ລິ້ງ ສຳຫລັບເຂົ້າຫາ

ວັນອາທິດ, ໑໔ ກໍລະກົດ ໒໐໒໔

ທ່ານທຣຳ ຮຽກຮ້ອງໃຫ້ ຂະຫຍາຍ ຄວາມສາ ມາດ ດ້ານນິວເຄລຍ ຂອງ ສຫລ


ປະຕູທີສອງ ກ່ອນຈະເຂົ້າໄປເຖິງ ຫ້ອງໃຕ້ດິນ ທີ່ຖານຍິງ ລູກສອນໄຟຂ້າມທະວີບ ໃກ້ເມືອງ Minot ລັດ North Dakota.
ປະຕູທີສອງ ກ່ອນຈະເຂົ້າໄປເຖິງ ຫ້ອງໃຕ້ດິນ ທີ່ຖານຍິງ ລູກສອນໄຟຂ້າມທະວີບ ໃກ້ເມືອງ Minot ລັດ North Dakota.

ປະທານາທິບໍດີທີ່​ຖືກ​ເລືອກ​ໃໝ່​ຂອງ​ສະຫະລັດ ທ່ານ Donald Trump ​ໄດ້ສົ່ງຂໍ້ຄວາມ ​ຜ່ານ​ທາງ Twitter ​ໃນ​ວັນ​ພະຫັດ​ວານ​ນີ້ວ່າ “ສະຫະລັດ​ ຕ້ອງ​ໄດ້​ປັບປຸງ ​ຢ່າງ​ເປັນ​ການ​ໃຫຍ່​ ແລະ​ຂະຫຍາຍ​ຄວາມ​ສາມາດ​ທາງ​ດ້ານ​ນິວ​ເຄລຍຂອງ​ຕົນ ກວ່າ​ຈະ​ເຖິງ​ເວລາ​ ທີ່​ໂລກ​ຂອງ​ເຮົາ​ຈະເຂົ້າ​ໃຈ ​ກ່ຽວ​ກັບ​ເລື້ອງນິວ​ເຄລຍ.”

ຄະນະ​ທີ​ມງານ​ຂອງ​ທ່ານ​ໄດ້​ພະຍາຍ​າມ​ໃຫ້​ຄວາມ​ກະຈ່າງ​ແຈ້ງໃນ​ອັນ​ທີ່​ເບິ່ງ​ກັນ ວ່າ​ເປັນ​ຄຳ​ເຕືອນ ​ຈາກ​ປະທານາທິບໍ​ດີທີ່​ໄດ້​ຮັບ​ເລືອກ​ໃໝ່ກ່ຽວ​ກັບ​ການ​ເສີມ​ຄວາມ​ເຂັ້ມ​ແຂງ​ໃຫ້​ແກ່​ຄວາມ​ສາມາດ​ທາງ​ດ້ານ​ນິວ​ເຄລຍຂອງ​ປະ​ເທດ.

ທ່ານ Trump ບໍ່​ໄດ້​ໃຫ້​ລາຍ​ລະອຽດ​ໃດໆ​ວ່າ​ທ່ານ​ໝາຍ​ຄວາມ​ວ່າ​ແນວ​ໃດ.

ປະທານາທິບໍດີຣັດ​ເຊຍ ທ່ານ Vladimir Putin ກ່າວ​ຕໍ່​ພວກ​ນັກ​ຂ່າວ​ ໃນ​ວັນ​ສຸກ​ມື້ນີ້ ​ໃນ​ກອງ​ປ​ະຊຸມ​ຖະ​ແຫຼງຂ່າວ​ທ້າຍ​ປີ​ຂອງ​ທ່ານ​ວ່າ ທ່ານ​ບໍ່​ໄດ້​ມອງ​ເຫັນຫຍັງ​ຜິດ​ປົກກະຕິ ໃນ​ການ​ໃຫ້​ຄຳ​ໝັ້ນສັນຍາ​ ຂອງ​ທ່ານ Trump ທີ່​ຈະ​ເສີມຄວາມ​ເຂັ້ມ​ແຂງ​ ໃຫ້​ແກ່​ກຳລັງ​ນິວ​ເຄລຍຂອງ​ສະຫະລັດໂດຍ​ໃຫ້​ຂໍ້​ສັງ​ເກດ​ວ່າ ປະທານາທິບໍດີ​ທີ່​ໄດ້​ຮັບ​ເລືອກ​ໃໝ່ໄດ້​ກ່າວ​ ຢູ່ແລ້ວ​ໃນ​ລະຫວ່າງ​ການ​ໂຄສະນາ​ຫາ​ສຽງ​ຂອງ​ທ່ານ.

ທ່ານ Putin ກ່າວ​ວ່າ ​ໃນ​ຂະນະ​ທີ່​ສະຫະ​ລັດມີ​ກຳລັງ​ທະຫານ​ທີ່​ໃຫຍ່​ກວ່າແຕ່ທ່ານ​ບໍ່​ໄດ້​ມອງ​ເຫັນ​ວ່າ ອາ​ເມຣິກັນ​ອາດ​ຈະ​ເປັນ​ຜູ້​ຮຸກ​ຮານ ແລະ​ການ​ເພັ່ງ​ເລັງ​ຂອງຣັດເຊັຍ ຄວນ​ ຈະ​ແມ່ນ​ໃນ​ເລື້ອງລູກ​ສອນ​ໄຟທີ່​ສາມາດ​ເຈາະຜ່ານລະບົບ​ປ້ອງ​ກັນ​ທີ່ມີ​ຢູ່​ໃນ​ປັດຈຸບັນ​ນີ້.

