັດໃຫ້ຈະຕ້ອງດຳເນີນການຟື້ນຟູເພື່ອໃຫ້ກັບຄືນສູ່ພາວະປົກກະຕິໃນທຸກດ້ານ ດັ່ງທີ່ ທ່ານອາດສະພັງທອງ ສີພັນດອນ ເຈົ້າຄອງນະຄອນວຽງຈັນ ຢືນຢັນວ່າ:

“ຮັບປະກັນໃຫ້ນະຄອນຫຼວງວຽງຈັນ ມີສະຖຽນລະພາບທາງດ້ານການເມືອງ ສັງ ຄົມມີຄວາມສີວິໄລ ແລະຍຸຕິທຳ ຍູ້ແຮງການພັດທະນາ ໃຫ້ຂະຫຍາຍຕົວຢ່າງຕໍ່ເນື່ອງຕາມທິດຄຸນະພາບ-ສີຂຽວ ແລະຍືນຍົງ ປົກປັກຮັກສາ ແລະນຳໃຊ້ຊັບພະ ຍາກອນທຳມະຊາດຢ່າງສົມເຫດສົມຜົນ ມີປະສິດທິຜົນສູງ ແລະຍືນຍົງ ປັບປຸງການຄຸ້ມຄອງບໍລິຫານລັດ ຄຸ້ມຄອງສັງຄົມຕາມລະບຽບກົດໝາຍໃຫ້ມີຜົນສັກສິດດີຂຶ້ນກວ່າເກົ່າຕາມທິດ ກະທັດຮັດ ໂປ່ງໃສ ທັນສະໄໝ ແລະມີປະທິຜົນສູງ ແກ້ໄຂຂອດຂັ້ນອຸດຕັນເປັນອຸປະສັກຕໍ່ການສົ່ງເສີມ ແລະການດຶງດູດການລົງທຶນ ກໍຄືການຜະລິດ ການດຳເນີນທຸລະກິດໃຫ້ມີຄວາມຄອ່ງຕົວ.”

ໂດຍອີງຕາມແຜນການພັດທະນາເສດຖະກິດແລະສັງຄົມແຫ່ງຊາດ ໃນຊ່ວງປີ 2021-2025 ລັດຖະບານລາວ ຍັງໄດ້ວາງເປົ້າໝາຍທີ່ຈະພັດທະນາເສດຖະກິດລາວ ໄປສູ່ລະບົບ Digital ໃຫ້ໄດ້ໃນປີ 2025 ແຕ່ກໍບໍ່ແມ່ນເລື້ອງງ່າຍ ເພາະລັດຖະບານລາວ ຂາດແຄນທັງໃນດ້ານເງິນທຶນ-ບຸກຄະລາກອນ ແລະເທັກໂນໂລຈີທັນສະໄໝ ຈຶ່ງເຮັດໃຫ້ການປະຕິບັດຕົວຈິງດຳເນີນໄດ້ຢ່າງຊັກຊ້າ ຊຶ່ງເຫັນໄດ້ຈາກໂຄງການພັດທະນາ 6 ສ ໃນນະຄອນວຽງຈັນ ກໍຄື ສ-ສະອາດ ສ-ສີຂຽວ ສ-ສະຫວ່າງ ສ-ສະເໜ່ ສ-ສີວິໄລ ນັ້ນ ຍັງຄົງບໍ່ສາມາດຈັດຕັ້ງປະຕິບັດໄດ້ຈິງ ດັ່ງເຈົ້າໜ້າທີ່ເຂດນະຄອນວຽງຈັນ ໄດ້ໃຫ້ການຢືນຢັນວ່າ:

“ການສ້າງເມືອງໃໝ່ຂະໜາດໃຫຍ່ ເພື່ອໃຫ້ເປັນເມືອງອັດສະລິຍະ ໃນປັດຈຸບັນນີ້ ມີຄວາມຫຍຸ້ງຍາກຫຼາຍເປັນສິ່ງທ້າທາຍ ເພາະວ່າ ພວກເຮົາມີງົບປະມານຈຳກັດໃນການລົງທຶນ ໂດຍສະເພາະແມ່ນການວາງແຜນການພັດທະນາພື້ນຖານໂຄງລ່າງ ແລະຫລຸດຜ່ອນຜົນກະທົບຕໍ່ສິ່ງແວດລ້ອມ ແລະສັງຄົມ ແລະອີກອັນນຶ່ງແມ່ນບັນຫາທີ່ໃຫຍ່ທີ່ສຸດ ແມ່ນການເວນຄືນທີ່ດິນ ແລະອັນໄທເຮົາເວົ້າທຸກມື້ນີ້ ບາງເທື່ອນີ້ ນະຄອນຫຼວງວຽງຈັນນີ້ ເວົ້າປະຕິບັດ 6 ສ. ກະຍັງບໍ່ທັນໄດ້ ຄິດວ່າ 2 ສ. ສ-ສະອາດ ສ-ສີຂຽວຫັ້ນ ກະແມ່ນດີແລ້ວ ແຕ່ວ່າ ເຮົາກະຍັງປະຕິບັດບໍ່ໄດ້ 6 ສ. ຫັ້ນແຫລະ ແມ່ນເມືອງອັດສະລິຍະ.”

ແຕ່ຢ່າງໃດກໍຕາມ ລັດຖະບານລາວ ກໍຄາດຫວັງວ່າ ການຮ່ວມມືຢ່າງໃກ້ຊິດກັບລັດຖະບານຈີນ ທີ່ໄດ້ໃຫ້ການຊ່ອຍເຫຼືອແກ່ລາວ ຫຼາຍທີ່ສຸດ ທັງໃນດ້ານເງິນທຶນແລະເທັກໂນໂລຈີການສື່ສານທັນສະໄໝນັ້ນ ຈະເຮັດໃຫ້ການພັດທະນາແລະການນຳໃຊ້ລະບົບ Digital ໃນພາກທຸລິກິດຕ່າງໆ ໃນລາວ ມີການຂະຫຍາຍຕົວເພີ້ມຂຶ້ນນັບມື້ ໂດຍສະເພາະເຄືອຂ່າຍລະບົບສັນຍານໄຮ້ສາຍ ທັງໂທລະສັບມືຖື ແລະ Internet ຄວາມໄວສູງນັ້ນ.

XS
SM
MD
LG