ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ການເສີມ ວິຕາມິນ D ອາດເຮັດໃຫ້ ໂຣກສະໝອງເສື່ອມ ຊັກຊ້າລົງ


Vitamin D Supplements Might Slow Dementia
please wait

No media source currently available

0:00 0:02:08 0:00

ຊົມວີດີໂອ ລາຍງານນີ້

ໃນ​ໄລຍະ 50 ປີ​ ຂ້າງ​ໜ້າ ຄາດ​ກັນ​ວ່າ ​ໂຣກຄວາມ​ຈຳ​ເສື່ອມ ຫຼື
Alzheimer ​ແລະ ​ໂຣກສະໝອງ​ເສື່ອ​ມ ຈະມີຜົນກະທົບ​ເພີ້ມຂຶ້ນ
ຕໍ່​ພວກ​ຜູ້ໃຫຍ່ທີ່ເຖົ້າ​ແກ່ແລ້ວ ​ໃນ​ທົ່ວ​ໂລກ. ອີງ​ຕາມ ຜູ້​ສື່ຂ່າວ
ວີ​ໂອ​ເອ Carol Pearson ບັນດາ​ນັກຄົ້ນຄວ້າ ກຳລັງ​ສຶກສາ
​ເບິ່ງ​ວ່າ ວິຕາມິນ D ຈະ​ສາມາດ ​ເຮັດ​ຜູ້​ທີ່​ກຳລັງເລີ້ມ​ເປັນ ໂຣກ
ສະໝອງ​ເສື່ອ​ມນັ້ນ ຊ້າ​ລົງ​ໄດ້ຫຼືບໍ່. ​ໄຊ​ຈະ​ເລີ​ນສຸກ ຈະ​ນຳ​ເອົາ
​ລາຍ​ລະ​ອຽດກ່ຽວ​ກັບ​ເລື້ອງ​ນີ້ ມາສະ​ເໜີ​ທ່ານ ​ໃນ​ອັນ​ດັບ​ຕໍ່​ໄປ.

ວິຕາມິນ D ແມ່ນມາ​ຈາກ​ແສງຕາ​ເວັນ ​ແລະ ຈາກ​ອາຫານ​ບາງ​ຢ່າງ​ ເຊັ່ນ ພວກໝາກຖົ່ວ​ ພວກຖົ່ວ​ເລັນ​ຕິລ ​ແລະ ​ໄຂມັນ​ປາ.

ບັນດາ​ນັກຄົ້ນຄວ້າ ​ໄດ້​ພົບເຫັນ​ວ່າ ການ​ທີ່​ມີ​ວິຕາມິນ D ​ໃນ​ລະດັບຕ່ຳ ອາດ​ພົວພັນ​ກັບ ​ສະພາບ
ສະໝອງ​ເສື່ອ​ມ ​ແລະ ​ໂຣກແອ​ລຊາມ​ເມີ້ ຊຶ່ງ​ເປັນໂຣກຄວາມຈຳເສື່ອ​ມ ປະ​ເພດນຶ່ງ​ ທີ່​ມີ​ໂດຍ​ ທົ່ວ​ໄປຫຼາຍທີ່​ສຸດ. ແອ​ລຊາມ​ເມີ້ ສາມາດ ​ເຮັດ​ໃຫ້​ພວກຜູ້​ເບິ່ງ​ແຍງ ຜູ້​ເປັນໂຣກດັ່ງກ່າວ ອິດ​ເມື່ອຍ ​ແລະ ​ເຮັດ​ໃຫ້​ພວກ​ຜູ້ທີ່​ເປັນ​ໂຣກນີ້ ​ມີຄວາມຢ້ານ​ກົວມັນ.

