ລິ້ງ ສຳຫລັບເຂົ້າຫາ

ວັນພະຫັດ, ໒໕ ເມສາ ໒໐໒໔

ສະພາສືບລັບແຫ່ງຊາດ ຂອງ ສຫລ ເຕືອນວ່າ ໂລກຈະມີສັງຄົມທີ່ແຕກຫັກ ແລະຄວາມຂັດແຍ້ງເກີດຂຶ້ນ


ທົ່ງທີ່ປົກຄົມໄປດ້ວຍໝອກຄວັນຢູ່ໃກ້ກັບເມືອງ Burragate ຂອງອອສເຕຣເລຍ ພາບຖ່າຍໃນວັນທີ 11 ມັງກອນ, 2020
ທົ່ງທີ່ປົກຄົມໄປດ້ວຍໝອກຄວັນຢູ່ໃກ້ກັບເມືອງ Burragate ຂອງອອສເຕຣເລຍ ພາບຖ່າຍໃນວັນທີ 11 ມັງກອນ, 2020

ໂລກທີ່ໄດ້ດີ້ນຮົນຕໍ່ສູ້ກັບການລະບາດຂອງພະຍາດ ແລະສິ່ງທ້າທາຍຕໍ່ລະບົບ ແລະສະຖາບັນທີ່ມີມາດົນນານຢູ່ແລ້ວນີ້ ຄົງຈະບໍ່ສາມາດບັນເທົາທຸກໄດ້ຫລາຍປານໃດໃນອີກ 20 ປີຂ້າງໜ້ານີ້, ອີງຕາມການລາຍງານໃໝ່ຂອງນັກວິເຄາະດ້ານຂໍ້ມູນຄວາມລັບຂອງສະຫະລັດ.

ກົງກັນຂ້າມ, ພວກເຂົາເຈົ້າຄາດຄະເນວ່າສະຖາບັນ ແລະລະບົບຕ່າງໆທີ່ຄອບງຳ ເຫດການໃນທົ່ວໂລກນັບແຕ່ສົງຄາມໂລກຄັ້ງທີ 2 ເປັນຕົ້ນມາຈະພົບຄວາມ ຫຍຸ້ງຍາກໃນການຮັບມືກັບ "ບັນດາສິ່ງທ້າທາຍທົ່ວໂລກທີ່ກຳລັງເກີດຂຶ້ນ," ລວມທັງການປ່ຽນແປງຂອງດິນຟ້າອາກາດ, ພະຍາດ, ວິກິດການທາງການເງິນ ແລະເຕັກໂນໂລຈີທີ່ກ້າວໜ້າທັນສະໄໝຢ່າງບໍ່ເຄີຍມີມາກ່ອນ.

ບົດລາຍງານເຕືອນວ່າ "ສິ່ງທ້າທາຍເຫລົ່ານີ້ຈະທົດສອບຄວາມໜຽວແໜ້ນແລະ ການປັບຕົວຂອງປະຊາຄົມ, ຂອງປະເທດ ແລະຂອງລະບົບສາກົນຊໍ້າແລ້ວຊໍ້າອີກ, ຊຶ່ງມັກຈະເກີນຄວາມສາມາດຂອງລະບົບ ແລະຕົວແບບທີ່ມີຢູ່ນີ້," ໂດຍໄດ້ກ່າວເພີ້ມອີກວ່າ ການພັດທະນາບາງອັນອາດຈະ “ປະເຊີນກັບໄພຫາຍະນະ.”

ການປະເມີນວ່າຈະມີສິ່ງທີ່ບໍ່ດີເກີດຂຶ້ນນີ້ ແມ່ນສ່ວນນຶ່ງຂອງບົດລາຍງານແນວໂນ້ມຂອງໂລກ ຫລື Global Trends 2040, ເຊິ່ງເປັນບົດລາຍງານ ທີ່ສັງລວມໂດຍສະພາສືບລັບແຫ່ງຊາດ ແລະພິມອອກທຸກໆສີ່ປີ. ແລະໃນຂະນະທີ່ງວດຫຼ້າສຸດນີ້ໄດ້ສະແດງໃຫ້ເຫັນບາງສະຖານະການຊຶ່ງໃນນັ້ນເວົ້າວ່າ ປະເທດ ທີ່ມີປະຊາທິປະໄຕເຊັ່ນ: ສະຫະລັດກັບຄືນສູ່ສະພາບເດີມ ແລະສາມາດກັບຄືນ ໄປສູ່ຄວາມຈະເລີນຮຸ່ງເຮືອງໄດ້ ແຕ່ບົດລາຍງານນີ້ກໍເຕືອນວ່າ ມັນຈະບໍ່ເປັນ ເຊັ່ນນັ້ນ ຖ້າຫາກພວກເຂົາເຈົ້າບໍ່ຊອກຫາວິທີທາງແກ້ໄຂບັນຫາທີ່ຮຸນແຮງແລະ ເກີດຂຶ້ນເລື້ອຍໆ ຢ່າງບໍ່ເຄີຍມີເຫລົ່ານີ້ ເສຍກ່ອນ.

ບົດລາຍງານກ່າວອີກວ່າ "ພະຍາດໂຄວິດ-19 ໄດ້ເຕືອນໃຫ້ໂລກຮູ້ເຖິງຄວາມບອບບາງຂອງມັນ ແລະສະແດງໃຫ້ເຫັນເຖິງຄວາມສ່ຽງທີ່ເກີດຂຶ້ນໃນລະດັບສູງຂອງການເພິ່ງພາອາໄສກັນ". "ລະບົບສາກົນ ... ບໍ່ໄດ້ຖືກສ້າງຕັ້ງຂຶ້ນມາ ເປັນຢ່າງດີ ເພື່ອແກ້ໄຂບັນດາສິ່ງທ້າທາຍໃນລະດັບໂລກ."

ນຶ່ງໃນບັນດາສິ່ງທ້າທາຍທີ່ສຳຄັນທີ່ສຸດຢູ່ໃນບົດລາຍງານນີ້ ແມ່ນການປ່ຽນແປງຂອງດິນຟ້າອາກາດ, ເຊິ່ງຄາດວ່າຈະເພີ່ມຂຶ້ນເທື່ອລະກ້າວໃນໄລຍະສອງທົດສະວັດຂ້າງໜ້ານີ້ ແລະເຮັດໃຫ້ທຸກປະເທດມີອຸນຫະພູມສູງຂຶ້ນ, ລະດັບນໍ້າທະເລ ຍື່ງຂຶ້ນແລະສະພາບອາກາດທີ່ຮຸນແຮງຫລາຍກວ່າເກົ່າເຊັ່ນ: ພະຍຸເຮີຣິເຄນ, ພາຍຸທໍນາໂດແລະ ນໍ້າຖ້ວມ.

ບັນດາປະເທດທີ່ທຸກຈົນ ແລະກຳລັງພັດທະນາຈະໄດ້ຮັບຄວາມເດືອດຮ້ອນຫຼາຍທີ່ສຸດ, ແລະການຂາດຄວາມສາມາດຂອງລັດຖະບານຂອງພວກເຂົາເຈົ້າ ໃນການປັບຕົວ ແລະການຮັບມື ກໍ່ອາດຈະເຮັດໃຫ້ມີກະແສຟອງຂອງຄົນຍົກຍ້າຍຖິ່ນຖານງວດໃໝ່ເກີດຂຶ້ນ.

ອ່ານຂ່າວນີ້ເພີ້ມເປັນພາສາອັງກິດ

XS
SM
MD
LG