ສະຫະລັດ ໃຫ້ເງິນຊ່ອຍເຫຼືອຈຳນວນ 20 ລ້ານໂດລ່າແກ່ຢູໂຣບ
ເພື່ອສົມທົບເຂົ້າໃນຄວາມພະຍາຍາມຂອງນາໆຊາດ ໃນການ
ຮັບມືກັບວິດກິດການອົບພະຍົບ.ກະຊວງການຕ່າງປະເທດສະຫະ
ລັດ ໄດ້ອອກຖະແຫລງຂ່າວສະບັບນຶ່ງໃນວັນຈັນວານນີ້ ໂດຍ
ກ່າວວ່າ ເງິນຈຳນວນນີ້ແມ່ນຈະໄປຊ່ອຍເຫຼືອອົງການສະຫະ
ປະຊາຊາດ ແລະອົງການສະພາກາແດງນາໆຊາດ ທີ່ຈະໃຫ້
ການຄຸ້ມຄອງ ໃຫ້ບ່ອນຢູ່ອາໄສ ແລະການໃຫ້ຄວາມຊ່ອຍເຫຼືອ
ຢ່າງອື່ນໆນຳ ໃນທົ່ວພາກພື້ນຢູໂຣບ.
ການປະກາດກ່ຽວກັບການຊ່ອຍເຫລືອຄັ້ງໃໝ່ນີ້ ຈະເພີ້ິມການຊ່ອຍ
ເຫລືອທັງໝົດຂອງສະຫະລັດຂຶ້ນເປັນເກືອບ 44 ລ້ານໂດລ່າ ນັບຕັ້ງແຕ່ໄດ້ເລີ້ມໃນປີກາຍນີ້. ປະມານ 17 ລ້ານ5 ແສນໂດລ່າ ຈະນຳໃຊ້ເພື່ອຊ່ອຍຈັດຕັ້ງປະຕິບັດ ໂຄງການຂອງອົງການອົບພະຍົບສະຫະປະຊາຊາດ ຫຼື UNHCR ແລະແຜນການຮັບມືກັບພວກອົບພະຍົບໃນຂົງເຂດຂອງຢູໂຣບ. ໂດຍສະເພາະແລ້ວ ເງິນຈຳນວນນີ້ຈະໄປຊ່ອຍໃນການຈັດສັນແລະການບໍລິຫານກ່ຽວກັບພວກອົບພະຍົບທີ່ຫາກໍເດີນທາງໄປຮອດໃໝ່ ສົ່ງເສີມການໃຫ້ຄຳປຶກສາ ແລະເພີ້ມ ການໂອ້ລົມສົນທະນາກັນລະຫວ່າງລັດຖະບານ ແລະພວກອົບພະຍົບ ໃນການອົບພະຍົບທີ່ຖືກຕ້ອງຕາມກົດໝາຍນັ້ນ.
ເງິນທີ່ຍັງເຫຼືອນັ້ນແມ່ນມີປະມານ 2 ລ້ານ 5 ແສນໂດລາ ຈະນຳໄປໃຊ້ກ່ຽວກັບການຮ້ອງ ຮຽນສຸກເສີນຂອງກຣີສເມື່ອໄວໆມານີ້ ແລະເພື່ອຊ່ອຍເຫລືອພວກອົບພະຍົບແມ່ຍິງແລະເດັກ
ນ້ອຍແມ່ຍິງ ໃນພາກຕາເວັນອອກສຽງໃຕ້ຂອງຢູໂຣບ. ມັນຈະຖືກນຳໃຊ້ເພື່ອ ພວກເຈົ້າໜ້າທີ່ກຣີສ ທີ່ໃຫ້ການຊ່ອຍເຫລືອພວກທີ່ຖືກຂົ່ມຂືນສຳເລົາແລະຊ່ອຍເຫຼືອປ້ອງກັນແລະຮັບມືກັບຄວາມຮຸນແຮງທາງເພດ ໃນທົ່ວຂົງເຂດ.
ການປະກາດດັ່ງກ່າວນີ້ ມີຂຶ້ນພຽງສັບປະດາດຽວເທົ່ານັ້ນ ຫຼັງຈາກທີ່ສະຫະພາບຢູໂຣບແລະເທີກີ ໄດ້ບັນລຸກັນໃນສິ່ງທີ່ບັນດາຜູ້ນຳທັງສອງຝ່າຍເອີ້ນວ່າ “ຂໍ້ຕົກລົງຄັ້ງປະຫວັດສາດ” ເພື່ອຮັບມືກັບພວກອົບພະຍົບທີ່ເຂົ້າໄປໃນກຣີສແບບ ຜິດກົດໝາຍ ຜ່ານທາງຊິເຣຍ ແລະບ່ອນອື່ນໆນັ້ນ.
