ຄວາມເຄັ່ງຕຶງລະຫວ່າງ ຈີນ ກັບ ສະຫະລັດ ໄດ້ເພີ່ມທະວີຂຶ້ນ ໃນວັນເສົາວານນີ້ ໃນ
ຂະນະທີ່ ກະຊວງການຕ່າງປະເທດຂອງ ຈີນ ໄດ້ຮຽກຮ້ອງໃຫ້ເອກອັກຄະລັດຖະທູດ
ສະຫະລັດ ປະຈຳ ຈີນ ທ່ານ ເທີຣີ ແບຣນສະແທັດ (Terry Branstad) ໃຫ້ອອກປະ
ກາດການປະທ້ວງຢ່າງຮຸນແຮງຕໍ່ມາດຕະການລົງໂທດ ສະຫະລັດ ທີ່ໄດ້ກຳນົດອອກ
ສຳລັບການຊື້ເຮືອບິນຮົບ ແລະ ລູກສອນໄຟ ທີ່ຍິງຈາກພື້ນດິນສູ່ອາກາດຂອງ ຣັດເຊຍ.
ການເຄື່ອນໄຫວດັ່ງກ່າວ ໄດ້ມີຂຶ້ນພຽງບໍ່ເທົ່າໃດຊົ່ວໂມງ ຫຼັງຈາກ ຈີນ ໄດ້ຍົກເລີກການ
ເຈລະຈາການຄ້າ ກັບ ສະຫະລັດ ລຸນຫຼັງການກຳນົດເກັບພາສີໃໝ່ ຂອງ ວໍຊິງຕັນ ຕໍ່
ສິນຄ້າຂອງ ຈີນ.
ຖະແຫຼງການ ຢູ່ເວັບໄຊ ຂອງກະຊວງການຕ່າງປະເທດ ຈີນ ໄດ້ກ່າວວ່າ “ມັນແມ່ນການ
ລ່ວງລະເມີດທີ່ຮ້າຍແຮງ ກ່ຽວກັບ ກົດເກນພື້ນຖານ ຂອງກົດໝາຍສາກົນ.” ແລະ “ການ
ປະພຶດເປັນເຈົ້າໂລກ.” ກະຊວງດັ່ງກ່າວຍັງໄດ້ຂຽນວ່າ “ການຮ່ວມມືລະຫວ່າງ ກອງທັບ
ຈີນ-ຣັດເຊຍ ແມ່ນການຮ່ວມມືປົກກະຕິຂອງສອງປະເທດເອກະລາດ. ແລະ ສະຫະລັດ
ບໍ່ມີສິດທີ່ຈະມາແຊກແຊງ,” ແລະ “ການກະທຳຂອງ ສະຫະລັດ ໄດ້ສ້າງຄວາມເສຍຫາຍ
ຢ່າງຮຸນແຮງຕໍ່ສາຍພົວພັນ” ກັບ ຈີນ.
ກ່ອນໜ້ານີ້ ຈີນ ໄດ້ຮຽກຮ້ອງ ໃຫ້ ສະຫະລັດ ຖອນມາດຕະການລົງໂທດຕ່າງໆ, ແລະ
ໃນການກ່າວຕໍ່ບັນດານັກຂ່າວໃນວັນສຸກທີ່ຜ່ານມານັ້ນ, ໂຄສົກກະຊວງການຕ່າງປະ
ເທດຂອງ ຈີນ ທ່ານ ເກັງ ຊວາງ (Geng Shuang) ໄດ້ເວົ້າວ່າ ປັກກິ່ງ ໄດ້ສະເໜີ ການ
ປະທ້ວງຢ່າງເປັນທາງການຕໍ່ ສະຫະລັດ.
ການຊື້ອາວຸດຂອງ ຈີນ ຈາກບໍລິສັດສົ່ງອອກອາວຸດຂອງ ຣັດເຊຍ ຊື່ວ່າ
Rosoboronexport ໄດ້ລ່ວງລະເມີດກົດໝາຍປີ 2017 ຂອງ ສະຫະລັດ ທີ່ມີເຈຕະນາ
ລົງໂທດລັດຖະບານຂອງປະທານາທິບໍດີ ຣັດເຊຍ ທ່ານ ວລາດິເມຍ ປູຕິນ ສຳລັບການ
ແຊກແຊງການເລືອກຕັ້ງຂອງ ສະຫະລັດ ແລະ ກິດຈະກຳອື່ນໆ. ການປະຕິບັດການ
ຂອງ ສະຫະລັດ ໄດ້ກຳນົດການເຄື່ອນໄຫວຫ້າມອອກວີຊາໃຫ້ກະຊວງພັດທະນາວັດຖຸ
ອຸປະກອນຂອງ ຈີນ ແລະ ຜູ້ອຳນວຍການ ທ່ານ ຫຼີ ຊວາງຟູ (Li Shuangfu), ຫ້າມການ
ໂອນເງິນກັບລະບົບການເງິນ ສະຫະລັດ ແລະ ຫ້າມຊັບສິນ ແລະ ຜົນປະໂຫຍດທຸກຢ່າງ
ຢູ່ໃນທີ່ດິນຂອງປະເທດພາຍໃນເຂດອຳນາດຂອງ ສະຫະລັດ.
