ທ່ານນາງ Karen B. Stewart ເອກອັກຄະທູດສະຫະ
ລັດ ປະຈໍາປະເທດລາວໄດ້ສົ່ງມອບລົດຈັກຈໍານວນ 21
ຄັນຫຼືຄິດເປັນມູນຄ່າການຊ່ວຍເຫຼືອລວມ 187 ລ້ານກີບໃຫ້
ແກ່ທ່ານສຸບັນ ສະຣິດທິລາດ ລັດຖະມົນຕີປະຈໍາສໍານັກງານ
ນາຍົກລັດຖະມົນຕີ ແລະປະທານຄະນະກໍາມະການຄວບຄຸມ ແລະ ກວດກາຢາເສບຕິດແຫ່ງ
ຊາດລາວຢ່າງເປັນທາງການເມື່ອບໍ່ນານມານີ້.
ການຊ່ວຍເຫຼືອດັ່ງກ່າວຖືເປັນ
ສ່ວນນຶ່ງໃນໂຄງການພັດທະ
ນາ ເພື່ອຍົກລະດັບປະສິດທິ
ພາບໃນການບັງຄັບໃຊ້ກົດ
ໝາຍຕໍ່ຜູ້ກະທໍາຄວາມຜິດ
ກ່ຽວກັບຢາເສບຕິດຢູ່ໃນລາວ
ແລະສໍາລັບລົດຈັກ 21 ຄັນ
ດັ່ງກ່າວນີ້ ທາງການລາວກໍ່
ຈະຈັດສົ່ງໄປໃຫ້ຫ້ອງການຕໍາ
ຫຼວດປາບປາມຢາເສບຕິດທີ່
ຕັ້ງຢູ່ໃນ 8 ແຂວງເປົ້າໝາຍ
ທີ່ທາງການສະຫະລັດໃຫ້ການ
ສະນັບສະໜູນແລະຊ່ວຍເຫຼືອ
ທາງການລາວໃນການຈັດຕັ້ງ
ຂຶ້ນມາເປັນການສະເພາະເມື່ອ
ຫຼາຍປີກ່ອນ.
ທາງດ້ານອົງການເພື່ອການພັດທະນາຂອງສະຫະລັດ ຫລື USAID ນັ້ນກໍໄດ້ຕົກລົງໃນບົດ
ບັນທຶກຄວາມເຂົ້າໃຈ ຮ່ວມກັບຫ້ອງການປະສານງານຕ້ານ ແລະຄວບຄຸມພະຍາດຕິດຕໍ່ແຫ່ງ
ຊາດລາວ ເພື່ອໃຫ້ການຊ່ວຍເຫລືອໃນການປ້ອງກັນເຊື້ອໂຣກຕິດຕໍ່ໃນຄົນແລະສັດໃນລາວ
ເປັນເວລາ 2 ປີ ກໍຄືນັບຈາກເດືອນມີນາປີນີ້ ໄປຈົນເຖິງເດືອນມີນາ ປີ 2013 ໂດຍຄິດ
ເປັນມູນຄ່າການຊ່ວຍເຫລືອ ຫລາຍກວ່າ 5 ແສນ 40 ພັນໂດລາ.
ທັງນີ້ໂດຍຫວັງວ່າການຊ່ວຍ
ເຫຼືອດັ່ງກ່າວຈະຊ່ວຍປ້ອງກັນ
ບໍ່ໃຫ້ເຊື້ອໂຣກຕິດຕໍ່ທີ່ເຄີຍແຜ່
ລະບາດ ຢູ່ໃນລາວນັ້ນບໍ່ກັບ
ຄືນມາແຜ່ລະບາດອີກເທື່ອໃໝ່
ເຊັ່ນ ເຊື້ອໂຣກໄຂ້ຫວັດສັດປີກ,
ໄຂ້ຫວັດໃຫຍ່ສາຍພັນໃໝ່, ໄຂ້
ມາເລເຣຍ, ໄຂ້ເລືອດອອກແລະ
ເຊື້ອໂຣກອື່ນໆ ທີ່ແຜ່ລະບາດ ໃນສັດລ້ຽງເປັນຕົ້ນ.
