ຫົນທາງກັບຄືນສູ່ປະຊາທິປະໄຕຂອງ ໄທ ໄດ້ຢືນຢັນເຖິງການປະສົບກັບ ອຸປະສັກຄັ້ງໃຫຍ່ໃນວັນອາທິດວານນີ້ ເມື່ອລັດຖະ ສະພາທີ່ໜູນຫຼັງໂດຍທະຫານໄດ້ປະຕິເສດການສະເໜີລັດຖະທຳມະນູນໃໝ່.
ສະພາປະຕິຮູບແຫ່ງຊາດໄດ້ປະຕິເສດ ກົດບັດທີ່ໄດ້ຖືກສະເໜີໂດຍການລົງຄະແນນສຽງ 135 ຕໍ່ 105 ສຽງ, ພ້ອມດ້ວຍສະມາຊິກ 7 ຄົນງົດອອກສຽງ. ລັດຖະບານທະຫານຕອນນີ້ຈະຕັ້ງຄະນະກຳມະການໃໝ່ທີ່ຈະມີເວລາ 6 ເດືອນເພື່ອຂຽນລັດຖະທຳມະນູນໃໝ່, ເຊິ່ງຕ້ອງໄດ້ຖືກອະນຸມັດໂດຍລັດຖະສະພາກ່ອນທີ່ຈະຖືກລົງປະຊາມະຕິ. ນັ້ນກໍໝາຍຄວາມວ່າ ການເລືອກຕັ້ງເບິ່ງຄືວ່າຈະບໍ່ເກີດຂຶ້ນຈົນກວ່າໄລຍະໃດໜຶ່ງໃນປີ 2017. ລັດຖະບານທະຫານໄດ້ອອກຕາຕະລາງເລືອກຕັ້ງສຳລັບທ້າຍປີ 2016 ຖ້າກົດບັດທີ່ໄດ້ຖືກສະເໜີໄປນັ້ນຖືກຮັບຮອງໂດຍ ສະພາປະຕິຮູບແຫ່ງຊາດ.
ລັດຖະທຳມະນູນທີ່ໄດ້ຖືກສະເໜີໄປໄດ້ຖືກປະນາມໂດຍທຸກໆພັກການເມືອງ ທີ່ກ່າວວ່າ ມັນຈະອະນຸຍາດໃຫ້ທະຫານຮັກສາອຳນາດຂອງພວກເຂົາເຈົ້າໄວ້ຢ່າງມີປະສິດທິພາບຕໍ່ໄປ. ພວກເຂົາເຈົ້າໄດ້ຊີ້ບອກເຖິງຂໍ້ບັນຍັດທີ່ຮຽກຮ້ອງໃຫ້ມີການຕັ້ງສະມາຊິກຄະນະກຳມະການ 23 ຄົນ, ປົກຄອງໂດຍທະຫານ, ທີ່ຈະຮັບໜ້າທີ່ຄວບຄຸມຈາກລັດຖະບານທີ່ໄດ້ຖືກເລືອກຕັ້ງຢ່າງເປັນປະຊາທິປະໄຕໃນເວລາເກີດ “ວິກິດການ” ຂອງປະເທດ.
ທະຫານຂອງ ໄທ ໄດ້ຂຶ້ນກຳອຳນາດຕັ້ງແຕ່ເດືອນ ພຶດສະພາ ປີກາຍນີ້ ເມື່ອພວກເຂົາເຈົ້າໄດ້ຂັບໄລ່ນະຍົກລັດຖະມົນຕີ ຍິ່ງລັກ ຊິນນະວັດ ອອກຈາກຕຳແໜ່ງ ແລະ ໄດ້ຍົກເລີກລັດຖະທຳມະນູນ. ປະເທດໄທໄດ້ຖືກລົບກວນໂດຍຄວາມບໍ່ສະຫງົບທາງດ້ານການເມືອງຕັ້ງແຕ່ອ້າຍຂອງທ່ານນາງ ຍິ່ງລັກ, ທ່ານ ທັກສິນ ຊິນນະວັດ ໄດ້ເປັນນາຍົກລັດຖະມົນຕີ ໃນປີ 2001.
ທ່ານ ທັກສິນ ແມ່ນໄດ້ຮັບຄວາມນິຍົມໃນບັນດາປະຊາຊົນທີ່ທຸກຍາກຂອງ ໄທ, ແຕ່ໄດ້ຖືກລັງກຽດໂດຍນັກອະນຸລັກນິຍົມ, ກຸ່ມຜູ້ສະໜັບສະໜູນລະບອບການປົກຄອງເຈົ້າຊີວິດ, ແລະ ໃນທີ່ສຸດກໍໄດ້ຖືກຂັບໄລ່ໂດຍການລັດຖະປະຫານທະຫານໃນປີ 2006. ທັງສອງຝ່າຍໄດ້ປ່ຽນກັນກຳອຳນາດຕັ້ງແຕ່ນັ້ນມາ, ແລະ ໄດ້ຕັ້ງເວທີການປະທ້ວງກາງຖະໜົນທີ່ໃຫຍ່ຫຼວງ ເຊິ່ງບາງຄັ້ງໄດ້ກາຍເປັນຄວາມຮຸນແຮງ ແລະ ເຖິງແກ່ຊີວິດ.
ໃນເມື່ອໄດ້ຖືກອະນຸມັດແລ້ວ, ລັດຖະທຳມະນູນໃໝ່ຈະເປັນ ສະບັບທີ 20 ຂອງ ໄທ ນັບຕັ້ງແຕ່ປະເທດດັ່ງກ່າວໄດ້ກາຍມາເປັນ ປະຊາທິໄປໄຕໃນປີ 1932.
