ລິ້ງ ສຳຫລັບເຂົ້າຫາ

ໄທ ລວບລວມ ຫຼັກຖານ ສຳຫລັບ ຄະດີ ວາງລະເບີດ ໃນບາງກອກ


ຕຳຫຼວດໄທ ຢືນຍາມ ໃນຂະນະທີ່ ປະຊາຊົນ ທຳການກາບໄຫວ້ ສານເຈົ້າ ໃນລະຫວ່າງ ການສະແດງເຫດການຄືນ ໃກ້ໆກັບສະຖານທີ່ວາງລະເບີດ ຢູ່ສານເຈົ້າ Erawan ໃນກາງເມືອງບາງກອກ ປະເທດໄທ, ວັນທີ 9 ສິງຫາ 2015.

ບັນດາ​ເຈົ້າໜ້າ​ທີ່​ໄທ ​ໄດ້​ກ່າວ​ຫາ ການວາງ​ລະ​ເບີດ ໃນ​ບາງ​ກອງ
​ເມື່ອ​ເດືອນ​ແລ້ວ​ນີ້ ທີ່​ຮ້າຍແຮງເຖິງແກ່ຊີວິດ ​ໃສ່ເຄືອ​ຂ່າຍ​ກຸ່ມລັກ
​ລອບ​ຄ້າ​ມະນຸດ ວີ​ເກີ້ ຢ່າງ​ເປັນ​ທາງ​ການ ຊຶ່ງ​ບັນດາ​ເຈົ້າໜ້າ​ທີ່
ກ່າວ​ວ່າ ​ພວກ​ເຂົາເກີດ​ຄວາມໂກດ​ແຄ້ນ ກ່ຽ​ວກັບ ການ​ປາບ
​ປາມ​ທຸລະ​ກິດ​ຂອງພວກເຂົາ ​ໂດຍ​ເຈົ້າໜ້າທີ່ຕຳຫຼວດ. ການ​ສືບ
ສວນ​ສອບ​ສວນ ​ໃນ​ການວາງ​ລະ​ເ​ບີ​ດ ​ໄດ້​ຖືກ​ຕຳ​ນິຕິ​ຕຽນ ວ່າ
ບໍ່ເປັນ​ລະບຽບ ເພາະໃນ​ບາງ​ຄັ້ງ​ບາງ​ຄາວ ​ຖະ​ແຫລ​ງການ ຂອງ
​ເຈົ້າໜ້າ​ທີ່​ຂັ້ນສູງ ແມ່ນເປັນໄປທາງກົງກັນຂ້າມ​. ຜູ້​ສື່​ຂ່າວ​ວີ​ໂອ​ເອ
Ron Corben ລາຍງານ​ຈາກ​ນະຄອນຫຼວງຂອງ​ໄທ ​ຊຶ່ງ​
ໄຊ​ຈະ​ເລີ​ນສຸກ ຈະ​ນຳ​ມາສະ​ເໜີ​ທ່ານ ​ໃນ​ອັນ​ດັບ​ຕໍ່​ໄປ.

ການ​ໂຈມ​ຕີຄັ້ງນຶ່ງ​ຄັ້ງດຽວທີ່​ຮ້າຍ​ແຮງ​ທີ່​ສຸດ ໂດຍ​ພວກ​ກໍ່​ການ​ຮ້າຍ ​ເມື່ອ​ວັນ​ທີ 17 ສິງຫາ​
ຜ່ານ​ມາ ​ໄດ້​ສັງຫານຫຼາຍກວ່າ 20 ຄົນ ​ແລະ ຫຼາຍກວ່າ 100 ຄົນ​ໄດ້​ຮັບ​ບາດ​ເຈັບ ຊຶ່ງໄດ້​
ເຮັດ​ໃຫ້ປະຊາຊົນ​ຊາວ​ໄທ ຢ້ານ​ກົວ ​ແລະ ​ເປັນ​ຫ່ວງ​ວ່າ ຈະ​ມີ​ການ​ໂຈມ​ຕີ​ອີກ.

ສ່ວນ​ພວກເຈົ້າໜ້າ​ທີ່ ກໍ​ແມ່ນພະຍາຍາມ​ໃຫ້​ຄວາມ​ໝັ້ນໃຈ ຢ່າງ​ວ່ອງ​ໄວ ​ແກ່​ມະຫາຊົນ ​
ແລະ ອຸດ​ສາ​ຫະກຳ​ທ່ອງ​ທ່ຽວ​ ທີ່​ສຳຄັນຂອງ​ປະ​ເທດ ຊຶ່ງເຫດການນັ້ນ ບໍ່ແມ່ນການກະທຳ
ຂອງພວກກໍ່ການຮ້າຍ ເຖິງແມ່ນວ່າ ພວກເຂົາຈະຍອມຮັບວ່າ ພວກເຂົາບໍ່ຮູ້ຈັກ​ເລີຍວ່າ
ຜູ້ໃດເປັນຜູ້ປະຕິບັດການໂຈມຕີດັ່ງກ່າວ.

