ການເສຍຫູ ຫລືສູນເສຍຄວາມສາມາດໃນການໄດ້ຍິນ ທີ່ມີສາ
ເຫດ ມາຈາກການຖືກເຜີຍແບໃສ່ສຽງດັງໆນັ້ນ ແມ່ນເປັນເລື້ອງ
ທຳມະດາຫລາຍ. ມາບັດນີ້ ພວກນັກຄົ້ນຄ້ວາກ່າວວ່າ ໄວຕາມິນ
ເສີມຊະນິດໜຶ່ງ ອາດຈະປ້ອງກັນການເສື່ອມເສຍຂອງເສ້ນປະ
ສາດ ທີ່ພາໃຫ້ເສຍຫູນັ້ນ ເຖິງແມ່ນໄດ້ຖືກເຜີຍແບໃສ່ສຽງດັງ
ຈົນແສບແກ້ວຫູກໍຕາມ. ຜູ້ສື່ຂ່າວ ວີໂອເອ Jessica Berman
ມີລາຍງານ ຊຶ່ງດາຣາຈະນຳມາສະເໜີທ່ານ.
ໃນແຕ່ລະມື້ ມີຜູ້ຄົນຫລາຍລ້ານຄົນໃນທົ່ວໂລກ ທີ່ຖືກເຜີຍແບໃສ່ສຽງດັງແສບແກ້ວຫູ
ຈາກສຽງລະເບີດ ໄປຈົນຮອດສຽງດັງ ທີ່ພົວພັນກັບການເຮັດວຽກກໍ່ສ້າງ ແລະວຽກໃນ
ເຮືອບິນ. ແລະຄົນພວກນີ້ແມ່ນສ່ຽງ ຕໍ່ການເສຍຫູ ແລະການບໍ່ໄດ້ຍິນ.
ສຽງດັງໆນັ້ນ ສ້າງຄວາມເສຍຫາຍໃຫ້ແກ່ເສ້ນປະສາດ ທີ່ກະຕຸ້ນ cochlea ກໍຄືໂຄງສ້າງ
ລັກສະນະໂຕຫອຍນ້ອຍໆ ຢູ່ທາງໃນຫູ ທີ່ຖ່າຍທອດສັນຍານສຽງ ໄປຍັງສະໝອງ.
ໄວຕາມິນເສີມຊະນິດໜຶ່ງ ທີ່ພົວພັນກັບໄວຕາມິນ B3 ໄດ້ສະແດງໃຫ້ເຫັນ ໃນການທົດ
ລອງກັບໜູວ່າ ສາມາດປົກປ້ອງເສ້ນປະສາດສຳພັດສຽງຂອງໂຕໜູ ທີ່ຖືກເຜີຍແບໃສ່
ສຽງດັງໆ. ໄວຕາມິນເສີມທີ່ວ່ານີ້ ມີຊື່ວ່າ nicotinamide riboside ຫລື NR.
ໃນລາຍງານການສຶກສາ ທີ່ລົງພິມໃນວາລະສານການແພດ Cell Metabolism, ພວກ
ນັກຄົ້ນຄ້ວາທີ່ມະຫາວິທະຍາໄລການແພດ Weill Cornell ໃນນະຄອນນິວຢອກ ແລະ
ສະຖາບັນ Gladstone ໃນລັດແຄລິຟໍເນຍ ໄດ້ບັນລະຍາຍໃຫ້ຟັງວ່າ ເຂົາເຈົ້າໄດ້ເອົາ
ໄວຕາມິນເສີມ NR ໃຫ້ໜູຈຳນວນໜຶ່ງກິນ ຊຶ່ງໜູພວກນັ້ນໄດ້ຖືກເຜີຍແບໃສ່ສຽງດັງ.
ພວກນັກຄົ້ນຄ້ວາໄດ້ເອົາໄວຕາມິນເສີມ NR ໃຫ້ ໜູກິນ ທັງກ່ອນແລະຫລັງຖືກເຜີຍແບ
ໃສ່ສຽງດັງໆ. ແລະມີແຕ່ພວກໂຕໜູທີ່ບໍ່ໄດ້ຮັບໄວຕາມິນເສີມ ຫລືໄດ້ກິນໄວຕາມິນປອມ
ເທົ່ານັ້ນ ທີ່ເສຍຫູຍ້ອນສຽງດັງໆນັ້ນ.
