ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ທ່ານ ທ​ຣຳ ເດີນ​ທາງ​ກັບ ​ຈາກ​ ອິນ​ເດຍ, ແຕ່ລາງວັນ ​ຈະ​ຕາມ​ມາ​ພາຍຫຼັງ


ປະ​ທາ​ນາ​ທິ​ບໍ​ດີ ດໍ​ໂນ​ລ ທ​ຣຳ, ແລະ ສະ​ຕີ​ໝາຍ​ເລກ​ນຶ່ງ​ທ່ານ​ນາງ ເມ​ລາ​ເນຍ ທ​ຣຳ, ຍົກ​ມື​ລາ ໃນ​ຂະ​ນະ​ທີ່​ເພິ່ນ​ເດີນ​ທາງ​ຂຶ້ນ​ເຮືອ​ບິນປະ​ທາ​ນາ​ທິ​ບໍ​ດີ Air Force One ຢູ່​ຖານ​ທັບ​ອາ​ກາດ ພະ​ລາມ, ນະ​ຄອນຫຼວງ ນິວ ເດ​ລີ, ອິນ​ເດຍ. 25 ກຸ​ມ​ພາ, 2020.
ປະ​ທາ​ນາ​ທິ​ບໍ​ດີ ດໍ​ໂນ​ລ ທ​ຣຳ, ແລະ ສະ​ຕີ​ໝາຍ​ເລກ​ນຶ່ງ​ທ່ານ​ນາງ ເມ​ລາ​ເນຍ ທ​ຣຳ, ຍົກ​ມື​ລາ ໃນ​ຂະ​ນະ​ທີ່​ເພິ່ນ​ເດີນ​ທາງ​ຂຶ້ນ​ເຮືອ​ບິນປະ​ທາ​ນາ​ທິ​ບໍ​ດີ Air Force One ຢູ່​ຖານ​ທັບ​ອາ​ກາດ ພະ​ລາມ, ນະ​ຄອນຫຼວງ ນິວ ເດ​ລີ, ອິນ​ເດຍ. 25 ກຸ​ມ​ພາ, 2020.

ປະ​ທາ​ນາ​ທິ​ບໍ​ດີ ສະ​ຫະ​ລັດ ທ່ານ ດໍ​ໂນ​ລ ທ​ຣຳ ໄດ້​ມ້ວນ​ທ້າຍ​ການ​ຢ້ຽມ​ຢາມ ອິນ​ເດຍ ທີ່​ເຕັມ​ໄປ​ດ້ວຍ​ຄວາມ​ຕື່ນ​ເຕັ້ນ, ບ່ອນ​ທີ່​ທ່ານ​ໄດ້​ຖືກ​ຕ້ອນ​ຮັບ​ດ້ວຍ​ຝູງ​ຊົນ​ຂະ​ໜາດ​ໃຫຍ່​ໃນ​ງານ “ນາ​ມາ​ສເຕ ທ່ານ ທ​ຣຳ”, ຖ່າຍ​ຮູບ​ຢູ່ ທັ​ຊ ມາ​ຮາ​ລ ແລະ ໄດ້​ປະ​ກາດ​ສາຍ​ພົວ​ພັນ​ລະ​ຫວ່າງ ສະ​ຫະ​ລັດ ກັບ ອິນ​ເດຍ ວ່າ “ແຂງ​ແກ່ນກວ່າ​ທີ່​ເຄີຍມີ​ມາ.”

ທ່ານ​ປະ​ທາ​ນາ​ທິ​ບໍ​ດີ​ໄດ້​ປະ​ຕິ​ບັດຕາມ​ແຜນ​ການ ໃນ​ການ​ຢ້ຽມ​ຢາມ ​ທີ່​ຖືກ​ອອກ​ແບບ​ມາ​ເພື່ອເຮັດ​ໃຫ້​ໂດດ​ເດັ່ນ ແລະ ມີ​ຄວາມ​ເປັນ​ສ່ວນ​ຕົວ ກ່ຽວ​ກັບ ສາຍ​ພົວ​ພັນ​ລະ​ຫວ່າງ ສະ​ຫະ​ລັດ ກັບ ອິນ​ເດຍ.

ທ່ານ ທ​ຣຳ ໄດ້​ກ່າວ​ຕໍ່​ນາ​ຍົກ​ລັດ​ຖະ​ມົນ​ຕີ ອິນ​ເດຍ ທ່ານ​ ນາ​ເຣັນ​ດ​ຣາ ໂມ​ດີ ວ່າ “ພວ​ກ​ເຮົາ​ຈະ​ຈົດ​ຈຳ ການ​ຕ້ອນ​ຮັບ​ທີ່​ສະ​ຫງ່າ​ງາມ​ຂອງ​ປະ​ຊາ​ຊົນ ອິນ​ເດຍ ໃນ​ເວ​ລາ​ທີ່​ເຮົາ​ເດີນ​ທາງ​ຮອດ,” ໂດຍ​ເອີ້ນ​ມັນ​ວ່າ “ເປັນ​ການ​ສະ​ແດງ​ຄວາມ​ເຂັ້ມແຂງ​ຢ່າງ​ເລິກ​ເຊິ່ງ ແລະ ຄວາມ​ຮັກ​ທີ່​ແທ້​ຈິງ.”

