ສະຫະລັດ ໄດ້ປະຕິບັດ ພາກສ່ວນສຳຄັນ ຂອງຍຸດທະສາດ
ການຫັນໄປສູ່ເອເຊຍ ໃນວັນພະຫັດ ຜ່ານມາ ດ້ວຍການເດີນ
ທາງໄປເຖິງຍີ່ປຸ່ນ ຂອງກຳປັ່ນບັນທຸກເຮືອບິນ ພະລັງນິວເຄລຍ
USS Ronald Reagan ຂອງກອງທັບເຮືອສະຫະລັດ. ນອກ
ເໜືອຈາກການຂະຫຍາຍອຳນາດ ຂອງອາເມຣິກາ ຢູ່ໃນເອເຊຍ
ແລ້ວ ຜູ້ສື່ຂ່າວວີໂອເອ Brian Padden ລາຍງານວ່າ ການປະ
ຈຳການ ຂອງເຮືອລົບສະຫະລັດນັ້ນ ຍັງສະແດງໃຫ້ເຫັນ ເຖິງ
ການສະໜັບສະໜູນ ຄວາມພະຍາຍາມ ທີ່ຈະຂະຫຍາຍບົດບາດ
ກອງທັບຍີ່ປຸນ ໃນຂົງເຂດ ຂອງນາຍົກລັດຖະມົນຕີ ຍີ່ປຸ່ນ
ທ່ານ Shinzo Abe ອັນເປັນເລື້ອງ ທີ່ຖືກຖົກຖຽງກັນນັ້ນ ຊຶ່ງ
ໄຊຈະເລີນສຸກ ຈະນຳເອົາລາຍລະອຽດ ມາສະເໜີທ່ານ
ໃນອັດດັບຕໍ່ໄປ.
ກຳປັ່ນ USS Ronald Reagan ໄດ້ເດີນທາງໄປເຖິງ ຖານທັບເຮືອສະຫະລັດ ຢູ່ທີ່
ນະຄອນ Yokosuka ໃນວັນພະຫັດຜ່ານມາ.
ການປ່ຽນໄປແທນກຳປັ່ນ USS George Washington ທີ່ກາຍມາເປັນສ່ວນສຳຄັນ
ໃນການຫັນສູ່ເອເຊຍຂອງວໍຊິງຕັນ ແມ່ນເປັນການເພັ່ງເລັງໃສ່ສົມບັດຕ່າງໆ ດ້ານການ
ທະຫານ ແລະ ການທູດ ໃສ່ຂົງເຂດທີ່ມີຄວາມສຳຄັນ ທາງດ້ານຍຸດທະສາດ ເພີ້ມຂຶ້ນ
ເລື້ອຍໆ.
ຮອງພົນເຮືອເອກ Joseph Aucoin ຜູ້ບັນຊາການ ກອງທັບເຮືອທີ 7 ຂອງສະຫະລັດ
ເວົ້າວ່າ “ພວກເຮົາມີເຮືອຈຳນວນນຶ່ງ ທີ່ມີຄວາມອາດສາມາດທີ່ສຸດ ໃນການປ້ອງ
ກັນຂີປະນາວຸດ ໂດຍສະເພາະ ຢູ່ໃນ ຂົງເຂດນີ້ ຂອງໂລກ ທີ່ຂ້າມມະຫາສະມຸດ
ມາຈາກເກົາຫຼີເໜືອ.”
ເຮືອຫຼາຍໆລຳ ທີ່ມີລູກເຮືອ 5,000 ຄົນ ໄດ້ປະຈຳການຢູ່ໃນທະເລ ເປັນເວລາຫຼາຍເດືອນ.
ຫຼັງຈາກທີ່ໄດ້ໄປເຖິງທ່າເຮືອແລ້ວ ພົນທະຫານເຮືອ Emanuel Taylor ກໍໄດ້ພົບກັບລູກ
ສາວເກີດໃໝ່ຂອງລາວ ເປັນຄັ້ງທຳອິດ.
ພົນທະຫານເຮືອ Taylor ເວົ້າວ່າ “ຂ້າພະເຈົ້າດີໃຈຫຼາຍ. ບໍ່ມີຄຳເວົ້າໃດໆ ທີ່ຈະສາ
ມາດພັນລະນາໄດ້ ໃນເວລານີ້.”