ການສືບສວນສອບສວນ ໃນເບື້ອງຕົ້ນ ແມ່ນນຳພາໂດຍ ຕຳຫລວດນະຄອນຫລວງ ທີ່
ປະກອບດ້ວຍເຈົ້າໜ້າທີ່ ຕຳຫລວດຈາກທ້ອງຖິ່ນ ແລະ ພະ​ແນກໜ່ວຍພິເສດຂອງໄທ
ທີ່ເພັ່ງເລັງໃສ່ກໍລະນີ ລະດັບສູງຕ່າງໆ.

ຜູ້ບັນຊາການ ຕຳຫຼວດແຫ່ງຊາດໄທ ຄົນຕໍ່ໄປ ທ່ານ Chakthip Chaijinda (ຊ້າຍ) ໂອ້ລົມກັບ ຜູ້ບັນຊາການ ຕຳຫຼວດແຫ່ງຊາດໄທ ຄົນປັດຈຸບັນ ທ່ານ Somyot Poompanmuang (ຂວາ) ໃນລະຫວ່າງ ພິທີທາງສາສະໜາ ໃກ້ໆ ກັບສານເຈົ້າ Erawan ຢູ່ກາງນະຄອນບາງກອກ, ວັນທີ 21ສິງຫາ 2015.
ຜູ້ບັນຊາການ ຕຳຫຼວດແຫ່ງຊາດໄທ ຄົນຕໍ່ໄປ ທ່ານ Chakthip Chaijinda (ຊ້າຍ) ໂອ້ລົມກັບ ຜູ້ບັນຊາການ ຕຳຫຼວດແຫ່ງຊາດໄທ ຄົນປັດຈຸບັນ ທ່ານ Somyot Poompanmuang (ຂວາ) ໃນລະຫວ່າງ ພິທີທາງສາສະໜາ ໃກ້ໆ ກັບສານເຈົ້າ Erawan ຢູ່ກາງນະຄອນບາງກອກ, ວັນທີ 21ສິງຫາ 2015.

ຄວາມເປັນ​ຫ່ວງ​ເປັນ​ໃຍ ກ່ຽວກັບ​ການ​ສືບສວນ​ສອບ​ສວນ​ ຂອງ​ຕຳຫຼວດ ​ເກີດ​ຂຶ້ນ ບໍ່ເຖິງ
ນຶ່ງ​ມື້ ຫຼັງຈາກ​ການລະ​ເບີດ ​ໃນ​ເວລາ​ທີ່​ຕຳຫຼວດ​ໄດ້​ປະກາດ​ວ່າ ພວກ​ເຂົາ​ເຈົ້າ​ ໄດ້​ສຳ​ເລັດ
​ການ​ສືບສວນ​ສອບ​ສວນ ​ເປັນ​ທີ່​ຮຽບຮ້ອຍ​ແລ້ວ ຢູ່​ທີ່​ສະຖານ​ທີ່​ເກີດ​ເຫດ ​ໃນ​ກາງ​ເມືອງ
​ແລະ ​ໄດ້​ສົ່ງ​ໜ່ວຍ​ງານ ​ເພື່ອ​ທຳ​ຄວາມ​ສະອາດ ​ລ້າງ​ຖູ​ບໍລິ​ເວນ​ທັງ​ໝົດ. ບັນດາ​ນັກວິ​ເຄາະ
ກ່າວ ​ວ່າ ພາບ​ພົດຂອງ​ຕຳຫຼວດ​ໄທ ໄດ້​ມີ​ຈຸດ​ບົກ​ຜ່ອງ ​ໃນ​ເວລາ​ທີ່ ລາງວັນ ມູນ​ຄ່າ 85,000 ​
ໂດ​ລາ ທີ່​ສະ​ເໜີ​ໃຫ້​ໂດຍ ຫົວໜ້າ​ຕຳຫຼວດ​ແຫ່ງ​ຊາດ ສຳ​ຫລັບ​ຂໍ້​ມູນ ທີ່​ນຳ​ໄປ​ສູ່​ການ​ຈັບ​ກຸມ ພວກວາງ​ລະ​ເບີດນັ້ນ ຊຶ່ງໄດ້​ຖືກ​ອ້າງ​ເອົາ​ໂດຍ​ພວກຕຳຫຼວດ​ເອງ.