ທ່ານ Chris Roberts ທີ່ມີອາການເປັນໂຣກສະໝອງ​ເສື່ອ​ມ ​ເວົ້າວ່າ “ສິ່ງ​ທີ່​ຮ້າຍ​ແຮງ​ທີ່​ສຸດ
ທີ່ຂ້າພະ​ເຈົ້າໄດ້ປະເຊີນ ກໍ​ແມ່ນວ່າ ຂ້າພະ​ເຈົ້າ ຫລົງທາງ​ໃນ​ຂະນະຂັບ​ລົດ​ຢູ່ ບໍ່​ພຽງ​ແຕ່ ລືມ​ບ່ອນ​ທີ່​ຂ້າພະ​ເຈົ້າຈະ​ໄປ​ເທົ່ານັ້ນ ຂ້າພະ​ເຈົ້າຍັງ​ບໍ່​ຮູ້ຈັກ​ວ່າ ຂ້າພະ​ເຈົ້າຢູ່​ບ່ອນ​ໃດອີກ.”

ອົງການອະນາໄມໂລກ ຫຼື WHO ກະປະມານ ວ່າ ຫຼາຍກວ່າ 47 ລ້ານຄົນ ແມ່ນປ່ວຍ​ເປັນ
ໂຣກສະໝອງເສື່ອມ ໃນຈຳນວນພວກຄົນ ເຫຼົ່ານັ້ນ 60 ເປີເຊັນ ແມ່ນປະຊາຊົນ ຜູ້ມີລາຍຮັບ
ຕ່ຳ ແລະ ປານກາງ ຢູ່ໃນປະເທດຕ່າງໆ ​ແລະ ​ໃນ​ປະ​ເທດທີ່​ມີ​ຄວາມອາດ​ສາມາດ ນ້ອຍ​ທີ່​ສຸດ
ທີ່​ຈະຮັບ​ມື​ກັບ​ໂຣກດັ່ງກ່າວ​ໄດ້.

ບັນດາ​ນັກຄົ້ນຄວ້າ ສະຫະລັດ ​ໄດ້​ທຳ​ການ​ສຶກສາ ເບິ່ງພວກ​ຜູ້​ໃຫຍ່ ທີ່ເຖົ້າ​ແກ່ແລ້ວ ​ແລະ ​
ໄດ້ວັດ​ແທກ ລະດັບວິຕາມິນ D ​ແລະ ຄວາມ​ສາມາດ​ຈື່​ຈຳໃນ​ມັນສະໝອງ ຂອງ​ພວກ​ເຂົາ​ເຈົ້າ: ອັນ​ນັ້ນ ກໍແມ່ນວ່າ ຄວາມ​ສາມາດ​ໃນ​ການ​ຈື່​ຈຳ ສິ່ງຕ່າງໆ ​ແລະ ວິທີການ​ໃຊ້​ຄວາມ​ຄິດຂອງເຂົາເຈົ້າ.

ດຣ. Joshua Miller ຈາກ​ມະຫາວິທະຍາ​ໄລ Rutgers ໃນລັດ New Jersey ​ເວົ້າວ່າ “ພວກ​ ຄົນ​ທີ່ເຂົ້າຮ່ວມ​ໃນ​ການ​ສຶກສາ ບາງ​ສ່ວນ ​ໄດ້​ເປັນ​ໂຣກ​ສະໝອງ​ເສື່ອ​ມ ຢ່າງສິ້ນ​ເຊີງ ບາງ​ສ່ວນ​ ມີອາການ​ເສື່ອ​ມ​ອ່ອນໆ ໃນ​ການ​ໃຊ້​ຄວາມ​ຄິດ ​ແລະ ບາງ​ສ່ວນ ມີ​ອັນ​ທີ່​ພວກ​ເຮົາ​ເອີ້ນ​ວ່າ ການ​ທຳ​ງານ​ຂອງຄວາມ​ຄິດ​ທີ່​ທຳ​ມະ​ດາ.”