ແນວ​ໃດ​ກໍ​ຕາມ, ການ​ຢ້ຽມ​ຢາມ​ດັ່ງ​ກ່າວ ແມ່ນ​ມີ​ຂຶ້ນ​ ໃນ​ຂະ​ນະ​ທີ່​ມີການ​ປະ​ທ້ວງຢ່າງຮຸນ​ແຮງ​ຢູ່​ຕາມ​ຖະ​ໜົນ​ ລະ​ຫວ່າງ​ພວກ​ທີ່​ນັບ​ຖື​ສາ​ສະ​ໜາ​ ຮິນ​ດູ ແລະ ກຸ່ມ​ມຸ​ສ​ລິມ ທີ່​ເປັນ​ຄູ່​ແຂ່ງ ເພື່ອປະ​ທ້ວງ​ກົດ​ໝາຍ​ສັນ​ຊາດ​ໃໝ່ທີ່​ໄດ້​ນຳ​ໄປ​ສູ່​ການ​ເສຍ​ຊີ​ວິດ​ຂອງ​ປະ​ຊາ​ຊົນ​ຢ່າງ​ໜ້ອຍ 10 ຄົນ​ ໃນ​ການ​ປະ​ທະ​ກັນ​ສອງວັນ, ອີງ​ຕາມ​ກາ​ນ​ລາຍ​ງານ​ຂອງ​ອົງ​ການ​ຂ່າວ AP. ອີກ 186 ຄົນ​ໄດ້​ຮັບ​ບາດ​ເຈັບ, ເຊິ່ງ​ລວມ​ມີ​ຕຳຫຼວດ ແລະ ຜູ້​ປະ​ທ້ວງ.

ນະ​ຄອນຫຼວງຂອງ ອິນ​ເດຍ ໄດ້​ຖືກ​ກະ​ທົບ​ໂດຍ​ຄວາມ​ຮຸນ​ແຮງ ແລະ ການ​ປະ​ທ້ວງ​ນັບ​ຕັ້ງ​ແຕ່​ສະ​ພາ​ແຫ່ງ​ຊາດ​ ໄດ້​ຮັບ​ຮອງ​ກົດ​ໝາຍ​ສັນ​ຊາດໃໝ່​ ໃນ​ເດືອນ​ທັນ​ວາປີ​ກາຍນີ້ ທີ່​ຈະ​ອະ​ນຸ​ຍາດ​ໃຫ້ຂະ​ບວນ​ການ​ໂອນ​ສັນ​ຊາດ​ສຳ​ລັບ​ພວກ​ສາ ສະ​ໜາ​ກຸ່ມ​ນ້ອຍ​ທີ່​ເກີດ​ຢູ່​ຕ່າງ​ປະ​ເທດ ແຕ່ບໍ່​ແມ່ນ​ຊາວ ມຸ​ສ​ລິມ ມີ​ຄວາມ​ໄວ​ຂຶ້ນ. ທ່ານ ທ​ຣຳ ໄດ້​ກ່າ​ວ​ວ່າ ທ່ານ​ຮູ້ ກ່ຽວ​ກັບ ການ​ປະ​ທ້ວງ ແຕ່ບໍ່​ໄດ້​ລົມ​ກັບ​ທ່ານ ໂມ​ດີ ກ່ຽວ​ກັບ​ມັນ.

ທ່ານ ທ​ຣຳ ໄດ້​ກ່າວ​ຕໍ່​ບັນ​ດາ​ນັກ​ຂ່າວ​ວ່າ “ຂ້າ​ພະ​ເຈົ້າ​ບໍ່​ຢາກ​ລົມ​ເລື່ອງ​ນັ້ນ. ຂ້າ​ພະ​ເຈົ້າ​ຢາກ​ໃຫ້​ມັນ​ເປັນ​ເລື່ອງ​ຂອງ ອິນ​ເດຍ ແລະ ຫວັງ​ວ່າ ເຂົາ​ເຈົ້າ​ຈະ​ທຳ​ການ​ຕັດ​ສິນ​ໃຈ​ທີ່​ຖືກ​ຕ້ອງ​ສຳ​ລັບ​ປະ​ຊາ​ຊົນ.”

ໃນ​ລະ​ຫວ່າງ​ການ​ຢ້ຽມ​ຢາມ​ຂອງ​ທ່ານ ທ​ຣຳ ນັ້ນ, ສອງ​ປະ​ເທດ​ດັ່ງ​ກ່າວ ບໍ່​ສາ​ມາດ​ທີ່​ຈະ​ແກ້​ໄຂ​ຄ​ວາມບໍ່​ເຫັນ​ພ້ອມ ກ່ຽວ​ກັບ ຂໍ້​ຕົກ​ລົງ​ການ​ຄ້າ​ສອງ​ຝ່າຍ, ແຕ່​ບັນ​ດາ​ຜູ້​ສັງ​ເກດ​ການ​ໄດ້​ກ່າວ​ວ່າ ທ່ານ​ປະ​ທາ​ນາ​ທິ​ບໍ​ດີ​ໄດ້​ຮັບ​ຜົນ​ປະ​ໂຫຍດ​ຈາກ​ປະ​ຊາ​ຊົນ 100,000 ຄົ​ນ​ຂອງ​ປະ​ເທດ​ທີ່​ສຳ​ຄັນ​ນັ້ນ ​ໃນ​ການ​ສະ​ແດງ​ການ​ສະ​ໜັບ​ສະ​ໜູນ​ທ່ານ, ໃນ​ການ​ເດີນ​ທາງ​ຢ້ຽມ​ປະ​ເທດ​ທີ່​ສຳ​ຄັນ​ຄັ້ງ​ທຳ​ອິດ ນັງ​ຕັ້ງ​ແຕ່​ໄດ້​ຖືກ​ຕັດ​ສິນ​ພົ້ນ​ຄວາມ​ຜິດຈາກ​ຂໍ້​ກ່າວ​ຫາ​ການ​ຟ້ອ​ງ​ຮ້ອງຕ່າງໆ​ໃນ ສະ​ຫະ​ລັດ.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

XS
SM
MD
LG