ຫຼັງຈາກ​ມີ​ການ​ຕຳ​ໜິ​ແລ້ວ ຜູ້ບັນຊາ​ການ​ຕຳຫຼວດ​ແຫ່ງ​ຊາດ ທ່ານ Somyot Poompanmuang
​ຈຶ່ງໄດ້​ມອບ​ການ​ຄວບ​ຄຸມ ຂອງ​ການ​ສື​ບສວນ​ສອບ​ສວນ ​ໃຫ້​ແກ່ ທິມງານໜ່ວຍ​ພິ​ເສດ.

ພາບນີ້ ເຜີຍແຜ່ໂດຍ ຕຳຫຼວດຣາຊະອານາຈັກໄທ ສະແດງໃຫ້ເຫັນຊາຍຜູ້ຖືກຈັບກຸມ ຢູ່ທີ່ບ້ານພັກ ອາພາດເມັນ ເມື່ອວັນທີ 29 ສິງຫາ 2015 ໃນບາງກອກ ພ້ອມດ້ວຍຫຼັກຖານ ທີ່ຕຳຫຼວດກ່າວວ່າ ລວມມີອຸປະກອນ ໃຊ້ໃນການເຮັດລະເບີດ.
ພາບນີ້ ເຜີຍແຜ່ໂດຍ ຕຳຫຼວດຣາຊະອານາຈັກໄທ ສະແດງໃຫ້ເຫັນຊາຍຜູ້ຖືກຈັບກຸມ ຢູ່ທີ່ບ້ານພັກ ອາພາດເມັນ ເມື່ອວັນທີ 29 ສິງຫາ 2015 ໃນບາງກອກ ພ້ອມດ້ວຍຫຼັກຖານ ທີ່ຕຳຫຼວດກ່າວວ່າ ລວມມີອຸປະກອນ ໃຊ້ໃນການເຮັດລະເບີດ.

ທ່ານ Tony Davis ນັກວິ​ເຄາະ ຈາກ IHS Janes ກ່າວ​ວ່າ ການສື​ບສວນ​ສອບ​ສວນ ​ໄດ້​
ກ້າວໜ້າ​ໄປ ເມື່ອ​ວັນທີ 29 ສິງຫາ ດ້ວຍ​ການ​ຈັບ​ກຸມ ຊາຍ​ຊົນ​ເຜົ່າ​ວີ​ເກີ້ ຄົນ​ນຶ່ງ​ຢູ່​ໃນ​ຊານ​
ເມືອງ​ຂອງ​ບາງກອກ ທີ່​ໄດ້​ພົບ​ເຫັນ ໜັງສື​ເດີນທາງປອມ​ແປງ ຂອງ​ປະ​ເທດ​ເທີ​ກີ ​ຫຼາຍສິບຫົວ ​ແລະ ວັດຖຸ​ລະ​ເບີດ​ຕ່າງໆ.

ທ່ານ Davis ​ເວົ້າວ່າ “​ໃນ​ເມື່ອ​ພວກ​ເຂົາ ຈັບ​ຊາຍ​ຄົນ​ນຶ່ງ​ໄດ້​ແລ້ວ ບັດ​ນີ້ ພວກ​ເຮົາ​
ຈຶ່ງຮູ້ຈັກ​ວ່າ ​ເປັນ​ຄົນ​ສັນຊາດ​ເທີ​ກີ ​ຊົນ​ເຜົ່າ​ວີ​ເກີ້ ທີ່​ອອກ​ມາ​ຈາກ ບ້ານ​ພັກອາພາດ​
ເມັນ ​ໃນ​ເຂດ Nong Chok ພວກ​ເຂົາ​ໄດ້​ເລີ້ມ​ມີຄວາມກ້າວໜ້າ ​ແລະ ​ໃນ​ເມື່ອ​
ການ​ຈັບ​ນັ້ນ ນຳ​ໄປ​ສູ່​ການ​ຈັບ​ໄດ້​ອີກ​ຄົນ​ນຶ່ງ ​ແນ່ນອນແລ້ວ​ວ່າ ການ​ທຳ​ງານ​ຂອງ​
ຕຳຫຼວດ ​ໄດ້​ເລັ່ງຂຶ້ນ ​ແລະ ​ໄດ້​ມີ​ຄວາມກ້າວໜ້າ​ທີ່​ສຳຄັນໆ ​ໃນ​ສອງ​ສາມ​ອາທິດ​
ຕໍ່​ມາ.”