ບັນດາ​ນັກຄົ້ນຄວ້າ ​ໄດ້​ພົບ​ເຫັນ​ວ່າ ປະມານ 60 ​ເປີ​ເຊັນ ຂອງ​ກຸ່ມຄົນ​ເຫຼົ່າ​ນັ້ນ ​ໄດ້​ມີ​ວິຕາມິນ D ໃນລະດັບທີ່ຕ່ຳ.

ດຣ. Miller ກ່າວວ່າ “ພວກ​ຜູ້​ທີ່​ມີໂຣກສະໝອງ​ເສື່ອມ ກໍ​ແມ່ນ​ຢູ່​ໃນ​ສະ ຖານະພາບ
ທີ່ມີວິຕາມິນ D ທີ່​ຕ່ຳ​ກວ່າ​ພວກຜູ້​ທີ່​ມີອາການ​ເສື່ອ​ມອ່ອນໆ​ ໃນ​ການ​ໃຊ້​ຄວາມ​ຄິດ
ຫຼື ພວກ​ຜູ້​ທີ່ມີການ​ທຳ​ງານ​ຂອງຄວາມ​ຄິດ​ທີ່​ທຳ​ມະ​ດາ.”

ພວກ​ທີ່​ມີ​ວິຕາ​ມິນ D ທີ່ຕໍ່າ ສະ​ແດງໃຫ້​ເຫັນວ່າ ມີ​ອາການ​ຫລົງ​ລືມ​ໃນ​ໄລຍະ​ສັ້ນ ຫຼາຍຂຶ້ນ
ພ້ອມ​ດ້ວຍ ມີ​ຄວາມ​ສາມາດຕ່ຳ​ ທີ່​ຈະ​ຈັດ​ແຈງ​ຄວາມ​ຄິດ, ​ລຳດັບ​ວຽກ​ງານ ​ແລະ ​ການ​ຕັດ
ສິນ​ໃຈ ຕ່າງໆ​ເຫຼົ່ານັ້ນ.

ດຣ. Miller ​ເວົ້າ​ວ່າ “ຄວາມຈຳເຂົາ​ເຈົ້າ ແມ່ນເສື່ອມລົງ ປະມານສອງ​ເທົ່າເຄິ່ງ ​ໄວ​ກວ່າ ພວກ​ຜູ້​ທີ່​ມີ ວິຕາມິນ D ​ພຽງພໍ.”

ໃນ​ຂະນະ​ທີ່ ການ​ສຶກສາຄົ້ນຄວ້າ​ນີ້ ສະ​ແດງ​ໃຫ້​ເຫັນ​ວ່າ ວິຕາ​ມິນ D ​ເບິ່ງ​ຄື​ວ່າ ຈະ​ມີ​ບົດບາດ ​
ໃນການຊ່ອຍເຮັດໃຫ້ການ​ເ​ລີ້​ມ​ເປັນ​ໂຣກສະ​ໝອງ​ເສື່ອ​ມຊ້າລົງ​ແລ້ວ ແຕ່ການສຶກສາຄົ້ນຄວ້າ ເພີ້ມຕື່ມແມ່ນມີຄວາມຈຳເປັນ​ເພື່ອ​ຈະ​ໃຫ້​ເຫັນ​ວ່າ ຖ້າມີ​ການ​ເສີມວິຕາມິນ D ​ນັ້ນ ຈະສາມາ​ດ ຊ່ວຍ​ເຮັດ​ໃຫ້ການ​ຊຸດ​ໂຊມ​ດັ່ງກ່າວ​ນີ້ ຊ້າ​ລົງ​ໄດ້ຫຼືບໍ່. ການ​ສຶກສາ​ຄົ້ນ​ຄວ້ານີ້ ​ໄດ້​ຖືກ​ພິມເຜີຍ​ແຜ່ ​ໃນວາລະສານ ຂອງສະມາຄົມ​ການ​ແພດ ອາ​ເມຣິກັນ ຫຼື Journal of the American Medical Association.

XS
SM
MD
LG