ຜູ້ຊ່ຽວຊານຄົນນຶ່ງຂອງອົງການສະຫະປະຊາຊາດ ທີ່ຮັບຜິດຊອບ ກ່ຽວກັບ ມຽນມາ
ໄດ້ຮຽກຮ້ອງ ບັງກລາແດັສ ໃນວັນອັງຄານວານນີ້ ໃຫ້ “ຈັດແຜນການ” ເພື່ອເລີ່ມການ
ສົ່ງຄືນ ອົບພະຍົບໂຣຮິງຢາ ໄປລັດ ຣາໄຄນ໌ ປະເທດ ມຽນມາ ໃນເດືອນນີ້ ເພື່ອຫຼີກ
ລ່ຽງການປະຫັດປະຫານ.
ຊາວ ໂຣຮິງຢາ ຂອງ ມຽນມາ ເກືອບ 750,000 ຄົນ ໄດ້ຫຼົບໜີອອກຈາກລັດ ຣາໄຄນ໌
ໃນເດືອນສິງຫາປີ 2017 ຫຼັງຈາກການປາບປາມ ຂອງກອງທັບ. ທ່າມກາງການກ່າວ
ຫາ ຂອງພວກອົບພະຍົບ ແລະ ນັກຂ່າວ ກ່ຽວກັບ ການຂ້າຄົນ ຢ່າງຫຼວງຫຼາຍ, ການ
ຂົ່ມຂືນ ແລະ ການຈູດໄຟເຜົາໝູ່ບ້ານຖິ້ມນັ້ນ, ຊາວ ໂຣຮິງຢາ ໄດ້ພາກັນໄປອາໄສຢູ່
ໃນສູນອົບພະຍົບທີ່ແອອັດໃນປະເທດ ບັງກລາແດັສ ທີ່ຕັ້ງຢູ່ໃກ້ຄຽງ.
ສອງປະເທດດັ່ງກ່າວ ໄດ້ຕົກລົງກັນ ໃນວັນທີ 30 ຕຸລາທີ່ຜ່ານມາ ເພື່ອເລີ່ມສົ່ງຄືນ ອົບ
ພະຍົບ ໂຣຮິງຢາ ໄປລັດ ຣາໄຄນ໌ ໃນກາງເດືອນພະຈິກ, ແຕ່ຜູ້ຂຽນລາຍງານ ກ່ຽວກັບ
ບັນຫາສິດທິມະນຸດໃນ ມຽນມາ ຂອງອົງການສະຫະປະຊາຊາດ ທ່ານນາງ ຢາງຮີ ອີ,
ກ່າວວ່າ ເວລານີ້ ແມ່ນບໍ່ເໝາະສົມ ສຳລັບການສົ່ງເຂົາເຈົ້າກັບຄືນເທື່ອ.
ທ່ານນາງ ອີ ໄດ້ກ່າວໃນຖະແຫຼງການສະບັບນຶ່ງວ່າ “ລັດຖະບານ ມຽນມາ ບໍ່ສາມາດ
ທີ່ຈະໃຫ້ການຮັບປະກັນວ່າ ເຂົາເຈົ້າຈະບໍ່ປະສົບກັບການປະຫັດປະຫານ ແລະ
ຄວາມຮຸນແຮງ ທີ່ໂຫດຮ້າຍແບບດຽວກັນຢ່າງຊ້ຳແລ້ວຊ້ຳອີກ.” ທ່ານນາງ ອີ ໄດ້ກ່າວ
ເພີ່ມເຕີມວ່າ ສາເຫດພື້ນຖານຂອງວິກິດການດັ່ງກ່າວນີ້ ຕ້ອງຖືກແກ້ໄຂກ່ອນອື່ນໝົດ,
ລວມທັງ ສິດທິໃນການໄດ້ຮັບສັນຊາດ.
ການເຕືອນຂອງທ່ານນາງ ອີ ໄດ້ມີຂຶ້ນລຸນຫຼັງການຍອມຮັບໃນ ເຟສບຸກ ວ່າເຄືອຂ່າຍ
ສື່ສັງຄົມ ໄດ້ຫຼິ້ນບົດບາດທີ່ສຳຄັນ ໃນການຂ້າລ້າງເຊື້ອຊາດຂອງປະຊາຊົນ ໂຣຮິງຢາ.
ໃນເດືອນສິງຫາທີ່ຜ່ານມາ, ບັນດານັກສືບສວນສອບສວນ ສະຫະປະຊາຊາດ ໄດ້ກ່າວ
ຫາ ເຟສບຸກ ວ່າ “ຊ້າ ແລະ ບໍ່ມີປະສິດທິຜົນ” ໃນການປາບປາມວິທີທີ່ເຂົາເຈົ້າໄດ້ຖືກ
ໃຊ້ເພື່ອ ແຜ່ລາມຄວາມຄຽດຊັງໃນບັນດາປະຊາຊົນ ທີ່ນັບຖືສາສະໜາພຸດ ຂອງປະ
ເທດດັ່ງກ່າວຕໍ່ຊົນກຸ່ມນ້ອຍມຸສລິມ ໂຣຮິງຢາ. ໃນການເຮັດແນວນັ້ນ, ເຂົາເຈົ້າ “ຈຶ່ງໄດ້
ເຂົ້າຮ່ວມມືກັບຄະນະກຳມາທິການ ອາຊະຍາກອນທີ່ຊົ່ວຮ້າຍ,” ອີງຕາມການກ່າວ
ຂອງບັນດານັກສືບສວນສອບສວນ.
