ລິ້ງ ສຳຫລັບເຂົ້າຫາ

logo-print

ສະຫະລັດ ຮຽກຮ້ອງອີກເທື່ອນຶ່ງ ໃຫ້ບັນດາປະເທດ ໃນອ່າວເປີເຊຍ ແກ້ໄຂບັນຫາຄວາມແຕກແຍກ


ທ່ານໄມຄ໌ ພອມພຽວ ລມຕ ກະຊວງການຕ່າງປະເທດ, ຂວາ, ແລະກາຕ້າຮອງນາຍົກ ທ່ານໂມຮຳເມັດ ບິນ ອັບດູລຣາມານ ອາລ-ທານີ ລົງນາມໃນບົດບັນທຶກຄວາມເຂົ້າໃຈ ໃນລະຫວ່າງ ກອງປະຊຸມສົນທະນາ ປະຈຳປີ ຄັ້ງທີ 3 ດ້ານຍຸດທະສາດ ຢູ່ກະຊວງການຕ່າງປະເທດ, ວັນທີ 14 ກັນຍາ 2020 ໃນນະຄອນຫຼວງ ວໍຊິງຕັນ.

ສະຫະລັດກຳລັງຮຽກຮ້ອງໃຫ້ບັນດາປະເທດໃນເຂດອ່າວເປີເຊຍແກ້ໄຂຄວາມແຕກແຍກທີ່ແກ່ຍາວມາໄດ້ 3 ປີແລ້ວນັ້ນ ໂດຍອ້າງເຖິງຄວາມຈຳເປັນທີ່ຈະຕ້ອງສາມັກຄີກັນເປັນແນວໂຮມເພື່ອຕໍ່ຕ້ານອີຣ່ານ.

“ເພື່ອປິດປະຕູຕໍ່ການແຊກແຊງທີ່ເພີ້ມຂຶ້ນຂອງອີຣ່ານ ມັນເກີນເວລາມາແລ້ວທີ່ຈະຫາທາງແກ້ໄຂບັນຫາຄວາມແຕກແຍກໃນອ່າວເປີເຊຍ” ທ່ານໄມຄ໌ ພອມພຽວ ລັດຖະມົນຕີກະຊວງການຕ່າງປະເທດສະຫະລັດ ໄດ້ກ່າວໄປ.

ທ່ານກ່າວຕື່ມວ່າ “ລັດຖະບານທ່ານທຣຳ ຢາກຈະເຫັນບັນຫາຂັດແຍ້ງນີ້ ໄດ້ຮັບການແກ້ໄຂ ແລະໃຫ້ເປີດນ່ານຟ້າຂອງກາຕ້າຄືນໃໝ່ ແລະເຂດຊາຍແດນຕ່າງໆ ຊຶ່ງໃນປັດຈຸບັນນີ້ໄດ້ຖືກປິດກັ້ນໂດຍບັນດາປະເທດອື່ນໆໃນອ່າວເປີເຊຍ. ຂ້າພະເຈົ້າຫວັງວ່າ ຈະມີຄວາມກ້າວໜ້າກ່ຽວກັບບັນຫານີ້.”

ທ່ານພອມພຽມ ໄດ້ກ່າວຖະແຫລງພາຍຫຼັງຈາກທີ່ໄດ້ຕ້ອນຮັບບັນດາເຈົ້າໜ້າທີ່ອາວຸໂສຂອງກາຕ້າ ທີ່ປະກອບດ້ວຍ ຮອງນາຍົກລັດຖະມົນຕີຂອງການຕ້າ ທ່ານໂມຮຳເມັດ ບິນ ອັບດູລຣາມານ ອາລ-ທານີ ແລະລັດຖະມົນຕີກະຊວງການເງິນ ທ່ານອາລີ ຊາຣີຟ ອາລ-ອີມາຈ໌ ມາຍັງກະຊວງການຕ່າງປະເທດ ສຳລັບການສົນທະນາດ້ານຍຸດທະສາດປະຈຳ ປີ ຄັ້ງທີ 3 ລະຫວ່າງ ສະຫະລັດແລະກາຕ້າ.

ເຂົ້າຮ່ວມກອງປະຊຸມນຳ ທ່ານລັດຖະມົນຕີພອມພຽວ ປະກອບດ້ວຍ ທ່ານສະຕີເວັນ ມນູຈິນ ລັດຖະມົນຕີກະຊວງການເງິນ ແລະທ່ານວີລເບີ ຣັອສ ລັດຖະມົນຕີກະຊວງການຄ້າ. ສະຫະລັດ ໄດ້ລົງນາມໃນຂໍ້ຕົກລົງຫຼາຍສະບັບ ກັບກາຕ້າ ເພື່ອເສີມຂະຫຍາຍການລົງທຶນ ແລະສາຍສຳພັນດ້ານວັດທະນະທຳ.

ທັງເຈົ້າໜ້າທີ່ຂອງສະຫະລັດແລະກາຕ້າ ໄດ້ປຶກສາຫາລື “ທ່າແຮງເພື່ອກ້າວໄປສູ່ສັນຕິພາບ ແລະຄວາມຈະເລີນຮຸ່ງເຮືອງຢູ່ໃນຂົງເຂດ ຄວາມຈຳເປັນທີ່ຈະຕ້ອງເອົາຊະນະການແຕກແຍກພາຍໃນອ່າວເປີເຊຍ ແລະສືບຕໍ່ຕ້ານຢັນຜົນກະທົບຈາກການປັ່ນປ່ວນຂອງອີຣ່ານຢູ່ໃນຂົງເຂດ ແລະຄວາມພະຍາຍາມຂອງກາຕ້າ ເພື່ອສະໜັບສະໜຸນສະຖຽນລະພາບ ແລະການພັດທະນາເສດຖະກິດໃນເຂດກາຊາ” ອິງຕາມກະຊວງການຕ່າງປະເທດສະຫະລັດ.

https://www.state.gov/secretary-pompeos-meeting-with-qatari-deputy-prime-minister-and-minister-of-foreign-affairs-al-thani/

ສະພາການຮ່ວມມືກຸ່ມເຂດອ່າວເປີເຊຍ ຫຼື GCC ທີ່ປະກອບດ້ວຍ ຊາອຸດີອາຣາເບຍ, ສະຫະລັດອາຣັບເອເມີເຣັສ ຫຼື UAE, ກາຕ້າ, ຄູເວດ ແລະບາຫ໌ເຣນ ກໍໄດ້ແຕກແຍກກັນ ນັບຕັ້ງແຕ່ກາງປີ 2017 ເປັນຕົ້ນມາ.

UAE, ຊາອຸດີອາຣາເບຍ, ບາຫ໌ເຣນ ແລະອີຈິບ ໄດ້ຕັດສາຍສໍາພັນທາງດ້ານການທູດ ກັບກາຕ້າ ແລະໄດ້ວາງມາດຕະການຂວ້ຳບາດ ໂດຍກ່າວຫາກາຕ້າວ່າ ສະໜັບສະໜຸນການກໍ່ການຮ້າຍ ຊຶ່ງກາຕ້າໄດ້ປະຕິເສດຕໍ່ຂໍ້ກ່າວຫານັ້ນ.

ອ່ານຂ່າວນີ້ຕື່ມ ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG