ສະມາຊິກ ລັດຖະສະພາສະຫະລັດ ພວມຊັ່ງຊາ ເບິ່ງການເອົາ
ບາດກ້າວທີ່ຈະຕ້ອບໂຕ້ຕໍ່ພວກ ຫົວຮຸນແຮງລັດອິສລາມ ທີ່ເຂົ້າ
ຄວບຄຸມຂົງເຂດອັນກ້ວາງໃຫຍ່ ໃນພາກເໜືອອິຣັກ ແລະພາກ
ຕາເວັນອອກຂອງຊີເຣຍ.
ໃນອາທິດແລ້ວນີ້ ປະທານນາທິບໍດີສະຫະລັດທ່ານບາຣັກ
ໂອບາມາໄດ້ປະກາດຂະຫຍາຍ ການປະຕິບັດງານ ທີ່ຮວມທັງ
ການໂຈມຕີທາງອາກາດ ເພື່ອຊ່ອຍກອງກຳລັງອີຣັກ ແລະການ
ອະນຸມັດຂອງທ່ານ ທີ່ຈະທຳການໂຈມຕີທາງອາກາດ ຢູ່ໃນ
ຊີເຣຍ ນຳອີກ.
ລັດຖະມົນຕີປ້ອງກັນປະເທດທ່ານ Chuck Hagel ຈະໄດ້ໃຫ້ການກ່ຽວກັບໄພຂົ່ມຂູ່ຂອງ ຫົວຮຸນແຮງໃນວັນອັງຄານມື້ນີ້ ຕໍ່ຄນະກຳມະການດ້ານກອງທັບ ພ້ອມໆກັບ ທ່ານນາຍພົນ Martin Dempsey ປະທານເສນາທິການຮ່ວມຂອງກອງທັບສະຫະລັດ.
ທ່ານ Obama ໄດ້ກ່າວວ່າ ທ່ານບໍ່ຈຳເປັນທີ່ຈະຕ້ອງໄດ້ຮັບການອະນຸມັດຈາກລັດຖະສະພາ ແຕ່ທ່ານກໍໄດ້ຮ້ອງຂໍໃຫ້ບັນດາສະມາຊິກສະພາອະນຸມັດແຜນການທີ່ຈະຝຶກແອບພວກຕໍ່ຕ້ານ
ລັດຖະບານໃນຊີເຣຍ ຊຶ່ງພວມທຳການສູ້ລົບກັບພວກກະບົດລັດອິສລາມ ແລະທະຫານລັດ
ຖະບານຊີເຣຍ ໃນສົງຄາມກາງເມືອງຢູ່ໃນປະເທດຊີເຣຍ.
ສະມາຊິກສະພາຕ່ຳ ຈະອະພິປາຍກ່ຽວກັບຮ່າງກົດໝາຍດັ່ງກ່າວ ໃນມື້ອັງຄານມື້ນີ້ ຊຶ່ງບັງ ຄັບວ່າທຳນຽບຫ້າແຈ ຕ້ອງໄດ້ແຈ້ງໃຫ້ຊາບ 15 ມື້ ກ່ອນຈະມີການຝຶກແອບໃດໆເລີ້ມຂຶ້ນ ແລະຄວາມຄືບໜ້າເປັນປະຈຳຫຼັງຈາກນັ້ນ. ບັນດາສະມາຊິກສະພາ ອາດຈະລົງຄະແນນສຽງໃນວັນພຸດມື້ອື່ນນີ້ກໍເປັນໄດ້. ມາດຕະການທີ່ວ່ານີ້ ຈຳເປັນຍັງຈະຕ້ອງໄດ້ຮັບອະນຸມັດຈາກສະພາສູງນຳດ້ວຍ.
ເຮືອບິນລົບຂອງສະຫະລັດ ໄດ້ທຳການໂຈມຕີເປັນເທື່ອທຳອິດ ໃນການຂະຫຍາຍການຖິ້ມລະເບີດ ຢູ່ໃນອີຣັກ ໃນວັນຈັນວານນີ້ ໂດຍໂຈມຕີເປົ້າໝາຍຕ່າງໆ ທາງພາກຕາເວັນຕົກສຽງໃຕ້ຂອງນະຄອນຫຼວງ Baghdad ຂອງອີຣັກ ພ້ອມທັງຂົງເຂດທີ່ໃກ້ໆກັບ ພູ Sinjar ທາງພາກເໜືອຂອງອີຣັກນຳ.
