ສະຫະລັດ ໄດ້ປະກາດທີ່ຈະຈັດຕັ້ງ ໂຄງການອາສາສະໝັກ
ເພື່ອສັນຕິພາບ ຫລື Peace Corp ຢູ່ໃນມຽນມາ.
ນີ້ແມ່ນການເຄື່ອນໄຫວຫລ້າສຸດ ທີ່ສະຫະລັດ ໄດ້ຂະຫຍາຍ
ການຮ່ວມມື ກັບປະເທດມຽນມາ ທີ່ຕັ້ງຢູ່ໃນເຂດເອເຊຍຕາ
ເວັນອອກສຽງໃຕ້ ທີ່ໂດດດ່ຽວມາເປັນເວລາດົນນານ.
ຖະແຫລງການສະບັບນຶ່ງຂອງທຳນຽບຂາວ ກ່າວວ່າ ບໍ່ມີທາງ
ໃດທີ່ດີໄປກວ່າສຳຫລັບສະຫະລັດ ໃນການສະແດງອອກຊຶ່ງ
ຄວາມໝາຍໝັ້ນຕໍ່ມຽນມາ ໂດຍຜ່ານ “ການຕິດຕໍ່ພົວພັນ ລະ
ຫວ່າງປະຊາຊົນ ກັບປະຊາຊົນ ໃນລະດັບຮາກຫຍ້າ.”
ຖະແຫລງການເວົ້າວ່າ ພວກອາສາສະໝັກເພື່ອສັນຕິພາບຈຸທຳອິດ ຈະໄປເຖິງ ມຽນມາ
ໃນທ້າຍປີ 2015 ແລະຈະຜ່ານການອົບຮົມສາມເດືອນ ກ່ອນຈະຍ້າຍໄປບ່ອນປະຕິບັດ
ງານເປັນເວລາສອງປີ.
ການປະກາດບັງເອີນໄດ້ມີຂື້ນ ໃນລະຫວ່າງການຢ້ຽມຢາມມຽນມາ ຂອງ ປະທາ ນາທິບໍດີ
ສະຫະລັດ ທ່ານ Barack Obama ຜູ້ທີ່ໄດ້ເຂົ້າຮວມກອງປະຊຸມສຸດຍອດຂົງເຂດ ແລະ
ພົບປະກັບບັນດາຜູ້ນຳປະເທດ. ຢູ່ໃນລະຍະການຢ້ຽມຢາມນີ້ ທ່ານ Obama ໄດ້ສະແດງ
ຄວາມເປັນຫ່ວງວ່າ ມຽນມາແມ່ນມີຄວາມຊັກຊ້າຫລື ຕ່າວປີ້ນຖອຍຫລັງກໍມີ ໃນການ
ປ່ຽນແປງໄປສູ່ປະຊາທິປະໄຕ.
ໂຄງການອາສາສະໝັກເພື່ອສັນຕິພາບ ໄດ້ຕັ້ງຂື້ນມາໃນປີ 1961. ນັບແຕ່ນັ້ນມາ ໄດ້ສົ່ງ
ບັນດາອາສາສະໝັກເກືອບ 220,000 ຄົນໄປປະຕິບັດໜ້າທີ່ຢູ່ໃນທົ່ວໂລກເພື່ອໃຫ້ການ
ຊ່ວຍເຫລືອຢູ່ໃນຂົງເຂດວຽກງານຕ່າງໆ ຮວມທັງການສຶກສາ ອານະໄມ ແລະກະສິກຳ.
ພາລະກິດພາກສ່ວນຂອງອົງການນີ້ ກໍຄືການສົ່ງເສີມ ຄວາມເຂົ້າອົກເຂົ້າໃຈທີ່ດີ ລະຫວ່າງ
ຊາວອາເມຣິກັນ ແລະປະຊາຊົນໃນປະເທດອຶ່ນໆ.
ມຽນມາຈະກາຍມາເປັນປະເທດທີ່ 141 ທີ່ມີໂຄງການອາສະໝັກເພື່ອສັນຕິພາບ. ທຳນຽບ
ຂາວກ່າວວ່າ ການປະກາດດັ່ງກ່າວນີ້ “ແມ່ນສະແດງໃຫ້ເຫັນເພີ່ມເຕີມ ໃນການເປັນພາຄີ
ທີ່ເຂັ້ມແຂງ ແລະຄວາມສຳພັນອັນຍາວນານ ລະຫວ່າງ ສະ ຫະລັດ ແລະມຽນມາ.”