ດັງທີ່ທ່ານບຸນຫຼາຍ ພົມມະສັກ
ຫົວໜ້າຫ້ອງ ການປະສານງານ
ຕ້ານ ແລະຄວບຄຸມພະຍາດຕິດ
ຕໍ່ແຫ່ງຊາດລາວ ໄດ້ໃຫ້ການຊີ້
ແຈງໃນຕອນນຶ່ງວ່າ:
“ຈຸດປະສົງແລ້ວກໍແມ່ນເພື່ອປະຕິບັດໂຄງການໃຫ້ຄວາມຮູ້ຂ່າວສານໃຫ້ແກ່ຊຸມຊົນ
ໃນການຕ້ານຕໍ່ພະຍາດຕິດຕໍ່ຕ່າງໆ ຊຶ່ງລວມມີ 6 ແຂວງ ກິດຈະກໍາຫຼັກກໍ່ແມ່ນໃຫ້ ການອົບຮົມແກ່ຊຸມຊົນ, ອໍານາດການປົກຄອງບ້ານໃຫ້ມີສ່ວນຮ່ວມໃນການຕ້ານ
ພະຍາດຕ່າງໆ ໃຫ້ການອົບຮົມໃຫ້ແກ່ຜູ້ສື່ຂ່າວ ໂດຍສະເພາະແມ່ນຜູ້ສື່ຂ່າວວິທະຍຸ
ແລະໂທລະພາບໃນ 6 ແຂວງ ເພື່ອວ່າເກີດແລ້ວບໍ່ໃຫ້ມັນເກີດຂຶ້ນອີກ”
ຍິ່ງໄປກວ່ານັ້ນ ໃນໄລຍະດຽວກັນນີ້ ທາງການສະຫະລັດໂດຍທ່ານນານ Karen B.
Stewart ກໍຍັງໄດ້ສົ່ງມອບ ເຄື່ອງອຸປະໂພກ, ບໍລິໂພກທີ່ມີນໍ້າໜັກລວມເຖິງ 1 ພັນໂຕນ ເພື່ອໃຫ້ການຊ່ວຍເຫຼືອໂຄງການອາຫານສໍາລັບເດັກນ້ອຍ, ນັກຮຽນຂັ້ນປະຖົມສຶກສາໃນ
ແຂວງຄໍາມ່ວນຈໍານວນ 19,600 ຄົນ ແລະຄູ 540 ຄົນ ຊຶ່ງຄິດເປັນມູນຄ່າການຊ່ວຍເຫຼືອ
ຫຼາຍກວ່າ 2.3 ລ້ານໂດລາ.
ໂດຍການຊ່ວຍເຫຼືອດັ່ງກ່າວນີ້ຖືເປັນໄລຍະທີ 3 ຂອງໂຄງການຊ່ວຍເຫຼືອ ທີ່ມີເປົ້າໝາຍ
ເພື່ອເຮັດໃຫ້ເດັກນ້ອຍລາວໃນເຂດຊົນນະບົດທີ່ມີຖານະຍາກຈົນນັ້ນ ໄດ້ມີໂອກາດຮຽນ
ໜັງສືຈົນຈົບຊັ້ນປະຖົມ ໂດຍຜູ້ທີ່ເປັນພໍ່ເປັນແມ່ນັ້ນ ບໍ່ຕ້ອງເປັນກັງວົນວ່າລູກຫຼານຂອງ
ພວກເຂົາເຈົ້າຈະຂາດອາຫານ ເພາະໂຄງການດັ່ງກ່າວນີ້ ບໍ່ພຽງແຕ່ຈະໃຫ້ການຊ່ວຍເຫຼືອ ດ້ານອາຫານການກິນເທົ່ານັ້ນ, ຫາກແຕ່ຍັງໄດ້ໃຫ້ເດັກນ້ອຍນັກຮຽນນໍາເອົາອາຫານກັບ
ຄືນເມືອບ້ານນໍາອີກ.
ນອກຈາກນີ້ເພື່ອເປັນການເຮັດໃຫ້ຄູ ແລະນັກ
ຮຽນມີຄວາມປອດໄພຈາກລະເບີດບໍ່ທັນແຕກ
(UXO) ທີ່ຕົກຄ້າງຢູ່ໃນລາວ ໂຄງການດັ່ງ
ກ່າວນີ້ກໍຍັງໄດ້ໃຫ້ການຊ່ວຍເຫຼືອໃນການ
ເກັບກູ້ລະເບີດ UXO ຢູ່ໃນໂຮງຮຽນ 150
ແຫ່ງໃນແຂວງຄໍາມ່ວນອີກດ້ວຍ ຊຶ່ງກໍຄືເປັນ
ສ່ວນນຶ່ງໃນແຜນການທີ່ສະຫະລັດ ຈະໃຫ້
ການຊ່ວຍເຫຼືອໃນການເກັບກູ້ລະເບີດ UXO
ໃນລາວ ຫຼາຍຂຶ້ນຢ່າງຕໍ່ເນື່ອງນັ້ນເອງ.