ນັບ​ຕັ້ງ​ແຕ່​ນັ້ນມາ ຕຳຫຼວດສາມາດ​ຈັບ​ໄດ້​ອີກ​ຢ່າງ​ນ້ອຍ 3 ຄົນ ດ້ວຍ​ການ​ຕິດຕາມ​ເບິ່ງ​
ບັນດາ​ຜູ້​ຕ້ອງ​ສົງ​ໄສ ທີ່​ເດີນທາງ​ຜ່ານ​ປະ​ເທດ​ຫວຽດນາມ ໄປ​ຍັງ ລາວ ​ແລະ ມາ​ເລ​ເຊຍ
ພ້ອມ​ກັນ​ກັບ ບັງ​ກລາ​ແດັສ. ຫ້ອງການ​ຕໍ່ຕ້ານ​ການ​ຟອກ​ເງິນ ຍັງ​ໄດ້​ລາຍງານ​ ​ເຖິງ​ການ​
ຕິດຕາມ​ຮ່ອງຮອຍ​ຂອງ​ເງິນ​ນັ້ນ ທີ່​ເຊື່ອມ​ໂຍງໄປ​ເຖິງ​ຄູ່ສົມຮູ້​ຮ່ວມ​ຄິດ​ທັງຫຼາຍ ທີ່​ໃຫ້​ທຶນ
ນຳ​ໃຊ້​ສຳ​ຫລັບ​ປະຕິບັດ​ການ ລັກລອບ​ຄ້າ​ມະນຸດ​ເຜົ່າ​ວີ​ເກີ້.

​ແຕ່​ກໍ​ຍັງ​ມີການ​ສົງ​ໄສ​ຢູ່​ ກ່ຽວ​ກັບ​ວ່າ​ອັນ​ໃດ​ເປັນ​ເຫດຜົນ​ຫຼັກທີ່​ພາ​ໃຫ້ເກີດການ​ໂຈມ​ຕີນັ້ນ. ​
ບັນດາ​ເຈົ້າໜ້າ​ທີ່ ຢືນ​ຢັດ​ວ່າ ມັນ​ເປັນ​ການ​ແກ້​ແຄ້ນ ສຳ​ຫລັບ​ການ​ປາບ​ປາມ​ ​ການ​ລັກລອບ
​ຄ້າຂາຍ​ມະນຸດ ​ໂດຍ​ພວກຕຳຫລວດ. ​ແຕ່​ບັນດານັກວິ​ເຄາະ ຊີ້​ໄປ​ໃສ່ ​ການ​ຕັດສິນ​ໃຈ
​ຂອງ​ລັດຖະບານ ​ໃນ​ເດືອນ​ກໍລະກົດ ຜ່ານ​ມາ ​ທີ່​ສົ່ງຊາວ​ວີ​ເກີ້ ຈຳນວນ 109 ຄົນ​ກັບ​ຄືນ
​ໄປ​ຈີນ ຫຼັງຈາກ​ທີ່​ໄດ້​ອະນຸຍາດ​ໃຫ້ ຫຼາຍກວ່າ 170 ຄົນອື່ນໆ ​ເດີນທາງ​ຜ່ານ​ຕໍ່​ໄປ​ຍັງ​ເທີ​ກີ.

ພວກ​ເຂົາ​ເຫຼົ່ານັ້ນ ​ແມ່ນ​ລວມຢູ່​ໃນ​ກຸ່ມ ຊາວ​ວີ​ເກີ ຈຳນວນ 400 ຄົນ ຜູ້​ທີ່​ໄດ້​ຫລົບໜີເຂົ້າໄປ ​
ໃນ​ໄທ ​ເມື່ອ​ເດືອນ​ມີນາ ປີ 2014 ທ່າມກາງ​ການ​ປາບ​ປາມ​ ຊຸມ​ຊົນບັນດາ​ເຜົ່າ ​ໃນແຂວງ
​ຊິນ​ຈຽງທາງ​ພາກ​ຕາ​ເວັນ​ຕົກຂອງ​ຈີນ. ກຸ່ມປົກ​ປ້ອງ​ສິດທິ​ມະນຸດ​ຕ່າງໆ ​ແລະ ບັນດາລັດຖະບານ
​ຕາ​ເວັນ​ຕົກ ​ໄດ້​ຮຽກຮ້ອງໃຫ້​ໄທ ບໍ່​ໃຫ້​ສົ່ງ​ພວກ​ຊົນ​ເຜົ່າ​ວີ​ເກີ້​ກັບ​ຄືນ ​ໄປຈີນ ບ່ອນ​ທີ່​ພວກເຂົາ​
ອາດ​ປະ​ເຊີນ​ໜ້າ ກັບ​ການ​ແກ້​ແຄ້ນ.

