ທ່ານຢົງ ຈັນທະລັງສີ ເອກອັກຄະລັດຖະທູດລາວປະຈໍາ
ປະເທດສວີສເຊີແລນດ໌ໄດ້ໃຫ້ການຢືນຢັນກັບ VOA ວ່າ
ສະເພາະໃນໄລຍະ 2 ປີມານີ້ ທາງການສະຫະລັດໄດ້ໃຫ້
ການຊ່ວຍເຫລືອເຂົ້າໃນການເກັບກູ້ລະເບີດບໍ່ທັນແຕກຫລື
UXO ທີ່ຕົກຄ້າງຢູ່ໃນລາວຄິດເປັນມູນຄ່າສະເລ່ຍ 5 ລ້ານ
ໂດລາຕໍ່ປີ ຫາກແຕ່ການຊ່ວຍເຫລືອໃນໄລຍະໃໝ່ນັ້ນ
ທາງການສະຫະລັດກໍໄດ້ຮັບປາກວ່າ ຈະເພີ່ມການຊ່ວຍ
ເຫລືອໃຫ້ຫລາຍຂຶ້ນ ແລະກໍຈະເປັນການຊ່ວຍເຫລືອ ໄລຍະຍາວອີກດ້ວຍ.
ທັງນີ້ໂດຍການຢືນຢັນຂອງທ່ານຢົ້ງໃນຄັ້ງດັ່ງກ່າວນີ້ ທ່ານໄດ້ອ້າງເຖິງໝາກຜົນທີ່ໄດ້ຮັບ
ຈາກການພົບປະເຈລະຈາ ລະ
ຫວ່າງທ່ານທອງລຸນ ສີສຸລິດ
ຮອງນາຍົກລັດຖະມົນຕີແລະ
ລັດຖະມົນຕີຕ່າງປະເທດກັບ
ທ່ານນາງ ຮິລລາຣີ ຄລິນຕັນ,
ລັດຖະມົນຕີວ່າການຕ່າງປະ
ເທດສະຫະລັດ ຊຶ່ງໄດ້ມີຂຶ້ນໃນ
ໂອກາດທີ່ທ່ານທອງລຸນ ເດີນ
ທາງ ໄປຢ້ຽມຢາມສະຫະລັດ
ຢ່າງເປັນທາງການເມື່ອທ້າຍ
ເດືອນກໍລະກົດທີ່ຜ່ານມາ ດັ່ງ
ທີ່ທ່ານຢົງໄດ້ໃຫ້ການຊີ້ແຈງ
ໃນຕອນນຶ່ງວ່າ:
“ພວກຂ້າພະເຈົ້າໄດ້ຮັບນີ້ແມ່ນຫ້າລ້ານຕໍ່ປີ ແລ້ວກະຕອນທີ່ທ່ານທອງລຸນ ໄດ້ພົບປະເຈລະຈາກັບທ່ານນາງ ຮິລລາຣີ ຄລິນຕັນ ເພີ່ນກໍໄດ້ຮັບປາກວ່າຈະພິຈາລະນາເພີ່ມທະວີຂຶ້ນ ແລະກໍຈະໃຫ້ພາຍໃນໄລຍະສິບປີ ອັນນີ້ ເປັນຄວາມຄືບໜ້າທີ່ດີ ແລະເປັນກ້າວກະໂດດໃນຂັ້ນທີ່ວ່າ ເປັນກ້າວກະໂດດອີກຂັ້ນນຶ່ງໃນການພົວພັນລະຫວ່າງ ສະຫະລັດກັບລາວ”
ຍີ່ງໄປກວ່ານັ້ນ ການທີ່ລັດຖະບານລາວໄດ້ເປັນເຈົ້າພາບຈັດກອງປະຊຸມຄັ້ງທໍາອິດຂອງລັດພາຄີສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຫລືສົນທິສັນຍາ OSLO ເມື່ອວັນທີ່ 9-12 ເດືອນພະຈິກທີ່ຜ່ານມານັ້ນ ກໍຍັງປາກົດວ່າ ມີຫລາຍປະເທດທີ່ໄດ້ຕົກລົງຫລືຮັບປາກ ແລະປະກາດທ່າທີທີ່ຈະໃຫ້ການຊ່ວຍເຫລືອລາວໃນການເກັບກູ້ລະເບີດ UXO ຫລາຍຂຶ້ນອີກດ້ວຍ.
ກອງປະຊຸມໄດ້ຮັບຮອງເອົາເອກະສານສໍາຄັນ 4 ສະບັບດ້ວຍກັນ ກໍຄືຖະແຫລງການວຽງຈັນ ແຜນປະຕິບັດການວຽງຈັນກ່ຽວກັບການ ຈັດຕັ້ງປະຕິບັດສົນທິສັນຍາ ຮູບແບບລາຍ ງານການປະຕິບັດສົນທິສັນຍາ ແລະແຜນ ການປະຊຸມສໍາລັບລັດພາຄີ ໃນປີ 2011.
ນັບແຕ່ປີ 1996 ເປັນຕົ້ນມາ ອົງການເກັບ
ກູ້ລະເບີດແຫ່ງຊາດລາວ ຫລື Lao UXO
ສາມາດເກັບກູ້ລະເບີດ ແລະທໍາລາຍ UXO
ໄປຫລາຍກວ່າ 1 ລ້ານໜ່ວຍ ໂດຍເປັນ
ການເກັບກູ້ UXO ອອກໄປຈາກພື້ນທີ່
ກວ້າງກວ່າ 25,000 ເຮັກຕ້າ ຫລືໜ້ອຍ
ກ່ວາ 1% ຂອງພື້ນທີ່ທີ່ມີລະເບີດ UXO
ຕົກຄ້າງຢູ່ໃນລາວ ຊຶ່ງໝາຍຄວາມວ່າ ຖ້າ
ຫາກສະພາບການເກັບກູ້ຍັງຄົງເປັນຄືກັບໃນໄລຍະ 15 ປີທີ່ຜ່ານມານີ້ ກໍຈະເຮັດໃຫ້ການ
ເກັບກູ້ UXO ໃນລາວ ຈະຕ້ອງໃຊ້ເວລາອີກຍາວນານກວ່າ 100 ປີ. ດ້ວຍເຫດນີ້ ຈຶ່ງເຮັດ
ໃຫ້ທາງການລາວຕັ້ງຄວາມຫວັງໄວ້ວ່າ ຈະຕ້ອງໄດ້ຮັບການຊ່ວຍເຫລືອຈາກຕ່າງປະເທດ
ບໍ່ໜ້ອຍກວ່າ 30 ລ້ານໂດລາໃນແຕ່ລະປີ ເພື່ອທີ່ວ່າຈະເຮັດໃຫ້ສາມາດເກັບກູ້ UXO ອອກ
ຈາກພື້ນທີ່ເພື່ອການກະເສດໄດ້ເພີ່ມຂຶ້ນອີກ 183,000 ເຮັກຕ້າພາຍໃນປີ 2020 ໃນຂະນະ
ທີ່ໃນໄລຍະ 5 ປີທີ່ຜ່ານມານັ້ນ ລາວກໍໄດ້ຮັບການຊ່ວຍເຫລືອຈາກຕ່າງປະເທດໂດຍສະເລ່ຍ
19 ລ້ານໂດລາໃນແຕ່ລະປີ. ສ່ວນສະຫະລັດນັ້ນກໍໄດ້ໃຫ້ການຊ່ວຍເຫລືອໄປແລ້ວຫລາຍ
ກວ່າ 30 ລ້ານໂດລາ ນັບຈາກປີ 1996 ເປັນຕົ້ນມາ.
