ຫຼັງຈາກໄດ້ເກີດອຸບບັດເຫດຮ້າຍແຮງເຖິງຕາຍ ຂອງລົດໄຟຟ້າ Tesla ໃນຂະນະທີ່ກຳລັງ ໃຫ້ ມັນບັງຄັບຂັບດ້ວຍໂຕຂອງມັນເອງແລ້ວ ກໍໄດ້ມີຄຳຖາມຂຶ້ນມາກ່ຽວກັບວ່າ ລົດທີ່ຂັບດ້ວຍຕົວມັນເອງນັ້ນ ພ້ອມແລ້ວບໍ່
ທີ່ຈະລົງສູ່ຖະໜົນຕາມປົກກະຕິໃນແຕ່ລະວັນ. ພວກນັກຊ່ຽວຊານພາກັນກ່າວວ່າ ເຫດໂສກນາຕະກຳດັ່ງກ່າວນີ້ ຈະບໍ່ຜ່ອນເບົາການຊ່ວງເສງຂອງພວກສ້າງລົດອັດຕະໂນມັດລົງແຕ່ ຢ່າງໃດ ແຕ່ວ່າ ປະຊາຊົນທົ່ວໄປຄວນເຂົ້າໃຈ ເຖິງຂອບເຂດຈຳກັດ ຂອງເທັກໂນໂລຈີປະຈຸບັນ. ນັກຂ່າວ VOA George Putic ມີລາຍງານນີ້ ຊຶ່ງວັນນະສອນ ຈະນຳເອົາລາຍລະອຽດ ມາສະເໜີທ່ານ.
ໃນວັນທີ 7 ພຶດສະພາ ທີ່ເມືອງ Williston ລັດ Florida ຊາຍໄວ 40 ປີ ຄົນນຶ່ງ ນັ່ງຢູ່ບ່ອນຄົນຂັບລົດ Tesla ລຸ່ນ S ໄດ້ເສຍຊິວິດ ເວລາລົດໄຟຟ້າຂອງລາວຕຳລົດແກ່ເຮືອນລົດຄັນນຶ່ງ.
ລົດຂອງລາວແລ່ນໄປດ້ວຍຄວາມໄວສູງ ໃນຂະນະທີ່ມັນຢູ່ທ່າທີ່ເອີ້ນວ່າ autopilot mode ຫຼືຂັບເອງ.
ເຖິງແມ່ນຈະເອີ້ນມັນວ່າ ລົດຂັບເອງ ກໍຕາມ ແຕ່ຄວາມຈິງແລ້ວ ລົດ Tesla ລຸ່ນ S ກໍແມ່ນເປັນລົດອັດຕະໂນມັດແຕ່ພຽງບາງສ່ວນເທົ່ານັ້ນ. ຄວາມຈິງແລ້ວລະບົບ autopilot mode ຂອງມັນແມ່ນເປັນພາກສ່ວນຊ່ອຍ ທີ່ຄົນຂັບຈຳເປັນຕ້ອງເອົາມືຈັບພວງມາໄລຢູ່ ຕະຫຼອດເວລາ. ອຸບບັດເຫດດັ່ງກ່າວ ຍັງພວມຕົກຢູ່ໃນການສືບສວນ ສອບສວນຢູ່ ແຕ່ວ່າ ບັນດານັກຊ່ຽວຊານສົງໄສວ່າ ສາຍຕາຂອງຄົນຂັບຜູ້ນັ້ນ ບໍ່ໄດ້ຢູ່ກັບຖະໜົນ ໃນຂະນະທີ່ເຄື່ອງເຕືອນສັນຍານ ຕີຄວາມໝາຍຂໍ້ມູນຜິດ ວ່າແມ່ນສິ່ງຂອງອັນໃດຢູ່ຕໍ່ໜ້າມັນ.
ທ່ານ Jim Holder ບັນນາທິການຂອງວາລະສານ Autocar ກ່າວວ່າ “ລະບົບລົດ Tesla ບໍ່ໄດ້ຮູ້ວ່າ ລົດບັນທຸກຄັນດັ່ງກ່າວຢູ່ຫັ້ນ. ພວກເຂົາເຈົ້າເວົ້າວ່າ ມື້ນັ້ນມັນແຈ້ງແສງແດດ ກ້າຫຼາຍ ທ້ອງຟ້າສີຄາມ ແລະທາງຂ້າງຂອງລົດບັນທຸກກໍເຫັນເປັນສີຂາວ ລົດ Tesla ຈຶ່ງສືບຕໍ່ຂັບໄປເລື້ອຍໆ.”
