ປະຊາຊົນຫຼາຍກວ່າ 2 ຕື້ຄົນ ຈະໄດ້ມີໂອກາດເປັນສັກຂີພິຍານ
ໃນປາກົດການທີ່ບໍ່ຄ່ອຍໄດ້ເຫັນກັນເທິງທ້ອງຟ້າຂອງຕອນເຊົ້າ
ມືດວັນຈັນມື້ອື່ນນີ້, ໃນມື້ “ເດືອນເພັງໃຫຍ່” ແຊກຕົວເຂົ້າ ກັບ
ເຫດການກົບກິນເດືອນ.
ປະກົດການກົບກິນເດືອນໃນມື້ເດືອນເພັງນີ້ຈະໃຊ້ເວລາດົນກວ່າ
1 ຊົ່ວໂມງແລະຖ້າສະພາບອາກາດອຳນວຍຈະເຮັດໃຫ້ປະຊາຊົນ
ຫຼາຍກວ່າ 1 ຕື້ ຄົນໃນຊີກໂລກຕາເວັນຕົກ, ພ້ອມກັບ ອີກ 1.5 ຕື້
ຄົນໃນທະວີບຢູໂຣບ, ອາຟຣິກາ ແລະເອເຊຍຕາເວັນຕົກ ໄດ້ເຫັນ.
ດວງພະຈັນ ຈະຖືກບັງດ້ວຍເງົາມືດຂອງໜ່ວຍໂລກ ແລະ ເລີ່ມທີ່
ຈະປ່ຽນເປັນສີທອງແດງໃນເວລາສັ້ນໆຫຼັງຈາກ 1 ໂມງເຊົ້າຕາມເວລາມາດຕະຖານສາກົນ ຂອງໂລກໃນວັນຈັນມື້ອື່ນນີ້.
ນັກດາລາສາດກ່າວວ່າ ດວງພະຈັນ ຈະເປັນສີແດງດົນກວ່າ 70 ນາທີກ່ອນທີ່ມັນຈະເລີ່ມ ອອກມາຈາກເງົາມືດ.
ຈຸດເຄິ່ງກາງຂອງປະກົດການກົບກິິນເດືອນໃນ ຢູໂຣບ ແລະ ອາຟຣິກາ ຈະເກີດຂຶ້ນໃນລະຫວ່າງ ທ່ຽງຄືນ ແລະ ຕອນເຊົ້າມືດ ໃນທ້ອງຟ້າຂອງຊີກໂລກພາກຕາເວັນຕົກ.
ປະກົດການເດືອນເພັງໃຫຍ່ ເກີດຂຶ້ນໃນເມື່ອພະຈັນເຕັມດວງ ເຄື່ອນໄປທັບກັບຈຸດທີ່ໃກ້ທີ່ສຸດກັບໜ່ວຍໂລກ, ເຮັດໃຫ້ເດືອນປະກົດໃຫຍ່ຂຶ້ນ ແລະ ແຈ້ງຂຶ້ນກວ່າເກົ່າຢູ່ໃນທ້ອງຟ້າ.