ລັດຖະບານໄທ ແລະຈີນລົງນາມໃນບັນທຶກຄວາມເຂົ້າໃຈ
(MOU) ວ່າດ້ວຍການຮ່ວມມື ໃນການກໍ່ສ້າງທາງລົດໄຟລາງຄູ່
ລະດັບຄວາມໄວປານກາງ ເພື່ອເຊື່ອມຕໍ່ຈາກຈີນຜ່ານລາວມາ
ໄທໃຫ້ໄດ້ໃນປີ 2022.
ການລົງນາມໃນບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືໃນການກໍ່ສ້າງທາງ
ລົດໄຟລາງຄູ່ ຄວາມໄວປານກາງ ໄດ້ມີຂຶ້ນໃນໂອກາດການປະຊຸມສຸດຍອດ ຜູ້ນຳລັດ
ຖະບານ ຈາກ 6 ປະເທດໃນເຂດລຸ່ມແມ່ນ້ຳຂອງ (GMS Summit) ຄັ້ງທີ 5 ຢູ່ບາງກອກ
ເມື່ອບໍ່ນານມານີ້ ໂດຍມີ ທ່ານຫລີ ເກີ້ຈຽງ ນາຍົກລັດຖະມົນຕີຈີນ ກັບພົນເອກປຣະຍຸດ ຈັນໂອຊາ ນາຍົກລັດຖະມົນຕີໄທ ເປັນປະທານໃນພິທີຮ່ວມກັນ.
ໂດຍການລົງນາມດັ່ງກ່າວນີ້ ຖືເປັນການຕົກລົງຮ່ວມມືລະດັບລັດຖະບານ ລະຫວ່າງໄທກັບຈີນ ທີ່ແນໃສ່ການພັດທະນາທາງລົດໄຟ ເພື່ອເຊື່ອມຕໍ່ກັນ ໃຫ້ໄດ້ພາຍໃນປີ 2022 ດ້ວຍການຮ່ວມລົງທຶນເພື່ອກໍ່ສ້າງທາງລົດໄຟລາງຄູ່ ລະດັບຄວາມໄວປານກາງ 2 ເສັ້ນທາງຢູ່ໃນໄທ ກໍຄືໜອງຄາຍ-ແກ່ງຄອຍ-ມາບຕາພຸດ ແລະ ແກ່ງຄອຍ-ບາງກອກ ເພື່ອເປັນພື້ນຖານ ໃຫ້ກັບການຂະຫຍາຍການເຊື່ອມຕໍ່ໄປຈີນ ໂດຍຜ່ານລາວຕໍ່ໄປດັ່ງທີ່ ພົນເອກປຣະຍຸດ ໄດ້ໃຫ້ການຢືນຢັນວ່າ:
“ການ ລົງນາມບັນທຶກຄວາມເຂົ້າໃຈທີ່ເອີ້ນວ່າ MOU ຄວາມຮ່ວມມືລະຫວ່າງໄທ
ກັບສາທາລະນະລັດປະຊາຊົນຈີນ ເລື້ອງການພັດທະນາໂຄງສ້າງພື້ນຖານທາງ
ລົດໄຟ ຄວາມໄວປານກາງ 2 ເສັ້ນທາງ ໜອງຄາຍ-ແກ່ງຄອຍ-ມາບຕາພຸດ
ແລະ ແກ່ງຄອຍ-ກຸງເທບ ໃນຍຸດທະສາດ 2558-2565 (ປີ 2015-2022)
ເປັນໜຶ່ງໃນຍຸດທະສາດສຳຄັນຂອງລັດຖະບານ ທີ່ຈະຍົກລະດັບຂອງເຮົາໃຫ້ເປັນ
HUB ໃນການເຊື່ອມຕໍ່ໃນກຸ່ມປະເທດເອເຊຍຕາເວັນອອກສຽງໃຕ້ ກັບຈີນໃຫ້ໄດ້.”
ໂດຍກ່ອນໜ້ານີ້ ພົນອາກາດເອກ ປຣະຈິນ ຈັ່ນຕອງ ລັດຖະ
ມົນຕີວ່າການກະຊວງຄົມມະນາຄົມ ຂອງໄທກໍໄດ້ຖະແຫລງ
ຢືນຢັນວ່າ ຄະນະລັດຖະບານໄທໄດ້ມີມັດຕິອະນຸມັດແຜນ
ການກໍ່ສ້າງທາງລົດໄຟລາງຄູ່ຂະໜາດກວ້າງ 1.435 ແມັດ
ທີ່ມີຄວາມໄວລະດັບປານກາງຢ່າງເປັນທາງການແລ້ວ ໂດຍ
ມີເປົ້າໝາຍທີ່ຈະເຊື່ອມຕໍ່ກັບລາວແລະຈີນໃຫ້ໄດ້ຕະຫລອດ
ເສັ້ນທາງໃນອະນາຄົດອັນໃກ້ນີ້.
