ລັດຖະສະພາ ສະຫະລັດ ໄດ້ຫຍັບໃກ້ເຂົ້າສູ່ການປິດລັດຖະບານໃນວັນອັງຄານວານນີ້ ໃນຂະນະທີ່ສະພາສູງບໍ່ສາມາດທີ່ຈະອະນຸມັດຕໍ່ຮ່າງກົດໝາຍການໃຊ້ຈ່າຍໄລຍະສັ້ນ.
ພັກເດໂມແຄຣັດໄດ້ຂັດຂວາງ ຕໍ່ຮ່າງກົດໝາຍ ທີ່ອາດຈະຂະຫຍາຍອຳນາດການໃຊ້ຈ່າຍ ຂອງລັດຖະບານກາງໄປຈົນຮອດເດືອນທັນວາ. ນອກຈາກວ່າລັດຖະສະພາຈະດຳເນີນການສິ່ງໃດສິ່ງນຶ່ງແລ້ວ, ອຳນາດໃນການໃຊ້ຈ່າຍຈະໝົດອາຍຸໃນຕອນທ່ຽງຄືນຂອງວັນ ສຸກທີ່ຈະມາເຖິງນີ້ ເຊິ່ງເປັນການສິ້ນສຸດລົງຂອງສົກງົບປະມານໃນປະຈຸບັນ ແລະ ການບໍ ລິການລັດຖະບານທີ່ບໍ່ສຳຄັນຂອງລັດຖະບານກາງ ຈະຖືກລະງັບໄວ້ຊົ່ວຄາວ, ບໍ່ເຖິງ 6 ສັບປະດາກ່ອນການເລືອກຕັ້ງໃນເດືອນພະຈິກນີ້.
ສະມາຊິກພັກຣີພັບບລີກັນ ແລະ ເດໂມແຄຣັດ ຕ່າງກໍໄດ້ຖິ້ມໂທດໃສ່ກັນແລະກັນກ່ຽວກັບເລື່ອງນີ້ ເຊິ່ງມີການພົບວ່າ ຮ່າງກົດໝາຍການໃຊ້ຈ່າຍຊົ່ວຄາວ ຍັງຂາດຄະແນນຢູ່ 15 ຄະ ແນນ ຈຶ່ງຈະໄດ້ຮັບການສະໜັບສະໜູນ 3 ສ່ວນ 5 ທີ່ຈຳເປັນເພື່ອຮັບຜ່ານສະພາສູງ.
ສະມາຊິກພັກຣີພັບບລີກັນ ຈາກລັດ Kentucky, ຜູ້ນຳສຽງສ່ວນຫຼາຍ ໃນສະພາສູງ ທ່ານ Mitch McConnell ໄດ້ກ່າວວ່າ “ມັນສາມາດເປັນໄປໄດ້ບໍວ່າ ບັນດາຜູ້ນຳພັກເດໂມ ແຄຣັດໄດ້ສະໜັບສະໜູນຄວາມຜິດປົກກະຕິຂອງການປະຕິບັດງານຢ່າງຮອບຄອບທີ່ ພວກເຂົາເຈົ້າໄດ້ກັກບັນຊີງົບປະມານ 10 ສັບປະດາທີ່ບໍ່ມີຂໍ້ຂັດແຍ້ງໄວ້ເພື່ອຫຍັງແທ້? ມີຜູ້ໃດຮູ້ວ່າບັນຫາມັນແມ່ນຫຍັງ? ແມ່ນກະທັ້ງພວກເດໂມແຄຮັດເອງຈະຮູ້ຈັກບໍ? ຄຳ ຊີ້ແຈງເຫດຜົນເບິ່ງຄືວ່າ ຈະປ່ຽນແປງໄປແຕ່ລະຊົ່ວ ໂມງ.”
ຜູ້ນຳສຽງສ່ວນນ້ອຍຈາກລັດ Nevada ທ່ານ Harry Reid ໄດ້ອ້າງວ່າ “ນິຕິບັນຍັດຂອງ ພັກຣີພັບບລີກັນແມ່ນພາດປະເດັນ.”
ພັກເດໂມແຄຣັດໄດ້ຄັດຄ້ານຕໍ່ຂໍ້ກຳນົດທີ່ຈະເຮັດໃຫ້ການເປີດເຜີຍສຳ ລັບບໍລິສັດຕ່າງທີ່ ປະກອບສ່ວນເຂົ້າໃນການໂຄສະນາຫາສຽງມີຄວາມອ່ອນແອລົງ. ພວກເຂົາເຈົ້າກໍຍັງໄດ້ ຕຳໜິວ່າຮ່າງກົດໝາຍດັ່ງກ່າວບໍ່ມີເງິນທຶນເພື່ອລົບລ້າງການປົນເປື້ອນສານກົ່ວຈາກນ້ຳ ດື່ມໃນເມືອງ Flint ລັດ Michigan, ເຊິ່ງມັນເປັນອັນຕະລາຍທີ່ເລີ່ມຂຶ້ນໃນສອງປີທີ່ຜ່ານ ມາ.
ສະມາຊິກພັກ ເດໂມແຄຣັດ ລັດ ອີລີນອຍ ທ່ານ Dick Durbin ໄດ້ກ່າວວ່າ “ປະຊາຊົນ ໜຶ່ງແສນຄົນໄດ້ກືນກິນເອົາສານກົ່ວນັ້ນ. ລອງຈິນຕະນາການເບິ່ງເດັກນ້ອຍ 9,000 ຄົນໃນເມືອງ Flint ເປັນເບື່ອຍ້ອນນ້ຳທີ່ປົນເປື້ອນກັບສານກົ່ວ. ສິ່ງນັ້ນໄດ້ເກີດຂຶ້ນ ແລ້ວ. ໃນເມືອງທີ່ເປັນຕາສົງສານນັ້ນ ພວກເຂົາເຈົ້າຍັງດື່ມນ້ຳຈາກຕຸກໃນທຸກໆມື້."
ພັກຣີພັບບລີກັນໄດ້ຕອບໂຕ້ວ່າພວກເຂົາເຈົ້າມີຄວາມຕັ້ງໃຈຢ່າງເຕັມທີ່ ເພື່ອສະໜອງທຶນ ຕ່າງໆໃຫ້ກັບເມືອງ Flint, ແຕ່ຈະເຮັດມັນໃນມະຕິແຍກຕ່າງຫາກ ທີ່ຮັບມືກັບຄວາມປອດ ໄພຂອງນ້ຳໂດຍສະເພາະ, ບໍ່ແມ່ນຮ່າງກົດໝາຍການໃຊ້ຈ່າຍໄລຍະສັ້ນສຳລັບລັດຖະ ບານທັງໝົດ.
ພັກຣີພັບບລີກັນ ເຫັນການເມືອງເປັນສິ່ງຄອບງຳໃນປີການເລືອກຕັ້ງ, ໂດຍອ້າງວ່າ ພັກ ເດໂມແຄຣັດ ເຊື່ອວ່າ ໂອກາດຂອງການທີ່ຈະຊະນະການຄວບຄຸມສະພາສູງຂອງພວກ ເຂົາເຈົ້າຈະເພີ່ມສູງຂຶ້ນ ຖ້າພັກຣີພັບບລີກັນ ຖືກມອງເຫັນວ່າບໍ່ສາມາດທີ່ຈະບັນລຸໜ້າທີ່ ພື້ນຖານໃນການປະຕິບັດກົດໝາຍ.