ບັນດານັກຊ່ຽວຊານ ກ່າວວ່າ ບໍລິສັດຜະລິດລົດ ຄວນຈະເຮັດໜ້າທີ່ໃຫ້ດີກວ່ານີ້ ໂດຍບອກເຕືອນຄົນຂັບກ່ຽວກັບຄວາມແຕກຕ່າງລະຫວ່າງລົດອັດຕະໂນມັດເຕັມສ່ວນ ກັບລົດອັດຕະໂນມັດພຽງບາງສ່ວນ.
ທ່ານນາງ Mary Cumming ຈາກ ມະຫາວິທະຍາໄລ Duke ກ່າວວ່າ “ຂ້າພະເຈົ້າຄິດວ່າ ຄວາມຮັບຜິດຊອບ ຂອງບໍລິສັດຜະລິດສຳລັບລົດເຄິ່ງອັດຕະໂນມັດ ກໍຄືຕ້ອງເຂົ້າໃຈ ວ່າ ຜູ້ຂັບທີ່ເປັນມະນຸດຈະເກີດມີຄວາມບໍ່ລະວັງໃນທັນທີ ແລະຖ້າວ່າ ລົດຄັນໃດຫາກມີ ຄວາມສາມາດໃນຂອບເຂດຈຳກັດ ໂດຍສະເພາະໃນຈຸດທີ່ເບິ່ງບໍ່ເຫັນ ຢູ່ເທິງຮາຍເວນັ້ນ ໜ້າທີ່ກໍຈະຕ້ອງແມ່ນບໍລິສັດຜູ້ຜະລິດເປັນຜູ້ແກ້ໄຂບັນຫາ.”
ລົດເຄິ່ງອັດຕະໂນມັດທັງຫຼາຍ ຈະສາມາດຂັບໄດ້ຢູ່ເທິງຮາຍເວ ດ້ວຍຄວາມໄວສະໝ່ຳສະເໝີ ຢູ່ໄລຍະຫ່າງທີ່ປອດໄພຈາກລົດຄັນອື່ນໃຊ້ຄັນຫ້າມແລະຄັນເລັ່ງ ແລ້ວແຕ່ ຄວາມໄວ ຊ້າຂອງການຈະລາຈອນ ແລະແມ່ນແຕ່ການປ່ຽນເລນ ແລະຂັບກາຍລົດຄັນອື່ນໆທີ່ແລ່ນຊ້ານັ້ນ ກໍເຮັດໄດ້.
ແຕ່ວ່າ ພວກນັກຊ່ຽວຊານ ເຊັ່ນທ່ານ Tim Caron ຊຶ່ງໄດ້ບອກກັບ VOA ຜ່ານທາງ Skype ວ່າ ການຄຳນວນບອກວ່າ ກ່ອນລົດອັດຕະໂນມັດເຕັມສ່ວນຈະອອກມາໃຫ້ໃຊ້ ມັນກໍຈະກິນເວລາອີກ ປະມານນຶ່ງທົດສະວັດ.
ທ່ານ Tim Caron ຈາກມະຫາວິທະຍາໄລ Notre Dame ກ່າວວ່າ “ພວກເຮົາຈະເຫັນວ່າຈຳນວນອຸບບັດເຫດ ແລະການບາດເຈັບລົ້ມຕາຍຈະເພີ້ມຂຶ້ນ ໃນຂະນະທີ່ລົດອັດຕະໂນມັດເລີ້ມແລ່ນອອກມາສູ່ທ້ອງຖະໜົນ. ແຕ່ວ່າ ເມື່ອເຖິງຈຸດໃດຈຸດນຶ່ງ ມັນກໍຈະຫຼຸດໜ້ອຍລົງ. ແລະເວລາແນວໂນ້ມທີ່ລົດນ້ອຍລົງນັ້ນ ເຮົາ ກໍຈະຮັບຮູ້ເຖິງ ຜົນປະໂຫຍດຂອງມັນ.”
ໃນປະຈຸບັນນີ້ ເກືອບວ່າ ບໍລິສັດຜະລິດລົດຍັກໃຫຍ່ທັງຫຼາຍ ແມ່ນກຳລັງພັດທະນາລົດອັດ ຕະໂນມັດທັງໝົດ ທັງສຳລັບລົດບັນທຸກນຳ ແຕ່ ພວກນັກຊ່ຽວຊານທັງຫຼາຍເຫັນພ້ອມນຳ ກັນວ່າ ມັນຈະລົງຮອດຖະໜົນຫົນທາງຊ້າໄວຊໍ່າໃດ ມັນກໍຂຶ້ນຢູ່ກັບສາຍຕາຂອງປະຊາຊົນ ກ່ຽວກັບຄວາມປອດໄພຂອງມັນ.