ໂດຍເສັ້ນທາງລົດໄຟລາງຄູ່ ທີ່ລັດຖະບານໄທໄດ້ໃຫ້ການອະນຸມັດ
ດັ່ງກ່າວມີຢູ່ 3 ເສັ້ນທາງທ່າເຮືອມາບຕາພຸດ-ໂຄຣາດ-ໜອງຄາຍ
ແລະເສັ້ນທາງລະຍອງ-ບາງກອກ-ໂຄຣາດ-ໜອງຄາຍ ຊຶ່ງກໍໝາຍ
ຄວາມວ່າ ການລົງນາມໃນ MOU ລະຫວ່າງທາງການໄທກັບຈີນ
ລວມເຖິງມາເລເຊຍ ແລະສິງກະໂປ ດ້ວຍດັ່ງທີ່ພົນອາກາດເອກ
ປຣະຈິນ ໄດ້ຢືນຢັນວ່າ:
“ຈີນມີຍຸດທະສາດ ໃນການທີ່ຈະສ້າງເສັ້ນທາງສາຍໄໝ ເຊື່ອມມາຍັງທາງດ້ານ
ອາຊ່ຽນ ໃນອະນາຄົດອັນໃກ້ເຊັ່ນກັນ ເຂົາກໍຈະສ້າງທາງລົດໄຟ ມາດຕະຖານ
ມາທີ່ລາວ ຜ່ານໄທໄປມາເລເຊຍ ແລະສິງກະໂປ ອັນນີ້ກໍເປັນໂອກາດອັນດີ ທີ່
ຍຸດທະສາດຂອງໄທ ຍຸດທະສາດຂອງຈີນນັ້ນ ສອດຄ້ອງກັນ.”
ທາງດ້ານທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳຂົງເຂດ
ເສດຖະກິດການຜະລິດ ແລະຈະລາຈອນ ໄດ້ໃຫ້ການຢືນຢັນກັບ ວີໂອເອວ່າ ທາງການ
ລາວພ້ອມທີ່ຈະເຊື່ອມຕໍ່ທາງລົດໄຟກັບຈີນ ແລະໄທ ໂດຍໃນປັດຈຸບັນຄະນະຮັບຜິດຊອບ
ຂອງລັດຖະບານລາວ ກັບຈີນຍັງຄົງສືບຕໍ່ການເຈລະຈາ ເພື່ອຕົກລົງກັນກ່ຽວກັບແບບ
ກໍ່ສ້າງທາງລົດໄຟໃນລາວ ລວມເຖິງການກຳນົດສັດສ່ວນຂອງການລົງທຶນ ແລະການຫາ
ແຫລ່ງເງິນທຶນກູ້ຢືມໃນຈີນດ້ວຍ ດັ່ງທີ່ທ່ານໄດ້ໃຫ້ການຊີ້ແຈງວ່າ:
“ເລັ່ງປຶກສາຫາລືກັນເຖິງການເຂົ້າຫາແຫລ່ງທຶນ ກັບການລົງທຶນເບື້ອງຕົ້ນ ຂອງ
ບໍລິສັດຮ່ວມລາວ-ຈີນຫັ້ນນ່າ ເຮົາສິຄວນເອົາເທົ່າໃດ ສິເອົາ 30 ເປີເຊັນ ບໍ 40
ເປີເຊັນ ບໍ ກະຍັງຢູ່ໃນຂັ້ນປຶກສາກັນເລື້ອງນີ້ນິແຫຼະ.”
ກ່ອນໜ້ານີ້ ທ່ານນາງວິໄລຄຳ ໂພສາລາດ ລັດຖະມົນຕີຊ່ວຍວ່າການກະຊວງໂຍທາ
ທິການ ແລະຂົນສົ່ງ ໄດ້ຖະແຫລງຢືນຢັນວ່າ ການເຈລະຈາລະຫວ່າງຄະນະຜູ້ຕ່າງໜ້າ
ລັດຖະບານລາວກັບຈີນ ກ່ຽວກັບການກໍ່ສ້າງທາງລົດໄຟ ເພື່ອເຊື່ອມຕໍ່ຈາກຈີນມາລາວ
ຍັງສືບຕໍ່ການເຈລະຈາຢູ່ເລື້ອຍມາ ໂດຍນາຍົກລັດຖະມົນຕີລາວ ແລະຈີນ ໄດ້ແຕ່ງຕັ້ງ
ຄະນະກຳມະການຂອງແຕ່ລະຝ່າຍ ຂຶ້ນມາຮັບຜິດຊອບການເຈລະຈາ ເປັນການ
ສະເພາະແລ້ວ.
ທາງດ້ານທ່ານ ຫຼີ ເກີ້ຈຽງ ນາຍົກລັດຖະມົນຕີຈີນ ກໍຢືນຢັນວ່າ ການເຈລະຈາຮອບໃໝ່
ຈະມີການກຳນົດຮູບແບບການຮ່ວມມືທີ່ມີປະສິດທິພາບ ທີ່ທຸກຝ່າຍໄດ້ຮັບຜົນປະໂຫຍດ
ແລະສອດຄ້ອງກັບສະພາບທີ່ເປັນຈິງ ໂດຍທາງການຈີນເຫັນວ່າ ລົດໄຟຄວາມໄວສູງ
ອາດບໍ່ເມາະສົມກັບສະພາບພູມິປະເທດໃນລາວ ທີ່ສ່ວນໃຫຍ່ເປັນເຂດພູດອຍ ຈຶ່ງສະເໜີ
ໃຫ້ມີການປັບປ່ຽນຈາກລົດໄຟຄວາມໄວສູງເປັນລົດໄຟຄວາມໄວປານກາງ ລະບົບລາງຄູ່
ທີ່ຂະບວນໂດຍສານມີຄວາມໄວ 160 ກິໂລແມັດ ແລະຂະບວນຂົນສົ່ງສິນຄ້າ ກໍມີຄວາມ
ໄວ 120 ກິໂລແມັດ ຕໍ່ຊົ່ວໂມງ ຊຶ່ງກໍຄືລະດັບຄວາມໄວດຽວກັນກັບໄທ ແລະຈີນນັ້ນເອງ.
