ເກົາຫຼີໃຕ້ ກັບ ສະຫະລັດ ໄດ້ເຊັນຂໍ້ຕົກລົງເບື້ອງຕົ້ນ ໃນວັນອາທິດວານນີ້ ສຳລັບການ
ຂະຫຍາຍຈຳນວນເງິນທີ່ລັດຖະບານ ໂຊລ ຈະຈ່າຍເພື່ອໃຫ້ມີກຳລັງ ສະຫະລັດ ຢູ່ໃນ
ເກົາຫຼີໃຕ້ຕໍ່ໄປ.
ເກົາຫຼີໃຕ້ ຈະຈ່າຍເງິນປະມານ 890 ລ້ານໂດລາພາຍໃຕ້ຂໍ້ຕົກລົງໄລຍະສັ້ນ ສະບັບ
ໃໝ່, ປະມານ 60 ລ້ານໂດລາຫຼາຍກວ່າປີກາຍນີ້. ບໍ່ຄືກັບຂໍ້ຕົກລົງໃນຄັ້ງທີ່ຜ່ານມາ,
ເຊິ່ງດຳເນີນການເປັນເວລາຫ້າປີນັ້ນ, ຂໍ້ຕົກລົງໃນວັນອາທິດວານນີ້ ແມ່ນສຳລັບພຽງ
ປີດຽວ, ເຊິ່ງອາດຜັກດັນໃຫ້ທັງສອງປະເທດກັບຄືນມາຕໍ່ລອງກັນອີກ ໃນສອງສາມ
ເດືອນຂ້າງໜ້າ.
ຂໍ້ຕົກລົງນີ້ ຍັງຈະຕ້ອງໄດ້ຮັບການຮັບຮອງໂດຍສະພາແຫ່ງຊາດຂອງ ເກົາຫຼີໃຕ້ເສຍ
ກ່ອນ ເຊິ່ງຄາດວ່າຈະເກີດຂຶ້ນໃນເດືອນເມສາ, ອີງຕາມອົງການຂ່າວຢອນຮັບ ຂອງ
ເກົາຫຼີໃຕ້.
ສະຖານທູດ ສະຫະລັດ ໃນນະຄອນຫຼວງ ໂຊລ ໄດ້ຂຽນຂໍ້ຄວາມໃນທວິດເຕີ, ໂດຍ
ເນັ້ນຄຳເວົ້າຂອງທີ່ປຶກສາລະດັບສູງຂອງກະຊວງການຕ່າງປະເທດ ສຳລັບການເຈລະ
ຈາຄວາມປອດໄພ ແລະ ຂໍ້ຕົກລົງ ທ່ານ ທີໂມຕີ ເບັດສ໌ ວ່າ “ພວກເຮົາໄດ້ບັນລຸຂໍ້ຕົກ
ລົງຜ່ານການປຶກສາຫາລືຢ່າງໃກ້ຊິດ ແລະ ການເຈລະຈາຢ່າງຍຸຕິທຳ. ຄຳໝັ້ນສັນຍາ
ຂອງ ສະຫະລັດ ຕໍ່ຄວາມປອດໄພຂອງສາທາລະນະລັດ ເກົາຫຼີ ແລະ ປະຊາຊົນຂອງ
ເຂົາເຈົ້າແມ່ນແຂງແກ່ນຫຼາຍ.”
ຂໍ້ຕົກລົງສະບັບໃໝ່ ໄດ້ສະແດງໃຫ້ເຫັນຄ່າໃຊ້ຈ່າຍຂອງລັດຖະບານ ໂຊລ ເພີ່ມຂຶ້ນ
8.2 ເປີເຊັນ ສຳລັບການຊ່ວຍຮັກສາກອງກຳລັງ ສະຫະລັດ 28,000 ຄົນໄວ້ຢູ່ໃນ
ເກົາຫຼີໃຕ້.
ສະຫະລັດ ໄດ້ມີກອງກຳລັງທະຫານໃນ ເກົາຫຼີໃຕ້ ຢ່າງຄົງທີ່ ນັບຕັ້ງແຕ່ສົງຄາມ ເກົາ
ຫຼີ ປີ 1950-1953 ເປັນຕົ້ນມາ. ນັບຕັ້ງແຕ່ໄດ້ເຂົ້າດຳລົງຕຳແໜ່ງນັ້ນ, ປະທານາທິບໍ
ດີ ສະຫະລັດ ທ່ານ ດໍໂນລ ທຣຳ ໄດ້ຕຳໜິຢ່າງຊ້ຳແລ້ວຊ້ຳອີກ ກ່ຽວກັບ ຄ່າໃຊ້ຈ່າຍ
ໃນການຮັກສາກອງກຳລັງ ອາເມຣິກັນໄວ້ ຢູ່ໃນແຫຼມດັ່ງກ່າວ, ໂດຍຮຽກຮ້ອງໃຫ້ບັນ
ດາເຈົ້າໜ້າທີ່ ເກົາຫຼີ ຂະຫຍາຍການປະກອບສ່ວນຂອງເຂົາເຈົ້າ. ການບໍ່ເຫັນພ້ອມກັນ
ໄດ້ກໍ່ໃຫ້ເກີດຄວາມເປັນຫ່ວງວ່າ ທ່ານ ທຣຳ ອາດເລືອກທີ່ຈະຖອນກອງກຳລັງ ສະຫະ
ລັດ ອອກ.
ຂໍ້ຕົກລົງເບື້ອງຕົ້ນ ໄດ້ມີຂຶ້ນ ກ່ອນກອງປະຊຸມ ທີ່ມີການຕັ້ງໜ້າລໍຄອຍ ລະຫວ່າງທ່ານ
ທຣຳ ກັບ ຜູ້ນຳເກົາຫຼີເໜືອ ທ່ານ ກິມ ຈົງ ອຶນ ໃນນະຄອນຫຼວງ ຮາໂນ່ຍ ໃນທ້າຍ
ເດືອນນີ້.
