ປະທານາທິບໍດີຂອງປະເທດ ສເປນ ທ່ານ ເປໂດຣ ຊານເຊັສ ໄດ້ກ່າວໃນວັນອັງຄານມື້ນີ້ວ່າລັດຖະບານຂອງທ່ານແມ່ນມີກຳນົດທີ່ຈະອະນຸມັດການຮັບຮູ້ລັດ ປາແລັສໄຕນ໌ ຢ່າງເປັນທາງການ, ໂດຍກ່າວວ່າການເຄື່ອນໄຫວດັ່ງກ່າວທີ່ຖືກປະຕິບັດແລ້ວໂດຍຫຼາຍກວ່າ 140 ປະເທດແມ່ນແນເປົ້າໃສ່ “ການປະກອບສ່ວນເຂົ້າໃນການບັນລຸສັນຕິພາບລະຫວ່າງ ອິສຣາແອລ ແລະ ປາແລັສໄຕນ໌.”
ທ່ານ ຊານເຊັສ ໄດ້ກ່າວວ່າ “ມັນແມ່ນວິທີດຽວທີ່ຈະຮູ້ຂໍ້ແກ້ໄຂທີ່ພວກເຮົາທຸກຄົນຮູ້ດັ່ງກັບຄວາມເປັນໄປໄດ້ພຽງອັນດຽວ ເພື່ອບັນລຸອານາຄົດທີ່ສະຫງົບສຸກ, ທີ່ວ່າລັດ ປາແລັສໄຕນ໌ ຢູ່ຮ່ວມກັນຄຽງຂ້າງກັບລັດແຫ່ງ ອິສຣາແອລ ໃນສັນຕິພາບ ແລະ ຄວາມໝັ້ນຄົງ.”
ສເປນ ໄດ້ປະກາດຈຸດປະສົງຂອງເຂົາເຈົ້າຄັ້ງທຳອິດເພື່ອຮັບຮູ້ລັດ ປາແລັສໄຕນ໌ ໃນອາທິດແລ້ວນີ້, ພ້ອມກັບປະເທດ ໄອຣແລນ ແລະ ນໍເວ, ເຊິ່ງກໍໄດ້ກຳນົດວັນອັງຄານມື້ນີ້ເປັນວັນສຳລັບການຕັດສິນໃຈຂອງເຂົາເຈົ້າທີ່ຈະມີຜົນບັງຄັບໃຊ້.
ອິສຣາແອລ ໄດ້ເອີ້ນການເຄື່ອນໄຫວນັ້ນດັ່ງກັບຂອງຂວັນສຳລັບກຸ່ມຮາມາສ ແລະ ໄດ້ເອີ້ນເອກອັກຄະລັດຖະທູດຂອງເຂົາເຈົ້າກັບຄືນຈາກທັງໝົດສາມປະເທດນັ້ນເພື່ອເປັນການປະທ້ວງ.
ທ່ານ ຊານເຊັສ ໄດ້ກ່າວໃນວັນອັງຄານມື້ນີ້ວ່າ ການຕັດສິນໃຈທີ່ຈະຮັບຮູ້ລັດ ປາແລັສໄຕນ “ຈະສະທ້ອນເຖິງການປະຕິເສດຢ່າງແນ່ນອນຂອງພວກເຮົາຕໍ່ກຸ່ມຮາມາສ, ເຊິ່ງແມ່ນອົງການກໍ່ການຮ້າຍຜູ້ທີ່ຕໍ່ຕ້ານການແກ້ໄຂບັນຫາສອງລັດ.”
ທ່ານໄດ້ກ່າວຕໍ່ໄປວ່າການເຄື່ອນໄຫວນັ້ນແມ່ນ “ບໍ່ໄດ້ຕໍ່ຕ້ານໃຜ, ຢ່າງໜ້ອຍທີ່ສຸດ ອິສຣາແອລ.”
ທ່ານ ຊານເຊັສ ໄດ້ກ່າວວ່າການວາງຕົວຂອງ ສເປນ ແມ່ນສະໜັບສະໜູນເຂດຊາຍແດນປີ 1967, ນອກຈາກວ່າການປ່ຽນແປງຕ່າງໆແມ່ນໄດ້ມີການຕົກລົງກັນໂດຍ ອິສຣາແອລ ແລະ ປາແລັສໄຕນ໌, ແລະ ລັດ ປາແລັສໄຕນ໌ ທີ່ສາມາດມີຊີວິດຢູ່ໄດ້ ເຊິ່ງລວມມີເຂດ ເວັນແບັ້ງ ແລະ ກາຊາ ເຊື່ອມຕໍ່ກັບເສັ້ນທາງສາຍນຶ່ງ ແລະ ເຈລູຊາແລັມຕາເວັນອອກ ດັ່ງກັບນະຄອນຫຼວງ.
ຟໍຣັມສະແດງຄວາມຄິດເຫັນ