ການ​ບັງຄັບ​ສົ່ງ​ກັບ​ຄືນ​ນັ້ນ ​ໄດ້​ກາຍ​ເປັນ​ການ​ຕຳ​ໜິຕິ​ຕຽນ​ຢ່າງ​ໜັກ ຈາກ​ນານາ​ຊາດ ​ແລະ
ມີ​ການ​ປະ​ທ້ວງ​ຢ່າງ​ຮຸນ​ແຮງ ​ໃນ​ເທີ​ກີ ບ່ອນ​ທີ່​ພວກ​ປະ​ທ້ວງ​ໄດ້​ໂຈມ​ຕີ ກົງສຸນ​ຂອງ​ໄທ.

ທ່ານ ທິຕິ​ນັນ ພົງ​ສຸ​ດທິຣັກ ນັກ​ລັດຖະສາດ ຢູ່​ທີ່​ມະຫາວິທະຍາ​ໄລ ຈຸລາ​ລົງ​ກອນ ກ່າວ​ວ່າ
ລັດຖະບານ​ໄທ ຕົກ​ຢູ່​ໃນ​ສະພາບ​ທີ່​ຕັດສິນ​ໃຈ​ໄດ້​ຍາກ ຫຼັງຈາກ​ໄດ້​ຖືກ​ກົດ​ດັນ​ຈາກ​ຈີນ ເພື່ອ​ໃຫ້
​ສົ່ງ​ພວກ​ຜູ້​ຊາຍ​ຊາວ​ວີ​ເກີ້ ກັບ​ຄືນ​ໄປ​ແຂວງ​ຊິນ​ຈຽງ ທີ່ຕ້ານ​ກັບຄວາມ​ປະສົງຂອງພວກ​ເຂົານັ້ນ​.

ທ່ານ ທິຕິ​ນັນ ​ເວົ້າວ່າ “ສະນັ້ນ ລັດຖະບານ ​ແມ່ນ​ຢູ່​ໃນ​ຖານະ​ທີ່​ຫຍຸ້ງຍາກ ​ເພາະວ່າ ຖ້າ​
ຕົນ​ຍອມ​ຮັບ​ວ່າ ​ໄດ້​ຜິດພາດ​ໃນ​ການເນລະ​ເທດ ຊາວ​ວີ​ເກີ້ ມັນ​ກໍ​ໝາຍຄວາມ​ວ່າ
ຕົນ​ໄດ້​ເຂົ້າຫາ​ຈີນ​ໃກ້​ເກີນໄປ ​ເພາະວ່າ ຈີນ​ຮັບ​ຮູ້​ການ​ກໍ່​ລັດຖະປະຫານ​ຂອງ​ທະຫານ​ ເມື່ອປີ​ແລ້ວ​ນີ້. ​ໃນ​ຂະນະ​ດຽວ​ກັນ ລັດຖະບານ ບໍ່​ຢາກອອກໄປ​ໄກ​ເກີນ​ໄປ ​ໃນ​ການ​ຍອມຮັບ​ວ່າ ການ​ໂຈມ​ຕີ​ດ້ວຍ​ລະ​ເບີດນັ້ນ ​ແມ່ນ​ເປັນປະຕິບັດ​ການ ກໍ່​ການ​ຮ້າຍ ​ເພາະວ່າ ​ໄທກາງ​ຕໍ່​ນຳການທ່ອງທ່ຽວ.”

ໃນ​ເວລາ​ນີ້ ຊາວ​ວີ​ເກີ້​ຈຳນວນ 98 ຄົນ ຍັງ​ຄົງ​ຢູ່​ໃນ ການ​ກັກ​ຕົວ​ໄວ້​ໂດຍ​ກົມ​ກວດ​ຄົນ​ເຂົ້າ​ເມືອງ​ຂອງໄທ ທີ່​ປະ​ເຊີນ​ໜ້າ​ກັບ ສະ​ຕາ​ກຳ​ອັນ​ທີ່​ບໍ່​ແນ່ນອນ​ ວ່າ ພວກ​ເຂົາຈະ​ຖືກ​ເນລະ​ເທດ ​ໄປ​ເທີ​ກີ ຫຼື ຈະຖືກ​ສົ່ງ​ກັບ​ຄືນ​ໄປ​ຈີນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

ທ່ານອາດຈະມັກເລື້ອງນີ້ຄືກັນ

XS
SM
MD
LG