ຈຳນວນຜູ້ເສຍຊີວິດແລະບາດເຈັບຂອງພົນລະເຮືອນ ຮວມທັງເດັກນ້ອຍທີ່ຖືກສັງຫານ ຫຼືເສຍອົງຄະ ຍ້ອນລະເບີດຝັງດິນ ແລະວັດຖຸລະເບີດໃນມຽນມາ ເພີ່ມຂຶ້ນຫຼາຍກວ່າສອງເທົ່າ ໃນປີກາຍນີ້ ເປັນ 1,052 ຄົນ, ອົງການເພື່ອເດັກຂອງສະຫະປະຊາຊາດ ກ່າວ ໃນຂະນະທີ່ຄວາມຂັດແຍ້ງ ໄດ້ເພີ້ມຂຶ້ນໃນປະເທດທີ່ທຸກຍາກດັ່ງກ່າວ, ອີງຕາມອົງການຂ່າວຣອຍເຕີສ໌.
ອົງການກອງທຶນເພື່ອເດັກນ້ອຍຂອງອົງການສະຫະປະຊາຊາດ ຫຼື UNICEF ກ່າວວ່າ ລະເບີດຝັງດິນ ແລະວັດຖຸລະເບີດທີ່ຕົກຄ້າງຈາກສົງຄາມເຮັດໃຫ້ມີຜູ້ເສຍຊີວິດເພີ່ມຂຶ້ນ 270 ເປີເຊັນ ໃນປີ 2023, ເຊິ່ງລວມມີຜູ້ເສຍຊີວິດ 188 ຄົນ ແລະຜູ້ໄດ້ຮັບບາດເຈັບ 864 ຄົນ, ເພີ່ມຂຶ້ນຈາກ 390 ຄົນຂອງຜູ້ໄດ້ຮັບບາດເຈັບ ແລະເສຍຊີວິດ ໃນປີ 2022. ໃນຈຳນວນດັ່ງກ່າວ ມີພວກເດັກນ້ອຍຫຼາຍກວ່າ 20 ເປີເຊັນຂອງຜູ້ເຄາະຮ້າຍຈາກລະເບີດຝັງດິນທັງໝົດໃນປີກາຍນີ້.
ມຽນມາໄດ້ເກີດຄວາມວຸ້ນວາຍນັບຕັ້ງແຕ່ທະຫານໄດ້ຢຶດອຳນາດຈາກລັດຖະບານທີ່ມາຈາກການເລືອກຕັ້ງໃນການກໍ່ລັດຖະປະຫານ ໃນປີ 2021, ໄດ້ຍຸຕິບາດກ້າວຕ່າງໆຂອງການເປັນປະຊາທິປະໄຕ. ຄວາມຂັດແຍ້ງດັ່ງກ່າວ ໄດ້ເຮັດໃຫ້ມຽນມາກາຍເປັນປະເທດນຶ່ງທີ່ມີລະເບີດຝັງດິນຫຼາຍທີ່ສຸດໃນໂລກ.
ໃນຊຸມປີມໍ່ໆມານີ້, ກຳລັງຕໍ່ຕ້ານຂອງພົນລະເຮືອນປະກອບອາວຸດ ໄດ້ສົມທົບກັບກຸ່ມປະກອບອາວຸດຊົນເຜົ່າ ທີ່ມີມາແຕ່ດົນນານ ເພື່ອຕໍ່ສູ້ກັບກອງທັບ. ການນຳຂອງລັດຖະບານທະຫານ ໄດ້ຕົກຢູ່ພາຍໃຕ້ຄວາມກົດດັນທີ່ບໍ່ເຄີຍມີມາກ່ອນພາຍຫຼັງຄວາມພ່າຍແພ້ໃນສະໜາມຮົບ ໃນການໂຈມຕີຢ່າງກວ້າງຂວາງຂອງກຸ່ມຕໍ່ຕ້ານລັດຖະບານທະຫານ ທີ່ໄດ້ເລີ້ມຂຶ້ນໃນເດືອນຕຸລາທີ່ຜ່ານມາ.
ອົງການ UNICEF ກ່າວວ່າ ລະເບີດຝັງດິນ ແລະວັດຖຸລະເບີດ ອື່ນໆ ໄດ້ຖືກນຳໃຊ້ຢ່າງບໍ່ມີການຈຳແນກຈາກທຸກຝ່າຍໃນຄວາມຂັດແຍ້ງທີ່ເພີ່ມຂຶ້ນ.
ໂຄສົກຂອງລັດຖະບານທະຫານທ່ານນຶ່ງ ບໍ່ໄດ້ໃຫ້ຄຳຕອບ ຕໍ່ການຂໍຄວາມເຫັນຈາກອົງການຂ່າວ Reuters.
ທ່ານ ນາງ ເດໂບຣາ ໂຄມິນີ (Debora Comini), ຜູ້ອໍານວຍການອົງການ UNICEF ປະຈໍາພາກພື້ນເອເຊຍຕາເວັນອອກ ແລະ ປາຊີຟິກ ກ່າວວ່າ "ການນຳໃຊ້ລະເບີດຝັງດິນບໍ່ພຽງແຕ່ເປັນສິ່ງທີ່ໜ້າຕໍາໜິຕິຕຽນເທົ່ານັ້ນ ແຕ່ຍັງຜິດກົດໝາຍ ພາຍໃຕ້ກົດໝາຍມະນຸດສະທໍາສາກົນອີກດ້ວຍ".
ອີງຕາມຂໍ້ມູນຂອງ UNICEF, ພື້ນທີ່ໃຈກາງທາງການກະເສດຂອງແຂວງ Sagaing ກວມເອົາຫຼາຍກວ່າ 35 ເປີເຊັນ ຂອງຜູ້ເສຍຊີວິດຍ້ອນລະເບີດຝັງດິນ ໃນປີ 2023.
ຟໍຣັມສະແດງຄວາມຄິດເຫັນ