ການເດີນທາງໄປເຖິງຍີ່ປຸ່ນ ຂອງກຳປັ່ນ USS Ronald Reagan ນັ້ນ ເກີດຂຶ້ນພ້ອມກັນ
ກັບການຮັບຜ່ານມາດຕະການ ຄວາມໝັ້ນຄົງໃໝ່ຂອງຍີ່ປຸ່ນ ທີ່ຄວນຈະເຮັດໃຫ້ງ່າຍຂຶ້ນ
ຕື່ມ ສຳຫລັບ ການປະຕິບັດໜ້າທີ່ ໃນການປ້ອງກັນຜົນປະໂຫຍດຕ່າງໆ ແລະ ບັນດາ
ພັນທະມິດຂອງຕົນ ໂດຍກອງທັບຍີ່ປຸ່ນ.
ເຖິງຢ່າງໃດກໍຕາມ ມັນກໍໄດ້ເນັ້ນໃຫ້ເຫັນເຖິງ ການຄັດຄ້ານຢ່າງແຂງຂັນ ໂດຍພວກທີ່ຮັກ
ຫອມຄວາມສະຫງົບຂອງປະເທດ ພ້ອມກັນກັບ ຄວາມຢ້ານກົວ ຈາກບັນດາປະເທດເພື່ອນ
ບ້ານຂອງຍີ່ປຸ່ນ ທີ່ວ່າ ໂຕກຽວ ຈະກັບຄືນໄປນິຍົມການທະຫານຄືນໃໝ່ ດັ່ງເມື່ອກ່ອນ.
ລັດຖະມົນຕີທະຫານເຮືອ ສະຫະລັດ ທ່ານ Ray Mabus ໄດ້ເດີນທາງໄປຍັງຍີ່ປຸຸ່ນ ພ້ອມດ້ວຍກຳປັ່ນບັນທຸກເຮືອບິນ USS Ronald Reagan ອັນເປັນສ່ວນນຶ່ງ ໃນການສະແດງໃຫ້ເຫັນວ່າ ສະຫະລັດ ສະໜັບສະໜູນ ໃຫ້ຍີ່ປຸ່ນສະແດງທ່າທີແບບມີຄວາມໝັ້ນໃຈ ແລະກົງໄປກົງມາ ຫຼາຍຂຶ້ນ ເພື່ອຊ່ວຍຢັບຢັ້ງ ຄູ່ປໍລະປັກຮ່ວມກັນ ເຊັ່ນ ຈີນ ແລະ ເກົາຫຼີເໜືອນັ້ນ.
ລັດຖະມົນຕີກອງທັບເຮືອ ສະຫະລັດ ທ່ານ Mabus ເວົ້າວ່າ “ສະນັ້ນ ພວກເຮົາຈຶ່ງຄິດ
ວ່າ ມາດຕະການໃໝ່ເຫຼົ່ານີ້ ຈະເລິກເຊິ່ງຂຶ້ນອີກ ຈະສ້າງຄວາມແຂງແກ່ນຂຶ້ນ ແລະ
ຈະເຮັດໃຫ້ພວກເຮົາ ດີຂຶ້ນຕື່ມອີກ ພ້ອມກັນ.”
ບັນດານັກວິເຄາະ ກ່າວວ່າ ສຳຫລັບຍີ່ປຸ່ນແລ້ວ ການເປັນພາຄີລຸ້ນນ້ອງ ກັບສະຫະລັດ
ຫຼາຍກວ່ານັ້ນ ມັນຕ້ອງໄດ້ໝາຍໝັ້ນ ທີ່ຈະທຳການເຝິກແອບທາງດ້ານທະຫານ ຢ່າງ
ເຂັ້ມງວດ, ເພີ້ມງົບປະມານ ດ້ານການປ້ອງກັນຂອງຕົນ ໃຫ້ຫຼາຍຂຶ້ນຢ່າງມີຄວາມໝາຍ
ແລະເອົາບົດບາດເປັນຜູ້ນຳ ຕໍ່ພາລະກິດຕ່າງໆ ທີ່ອາດສາມາດເປັນອັນຕະລາຍໄດ້.