​ໂຄສົກ​ກະຊວງ​ການ​ຕ່າງປະ​ເທດ​ສະຫະລັດ ທ່ານ John Kirby ກ່າວໃນວັນພະຫັດວານ ນີ້​ວ່າ ລັດຖະບານ ທ່ານ​ໂອບາ​ມາ ​“ໄດ້​ພະຍາຍາມ ທີ່​ຈະ​ນຳພາ​ພວກ​ເຮົາ​ ໄປ​ສູ່​ເສັ້ນທາງເພື່ອໃຫ້​ໂລກ​ປອດ​ຈາກ​ອາວຸດ​ນິວ​ເຄລຍ. ກ່ອນ​ອື່ນ​ໝົດແມ່ນ​ໂດຍ​ການ​ຫຼຸດ​ການ​ເກັບສະ ​ສົມ​ແລະ​ເຄື່ອງ​ຍິງ​ຂອງ​ພວກ​ເຮົາ ສອງ​ມາຕັດ​ຮອນ​ບົດບາດ​ຂອງ​ອາວຸດ​ນິວ​ເຄລຍ​ໃນ​ຍຸດ​ທະ​ສາດ​ດ້ານ​ຄວາມ​ໝັ້ນຄົງ​ຂອງ​ພວກ​ເຮົາ​ລົງ ​ແລະ​ສາມບັນລຸ​ການຕົກລົງ​ກັບ​ອີ​ຣ່ານ.”

​ໂຄສົກ ຄະນະ​ໂອນ​ອຳນາດ ຂອງ​ທ່ານ Trump ທ່ານ Jason Miller ກ່າວ​ວ່າ ທ່ານ Trump ​ແມ່ນ​ເວົ້າ​ເຖິງ​ຄວາມ​ຈຳ​ເປັນ​ທີ່​ຈະ​ປ້ອງ​ກັນ​ບໍ່​ໃຫ້​ອາວຸດ​ນິວ​ເຄລຍ ຕົກ​ໄປ​ຢູ່​ໃນ​ກຳມື​ຂອງ​ພວກ​ກໍ່​ການ​ຮ້າຍ​ແລະ​ບັນດາ​ຜູ້ນຳ​ທີ່​ເປັນ​ອັນຕະລາຍ​ຂອງໂລກ.

ທ່ານ Miller ກ່າວ​ວ່າ “ທ່ານ Trump ປະທານາທິບໍດີ ​ທີ່​ຖືກ​ເລືອກ​ໃໝ່ ​ແມ່ນໝາຍ​ເຖິງ​ການ​ແຜ່ຜາຍ​ຂອງ​ໄພ​ຂົ່ມຂູ່​ຈາກ​ອາວຸດ​ນິວ​ເຄລຍ​ແລະ​ຄວາມ​ຈຳ​ເປັນ​ທີ່​ສຳຄັນ​ເພື່ອ​ປ້ອງ​ກັນ​ສິ່ງ​ດັ່ງກ່າວບໍ່​ໃຫ້​ເກີດ​ຂຶ້ນ ​ໂດຍ​ສະ​ເພາະ​ແມ່ນ​ໃນ​ໝູ່​ພວກ​ກໍ່ການ​ຮ້າຍ ​ແລະ​ອຳນາດ​ການ​ປົກຄອງ​ທີ່​ໂລ​ເລທີ່​ບໍ່​ມີ​ຄວາມ​ທຸ່ນ​ທ່ຽງ.”

ພວກ​ນັກ​ຊ່ຽວຊານ​ດ້ານ​ການ​ຄວບ​ຄຸມ​ອາວຸດ​ຂອງ​ສະຫະລັດກ່າວ​ວ່າ ສະຫະລັດ​ແລະຣັດ​ເຊຍ​ມີ​ອາວຸດ​ນິວ​ເຄລຍຢູ່​ໃນ​ຄັງ​ອາວຸດ​ຂອງ​ຕົນ ​ເກືອບ​ເທົ່າໆ​ກັນ ຄື ​ແຕ່ລະ​ຝ່າຍ​ມີຫລາຍ​ກວ່າ 7,000 ລູກ.

​ແຕ່​ຖ້າ​ທ່ານ Trump ຕັດສິນ​ໃຈຈະ​ຂະຫຍາຍ​ຄັງ​ອາວຸດ​ນິວ​ເຄລຍ ມັນ​ອາດ​ຈະ​ເປັນ​ການ​ຕ່າວ​ປີ້ນທີ່​ສຳຄັນ ​ໃນ​ນະ​ໂຍບາຍ ​ທີ່​ມີ​ມາ​ເປັນ​ເວລາ​ດົນ​ກວ່າ 50 ປີ ຂອງ​ສະຫະລັດທີ່​ໄດ້​ເພັ່ງ​ເລັງ​ໃສ່​ແຕ່​ການ​ຫລຸດ​ຜ່ອນອາວຸດ​ນິວ​ເຄລຍລົງ​ນັ້ນ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG