ໃນປີ 1986, ຕອນທີ່ທ່ານ ວິນລຽມ ບຣາວນ໌ (William Brown), ທີ່ຄັ້ງນຶ່ງ ເຄີຍເປັນເຈົ້າໜ້າທີ່ສືບລັບ ແລະນັກເສດຖະສາດ ຂອງລັດຖະບານສະຫະລັດ ຖືກສົ່ງໄປປະຈຳການຢູ່ໃນນະຄອນໂຊລນັ້ນ ບັງເອີນໄດ້ເຫັນຄະນະຜູ້ແທນຂອງຫວຽດນາມຄະນະນຶ່ງຢູ່ ໂຮງແຮມ Plaza. ພວກເຂົເຈົ້າໄປທີ່ນັ້ນເພື່ອເຂົ້າຮ່ວມການແຂ່ງຂັນກິລາເອຊຽນເກມ (Asian Games).
ເມື່ອຄະນະຜູ້ແທນດັ່ງກ່າວຮູ້ວ່າທ່ານ ບຣາວນ໌ ເປັນເຈົ້າໜ້າທີ່ອາເມຣິກັນ "ພວກເຂົາເຈົ້າກໍມີລັກສະນະທ່າທາງເວົ້າແບບເປັນທາງການໃນທັນທີທັນໃດ ແລະເບິ່ງຄ້າຍກັບວ່າ ພວກເຂົາເຈົ້າຮັບການແນະນຳທາງການທູດ ທີ່ໄດ້ຮັບອະນຸຍາດ ແລ້ວ" ໂດຍທີ່ໄດ້ກ່າວຕໍ່ທ່ານບຣາວນ໌ວ່າ ພວກເຂົາເຈົ້າມີຄວາມປະທັບໃຈ ຕໍ່ການທີ່ສະຫະລັດໄດ້ພັດທະນາ ນະຄອນໂຊລໃຫ້ຈະເບັນຄືແນວໃດ ແລະເວົ້າວ່າ ລັດຖະບານຂອງພວກເຂົາເຈົ້າ ຢາກເອົາຄວາມບາດໝາງກັບວໍຊິງຕັນໄປຝັງດິນໄວ້ ເພື່ອໃຫ້ສະຫະລັດສາມາດເຮັດຄືກັນນີ້ໃຫ້ແກ່ຫວຽດນາມໄດ້. "ພວກເຂົາເຈົ້າຢາກໃຫ້ຮາໂນ່ຍເປັນຄືກັນກັບນະຄອນໂຊລ," ນັ້ນຄືສິ່ງທີ່ທ່ານ ບຣາວນ໌ ຜູ້ທີ່ດຽວນີ້ເປັນອາຈານສອນບາງຄັ້ງຄາວ ທີ່ມະຫາວິທະຍາໄລຈອຣ໌ຈວໍຊິງຕັນ (Georgetown) ຈື່ໄດ້.
ທ່ານບຣາວກ່າວຕໍ່ວີໂອເອ ພະແນກພາສາເກົາຫລີວ່າ "ພວກເຂົາເຈົ້າເຂົ້າໃຈຜິດຢ່າງສິ້ນເຊີງເລີຍ," ແລະກ່າວເພີ້ມອີກວ່າ ເພິ່ນໄດ້ບອກພວກຫວຽດນາມວ່າ ເຖິງແມ່ນສະຫະລັດຈະໃຫ້ການຊ່ວຍເຫລືອກໍຕາມ "ໂຮງແຮມ ແລະທຸກສິ່ງ ທຸກຢ່າງທີ່ພວກເຂົາເຈົ້າເຫັນໄດ້ຢູ່ໃນນະຄອນໂຊລ ທີ່ເຕັມໄປດ້ວຍຕຶກອັນສູງໆ ນີ້ ລ້ວນແຕ່ແມ່ນຜົນ ຂອງການດຳເນີນຄວາມພະຍາຍາມ ແລະການອອກແຮງຂອງຊາວເກົາຫລີໃຕ້, ບໍ່ແມ່ນຂອງຄົນອາເມຣິກັນ."
ການໂອ້ລົມກັນດັ່ງກ່າວແມ່ນມີຂຶ້ນໃນປີທີ່ຮາໂນ່ຍດຳເນີນຕາມນະໂຍບາຍເປີດເສລີແບບ "ໂດຍເມີ້ຍ (doi moi)" ຂອງຕົນ ເພື່ອປະຕິຮູບເສດຖະກິດຂອງຫວຽດນາມ. "ໂດຍເມີ້ຍ (doi moi)" ໝາຍຄວາມວ່າ ການຫັນປ່ຽນໃໝ່ ໃນພາສາຫວຽດນາມ.
ນັບແຕ່ນັ້ນມາ, ຫວຽດນາມໄດ້ປັບປຸງສາຍພົວພັນກັບສະຫະລັດ ແລະໄດ້ເປີດກວ້າງເສດຖະກິດຂອງຕົນ ຕໍ່ປະຊາຄົມສາກົນ …..ແລະດຽວນີ້ ກໍກຳລັງມີຄວາມສະດວກສະບາຍຍ້ອນຄວາມອຸດົມຮັ່ງມີທາງເສດຖະກິດ.
ເສດຖະກິດທີ່ມີການປ່ຽນແປງຂອງຫວຽດນາມຈະກາຍເປັນສ່ວນນຶ່ງຂອງຜ້າສາກ ໃຫ້ແກ່ກອງປະຊຸມສຸດຍອດຄັ້ງທີສອງຂອງປະທານາທິບໍດີ ສະຫະລັດ, ທ່ານ ດໍໂນລ ທຣຳ ກັບຜູ້ນຳເກົາຫລີເໜືອ, ທ່ານ ກິມ ຈົງອຶນ ທີ່ມີກຳນົດຈະຈັດຂຶ້ນ ທີ່ນະຄອນຫລວງຮາໂນ່ຍ ຂອງຫວຽດນາມ ໃນວັນທີ 27 ແລະ 28 ກຸມພາ ທີ່ຈະມາເຖິງນີ້. ພວກຜູ້ນຳດັ່ງກ່າວ ໄດ້ພົບປະກັນຄັ້ງທຳອິດໃນເດືອນມິຖຸນາຜ່ານມາ ຢູ່ສິງກະໂປ, ຊຶ່ງເປັນກອງປະຊຸມທີ່ຖືກຕຳໜິຢ່າງກວ້າງຂວາງວ່າບໍ່ມີຜົນອອກມາໃຫ້ເຫັນຢ່າງຈະແຈ້ງນັ້ນ.
