ຫຼັງຈາກທີ່ໄດ້ມີການຕຳໜິຕິຕຽນ ຈາກບັນດາຜູ້ນຳສະຫະລັດ ແລະພວກປະເທດຕາເວັນຕົກອື່ນໆແລ້ວ ນາຍົກລັດຖະມົນຕີເທີກີ ທ່ານ Binali Yildirim ໃນວັນອັງຄານມື້ນີ້ ໄດ້ລະມັດລະວັງ ຕໍ່ພວກຜູ້ຄົນທີ່ຊອກຫາທາງທີ່ຈະແກ້ແຄ້ນຄືນ ໃນຄວາມພະຍາຍາມກໍ່ລັດຖະປະ ຫານ ເພື່ອໂຄ່ນລົ້ມລັດຖະບານຂອງທ່ານ ທີ່ປະສົບກັບຄວາມລົ້ມແຫຼວ.
“ບໍ່ມີບຸກຄົນໃດນຶ່ງ ທີ່ຈະມີຄວາມຮູ້ສຶກແກ້ແຄ້ນ. ນີ້ແມ່ນການຮັບເອົາບໍ່ໄດ້ ຢູ່ໃນປະເທດທີ່ປົກຄອງດ້ວຍຕົວບົດກົດໝາຍ,” ທ່ານ Yildirim ໄດ້ກ່າວ ໃນຂະນະທີ່ທ່ານໄດ້ຮຽກຮ້ອງ “ໃຫ້ມີຄວາມເປັນພະລາດອນພາບ” ລຸນຫລັງທີ່ໄດ້ມີການກໍ່ລັດຖະປະຫານແລ້ວ.
ເຖິງແມ່ນວ່າ ທ່ານໄດ້ຮຽກຮ້ອງໃຫ້ມີຄວາມເປັນເອກະພາບກັນ ທ່ານ Yildirim ໄດ້ກ່າວວ່າ ທ່ານຈະກຳຈັດຂະບວນການເຄື່ອນໄຫວ ຂອງນັກສອນສາສະໜາ Fethullah Gulen ທີ່ຢູ່
ໃນສະຫະລັດ ບຸກຄົນທີ່ມີການຖິ້ມໂທດໃສ່ວ່າ ເປັນຜູ້ຢູ່ເບື້ອງຫຼັງຂອງຄວາມພະຍາຍາມ ໃນການກໍ່ລັດຖະປະຫານ ໂດຍ “ການຖອນຮາກເຫງົ້າຂອງມັນ” ຊຶ່ງມັນຈະບໍ່ສາມາດທໍລະຍົດ ຕໍ່ປະຊາຊົນເທີກີ ໄດ້ອີກຕໍ່ໄປ.
ສະຫະລັດ ຮຽກຮ້ອງໃຫ້ເທີກີ ໃຊ້ຄວາມຢັບຢັ້ງ ແລະດຳເນີນການ ພາຍໃຕ້ການປົກຄອງດ້ວຍຕົວບັດກົດໝາຍ ໃນຂະນະທີ່ການສືບສວນ ກ່ຽວກັບການກໍ່ລັດຖະປະຫານທີ່ປະສົບກັບຄວາມລົ້ມແຫຼວ ໃນສັບປະດາແລ້ວນັ້ນ.
ເບິ່ງ: ທ່ານ Gulen ປະຕິເສດຕໍ່ການກ່າວຫາຂອງທ່ານ Erdogan ກ່ຽວກັບການກໍ່ລັດຖະປະຫານ
ໃນນະຄອນ Brussels ໃນວັນຈັນວານນີ້ ລັດຖະມົນຕີການຕ່າງປະເທດສະຫະລັດ ທ່ານ John Kerry ໄດ້ກ່າວວ່າ ທ່ານສະໜັບສະໜຸນໃນການນຳເອົາພວກກໍ່ການ ໃນຄວາມພະ ຍາຍາມເຮັດລັດຖະປະຫານໃນເທີກີ ມາລົງໂທດ ແຕ່ໄດ້ເຕືອນວ່າ ລັດຖະບານໄດ້ທຳການ ແຮງ “ເກີນໄປ” ໃນຂະນະທີ່ທຳການຟື້ນຟູຄວາມເປັນລະບຽບຂອງປະເທດນັ້ນ.
ທ່ານ Josh Earnest ໂຄສົກປະຈຳທຳນຽບຂາວ ໄດ້ເນັ້ນເຖິງການສະໜັບສະໜຸນຕໍ່ “ການເລືອກຕັ້ງແບບປະຊາທິປະໄຕ” ຂອງລັດຖະບານເທີກີ ແລະໄດ້ກ່າວວ່າ ວໍຊີງຕັນ ແມ່ນໃຫ້ການສະໜັບສະໜຸນຢ່າງແຂງຂັນຕໍ່ “ສາຍພົວພັນ” ກັບບັນດາພັນທະມິດຂອງອົງການເນໂຕ. ແຕ່ທ່ານກໍໄດ້ກ່າວວ່າ ລັດຖະບານຄວນຈະ “ໃຫ້ການສະໜັບສະໜຸນ ຕໍ່ຂັ້ນທາງດ້ານ ຍຸຕິທຳ ແລະສິດເສລິພາບ ທີ່ໄດ້ກຳນົດໄວ້ໃນລັດຖະທຳມະນູນຂອງເທີກີ ທີ່ຮວມທັງສິດເສລິພາບໃນການປາກເວົ້າ ສິດເສລິພາບໃນດ້ານການຂ່າວສານ ແລະສິດເສລິພາບໃນການເຕົ້າໂຮມກັນ.”
ທ່ານ Yildirim ໄດ້ກ່າວວ່າ ທ່ານ ໄດ້ສົ່ງເອກກະສານ ຮ້ອງຮຽນຕໍ່ສະຫະລັດຫຼາຍໆສະບັບ ເພື່ອໃຫ້ສົ່ງທ່ານ Gulen ກັບຄືນປະເທດ ຫຼັງຈາກທີ່ທ່ານ Kerry ໄດ້ກ່າວວ່າ ສະຫະລັດ ຕ້ອງການຫຼັກຖານ ກ່ອນທີ່ຈະພິຈາລະນາ ໃນການສົ່ງທ່ານ Gulen ກັບເທີກີ ນັ້ນ.
ອ່ານຂ່າວນີ້ເພີ້ມຕື່ມເປັນພາສາອັງກິດ