ທ່ານ Samie Jaffrey ເປັນອາຈານສອນວິຊາເພຊັດວິທະຍາ ທີ່ມະຫາວິທະຍາໄລ
Weill Cornell.
ທ່ານ Jaffrey ເວົ້າວ່າ “ເວລາພວກເຮົາເອົາສານ NR ນີ້ໃຫ້ໜູພວກນັ້ນກິນ
ມັນໜ້າອັດສະຈັນສົມຄວນ. ການໄດ້ຍິນສຽງ ກໍຄືຫູຂອງພວກມັນ ແມ່ນຄືກັນ
ກັບວ່າ ບໍ່ໄດ້ຖືເຜີຍແບໃສ່ສຽງໃດໆເລີຍ. ແລະພວກເຮົາກໍໄດ້ເອົາສານໄວ
ຕາມິນນັ້ນ ໃຫ້ພວກໜູເຫລົ່ານັ້ນກິນ ບໍ່ດົນຫລັງຈາກທີ່ພວກມັນຖືກເຜີຍແບ
ໃສ່ສຽງດັງຄືກັນ ແລະນັ້ນກໍແມ່ນສຳຄັນເຊັ່ນກັນ ເພາະວ່າພວກເຮົາຢາກ
ໄດ້ວິທີການບຳບັດ ທີ່ສາມາດເຮັດໄດ້ກັບ ຄົນແທ້ໆ.”
ການເສຍຫູທີ່ມາຈາກການຖືກເຜີຍແບໃສ່ສຽງດັງຫລາຍເກີນໄປນັ້ນ ແມ່ນເກີດຂຶ້ນ
ເທື່ອລະເລັກລະນ້ອຍໆ. ທ່ານ Jaffrey ກ່າວວ່າ ປາກົດວ່າມີການຊັກຊ້າປະມານ
2-3 ມື້ ຫາຫລາຍອາທິດ ຈາກເວລາທີ່ຖືກເຜີຍແບໃສ່ສຽງດັງເປັນພິດ ໄປຮອດມື້ທີ່
ປະສາດສຳພັດສຽງໃນຫູ ເລີ້ມເສື່ອມເສຍ.
ທ່ານ Jaffrey ເວົ້າວ່າ “ການສູນເສຍປະສາດສຳພັດສຽງນັ້ນ ໃຊ້ເວລາ. ແລະ
ພວກເຮົາກໍສາມາດເຂົ້າແຊກແຊງໄດ້ ໂດຍການໃຊ້ສານ ໄວຕາມິນເສີມນີ້.
ຖ້າເຮົາເອົາສານນີ້ໃຫ້ກິນແຕ່ຫົວທີພໍ ພວກເຮົາກໍຈະ ສາມາດແຊກແຊງ ແລະ
ປ້ອງກັນການເສື່ອມເສຍລົງຂອງປະສາດສຽງ. ດັ່ງນັ້ນ ຂ້າພະເຈົ້າຈຶ່ງຄິດວ່າ
ມັນສຳຄັນ ເພາະວ່າມັນເຮັດໃຫ້ມີຄວາມ ເປັນໄປໄດ້ຫລາຍຂຶ້ນ ວ່າມັນຈະ
ເປັນປະໂຫຍດສຳຫລັບຄົນເຮົາ.”
ທ່ານ Jaffrey ກ່າວວ່າ ບັນຫາໃນການໄດ້ຍິນສຽງ ຫລືອາການຫູເສຍ ທີ່ພົວພັນກັບ
ປະສາດສຳພັດສຽງໃນຫູນັ້ນ ສາມາດມີສາເຫດມາຈາກການກິນ ຫລືໃຊ້ຢາບາງຢ່າງ
ແລະພະຍາດທີ່ພົວພັນກັບອາຍຸໄດ້ ຮວມທັງໂຣກເບົາຫວານ ແລະຄວາມດັນເລືອດ
ສູງໃນປອດ. ທ່ານກ່າວມ້ວນທ້າຍວ່າ ບັນດານັກຄົ້ນຄ້ວາມີຄວາມກະຕືລືລົ້ນ ຢາກຈະ
ຮູ້ວ່າສານໄວຕາມິນເສີມ NR ຈະສາມາດປິ່ນປົວຫລືປ້ອງກັນອາການເສຍຫູ ກໍຄືການ
ສູນເສຍຄວາມສາມາດໄດ້ຍິນສຽງ ໃນກໍລະນີເຫລົ່ານັ້ນ ໄດ້ຫລືບໍ່?
