ປະທານາທິບໍດີ ໂຈ ໄບເດັນ ໃນວັນຈັນມື້ນີ້ ຄາດວ່າຈະເອົາບັນຊີລາຍຊື່ຂອງປະເທດທີ່ຈະຖືກຈັດເຂົ້າຮ່ວມສັນຍາ ການ ຄ້າອິນໂດ-ປາຊີຟິກທີ່ຄາດວ່າຈະມີມາແຕ່ດົນນານນັ້ນອອກມາເປີດເຜີຍໃຫ້ຮູ້ ແຕ່ວ່າໄຕ້ຫວັນຈະບໍ່ຢູ່ໃນນັ້ນ, ອີງຕາມອົງການຂ່າວເອພີ (AP).
ທີ່ປຶກສາດ້ານຄວາມໝັ້ນຄົງແຫ່ງຊາດຂອງທຳນຽບຂາວ, ທ່ານເຈກ ຊູລີວານ ຢືນຢັນໃນວັນອາທິດວານນີ້ ໃນຂະນະທີ່ເດີນທາງໄປຍີ່ປຸ່ນກັບປະທານາທິບໍດີ ໂຈ ໄບເດັນວ່າ ໄຕ້ຫວັນບໍ່ໄດ້ລວມຢູ່ໃນບັນດາລັດຖະບານຂອງປະເທດທີ່ໄດ້ ເຊັນຢູ່ໃນການເລີ້ມກອບເສດຖະກິດອິນໂດ-ປາຊີຟິກ, ຊຶ່ງເປັນສັນຍາທີ່ມີຈຸດ ປະສົງອະນຸຍາດໃຫ້ ສະຫະລັດ ເຮັດວຽກຢ່າງໃກ້ຊິດຫລາຍຂຶ້ນກັບບັນດາເສດ ຖະກິດທີ່ສຳຄັນຂອງເອເຊຍກ່ຽວກັບບັນຫາເຊັ່ນ: ຕ່ອງໂສ້ການສະໜອງສິນຄ້າ, ການຄ້າດິຈິຕອລ, ພະລັງງານສະອາດ ແລະການຕ້ານການສໍ້ລາດບັງຫຼວງ.
ປະທານາທິບໍດີສະຫະລັດ ມີກຳນົດທີ່ຈະຍົກໃຫ້ເຫັນການເລີ້ມໂຄງການດັ່ງກ່າວ ໃນຂະນະທີ່ທ່ານພົບປະກັບນາຍົກລັດຖະມົນຕີຍີ່ປຸ່ນ, ທ່ານຟູມີໂອະ ກິສຊີດະ (Fumio Kishida) ໃນວັນຈັນມື້ນີ້.
ການລວມເອົາເກາະໄຕ້ຫວັນທີ່ປົກຄອງຕົນເອງທີ່ຈີນອ້າງວ່າເປັນຂອງຕົນນັ້ນຈະເຮັດໃຫ້ປັກກິ່ງຄຽດແຄ້ນ.
ທ່ານຊູລີວານ ກ່າວວ່າ "ພວກເຮົາກໍາລັງຫາທາງເຮັດໃຫ້ການຮ່ວມມືດ້ານເສດ ຖະກິດຂອງພວກເຮົາກັບໄຕ້ຫວັນ ເລິກເຊິ່ງຂຶ້ນ ລວມທັງບັນຫາເທັກໂນໂລຈີລະດັບສູງ, ລວມທັງການສະຫນອງເຊມີຄອນດັກເຕີ (semiconductor)." ທ່ານກ່າວອີກວ່າ "ແຕ່ພວກເຮົາກໍາລັງຊອກຫາ ເຮັດເຊັ່ນນັ້ນ ໃນຂັ້ນທໍາອິດແມ່ນບົນພື້ນຖານ ການພົວພັນສອງຝ່າຍ."
ກອບດັ່ງກ່າວແມ່ນເພື່ອສ້າງຍຸດທະສາດເສດຖະກິດຂອງທ່ານໄບເດັນສຳລັບ ຂົງເຂດນັ້ນ. ທ່ານແມັດທີວ ກູດແມນ (Matthew Goodman), ຮອງປະທານ ອາວຸໂສດ້ານເສດຖະກິດຂອງສູນຍຸດທະສາດ ແລະການສຶກສາສາກົນ ໃນນະຄອນຫລວງວໍຊິງຕັນ ແນະນໍາວ່າ ບາງປະເທດຢູ່ໃນເຂດປາຊີຟິກທີ່ລົງນາມໃນສັນຍານັ້ນ ຈະຮູ້ສຶກຜິດຫວັງ ເພາະວ່າສັນຍາດັ່ງກ່າວບໍ່ຄາດວ່າ ຈະລວມເອົາຂໍ້ກໍານົດສໍາລັບການເຂົ້າເຖິງຕະຫຼາດສະຫະລັດຫຼາຍຂຶ້ນກວ່າເກົ່າ.
"ຂ້າພະເຈົ້າຄິດວ່າຄູ່ພາຄີຫລາຍປະເທດຈະອ່ານເບິ່ງບັນຊີນັ້ນແລະເວົ້າວ່າ: ອັນນັ້ນເປັນບັນຊີກ່ຽວກັບເລື້ອງຕ່າງໆທີ່ດີ. ຂ້າພະເຈົ້າດີໃຈທີ່ໄດ້ມີສ່ວນຮ່ວມ," ນັ້ນຄືຄຳເວົ້າຂອງທ່ານກູດແມນ (Goodman), ອະດີດຜູ້ອໍານວຍການດ້ານເສດ ຖະກິດສາກົນຂອງສະພາຄວາມຫມັ້ນຄົງແຫ່ງຊາດໃນຄະນະລັດຖະບານຂອງປະທານາທິບໍດີບາຣັກ ໂອບາມາ. "ແຕ່, ທ່ານຮູ້ບໍ່, ພວກເຮົາຈະໄດ້ຮັບຜົນປະ ໂຫຍດທີ່ເຫັນໄດ້ຢ່າງ ຊັດເຈນໃນການເຂົ້າຮ່ວມໃນກອບນີ້ບໍ?"
ປັກກິ່ງ, ໃນການຄາດວ່າ ຈະມີການເລີ້ມຕົ້ນສັນຍາດັ່ງກ່າວ ກໍໄດ້ຕຳໜິການດຳເນີນຄວາມພະຍາຍາມນັ້ນຂອງສະຫະລັດ.
