ໄທ ຢາກເຮັດວຽກກັບຝ່າຍເຮັດສົງຄາມໃນ ມຽນມາ ເພື່ອສ້ອມແປງທາງດ່ວນທີ່ຕັດຜ່ານປະເທດທີ່ປະສົບບັນຫາຂັດແຍ້ງນັ້ນ ໃນຂະນະທີ່ເຂົາເຈົ້າພະຍາຍາມຈະສ້າງສະຖຽນລະພາບໃນເຂດຊາຍແດນ ແລະ ຮັກສາເສັ້ນທາງການຄ້າໃຫ້ເປີດໄວ້ຄືເກົ່າ, ລັດຖະມົນຕີການຕ່າງປະເທດ ໄທ ທ່ານ ມາຣິສ ແສງອ່ຽມພົງສາ ໄດ້ກ່າວໃນວັນພະຫັດມື້ນີ້.
ໄທ ໄດ້ສະໜັບສະຫນູນກຸ່ມອາຊຽນໃນພາກພື້ນ ແລະ ອິນເດຍ ໃນການຜັກດັນໃຫ້ສ້າງຄືນພາກສ່ວນຕ່າງໆຂອງທາງດ່ວນ ເອເຊຍ 1 ຫຼື AH-1 ທີ່ໄດ້ຮັບຄວາມເສຍຫາຍຍ້ອນການຕໍ່ສູ້ເມື່ອບໍ່ດົນມານີ້, ທ່ານໄດ້ກ່າວຕໍ່ບັນດານັກຂ່າວ.
ປະເທດ ລາວ, ເຊິ່ງປັດຈຸບັນນີ້ເປັນປະທານຂອງສະມາຄົມປະຊາຊາດແຫ່ງເອເຊຍຕາເວັນອອກສຽງໃຕ້ ທີ່ມີ 10 ປະເທດນັ້ນ, ກໍໄດ້ຂໍໃຫ້ ໄທ ເປັນເຈົ້າພາບຈັດກອງປະຊຸມຂອງພາກພື້ນ ກ່ຽວກັບ ມຽນມາ ກ່ອນໝົດປີ, ທ່ານໄດ້ກ່າວ, ໂດຍບໍ່ໄດ້ສະໜອງລາຍລະອຽດເພີ່ມເຕີມ.
ທ່ານ ມາຣິສ ກ່າວວ່າ “ຂ້າພະເຈົ້າຄິດວ່າບັນຫາ ມຽນມາ ບໍ່ສາມາດແກ້ໄຂດ້ວຍການໃຊ້ກຳລັງທະຫານໄດ້, ແຕ່ຜ່ານການສົນທະນາທີ່ສ້າງສັນ.”
ມຽນມາ ໄດ້ປະສົບຄວາມວຸ້ນວາຍນັບຕັ້ງແຕ່ເດືອນກຸມພາ 2021, ເວລາທີ່ນາຍພົນທີ່ມີອຳນາດຂອງເຂົາເຈົ້າໄດ້ຂັບໄລ່ລັດຖະບານພົນລະເຮືອນທີ່ຖືກເລືອກຕັ້ງເອົາ, ຈົນກໍ່ໃຫ້ເກີດການເຄື່ອນໄຫວປະທ້ວງ ທີ່ໄດ້ກາຍເປັນການກໍ່ກະບົດຕິດອາວຸດຕໍ່ລັດຖະບານທະຫານທີ່ປົກຄອງປະເທດ.
ລັດຖະບານທະຫານໄດ້ສູນເສຍການຄວບຄຸມພື້ນທີ່ອັນກວ້າງຂວາງຂອງປະເທດ ແລະ ເສດຖະກິດແມ່ນໄດ້ກາຍເປັນພິການ.
